Aḍinyạ Dị Aloor Phọ Repogh Bọ Ogẹ

Buuḅi Abumor r’Abumaranhi:

Idiphọ awe dị rooḅereghị ghan aJehova, yira opomhoghiạn ni Ekpo onhụ phọ odị, Baibul phọ. Mem dị yira aạl Baibul phọ, yira romiịn ghan ni mọ aJehova apomhoghiạn ni omhạr awe. ABaibul phọ aḅilhẹ rungọ ghan iyira iiḅakiọm orolhọm. Yira oḅilhẹ kẹn ni omiịn mọ ilọ aBaibul phọ aghaạph, retuụgh ghan ni kemite. (Psalm 119:105; Luk 1:3; 1 Jọn 4:19) Esi iduọn phọ, riphụ ghan ni iyira oḅenhị aani abunhọn imạ araraạr phọ yira motuughạ bọ siphẹ aBaibul phọ. Pọ kụ iyaạr phọ Aloor Phọ Repogh Bọ momiteom bọ ḍinyạ phọ aḍiẹn, “Araraạr Ituughạ Dị Edi Baibul.” Yoor uḅenhị nyinhạ iphurukpu araraạr ilọ aḍinyạ phọ aḍiẹn.

Ookolhobianhaan ibạm anmụny ḍinyạ phọ aḍiẹn phọ. Toroboiperolbọ, kotue ni osighẹ otughemhiọm torobọ oye dị rawạ obughẹ olhegheri iyaạr phọ odị ilọ aBaibul phọ. Loor iduọn aBaibul phọ aḍighi bọ ḍinyạ dị ogeanhaạn torobọ oye, dị iikia i/lo yira komoọgh ni suọ r’oḅaạl olhoghi mem dị yira ooḅeghiọn raraạr phọ edi bọ siphẹ phọ.

Aḍinyạ phọ aḍiẹn phọ egbon ipẹ aBaibul phọ aghaạph bọ ilọ olhẹm mọ r’ipẹ Enhaạn kamunhenhi bọ rigbiom mọ odị ghisigh. Ulhọgh ni inyaạm omhiịn mọ araraạr phọ ogẹ bọ siẹn aḍinyạ phọ eegholhaan ni eḅilhẹ edugh onhaghanhạn, dị edaphạn mem mọ araraạr phọ emiteghu bọ siphẹ aBaibul phọ.

Aḍinyạ phọ aḍiẹn phọ i/kaạph raraạr dị emite siphẹ aBaibul phọ bịn. Ipẹ ogẹ bọ r’asifoto phọ edi bọ kilhoghonhaạn iyira ḍighaạgh omhiịn araraạr r’olhoghoma aani eten phọ epẹ awe phọ orọl bọ mem mọ amuphẹ phọ olhoghoma bọ.

Aḍinyạ phọ aḍiẹn phọ kilhoghonhaạn iyira ḍighaạgh omhiịn mọ aBaibul phọ aḍighi ḍinyạ dị eghaạph ilọ awe dị onhaghanhạn aJehova r’awe dị nyodị u/naghanhạn. Kụ iphẹn phọ kinyu iyira otuughạ araraạr esi ipẹ emitenhaan bọ bidị. (Rom 15:4; 1 Korịnt 10:6) Aḍinyạ phọ aḍiẹn phọ emoọgh 14 asiikpịgh. Emhiighom atorobọ ekpịgh, okaạph ghan ni iniin araraạr dị yira kotuughạ ekpịgh phọ.

Aburudẹ r’aburunhiin kotue ni obạl esi ituughạ phọ kụ oḅilhẹ ooḅeghiọn sifoto phọ r’obumoọny phọ abidị. Ipẹ reten, kụ ebạl riisi aBaibul phọ okpasị bọ esi ituughạ phọ. Burudẹ r’aburunhiin, iloghonhaạn ḍighaạgh obumoọny phọ anyinha omhiịn mọ ipẹ nyinha retughemhị bọ nyodị edi siphẹ aBaibul phọ. Kotue kẹn ni osighẹ eniin phọ eten phọ oḍighinhom mem dị rologhonhaạn ḍighaạgh bunhọn awe onhaghanhạn aBaibul phọ.

Yoor oḍuom ni olhoghi mọ aḍinyạ phọ aḍiẹn phọ keloghonhaạn ni ḍighaạgh torobọ oye lọ amhoọgh eeḅi ekpom otuughạ Ekpo onhụ phọ Enhaạn kụ oḅilhẹ osighẹ oḍighinhom ipẹ odị ratuughạ bọ. Iphẹn phọ keḍighi iyaạr dị bidị kotue omiigh ooḅereghị aani aJehova bịn oḍighom aani pakirị eghunotu phọ odị.