A Josạyạ Ạphomhoghian Olhogh Phọ Ẹnhaan

A Josạyạ ạmhan ọphaanya ạsia mem mọ oḍighi bọ nyọdi uwo ẹmha. Mem mọ ạmuphe phọ, awe phọ a Judia rọoḅereghi ghan ịkaanheen ạrumhugh kọḅilhe oḍighi iiḍighi ịkaraph aruwaloor. Mem dị ọdi ạmhan 16 ạsia, ọdi ạwa ni olhegheri eten phọ ẹpe a Jehova rạwa bọ mọ ọoḅereghi nyọdi. Kụ ọdi rọmhan 20 ạsia bịn amhiigh oḅomoghi ịkaanheen ạrumhugh r’arenmeny ạrikia phọ ẹrol bọ Izrẹl. Kụ ọdi rọman 26 ạsia bịn aakolhobian oselhemhi otu ịiḅereghi phọ a Jehova.

Mem mọ roselhemhi bọ otu ịiḅereghi phọ, a Hịlkạyạ, aḍighi bọ uwo ẹmhu ạbupinyon rịkia phọ ạmhiin ni ḍikpooghinheen ạḍinya phọ ọge bọ iilhogh phọ a Jehova. Eeni a Mozis r’aloor kụ ạge ḍikpooghinheen ạḍinya phọ ạḍien phọ. A Sefạn aḍighi bọ ọgeeghia uwo ẹmha phọ ạsighe ni ḍikpooghinheen ạḍinya phọ ạghi aḍeenhaan a Josạyạ kụ ạḅilhe ạal iilhogh phọ ạḅenhi nyọdi. A Josạyạ ạnhaghan bọ iilhogh phọ, ọdi alhegheri ni mọ awe phọ rọ́oḅereghi ghan a Jehova esi ịbadi ạsia. Esi ịduon phọ, Uwo ẹmha phọ a Josạyạ arom ni mọ ọghi ọḅenhi a Hịlkạyạ mọ: ‘A Jehova mụghagham iyira olhoghi. Kịa ạteeny oyil ạnhir phọ Họldạ ạwaaghi alhegheri ịyaar dị yira koḍighi.’ Dị eego esi a Họldạ, a Jehova ạḅenhi ni bịdi mọ: ‘Awe phọ a Judia mụwilhe ịmhi. Esi ịduon phọ, mị kạliom ni bịdi kụolo mị kạ́liom bịdi sịen uwo ẹmha phọ Josạyạ rạtooghi bọ. Loor esi dị ọdi asooromhi ni loor kụ ạwa olhegheri ịpe olhogh phọ rạkaaph bọ pịdi ạtuugh aako.’

Mem mọ ọḅenhi bọ Uwo ẹmha phọ Josạyạ ịpe a Jehova ạghaaph bọ, ọdi ạmhagh ni oomo awe phọ a Judia mọ ọghi sịphe otu ịiḅereghi phọ. Sịphe phọ, ọdi ạal li iilhogh phọ a Jehova amiteom. Kụ a Josạyạ r’awe phọ a Judia oguanhaan a Jehova mọ bịdi kooko ni oomo iilhogh phọ ọdi r’oomo ekpom ạbidi.

Mem mọ ạmuphe phọ, awe phọ a Judia kólhe Ẹyaal Ọphel Otenhe phọ esi ịbadi ạsia. Esi ịduon phọ, mem mọ a Josạyạ ạal bọ sịphe olhogh phọ kụ ạmhiin bọ mọ a Jehova ạto mọ olhe ghan Ẹyaal Ọphel Otenhe phọ tọrobo ạlha, ọdi ạḅenhi ni we phọ a Judia mọ: ‘Yira kole Ẹyaal Ọphel Otenhe phọ ịdipho a Jehova ạto bọ.’ A Josạyạ aakolhobian ni rịkia dị kọpinyon ọngo a Jehova r’awe dị kọmoor ghan sụor sịphe otu ịiḅereghi phọ. A Josạyạ rọman iikolhobian phọ, kụ awe phọ a Judia ole Ẹyaal Ọphel Otenhe phọ r’ Ẹyaal Ạ Brẹd Phọ Yist Rọ́logh Ghan Bọ esi ọphaanya aḍughul otu. Emhiigh k’amem mọ ạ Sạmụẹl kụ ẹteeny mem mọ ạmuphe phọ, awe phọ Izrẹl kólhe ghan Ẹyaal Ọphel Otenhe dị ẹrol ịduon phọ. A Josạyạ ạtuugh ghan ni aḍighi ịpe olhogh phọ Ẹnhaan ạghaaph bọ. Nạ rạwa ghan ni ọtuugha ịlo a Jehova ọbughe ḍụghum?