A Jizọs Ạsaḅar Sọl

Ụmhar Sọl ẹmha a Rom dị oghol mọ Tạsọs. Ọdi aḍighi ọnyo ạ Fạrisi dị ạtuugha iilhogh a Ju. Ọdi ạlhogh ni kẹn ḍien Krịsten phọ kụ ạghi ghan ilhoghi aruutu ạbidi asiphi ghan nmạriir r’alhephiri dị oḍighi Krịsten kụ ạlhogh ikoli. Ọdi ạmheera ni ọgbal ạmhiin mem mọ oroḅol bọ ikpo oghiigh oniin ọnyo ạmatuan ạ Krạịst dị oghol mọ Stivin.

Ghạlhamo r’ịduon ạ Sọl masiphi bọ ni Krịsten dị odi Jeruselem, ọdi ạwa ni ọḅilhe ọghi ịnhon arikpisi osiphi ạKristen phọ. Ọdi ạḅenhi ni uwo ẹmhu ạbupinyon rịkia phọ mọ amheera ọdi ạghi Dạmạskọs asiphi Krịsten phọ odi bọ ẹpe phọ. Mem dị ạ Sọl matuman ẹmha phọ, aḍiboom ạḍiḅaal isoorom ni nyọdi, kụ ọdi ameel. Ọdi ạnaghan ni ẹḍogh dị epuru nyọdi mọ: ‘Sọl, eeghe kụ iḍighi kụ nạ rụgbiphoghom bọ ịmhi?’ Kụ ạ Sọl apuru mọ: ‘Nạ ạnhian?’ Kụ ẹḍogh phọ ẹphagharanhaan mọ: ‘Mị a Jizọs, kịa Dạmạskọs, kọḅenhi ni nyịnha ịyaar dị nạ kaḍighi.’ Mem mem mọ bịn ạ Sọl eten ọ́miin mụn, kụ ọpham nyọdi ọghi osiemhi Dạmạskọs.

Oniin ọnyo ạKristen ạrol li Dạmạskọs dị oghol mọ Ạnạnạyạs. Kụ a Jizọs ạḅenhi Ạnạnạyạs dị eego esi uḍien mọ: ‘Kịa olhoghi otu a Judas odi bọ eten dị oghol mọ Oseleeny, ạwa oye dị oghol mọ Sọl.’ Ạnạnạyạs ạḅenhi Jizọs mọ: ‘Uwo ẹmhoogh, mị alegheri ni oye phọ ọphon phọ. Ọdi oye dị rasiphi ghan bụmatuan phọ ạna kạlhogh ikoli!’ Kụolo a Jizọs ạḅenhi nyọdi mọ: ‘Kịa ni ạteeny nyọdi. Mị mạsaḅar nyọdi ọghaaph iiḅi ịinhaghan phọ olheenye ịbadi areelhe.’

Esi ịduon phọ, Ạnạnạyạs ạghi ni ạwa Sọl ạmhiin, kụ ạḅenhi nyọdi mọ: ‘Sọl umor ạmhi, a Jizọs kụ ụḅenhi ịmhi mọ mị utu uḍighi ịdi nạ kạmiin eten.’ Mem mem mọ bịn ạ Sọl amhiigh ọmhiin eten. Ụtughemhi ni nyọdi ịlo a Jizọs kụ ọdi aḍighi aani oniin ọnyo ạmatuan. Ọdi roḍiiny mụum ịdipho oniin ọnyo ạKristen, kụ amhiigh ọghaaph iiḅi ịinhaghan phọ sịphe arubughotu phọ r’ạbueripho ạKristen phọ. Kụ iḍighi ni iikia esi awe a Ju phọ ọmhiin dị ạ Sọl rạtughemhi we ịlo a Jizọs. Ịphen phọ iḍighi ni ịdi awe phọ opuru mọ: ‘Ọphon kőye phọ asiphi ghan bọ bụmatuan phọ a Jizọs ạlhoghoḍi ikoli?’

Esi ịraar ạsia, ạ Sọl ạrol li Dạmạskọs ạghaaph ghan iiḅi ịinhaghan phọ, kụ awe a Ju phọ ọlhogh nyọdi ḍien kụ ọwa oghiigh. Kụolo ạbumatuan phọ a Jizọs ọrol bọ ẹpe phọ ụnhaghan ni ịpe awe phọ rọwa bọ oḍighi phọ kụ ọlhoghonhaan Sọl ḍịghaagh dị kasuma. Bịdi ụlhogh ni nyọdi loor egunhum, kụ osoore ude dị eego esi epogh dị ẹrol iikpe ẹmha phọ.

Ạ Sọl ạghi ni Jeruselem kụ ạkparagha oḍighan ạbumatuan phọ ọrol bọ ẹpe phọ, kụolo bịdi ughiilhaan ni nyọdi. Esi ịduon phọ, oniin ọnyo ạmatuan dị oghol mọ Bạnạbạs ạghi ni ạsighe Sọl aḍeenhaan butelhedom mọ kụ ạḅenhi bịdi rạraar dị ẹma emiteom mọ ạ Sọl mạkar ri anmia. Ạ Sọl ạrol li ookpomhoghan phọ ạrol bọ ẹpe Jeruselem amhiigh ọghaaph iiḅi ịinhaghan phọ r’oophugh. Ẹsighe rẹki, bịn omhiigh ọmhagh ghan ọdi mọ ạ Pọl.