Uwaloor Iigbia Phọ Asoorom Kọnịlịọs

Oniin ọnyo ẹgham ọlo a Rom ạrol li Sịsạriạ dị oghol mọ Kọnịlịọs. Oomo awe a Ju phọ ụlhogh ghan ni nyọdi eegu. Ọdi anmo ghan ni ruunmo rukulhom mọ r’awe dị ekuom. Ạ Kọnịlịọs akumu ghan a Jehova kụ ạaḅereghi ghan ẹgba gbạ amem. Ḍiniin aḍio, ọokpaany Ẹnhaan amitenhaan ni ạ Kọnịlịọs kụ ạḅenhi nyọdi mọ: ‘Ẹnhaan mạnaghan ni ịiḅereghi phọ ạna. Tom awe ọghi ọmhagh Pita, ọdi odi ẹmha dị oghol mọ Jọpạ.’ Mem mem mọ bịn ạ Kọnịlịọs arom ịraar awe mọ ọghi Jọpạ, erelhe dị ẹmhan ni 30 itobi.

Ẹpe Jọpạ, a Pita ạmhiin ni uḍien. Sịphe uḍien phọ ọdi ạmhiin ni ịnham kịrokiro dị ạbuo a Ju phọ rọ́ba ghan. Kụ ọokpaany Ẹnhaan ạḅenhi nyọdi mọ ạa ịnham mọ. Kụolo a Pita ómheera, ọdi ạḅem mọ: ‘Mị kạ́any ghan ịnham dị ị́ḅaal.’ Kụ ọokpaany phọ ạḅenhi nyọdi mọ: ‘Kạ́ḅem mọ ịnham mọ ịphen phọ ị́ḅaal. Loor esi dị Ẹnhaan maḍighi ịdi mẹḅaal.’ Mọony amem, Ẹnhaan ạḅilhe ni ạḅenhi Pita mọ: ‘Ịraar awe ọmeera ni ọnhu aḍibuo ạna. Kịa ạdaph bịdi.’ Kụ a Pita ạghi ạteeny we phọ apuru ịyaar phọ bịdi ọtuan bọ oru. Awe phọ ụḅenhi nyọdi mọ: ‘Ạ Kọnịlịọs, aḍighi bọ oniin ọnyo ẹgham a Rom kụ urom iyoor mọ yoor utu. Ọdi ạḅem mọ yoor utu ụmhagh nyịnha oru olhoghi otu ọdi ẹpe Sịsạriạ.’ A Pita ạmhagh ni we phọ ạlhogh otu, kụ rẹḅaal bịn a Pita r’ạbunhon ạbumatuan ọdaph we phọ onyeenhe Sịsạriạ.

Mem dị a Pita asi kạ Kọnịlịọs, ạ Kọnịlịọs akpuḍian ni ghisigh a Pita. Kụolo a Pita ạḅenhi nyọdi mọ: ‘Mẹera! Mị oye ịduon ạna. Ẹnhaan kụ ụḅenhi ịmhi mọ mị utu k’ạna, ghạlhamo r’ịduon awe a Ju phọ róḍigh ghan bọ ilhoghi aruutu awe dị úḍighi bụo a Ju. Ụḅenhi ịmhi ịyaar phọ nạ ạtuan bọ arom mọ mị utu.’

Ạ Kọnịlịọs ạḅenhi ni Pita mọ: ‘Inya aḍughul otu ẹpe ọmhan mem dị mị rạaḅereghi, ọokpaany Ẹnhaan ụḅenhi ni ịmhi mọ mị utom oru ọmhagh nyịnha. Seseeny ụtughemhi iyoor ikpo ọnhu phọ a Jehova.’ A Pita ạḅenhi nyọdi mọ: ‘Mị mạmhiin mọ Ẹnhaan ọ́phomhoghian eniin eelhe bịn. Ḅịlhe mọ ọdi rạsighe ghan ni tọrobo oye dị rạwa ọoḅereghi ọdi.’ Kụ a Pita ạtughemhi bịdi ịbadi ạraraar ịlo a Jizọs. Ịduon ọdi rạtughemhi bọ bịdi bịn uwaloor iigbia phọ asoorom Kọnịlịọs r’oomo awe phọ odi bọ olhoghi otu ọdi, kụ oḍiinye bịdi mụum.