Awe Areelhe Kịrokiro Ụmhoogh Ni Omheeraam

Abutelhedom mọ a Jizọs ụghaaph ni iiḅi ịinhaghan phọ olheenye sịen aḅirinhi phọ ịdipho a Jizọs ạḅenhi bọ bịdi. Lhạ phọ 47 C.E., abutelhedom mọ ọrol bọ Ạntịọk urom ni Pọl rạ Bạnạbạs ọghi ọghaaph iiḅi ịinhaghan phọ ịnhon arikpisi. Ạ Pọl rạ Bạnạbạs roophugh ụghi ni Esia Mạịnọ (nyịidipho olhegheriom bọ mọ Turkiye) ogbeelhom iiḅi ịinhaghan phọ ẹpe Daabi, Listra rạ Ạịkonịọm.

Ạ Pọl rạ Bạnạbạs ụghaaph ni iiḅi ịinhaghan phọ ọḅenhi tọrobo oye mụghumo uwo ekulhom ọbobo ọolha. Kụ ịbadi awe omheeraam igey phọ ịlo ạ Krạịst. Mem dị ạ Pọl rạ Bạnạbạs rọkaaph iiḅi ịinhaghan phọ kọḅenhi opoghom ạ Sạịprọs dị oghol mọ Sạjos Pọlọs, oniin oye idike ạwa ni oḍighi ịdi oye phọ kạ́naghan. Esi ịduon phọ, ạ Pọl ạḅenhi ni oye idike phọ mọ: ‘A Jehova kạlhiom ni nyịnha.’ Mem mem mọ bịn, oye phọ ọ́mhiin mụn eten. Ịpe emite bọ iḍighi ni ịdi opoghom mọ amheeraam iiḅi ịinhaghan phọ.

Ạ Pọl rạ Bạnạbạs ụghaaph kẹn ni iiḅi ịinhaghan phọ tọrobo ekpisi lọ bịdi kọmiin we. Emhiigh ẹpe ilhoghi aruutu phọ kụ esi ilhoghi aḍighi, reten, r’ịsiphe arubughotu phọ. Mem dị ạ Pọl rạ Bạnạbạs ookonhom oye dị rátelhe ghan ẹpe Listra, awe phọ ọmhiin bọ ịiḍaany phọ ụsighe mọ bịdi ạrumhugh kụ omhiigh ọoḅereghi ạbidi. Kụolo bịdi úmeera, ụḅenhi ghụn we phọ mọ: ‘Iiseeny oginha Ẹnhaan! Yoor oopho awe bịn.’ Ẹsighe rẹki bịn abuniin awe a Ju oḍighi ịdi aḍita awe phọ ọghagham Pọl olhoghi, kụ oroḅol nyọdi ikpo. Mem dị ọsighe mọ ạ Pọl mamhugh, ụghogh ni nyọdi omiteom ẹmha phọ. Mem mem mọ bịn abumor phọ ọrol bọ ẹpe phọ ọghi ọsighe Pọl oḅulhemhi ẹpe ẹmha phọ. Kụ ạ Pọl ạḅilhe aḅula Ạntịọk.

Lhạ phọ 49 C.E., ạ Pọl ạḅilhe ni ạghi ịnhon arikpisi ọghaaph iiḅi ịinhaghan phọ. Ọdi ạḅilhe ni aḅula Esia Mạịnọ ọmhiin abumor phọ. Ịpe reten kụ ọdi ạghi reelhe dị edi Europe, ịdipho a Filipạị rạ Tẹsạlonạịkạ ạghaaph iiḅi ịinhaghan phọ. Ọdi ạghi kẹn ni Ạtẹns r’ịnhon arikpisi. Awe dị ọdaph aani nyọdi pọ ạ Sạịlạs, Luk, r’ọḍoogh ọony dị oghol mọ Timoti. Bịdi umiteom ni imhoom arookpomhoghan kụ ọḅilhe ọkparamhi bumor phọ. Ạ Pọl ạrol li Kọrịnt lhạ r’ạpakiri kụ ạkparamhi bumor phọ. Ọdi agbeelhom ni iiḅi ịinhaghan phọ, ạtughemhi we phọ, kụ ạḅilhe ạge rịnya ạghiom rookpomhoghan kịrokiro. Ọdi aḍighi ghan oḍighi ọkolhogh arukpe dị kọloghom rogbogo. Ẹsighe rẹki kụ ạghi Ẹfẹsọs, kụ ạḍua sịphe aḅula Ạntịọk.

Lhạ phọ 52 C.E., ạ Pọl ạḅilhe ni ạghi ịnhon arikpisi ọghaaph iiḅi ịinhaghan phọ omhunhenhiom ịraar amem. Ọdi ạḍua ni Esia Mạịnọ ạghi ịnhon arikpisi. Ạ Pọl ạrol li Ẹfẹsọs esi ịbadi ạsia ạtughemhi ghan, aakonhom we lọ úmoon kụ ạḅilhe ạlhoghonhaan ḍịghaagh ookpomhoghan phọ. Ọdi ạghi ghan kẹn ni esi dị ọrol ghan ọtughemhi we, ạngo ghan rạghaaph tọrobo aḍio. Ịbadi awe ụnhaghan ni rạghaaph phọ ọdi kụ onmia. Ịpe reten kụ ọdi ạḅilhe ạghi Filipạị, kụ ạḅua sịphe asi Kọrịnt. Kụ mem dị ọdi rọghaaph iiḅi ịinhaghan phọ ịbadi arikpisi, kụ aḅula Jeruselem.