Orophomhi Asighalhanyạ Phọ Ayira epẹ Erugh phọ​—Omhiighom Imạ Araghaạph Dị Kemiteom Eepoogh Ongọ Ogbaanhaạn

AJizọs arue ni angọ ogbaanhaạn anhịr olọ aSameria phọ mem dị u/gu, loor esi dị odị amhiigh oḅaanhaạn anhịr phọ. Ika kụ idị yira kotophomhi ḍighalhanyạ phọ ayira eten omhiighom ghan oḅaanhaạn awe?

• Sighẹ ghan eten arighirị kụ aḅaanhaạn oye lọ nạ ateẹny. Ghalhamọ r’iduọn aloọr mekporokporọ bọ ni, aJizọs amiighom oghaạph phọ esi olhọm amuụm ophughọl. Iduọn phọ pọ nạ katue ni amiighom ḍimhạgh, kụ agbi oghaạph enhọn iyaạr, eeni ilọ aḍio phọ erọl, eeni ilọ amoto dị u/nuụn utu, obobọ iyaạr dị purukụ emite. Legheri mọ, eḅẹl iyaạr phọ pọ oghaaphạn oye phọ, kụ iḍighi kụ, kaạph iyaạr dị keḍạ ḍiḅeraạn odị. Eḍighi maạr lọ odị u/megheron, p’ooḅaghamị o/lho. Kparaghạ oḅilhẹ oghaaphạn onhọn oye bịn. Kụ alhọm aJihova akpọ olhoghi.​—Ne 2:4; Iiḍ 4:29.

• Gon ghan omhiịn aroopoogh oghaạph iiḅi iinhaghạn phọ, kuolọ ka/kpạgh raghaạph phọ. Eḍighi idị oghaạph phọ kayọ. Loor esi dị nạ akpạgh, keḍighi idị oye phọ ka/naghạn mun. Ki/pin esi anạ eḍighi maạr lọ araghaạph phọ ayinha esi eekunha mem lọ nạ k/ongọ ogbaanhaạn. Eḍighi maạr lọ nạ rakiilhaan ghan oghaạph iiḅi iinhaghạn phọ mem dị u/gu, pọ tuughạ oḅaanhaạn ghan awe, ghalhamọ nạ ra/wạ ni ongọ ogbaanhaạn. [Pegh kụ eḅilhẹ eghaạph 1 avidio phọ.]

• Mem lọ nyinha rekaạph, nạ katue ni amiteom eepoogh ongọ ogbaanhaạn, esi oghaạph iyaạr ilọ omheeraam m’anạ dị keḍighi idị oye phọ kapuru ḍipuru. AJizọs aḅạ ikpo onhụ dị enyu anhịr phọ opuru asipuru. Kụ ophagharanhaạn phọ odị aḍighi oghaạph iiḅi iinhaghạn phọ. [Pegh kụ eḅilhẹ eghaạph omhunhenhiom 2 avidio phọ, ipẹ reten kụ eḅilhẹ ephegh, kụ eghaạph ilọ amhunhenhiom 3 avidio phọ.]