Obakị Ilhioghọm AZihova Reḍeenhaan Ghan Ephomhoghiạn

Rokoph ghan ookpomhoghan phọ mem dị ophorogh oye, eḅilhẹ kẹn eḍighi eten olhiọm opọ apiomạn bọ. (1Kọr 5:6, 11) Mem dị yira obakị ilhioghọm mọ aZihova, yira roḍeenhaan ghan ephomhoghiạn. Uḍighi ika kụ oḅẹm bọ iduọn phọ mem dị ophorogh oye rekọm ghan eephinha kengọ oye phọ, siya, ikumor awe phọ osoph bọ ooruẹn phọ ḅilhẹ r’abunhọn awe?

Esi inhọn araraạr, yira roḍeenhaan ghan ephomhoghiạn aZihova, esi oghel oopụ aḍien phọ odị kụ omhaghamhị maạr raraạr dị eḅaạl esi odị. (1Pit 1:14-16) Yira roḍeenhaan ghan kẹn ephomhoghiạn opọ ophorogh bọ. Ghalhamọ r’idiphọ igbagarạ ilhioghọm repin ghan bọ ni, ketue ni eḍighi idị oye kamuum “iimuma eephọ [aḅilhẹ adọl] dọl aruukuan.” (Hib 12:5, 6, 11) Yira rosophoghom ghan ilhioghọm aZihova mem dị yira ooḍikuan ghan r’opọ mophorogh bọ obobọ mamheel bọ aḅuạ siẹn igey phọ. Ka/bula mọ aZihova raliọm ghan we phọ odị “kasiemhi esi dị ekasiạn.” (Jer 30:11) Iduọn yira robakị bọ ilhioghọm mọ aZihova, oḅilhẹ roḍighi raraạr okparamhiọm omheeraam mọ ayira, yira rogon ni omhiịn dị opọ phọ kaḅula ḍighaạgh Odẹ onmạ ighirigiir phọ ayira.—Isa 1:16-18; 55:7.

IPOGH VIDIO PHỌ TỌL DỌL OḄẠR R’EKPOM DỊ EMHUNHUGHAN, KỤ EPHANYANHAẠN SIPURU PHỌ EDAPHẠN BỌ SIẸN:

• 

  Eeghe eephinha kụ edị odẹ r’onhiin obumoọny dị awilhẹ aZihova rologhoma ghan?

• 

  Ookpomhoghan phọ kologhonhaạn ika ḍighaạgh buọ eghunotu phọ?

• 

  Eghẹn eḍeenhaan aBaibul kụ imạ emiteom mọ oḅạr aZihova kụ imhạn maạr epu oḅạr eghunotu?

• 

  Yira koḍeenhaan ika mọ yira oḅạr aZihova opu buọ eghunotu ayira?