Bịdi Úmeera Mọ Ịyaar Esophoghom Bịdi

Ọnhu aḍibuo otu ịiḅereghi phọ, oniin oye dị kátue atelhe ạrol ghan ni sịphe phọ ạlhomian ghan. Ḍiniin aḍio dị ạ Jọn ra Pita rọki otu ịiḅereghi phọ, oye phọ ạḅenhi ni bịdi mọ: ‘Iseseeny, ịngo aani ịmhi ịyaar.’ A Pita ạḅenhi ni oye phọ mọ: ‘Ịyaar dị mị ạmhoogh ọngo ạna ẹnighe epu ikpoki. Esi aḍien phọ a Jizọs, ḅetenhu arelhe!’ A Pita ạpham ḍịghaagh oye phọ kụ ạlhoghonhaan nyọdi ḍịghaagh ọmheera, kụ oye phọ amhiigh orelhe. Aḍita awe phọ ọmhiin bọ ịiḍaany phọ ịphen phọ ụmhoogh ni ibo kụ ịbadi awe omheeraam Jizọs.

Kụolo ạbupinyon rịkia phọ r’ạbuo ạ Sạdusi phọ ọnhaghan bọ ịphen phọ ụghagh ni olhoghi. Kụ osiph bịdi ọghi osiemhi risigh ikpolhom awe phọ osoph ghan bọ ịiruen, kụ opuru bịdi mọ: ‘Ạnhian kụ ịngo bọ inyinha ịikpo ookonhom oye phọ ọphon phọ?’ Kụ a Pita ạphagharanhaan mọ: ‘A Jizọs Krạịst phọ nyinha eghiigh bọ kụ ụngo iyoor ịikpo phọ.’ Ikpolhom awe phọ ụlo mọ: ‘Kẹ́kaaph mụn ịlo a Jizọs!’ Kụolo abutelhedom mọ ụḅenhi bịdi mọ: ‘Yoor ọmoogh ọghaaph ịlo ọdi. Yoor kọ́bilhe ni bịn.’

Ịduon oseere bọ Pita rạ Jọn, bịn bịdi ọghi ọteeny bụeripho ạbumatuan phọ kụ ọḅenhi oomo ịpe emite bọ. Kụ oomo phọ ạbidi ọoḅereghi kụ ọlhom a Jehova mọ: ‘Seseeny, ụngo iyoor ạkpo oḅio pịdi yoor ọkiom ghisigh oḍighi oḍighi phọ ạna.’ A Jehova ạngo ni bịdi uwaloor iigbia phọ ọdi, kụ bịdi ọghiom ghisigh ọghaaph ghan iiḅi ịinhaghan phọ ọḅilhe ookonhom ghan we. Ịphen phọ iḍighi ni ịdi ạbunhon awe ọḅilhe omheeraam Jizọs. Awe ạ Sạdusi phọ ụghagh ni olhoghi kụ ọḅilhe osiph butelhedom mọ ọlhogh ikoli. Kụolo ḍughul phọ ạḍiphe phọ, a Jehova arom ni ọokpaany ọdi kụ ạghi aghughuron eghuugh otu ikoli phọ, kụ ạḅenhi butelhedom mọ, mọ: ‘Ịḅilhe ẹghi ẹpe otu ịiḅereghi phọ ẹtughemhi we phọ.’

Rẹḅaal ḍịroor bịn abukoriom otu ikoli phọ ọḅenhi ikpolhom awe phọ roogbo ghan bọ ịiruen phọ mọ: ‘Awe phọ nyinha ẹlhogh bọ ikoli phọ momiteghu, kụolo ọkasi ni eghuugh otu ikoli phọ!’ Sịphe phọ ọnhon oye ạḅenhi ni we phọ mọ: ‘Awe phọ ạbuen phọ odi ẹpe otu ịiḅereghi phọ rọtughemhi ghan we phọ!’ Bịdi ụḅilhe ni osiph butelhedom mọ ọsighe ọghimom risigh ikpolhom awe phọ roogbo ghan bọ ịiruen. Sịphe phọ uwo ẹmhu ạbupinyon rịkia phọ ạḅenhi ni bịdi mọ: ‘Yoor ụto ni ịḅenhi inyinha mọ kẹ́kaaph mụn ịlo a Jizọs!’ Kụolo a Pita ạphagharanhaan mọ: ‘Yoor kọnaghanhan ịto Ẹnhaan kpạripe r’ịto awe.’

Ịphen phọ ịghagh ni ilhoghi ikpolhom awe phọ kụ ọwa ọze abutelhedom mọ. Kụolo ọnyo ạ Fạrisi dị oghol mọ Gạmelịẹl ạmheera ni kụ ạḅenhi bịdi mọ: ‘Imiigha loor anyinha! Eeni Ẹnhaan odi ni r’awe phọ ạbuen phọ. Nyinha ẹkar ri rẹwa ee elhebiri ọghi esi Ẹnhaan?’ Ikpolhom awe phọ ụnaghanhan ni oromha phọ ọdi kụ ọgurogh butelhedom mọ kụ ọḅilhe ọphur bịdi rụru mọ kụ́kaaph mụn ịlo a Jizọs. Kụolo abutelhedom mọ ụghiom ni ghisigh ọghaaph ghan iiḅi ịinhaghan phọ r’ạkpo oḅio ẹpe otu ịiḅereghi phọ r’ilhoghi aruutu awe phọ.