Ogbogo Ịiḅereghi

Mem mọ a Mozis ạrol bọ ẹpe Ẹeḅaraph ạ Sạịnạị, a Jehova ạḅenhi Mozis ọlhogh ogbogo dị awe phọ Izrẹl kọki ghan ọoḅereghi nyọdi. Kụ ughol esi phọ mọ ogbogo ịiḅereghi. Bịdi kotue ghan ni okpooghi ogbogo phọ ọpam mem dị bịdi rọḍua.

A Jehova ạḅenhi Mozis mọ: ‘Ḅẹnhi we phọ mọ bịdi osogh rạraar dị kọsighe ọloghom ogbogo ịiḅereghi phọ.’ Awe phọ Izrẹl usogh ni sigol, silva, ọgiata, ịma ikpo dị ẹmhan mạar ḅịlhe r’ịnme. Bịdi ụḅilhe ni osogh ịyegheyeghe arukpe, ruzu ịnham ḅịlhe r’ịnhon ịbadi ạraraar. Bịdi usogh ni rạraar phọ r’ophooph olhoghi dị tụtu a Mozis ạḅenhi bịdi mọ: ‘Mẹkasian ni! Kẹ́sighe mụn ịnhon ạraraar etumhom.’

Ịbadi alhephiri r’ạnmariir dị ọmhoogh sịghalhanya ụlhoghonhaan ni ḍịghaagh ọlhogh ogbogo ịiḅereghi phọ. A Jehova ạngo ni bịdi ọsu olhoghi oḍighinhom oḍighi phọ. Abuniin ạbidi ulho ghan iri, ọkolhogh rukpe, kụ ọḅilhe olho ghan rạraar dị keḍighi ịdi arukpe phọ kẹnighe ọdamaghi. Ạbunhon ụsighe ghan ịma ikpo phọ ra gol phọ oḍighinhom oḍighi kụ ạbunhon ọsighe ghan ireeny ọkaam rạraar.

Awe phọ ụlhogh ogbogo ịiḅereghi phọ eten phọ ẹpe a Jehova ạḅenhi bọ bịdi ọlhogh phọ. Bịdi ụkol li ịma ukpe dị kọsighe odiom Dọl Iigbia phọ rạ Ẹphan phọ. Sịphe Ẹphan phọ kụ ẹdi igbe ịyo phọ ẹrol ghan, kụ ụkaam oreeny akesia ra a gol. Sịphe Ạdol Iigbia phọ useere ọmheremhiom ọtozi dị oḍighinhom gol. Ụḅilhe ni oseere ịdaabilhi r’ẹkpan dị kọsu ghan ịnsẹns. Erugh ogbogo ịiḅereghi phọ useere ni bạfu dị oḍighinhom ọgiata ḅịlhe r’enmeny ạrikia. Igbe ịyo phọ ịitughianham ghan we phọ Izrẹl ịlo oguan phọ bịdi oguan bọ a Jehova ọnhaghanhan ọdi. Nạ alegheri ni ịyaar dị ịyo eru? Eḍighi oguan dị ạgbatanhaan.

A Jehova ạsaḅar Erọn r’ạnmuny ọdi okumuan ịsiphe ogbogo ịiḅereghi phọ ịdipho ạbupinyon rịkia. Bịdi kụ kopogh ghan ogbogo ịiḅereghi phọ ọḅilhe ọpinyon ghan rịkia ọngo a Jehova. Oginha Erọn aḍighi bọ uwo ẹmhu ạbupinyon rịkia phọ bịn kụ katue aḍigh sịphe Ẹphan phọ. Ọdi aḍigh ghan sịphe phọ mem lhạ ọphighiron ẹkia ịlo ịkaraph ọdi, eghun otu phọ ọdi, r’ịlo eelhe phọ Izrẹl.

Awe phọ Izrẹl ọḅua bọ Ijipt, ạlha bịn kụ iten kụ ọlhogh bọ ogbogo ịiḅereghi phọ. Nyịidipho, bịdi mọmhoogh esi ọghi ghan ọoḅereghi a Jehova.

A Jehova aḍeenhaan ni mọ ọdi ạsighe ni ogbogo ịiḅereghi phọ kụ ạḅilhe aḍighi ịdi eekpoogh ọotu ẹrol ạnyu ogbogo ịiḅereghi phọ. Mem dị ạbuo Izrẹl phọ ọmhiin mọ eekpoogh ọotu edi ni sịphe ạnyu ogbogo ịiḅereghi phọ, bịdi ụrol ghan ni sịphe amarugh phọ ạbidi. Kụolo mem dị eekpoogh ọotu phọ ephooph, bịdi ulhegheri ghan ni mọ amem omhiigh erelhe phọ mẹteeny. Kụ bịdi okpooghi ogbogo ịiḅereghi phọ omiigh ọdaph eekpoogh ọotu phọ.