Igbeelhom Dị Egbatanhaạn Ilọ Omhiighom Itughemhị ABaibul Unwanyụ ASeptember

Unwanyụ aSeptember, yira kolọgh ni iboom inyaạm oḅenhị atorobọ eghunotu ilọ itughemhị aBaibul phọ ayira kosighẹ bọ Kelhọm Ghuḍum K’agee-pọ! phọ kụ oḍighinhom. Abukaaphọm kotue ni osaḅạr okọy eten ekulha amem ongọ 30-awạ. Ika kụ idị koḍighi bọ oḍighi phọ ophọn?

• Siphẹ Eḅẹl Eghị phọ: Sighẹ opoḍi omhạn abrosọ phọ aḍaạm ḍiḅeraạn, kụ akparaghạ omhiighom ituughạ aBaibul. Ka/bula we dị moḍeenhaan ghan ni ḍiḅeraạn, eḅaramaạm bọ ni we dị nạ aḅula ghan ateẹny. Ghalhamọ u/meeraam ghan ni otuughạ aBaibul phọ, eeni emhoom eten itughemhị phọ ayira r’abrosọ phọ etue ni eḍạ ḍiḅeraạn abidị. Ka/seere brosọ phọ otu dị oye u/lo obobọ aloghọm olhoghi aletạ aseenhaan oye dị ko/ḍeenhaan ghan ḍiḅeraạn. Ekụ phọ Repogh ghan bọ Rukumuan epẹ Erugh phọ otue ni omiteom inhọn iikolhobian ilọ omite epẹ erugh phọ unwanyụ phọ ophọn phọ.

• Inhọn Aroopoogh: Eḍighi maạr dị ookpomhoghan phọ anyinha roḍighinhom ghan ni kạt, pọ ilọgh ni brosọ phọ Kelhọm Ghuḍum K’agee-pọ! Ḅenhị ni buphẹ rosighẹ bọ brosọ phọ ilọ ituughạ aBaibul phọ ikpoki ro/kpẹ bọ. Ḅenhị oye phọ ipẹ rotuughạ ghan bọ, obobọ guan oḍighi iduọn phọ enhọn amem. Opoghom arukumuan epẹ erugh phọ atue ni amạ bukaaphọm dị osilor oghị igbogh ariisi dị romuul ghan ḍighi dị edi ekool phọ oḅenhị awe phọ ilọ ituughạ aBaibul phọ. Nạ atue ni aḅenhị buọ otu oḍighi anạ ilọ ituughạ aBaibul phọ obobọ we dị nạ aghaạph oghaạph phọ aḅenhị mem dị u/gu.

AZizọs ungọ iyira itọ oghị ‘oḍighi awe bumatuạn,’ esi ‘otughemhị’ ghan abidị. (Mat 28:19, 20) Eḍighi idị igbeelhom mọ iphẹn phọ egbatanhaạn bọ kilhoghonhaạn iyira ḍighaạgh osighẹ Kelhọm Ghuḍum K’agee-pọ! phọ omhunhenhiom itọ phọ.