Uwaloor Iigbia Phọ Asoorom Bụmatuan Phọ

A Jizọs agheel bọ ẹpe k’ạke phọ, ḍioph aḍughul otu bịn kụ iten bịn uwaloor iigbia phọ asoorom bụmatuan phọ ọdi. Aḍio phọ ạḍiphe phọ iḍighi ḍio ẹyaal ạ Pẹntịkọst, lhạ phọ 33 C.E., kụ awe dị ọḍua rikpisi kịrokiro moru Jeruselem olhe ẹyaal phọ. Ạbumatuan a Jizọs dị ookpomhoghan oniin otu ạnyu rọki ni ọman 120. Kụ ekperenhom bịn ẹekia ịyaar imite ni sịphe osoph phọ. Ịyaar dị ẹghigh nem ạnian imite ni ẹmhu ạtorobo ọnyo ạmatuan phọ, kụ omhiigh ọḅa ạrunhu kịrokiro. Kụ oghur dị ạghigh oboom ookuugh amuza sịphe otu phọ bịdi ọrol bọ.

Mem dị aruuruen phọ ọḍua bọ kịrokiro arikpisi oru Jeruselem ọnhaghan oghur phọ, bịdi ughiil li ọghi sịphe otu phọ ọmhiin ịyaar phọ remite bọ. Kụ iḍighi ni iikia esi ạbidi ọnhaghan dị ạbumatuan phọ rọḅa rụnhu kịrokiro. Esi ịduon phọ, bịdi ụḅem mọ: ‘Awe phọ ạbuen phọ ạbuo ạ Gạlili. Uḍighi ika kụ bịdi otue bọ rọḅa rụnhu phọ ayira?’

Mem mọ ạmuphe phọ, a Pita r’ạbueripho abutelhedom mọ ụmeregha ni ghisigh egu awe phọ kụ a Pita ạḅenhi we phọ ịpe oghiigh bọ Jizọs r’ịpe a Jehova aḅeton bọ nyọdi ạngo ghuḍum. Ọdi ạḅilhe ni ạḅenhi we phọ mọ: ‘Nyịidipho a Jizọs ạtol ḍịghaagh elhiom Ẹnhaan ẹpe k’ạke phọ kụ muukuom iyoor uwaloor iigbia phọ ọdi aguanhaan bọ. Ọpo kụ ịyaar phọ nyinha ẹmhiin bọ ịiḍaany phọ ịphen phọ.’

Ịpe a Pita ạghaaph bọ itir ri we phọ, kụ bịdi opuru mọ: ‘Yoor koḍighi eeghe nyịidipho?’ Kụ ọdi ạphagharanhaan mọ: ‘Ikiton esi ịkaraph phọ anyinha, kụ eḍiiny mụum esi aḍien phọ a Jizọs bịn kịngo aani ni inyinha uwaloor iigbia phọ.’ Awe dị oḍiiny mụum ḍio phọ ạḍiphe phọ rọki ni ọmhan 3,000 awe. Kụ emhiigh mem mọ ạmuphe phọ kụ rẹki, awe dị okiton oḍighi bụmatuan a Jizọs ụbugh ghan bịn. Rọlhoghonhaan ạḍighaagh uwaloor iigbia phọ, abutelhedom mọ umiteom ni rookpomhoghan pịdi bịdi otue ọtughemhi bumhoom ạbumatuan phọ a Jizọs rạraar phọ ịpe a Jizọs mạto bọ.