Sighẹ Sividio Aḍighinhom Mem Dị Nạ R’atughemhị Oye Baibul

Araraạr dị romiinhọm riḍien reḍạ ghan ḍiḅeraạn opọ ramiịn bọ onaghanhạn ḅilhẹ r’ootughiạn ipẹ odị atuughạ bọ. Okaraghị Ogbogh Otomoghiom mọ ayira, aJihova, asighẹ ni raraạr dị romiinhọm riḍien aḍighinhom otughemhiọm araraạr dị emhạn maạr. (Ge 15:5; Jer 18:1-6) Ogbogh Otughemiạ phọ aJizọs aḅilhẹ kẹn ni aḍighinhom. (Mat 18:2-6; 22:19-21) Eniin iyaạr omiinọm ariḍien dị mekạr elhoghonaạn ḍighaạgh sisiạ phọ iphẹn pọ asividio. Nạ asighẹ ni r’aḍighinhom sividio phọ otughemhiọm abuphẹ nạ ratughemhị ghan bọ Baibul phọ ḍughụm?

Ḍioph asividio kụ edị m’omiteom olhoghonaạn ayira ḍighaạgh otughemhiọm araraạr ituughạ phọ edi bọ siphẹ abrosọ phọ: Good News From God! Torobọ avidio phọ akpasị ghan ḍiniin siphẹ asipuru phọ ogeọm bọ ikpakara ikpo phọ edi bọ siphẹ abrosọ phọ. Opọ odi bọ olhoghi intanẹt ajw.org phọ aḅaramaạm riisi dị keḍeenhaan ghan mem lọ ekpẹ ophegh avidio phọ. Opumhom isiẹn, ipherị phọ asividio phọ eḅaramaạm raraạr dị edi siphẹ arinyạ itughemhị phọ edi bọ siphẹ Igbe Araraạr Osighẹ Otughemhiọm Mọ Ayira.

Nạ ratughemhị ni emhuoghaạph aBaibul dị eeni kekparanaạn nyopọ nạ ratughemị bọ onhaghanạn ḍughụm? Obobọ eḍighi ni idị opọ nạ ratughemhị ghan bọ asoman ipaanaạn ḍughụm? Wạ siphẹ asividio phọ edi bọ jw.org/abn/r’aJW Broadcasting® omhiịn odị kaloghonaạn nyodị ḍighaạgh. Eeni opọ nạ ratughemhị ghan bọ r’anạ etue ni epogh vidio phọ kụ eḅilhẹ eeḅeghiọn.

Torobọ unwanyụ, romiteom ghan ni imoom asividio. Mem lọ nạ aphogh, tuutughiạn ghan ipẹ nạ katue bọ asighẹ aḍighinom olhoghonaạn aḍighaạgh bunhọn mem lọ nạ ratughemhị bidị.