A Jonạtạn Ạkpo Oḅio Kụ Ạḅilhe Ạḅar Devid

A Jonạtạn kụ ọḅel ọony Uwo Ẹmha phọ Sọl. Kụ ọdi aḍighi ophelhegbe ẹgham dị ạkpo oḅio. A Devid ạḅem mọ a Jonạtạn akem apu uga ạḅilhe ạmoogh ịnyaam apu idimini ḅụagu. Ḍiniin aḍio, a Jonạtạn ạmhiin ni 20 awe ẹgham a Filistia ạnyu ẹeḅaraph, kụ ạḅenhi ọony phọ rạpam ghan bọ rạraar ẹgham mọ ọdi mọ: ‘Yira kozuom ni bịdi eḍighi mạar dị a Jehova ụngo iyira eḍeenhaan. Eḍighi mạar dị awe a Filistia phọ ụḅenhi iyira mọ itu ẹphen, pọ eḍeenhaan mọ a Jehova kaḍighi ni ịdi yira kọkpar opu bịdi.’ Mem mọ awe a Filistia phọ ọmhiin bọ bịdi, ụlo mọ: ‘Itu ẹphen obe!’ Ịyal phọ ạbidi ụsiiny ni ẹeḅaraph phọ kụ ọkpar opu we phọ.

Loor ịduon a Jonạtạn aḍighi bọ ọḅel ọony ạ Sọl, ọdi kụ muḍighi uwo ẹmha mem dị ạ Sọl amhugh. Kụolo a Jonạtạn alhegheri ni mọ a Jehova mạsaḅar Devid oḍighi uwo ẹmha mem dị ạ Sọl amhugh. Ghạlhamo r’ịduon phọ, ọdi ọ́mhoogh ẹḍim ọghi esi a Devid. Ịyal phọ ạbidi uḍighi ghụn igbogh ạrighiri dị tụtu oghiran ịyo dị oniin kakoph nyoniin. Oḍeenhaan mọ bịdi ạrighiri, a Jonạtạn ạngo Devid ạsuoma, elhool ẹgham, kụmhugh r’okuughaam ukpe ọdi.

Mem mọ a Devid aghiil bọ asuma loor esi ạ Sọl, a Jonạtạn ạghi ni ạteeny nyọdi kụ ạḅenhi mọ: ‘Kákiilhaan, kpọ oḅio. A Jehova mạsaḅar nyịnha oḍighi uwo ẹmha. Kụ ghạlhamo r’ọde phọ ạmhi bịn alegheri ni ịphen phọ.’ Kẹḅeraan ni nyịnha ọmhoogh ọyaghiri dị ạrol ịdipho a Jonạtạn ḍụghum?

Ịbadi amem, a Jonạtạn ạlhogh ni ghuḍum ọdi esi ooto r’osooromhinheen oghoph ọyaghiri phọ ọdi. A Jonạtạn alhegheri ni mọ Uwo Ẹmha phọ Sọl, aḍighi bọ ọde ọdi, rạwa ghan oghiigh a Devid. Esi ịduon phọ ọdi ạḅenhi ọde phọ ọdi mọ: ‘Keḍighi ni ịkaraph eḍighi mạar dị nạ aghiigh Devid, loor esi dị ọdi nyịnha kőḍighi ghan ịkaraph.’ Ịpe phọ iḍighi ni ịdi ạ Sọl ạghagham olhoghi Jonạtạn. Ịyal ikpo ạsia reten, bịn ạ Sọl ra Jonạtạn omhugh erugh ẹgham.

A Jonạtạn amhugh bọ, a Devid ạwa ni ọony a Jonạtạn dị oghol mọ Mefibosẹt. Kụ mem mọ ạmhiin bọ, ọdi ạḅenhi Mefibosẹt mọ: ‘Loor ịduon ọde phọ ạna aḍighi ghan bọ ogey ọyaghiri ạmhi, mị kaphogh ni nyịnha oomo aghuḍum mọ ạna. Nạ kạtol r’ạmhi sịen otu phọ ạmhi kụ ịyal ayira ole ghan eḍien eniin esi.’ A Devid ówulha ni bịn Jonạtạn ọyaghiri phọ ọdi.