ORỌL GHAN ADỌL ONYỌ AKRISTẸN
‘Ikparamiọm ni Ologhi APọl kụ Asẹph Enaạn’
Mem mọ ookpomoghan phọ epẹ Rom onaghạn bọ mọ aPọl odi eten dị ratu, urom ni bumor dị orelhe 64 itobi oghị oteẹny odị. Ika kụ idị ephomoghiạn osighẹ aloor ophighironọm ekiạ phọ abidị etir Pọl? “APọl amiịn bọ bidị, ikparamiọm ni ologhi odị kụ asẹph Enaạn.” (Iiḍ 28:15) Obọ ulegheriom Pọl idiphọ oye dị rakparamị ghan rookpomoghan lọ aghị, kuolọ nyiidiphọ odị aḍighi bọ onyọ ikoli phọ, odị ghụn kụ edị rokparamị.—2Kọr 13:10.
Rodon abupoghom eghir roḍuạ ghan ookpomoghan kogbạ ookpomoghan okparamị abumor r’abumaranhi phọ. Idiphọ atorobọ ebenẹ Enaạn, eeni amem rooḅaghamhiạn ghan ni loor, k’oḅonyonhu ozuan ḅilhẹ aloor k’edugh. Mem lọ opoghom eghir phọ r’anhịr odị oḅilẹ oru ookpomoghan anyina, nạ kaḍighi ika ologhonaạn aḍighaạgh okparamị ologhi abidị, pidị ‘omeeraam mọ anạ r’opọ abidị aloghonaạn ḍighaạgh oomo phọ anyina’?—Rom 1:11, 12.
Bakị aani rukumuan epẹ erugh phọ. Rekparamị ghan ni opoghom eghir phọ mem dị abukaaphọm ophighirọn rikiạ omooghọm aani asuọ dị amunughan wiki arukumuan phọ agbatanaạn bọ. (1Tẹs 1:2, 3; 2:20) Tuutughiạn okọy aani eten opọ ekula amem mọ unwanyụ eru phọ odị. Nạ katue ni angọ aani ḍien anạ orelhean odị r’anhịr odị epẹ erugh phọ obobọ apạm onyọ abidị akị apoghom oye dị nạ ratughemị ghan Baibul ḍughụm? Bidị rokelọm ghan ni orelhean atorobọ okaaphọm, ghalamọ r’abuẹn purukụ omiigh aani bọ ḅilẹ r’abuphẹ u/kạr bọ u/legheri ilọ oghaạph.
Kọ ghan igoni. Nạ katue ni angọ aani bidị esi ominạ ghan obobọ eḍien olhe? Iphẹn phọ keḍeenhaan opoghom eghir phọ r’anhịr phọ odị mọ nạ apomoghiạn ni bidị. Bidị u/wạ iboom araraạr.—Luk 10:38-42.
Naghanạn kụ asighẹ aḍighinom iiḅakiọm r’oroma. R’ephomoghiạn, opoghom eghir phọ ruloghonaạn ghan iyira ḍighaạgh omiịn idị yira kokị ghisigh siphẹ arukumuan phọ ayira r’aJihova. Eeni amem, kewạ ni mọ odị uḅaạm iyira. (1Kọr 5:1-5) Rengọ ghan ni nyodị ibo mem lọ yira onaghanạn oḅilẹ osooromi loor.—Hib 13:17
Ḍeenhaan Osereghiạn. Ḅenhị opoghom eghir phọ r’anhịr phọ odị idị eru phọ abidị eloghonaạn nyinạ ḍighaạgh. Nạ katue ni akị ateẹny bidị r’aloor obobọ agẹ ḍinyạ akiọm.—Kọl 3:15.