Adạm r’Iv U/naghanhạn Enhaạn

Ḍiniin aḍio mem dị oginha Iv bịn kụ odi, ekarạph iyaạr iḅaanhaạn ni nyodị, kụ epuru mọ: ‘Iduọn phọ ni mọ Enhaạn o/mheera mọ ile iimhumha atorobọ oreeny?’ Iv aphagharanhaạn mọ: ‘Enhaạn aḅẹm mọ yoor otue ni ole iimhumha atorobọ oreeny epel nyoniin bịn. Odị aḅẹm mọ yoor komugh ni eḍighi maạr dị yoor olhe eemhumha oreeny phọ opọ phọ.’ Ekarạph iyaạr phọ iḅenhị anhịr phọ mọ: ‘Nạ ka/mugh. Nạ alhe eemhumha phọ, nạ katọl ghụn idiphọ Enhaạn.’ Ipẹ ekarạph iyaạr phọ eḅenhị bọ Iv etu ni inẹ? Eeye, okpẹ ni. Kuolọ Iv amheeraam ni. Iduọn Iv amhiigh bọ ophogh eemhumha phọ okanhanhaam, bịn ephụ nyodị okụ eemhumha phọ olhe. Odị alhe ni eemhumha oreeny phọ kụ angọ aani Adạm. Kụ ghalhamọ r’iduọn Adạm alhegheri bọ mọ bidị komugh ni eḍighi maạr dị bidị u/naghanhạn aJehova, odị alhe ni eemhumha phọ.

Ḍiniin phọ aḍio phọ aḍiphẹ phọ, aJehova aḅaanhaạn ni Adạm r’Iv kụ apuru olhegheri iyaạr phọ eḍighi bọ kụ bidị u/naghanhạn bọ nyodị. Adạm aḅẹm mọ Iv kụ aḍighi, kụ Iv aḅẹm mọ ekarạph iyaạr phọ kụ iḍighi. Loor iduọn Adạm r’Iv u/naghanhạn bọ aJehova, aJehova aphorogh ni bidị siphẹ oghoony phọ, kụ aseere ruukpaạny r’elhool eghạm dị reeghiraan ghan siphẹ eḍighom oghoony phọ. Odị aḍighi iduọn phọ pidị Adạm r’Iv ko/ḅula siphẹ oghoony phọ.

AJehova aḅilhẹ ni aḅẹm mọ koliọm ni opọ agbạ bọ okpẹ phọ aḅenhị Iv. Okarạph ookpaạny kụ aḅaanhaạn ghan bọ Iv, ke/karạph iyaạr phọ odị amhiịn bọ. AJehova o/lhẹm dị arakarạph araraạr keḅaanhaạn ghan we. Ookpaạny phọ opọ phọ asighẹ ekarạph iyaạr phọ aḍighinhom ookelheghi Iv. Okol ookpaạny phọ opọ phọ mọ aSetan r’Eru. Ghisigh, aJehova kapiemhi ni Setan, pidị odị kaa/kelheghi mun we.