OLHOGHONHAẠN AḌIGHAẠGH OLỌ ARUGHUNOTU
Ilọ Ophamaghạn Oghạgh Olhoghi
Eeni anhịr obobọ olom anạ kụ aghaạph iyaạr dị repin olhoghi anạ, kụ nạ akparaghạ ophamaghạn oghạgh olhoghi anạ. Kuolọ anhịr obobọ olom mọ anạ aḅilẹ ghụn bịn raapuruyogh nyinạ iboom asipuru loor esi dị amiịn mọ repin esi anạ. Kụ ipẹ phọ eḍighi iyaạr dị oghạgh olhoghi phọ anạ alhegheri abụgh. Ika kụ idị nạ katue apamaghạn oghạgh olhoghi anạ eeḍiạn aḍọl phọ aḍiẹn phọ?
Iyaạr dị ewạ mọ legheri
Oghạgh olhoghi rakọm ghan ezẹgh. Owaaghị omiịn mọ e/pamaghạn oghạgh olhoghi rekọm ghan BP, ezẹgh ekpom, ooḅaghamiạn aloor, ḅilẹ reḍighi ghan iyaạr dị eḍien oye re/dạph ghan. Oghạgh olhoghi rakọm ghan kẹn e”naanị, iboom iitughiạn, aḍizu oye phọ esiighi, rekọn ghan kẹn ezẹgh aḍighaạgh r’aḍuwol. Epẹ kụ iyaạr phọ aBaibul phọ aḅẹm bọ mọ: “Kporiọn raghaạgh ighạgh ilhoghi . . . , idị eḍighi bọ rekọm ghan ghụn oḍighima iyaạr.”—Psalm 37:8, igẹ dị edi ude.
Oḅoronom ighạgh ilhoghi ketue kẹn ni ekọm iiḅaghamị. Ighạgh ilhoghi dị oḅoronom etọl idiphọ ezẹgh dị aaghiạn ologhi aloor oye phọ. Esi omaạm, ketue ni eḍighi iyaạr dị nạ ka/ḍuom mun oye phọ olhoghi ḅilẹ nạ aḍaghạ yogh ghan. Odọ uwaloor phọ ophọn phọ katue ni aḍighi idị kekparanaạn nyinạ orolạn olom obobọ anhịr phọ anạ, bịn ekọm iiḅaghamị siphẹ apinien phọ.
Idị nạ kaḍighi
Pogh ghan amiịn imạ araagharạ olom obobọ anhịr phọ anạ. Gẹ alhọgh esi iraạr araagharạ opọ r’anạ aalhạn bọ dị ekạr eḅeraạn nyinạ. Bịn odị aḅilẹ aḍighi nyinạ iyaạr dị repin esi anạ, tuutughiạn ghụn ilọ imạ araagharạ phọ odị. Iphẹn phọ ketue ni eloghonaạn nyinạ ḍighaạgh ophamaghạn oghạgh olhoghi phọ anạ.
Aḍinị olhogh dị odi siphẹ aBaibul phọ: “Kụ ingọ ghan ni ḍisẹph.”—Kolosị 3:15.
Moọgh eegharạ osạr ghan owilenaạn. Eḅẹl phọ, kparaghạ ghan ophogh araraạr eten phọ epẹ anhịr obobọ olom mọ anạ aphogh bọ. Iphẹn phọ keloghonaạn nyinạ ḍighaạgh omhoọgh oniin phọ olhoghoma phọ—aBaibul phọ akol mọ “igbiririph.” (1 Pita 3:8) Ipẹ reten kụ apuruan loor anạ mọ, ‘Iyaạr phọ mị atuạn bọ kụ aghạgh olhoghi ebụgh iboom dị mị ka/tue asạr abilenaạn ḍughụm?’
Aḍinị olhogh dị odi siphẹ aBaibul phọ: “Eḍighi iyaạr dị enighẹ . . . Ophogh ogunụm iyaạr ophin-ologhi.”—Proverbs 19:11.
Sighẹ ghan magheel r’eyoghoyoghọ eten kụ aghaaphọm ipẹ nạ aloghoma bọ. Ḍighinom ghan ekpo onhụ phọ “Mị.” Esi omaạm, kparipẹ roḅẹm ghan mọ, “Nạ ra/ḍeenaan ghan ogbolomaam mem dị nạ imị u/mạgh uḅenị ekpisi lọ nạ rakị,” ḅẹm ghụn mọ, “Ologhi amị ra/pọ ghan mem dị mekpereghian kụ mị u/legheri ekpisi lọ nạ rakị.” Oḅaạm ikpo onhụ dị eyoghoyoghọ keloghonaạn nyinạ ḍighaạgh ophamaghạn oghạgh olhoghi.
Aḍinị olhogh dị odi siphẹ aBaibul phọ: “Oghaaph phọ anyina adụgh ghan aḅilẹ aroor weye.”—Kolosị 4:6.
Lher ghan rurụ angọ r’eten olhọgh eegu. Nạ roghaạph ipẹ edi bọ olhoghi anạ, meera ghan anhịr obobọ olom mọ anạ aghaạph aani iyaạr. Mem dị anhịr obobọ olom mọ anạ roghaạph omadạn, kụ akparaghạ oghaạph aani ipẹ dị aghaạph bọ, ophogh mughumọ nạ akạr ri anaghanạn ipẹ dị aghaạph bọ. Oopho olher arurụ ongọ bịn ketue ni eloghonaạn nyinạ ḍighaạgh ophamaghạn oghạgh olhoghi.
Aḍinị olhogh dị odi siphẹ aBaibul phọ: “Torobọ oye anuụn ghan ni anaghanạn, aaḅeghiọn ghan ikpo oghaạph kụ aghaạph.”—Jems 1:19.