‘Ikị Oomo Areelhe Aḅirinhi Phọ Eḍighi We Bumatuạn Amhị’

1-2. Ookpaạny aḅenhị eeghe nmariịr phọ oghị bọ ophogh oḍi phọ aZizọs, ḅilhẹ aZizọs r’aloor aḅenhị aani eeghe nmariịr phọ?

ESOPH aḍiroọr aNisan 16, 33 C.E, r’oboom okururu ni, abuniin anmariịr dị rokiilhaan ghan Enhaạn ughị ni osi siphẹ oḍi phọ, siphẹ phọ aḍizu phọ aZizọs merọl bọ ni dị epel 36 awạ. Mem dị bidị oghị bọ osi siphẹ oḍi phọ r’arolo eeḅi eḍu kirokirọ dị ophamhạgh ogbul aḍizu phọ aZizọs, iḍighi ni iikia esi abidị omhiịn dị oḍi phọ m’apokoro! Kụ ookpaạny aḅenhị ni nmariịr phọ mọ moḅeton Zizọs siphẹ aḍuugh phọ, kụ aḅarạm mọ: “Odị raḍiemi ghan epẹ GaIiIi kụ okori anyina. Epẹ kụ edị nyina kemiịn nyodị.”—Mat. 28:1-7; Luk 23:56; 24:10.

² Mem dị anmariịr phọ oḍuạ bọ siphẹ oḍi phọ, aZizọs akạr ri amitenhaan bidị r’aloor kụ aḅenhị mọ: “Ikị eḅenị bumor phọ amị bidị oghị epẹ Galili. Epẹ kụ edị bidị kumiịn imị.” (Mat. 28:10) AZizọs akạr ri amhoọgh iyaạr dị emhạn maạr oḅenhị abutelhedom mọ odị, idị eḍighi bọ ephẹn kụ eḅẹl amem dị odị aakolhobian dị bidị komiinạn mem mọ odị aḅetenhu bọ esi aḍuugh phọ!

BUỌ ANHIẠN KỤ EDỊ ONGỌ BỌ ITỌ PHỌ?

3-4. Yira utụ eeghe kụ koḅẹm bọ mọ u/geanhaạn ogina abumatuạn phọ, itọ phọ edi bọ siphẹ Matiu 28:19, 20? (Miịn afoto oḅẹl opoḍi phọ.)

³ Bạl Matiu 28:16-20. Siphẹ bidị ookpomhoghan bọ, odị aghaạph ni amiteom okpanhạ oḍighi dị abutelhedom mọ odị koḍighi omuneni siphẹ oḅẹl okuron asiạ phọ, ḅilhẹ r’isiẹn amem mọ ayira. AZizọs aḅenhị bidị mọ: ‘Ikị oomo areelhe aḅirinhi phọ eḍighi we bumatuạn amhị, . . . etughemị bidị ooko oomo araraạr phọ mị atọ bọ iḅenhị inyina.’

⁴ AZizọs rawạ mọ oomo abumatuạn odị ogbeelhom ghan iiḅi iinhaghạn phọ. Odị o/ngọ itọ phọ iphẹn phọ 11 abutelhedom mọ bịn. Utụ eeghe kụ yira oḅẹm bọ iduọn phọ? Nạ ragbi mọ mem mọ aZizọs angọ bọ itọ phọ siphẹ eeḅarạph phọ, epẹ Galili, ogina 11 phọ bịn kụ urọl ḍughụm? Tuutughiạn mọ ookpaạny phọ aḅenhị nmariịr phọ mọ: “Epẹ [Galili] kụ edị nyina kemiịn nyodị.” Esi iduọn phọ yira kotue ni oḅẹm mọ anmariịr dị okpẹ oḍuomolhoghi urọl aani ni siphẹ odị rangọ bọ itọ phọ. Epel siphẹ, otelhedom mọ aPọl aganhanhamhi ni aḍeenhaan mọ aZizọs “amitenaan ḍita abuọ asiya dị opel [500] mem.” (1 Kọr. 15:6) Amitenhaan bidị eghẹn?

5. Yira omeeraam eeghe esi ipẹ ogẹ bọ siphẹ 1 Korịnt 15:6?

⁵ Yira omoọgh igey ariphigh otuạn omheeraam mọ aPọl aghaạph ghan ilọ amem mọ ookpomhoghan bọ siphẹ eeḅarạph phọ, epẹ Galili, ogẹ bọ siphẹ Matiu 28. Utụ eeghe kụ koḅẹm bọ iduọn phọ? Eḅẹl phọ, opol abutelhedom mọ aZizos uḍighi buọ aGalili. Esi duọn phọ, ikạr ekpeanhaạn orọl isiphẹ eeḅarạph phọ epẹ Galili—kparipẹ r’orọl olhoghotu oye epẹ Zeruselem—loor esi oolhoọgh awe phọ. Edị emhunhenhiom iyạl, aZizọs phọ ophọn oḅeton bọ mamitenhaan ni 11 abutelhedom mọ odị olhoghotu oye epẹ Zeruselem. Mughumọ aZizọs awạ ongọ itọ ogbeelhom iiḅi iinhaghạn phọ r’oḍighi awe bumatuạn phọ ogina abutelhedom mọ odị, obọ odị mungọ ni bidị itọ phọ epẹ Zeruselem kparipẹ roḅenhị anmariịr ephoph r’abunhọn mọ okori nyinọ epẹ Galili.—Luk 24:33, 36.

6. Ika kụ idị aMatiu 28:20 eḍeenhaan mọ itọ oghị oḍighi awe bumatuạn phọ igbolhomaam aani ni iyira ḍio arodon, kụ onhụ abạl awe dị olheeny ika kụ rodaphạn itọ phọ iphẹn phọ?

⁶ Ephigh dị emhunhenhiom iraạr. AZizọs o/ngọ itọ phọ iphẹn phọ Kristẹn oḅẹl okuron asiạ phọ bịn. Yira ulhegheri ika? AZizọs akureriom oghaạph phọ odị r’ikpo onhụ phọ eḅẹm bọ mọ: “mị odianaan ni r’anyina, ḍio etum ḍio tutụ eteẹny eekuna aḅirini phọ.” (Mat. 28:20) Oḍighi iphelhegbeel phọ makạr kụ aleeny elheeny ḍio arodon, idiphọ aZizọs aḅẹm bọ. Pogh aani aa! Awe dị romạn ni 300,000 kụ roḍiiny ghan muụm idiphọ Abugbaanhaạn AZihova torobọ alhạ, oḍighi aani abumatuạn aZizọs Kraist!

7. Yira kooḅeghiọn eeghe, kụ eeghe kụ iḍighi?

⁷ Ibadị rotuughạ ghan ni Baibul phọ koḍiiny muụm. Kuolọ abuniin odi ni dị yira rotughemhị ghan Baibul phọ dị rokiilhaan ghan oḍighi abumatuạn. Bidị rokelọm ghan ni ituughạ aBaibul phọ, kuolọ u/meera uḍiiny muụm. Oomo phọ ayira omhoọgh bọ we dị rotughemhị ghan Baibul, rowạ ghan ni olhoghonhaạn abidị ḍighaạgh obọ oḍighi aani bumatuạn aKraist. Emhuoghaạph phọ ephẹn phọ keeḅeghiọn idị yira kotue okaạph ghan idị ketir rokpom abuphẹ yira rotughemhị ghan bọ Baibul phọ, kụ opoph okị ghisigh. Eeghe kụ iḍighi kụ ekpẹ bọ ni dị yira kooḅeghiọn iphẹn phọ? Idị eḍighi bọ, eeni amem kewạ ni dị yira kosopha mughumọ yira kokiọm ni ghisigh otughemhị ghan oye phọ obobọ kobilhẹ.

KPARAGHẠ GHAN OTEẸNY EKPOM MỌ

8. Eeghe kụ iḍighi kụ rekpạr ghan bọ olhoghonhaạn aḍighaạgh buphẹ yira rotughemhị ghan bọ ophomhoghiạn aZihova?

⁸ AZihova rawạ mọ awe ooḅereghị nyodị loor ephomhoghiạn dị bidị omhoọgh oghị esi odị. Esi iduọn phọ, yira rowạ ghan olhoghonhaạn abidị ḍighaạgh dị bidị kolegheri mọ aZihova apomoghiạn ni bidị iboom aḅilhẹ amoọgh ogbolhomaam abidị. Yira rowạ oḍighi idị bidị komiịn aZihova idiphọ “odẹ abuphẹ aburudẹ u/lo bọ r’odị rakoph ghan rukpukele anmariịr.” (Ps. 68:5) Mem dị opọ nạ ratughemhị ghan bọ Baibul phọ amhiịn odọ idị Enhaạn aphomhoghiạn nyodị, kenyu ni nyodị ophomhoghiạn aani Enhaạn. Etue ni ekparanhaạn buniin abuphẹ yira rotughemhị ghan bọ Baibul phọ omhiịn aZihova idiphọ Odẹ ephomhoghiạn, loor esi dị odẹ phọ abidị o/ḍeenhaan bidị ephomhoghiạn r’amatir. (2 Tim. 3:1, 3) Esi iduọn phọ, kaạph ghan akparamhị imạ araagharạ phọ aZihova, mem dị nạ ratughemhị bidị Baibul. Loghonhaạn ḍighaạgh buphẹ nạ ratughemhị ghan bọ Baibul phọ olhegheri mọ Enhaạn ephomhoghiạn phọ ayira rawạ mọ bidị omhoọgh ghuḍum k’agee-pọ, kụ esi iduọn phọ, raloghonhaạn ghan ni bidị ḍighaạgh omhoọgh aghuḍum mọ akuẹn phọ. Eeghe kụ enhọn iyaạr dị ewạ mọ yira oḍighi?

9-10. Ighẹn arinyạ kụ edị yira kotughemhiọm ghan we Baibul, kụ utụ eeghe kụ ipẹ phọ kụ ekpẹ bọ otughemhiọm ghan?

⁹ Ḍighinhom “What Can the Bible Teach Us?” r’iḍiphẹ eḅẹm bọ mọ “How to Remain in God’s Love.” Arinyạ phọ iphẹn phọ riloghonhaạn ghan iyira ḍighaạgh oteẹny arokpom abuphẹ yira rotughemhị ghan bọ Baibul phọ. Esi omaạm, siphẹ aḍinyạ phọ What Can the Bible Teach Us? Emhuoghaạph phọ 1 epanyanhaạn sipuru dị eḅẹm mọ: Does God care about us or is he cruel?, How does God feel when people suffer?, ḅilhẹ r’aḍidị epuru mọ, Can you be Jehovah’s friend? Kokaạph aani ika ilọ aḍinyạ phọ Remain in God’s Love? Aḍinyạ phọ aḍiẹn phọ reloghonhaạn ghan ḍighaạgh opọ rotughemhị bọ onhaghanhạn ipẹ odị kasighẹ bọ aḍighinhom sinị iilhogh aBaibul dị kenighemhị ghuḍum odị eḅilhẹ eḍur nyodị etumeriom aZihova. Ghalhamọ nạ matughemhị ni rinyạ phọ iphẹn phọ bunhọn awe, maạr ghan ni aakolhobian kụ agbi oghị otughemhị oye, obọ nạ alhegheri okạr ipẹ egbolhomaam bọ opọ nạ rakị bọ otughemhị phọ.

¹⁰ Kokaạph ika eḍighi maạr dị oye phọ nạ ratughemhị ghan bọ rawạ olhegheri oghaạph dị u/lo siphẹ arinyạ phọ edi bọ siphẹ Igbe Araraạr Otughemhiọm mọ ayira? Eḍighi idiphọ, pọ nạ atue ni aḅenhị opọ nạ ratughemhị ghan bọ mọ akori aạl ḍinyạ phọ ephạm bọ oghaạph phọ ḍiọ odị, obọ engọ nyinhạ eepoogh osighẹ arinyạ phọ ookpomhoghan phọ oḅẹm bọ kụ otughemhiọm ghan oye phọ.

11. Pụr amem kụ edị ewạ mọ omhiigh oḅarạm ghan iiḅereghị siphẹ ituughạ phọ, kụ ika kụ idị yira kotue ologhonhaạn ḍighaạgh opọ yira rotughemhị bọ omhiịn mọ iiḅereghị emạn ni maạr?

¹¹ Iiḅereghị ghan kụ egbi omhiigh ituughạ phọ. Ibadị amem, renighẹ ghan ni onhuụn oḅarạm iiḅereghị siphẹ ituughạ phọ lọ edugh ni, eḍighi maạr dị mophighi ni ituughạ aBaibul phọ. Ewạ dị yira kologhonhaạn ḍighaạgh oye phọ yira rotughemhị ghan bọ olhegheri mọ uwaloor iigbia phọ Enhaạn bịn kụ katue aḍighi idị yira konaghanhạn ituughạ phọ. Abuniin abumor romiteom ghan oghaạph iiḅereghị phọ esi aạl aJems 1:5, eḅẹm bọ mọ: “Onyọ anyina lọ u/moọgh olegheri iyaạr [alhọm Enhaạn].” Kụ opuru opọ rotughemhị bọ mọ; “Ika kụ idị yira kotue bọ olọm Enhaạn ongọ ayira osụ olhoghi?” Bịn eeni opọ odị ratughemhị ghan bọ mamheera m’ooḅereghị.

12. Ika kụ idị nạ kasighẹ Psalm 139:2-4 aḍighinhom, olhoghonhaạn aḍighaạgh oye dị nạ ratughemhị ghan Baibul onhighemhị eten iiḅereghị phọ odị?

¹² Tughemhị oye phọ ilọ ooḅereghị ghan. Ḅenhị ni nyodị mọ aZihova aakolhobian ni onhaghạn iiḅereghị phọ odị eḍuạ bọ k’ekpom kụ emite. Ḅenhị ni nyodị mọ odị katue ni akaạph torobọ iyaạr aḅenhị aZihova siphẹ iiḅereghị phọ odị.—ghalhamọ r’iyaạr dị odị ka/mighirom akaạph aḅenhị oye. Idị eḍighi bọ aZihova alegheri ni oomo iitughiạn ayira. (Bạl Psalm 139:2-4.) Yira otue kẹn ni oḅenhị opọ yira rotughemhị ghan bọ mọ alhọm aZihova olhoghonhaạn odị ḍighaạgh onme iitughiạn r’araagharạ dị i/kpeanhaạn. Esi omaạm, oye dị ratuughạ ghan Baibul phọ atue ni amoọgh ḍiḅeeraạn akị esi olhe ghan arayaạl dị aBaibul phọ aghel. Obọ odị alegheri ni mọ i/kpeanhaạn, kuolọ eḍighi iyaạr dị odị rakelhọm ghan oḍighi. Miigha loor aroma nyodị mọ odị aḅenhị aZihova ipẹ dị alhoghoma bọ, bilhẹ mọ odị alhọm aZihova olhoghonhaạn odị ḍighaạgh obọ odị aphomhoghiạn ghan ipẹ iḅeeraạn bọ aZihova bịn.—Ps. 97:10.

13. (a) Eeghe kụ iḍighi kụ ewạ bọ ni mọ omhạgh aani ghan buphẹ yira rotughemhị ghan bọ Baibul phọ oru aani ghan ituughạ, lọ edugh ni? (b) Ika kụ idị yira kotue oḍighi kụ kedughanhaan buphẹ yira rotughemhị ghan bọ Baibul phọ ooḍikuan awe mem lọ oru aani ituughạ?

¹³ Kaa/binyemhiom ghan omhạgh aani opọ nạ ratughemhị ghan bọ Baibul phọ oru aani ituughạ. Araraạr phọ ipẹ opọ nạ ratughemhị ghan bọ Baibul phọ amhiịn bọ aḅilhẹ anhaghạn epẹ otu ituughạ phọ, ketue ni eloghonhaạn nyodị ḍighaạgh okumu aZihova. Ḍeenhaan nyodị vidio phọ, Eeghe Kụ Remite Ghan Siphẹ aKindọm Họl phọ? kụ amhạgh nyodị eten eenyuụm odạph aani anạ oghị ituughạ. Kpeanhaạn ni ikpoki okoọm eten lọ edugh ni. Renighẹ ghan ni ophạm abukaaphọm kirokirọ mem dị nạ rakị otughemhị oye phọ Baibul. Iduọn phọ, keloghonhaạn ḍighaạgh opọ nạ ratughemhị ghan bọ Baibul phọ olhegheri aani abunhọn awe siphẹ ookpomhoghan phọ, bịn medughanhaan nyodị ooḍikuan awe mem lọ aru aani ituughạ.

LOGHONHAẠN ḌIGHAẠGH NYOPỌ NẠ RATUGHEMHỊ GHAN BỌ BAIBUL PHỌ OPHOPH OGHỊ AGHISIGH

14. Eeghe kụ ketue enyu oye dị rotughemhị ghan Baibul okparamhị asiya phọ odị r’aZihova?

¹⁴ Aḍiigbu ayira pọ olhoghonhaạn aḍighaạgh buphẹ yira rotughemhị ghan bọ Baibul phọ okparamhị asiya phọ abidị r’aZihova. (Efẹ. 4:13) Oye lọ amheeraam otuughạ aBaibul phọ ramoọgh ghan ni ogbolhomaam ilọ ipẹ aBaibul phọ kaloghonhaạn bọ nyodị ḍighaạgh. Kuolọ idiphọ ephomhoghiạn phọ odị esi aZihova rebụgh bọ, bịn odị mamhiigh ootughiạn aani idị odị kaloghonhaạn aani ḍighaạgh bunhọn epẹ erugh phọ, r’abuẹn isiẹn ookpomhoghan phọ. (Mat. 22:37-39) Mem lọ ekpeanhaạn, ka/bilhẹ oḅenhị aani opọ nạ ratughemhị ghan bọ ilọ eepoogh phọ yira omhoọgh bọ ilọ osogh aani ghan iisogh obakị oḍighi Omhạr phọ.

15. Ika kụ idị yira kotue ologhonhaạn ḍighaạgh buphẹ yira rotughemhị ghan bọ Baibul phọ ozọ eten dị enhighẹ mem dị iiḅaghamhị emite?

¹⁵ Tughemhị nyopọ nạ retughemhị ghan bọ Baibul phọ ilọ oḍighi ghan mem dị iiḅaghamhị emite. Esi omaạm, nạ kaḍighi ika eḍighi maạr dị oye dị nạ ratughemhị ghan Baibul dị muụm ko/ḍiiny, aḅenhị nyinhạ mọ oye apiomạn nyodị siphẹ ookpomhoghan phọ? Kparipẹ roḅenhị odị mọ odị kụ apiomạn obobọ onyọ umor phọ, ḅenhị ghụn nyodị ipẹ aBaibul phọ aḅẹm bọ mọ oḍighi ghan. Ḅenhị mọ odị asạr awilhenhaạn onyọ umor phọ, obobọ odị aghị ateẹny onyọ umor phọ aghaaphạn eyoghoyoghọ eten ḅilhẹ r’eten ephomhoghiạn, ilọ oḅilhẹ ophomhoghiạn ‘umor phọ odị’. (Poghom Matiu 18:15.) Loghonhaạn ḍighaạgh opọ nạ ratughemhị ghan bọ ookolhobian ipẹ dị kakaạph bọ. Ḍeenhaan nyodị ilọ osighẹ ghan oḍighinhom aJW Library^® app phọ, Research Guide for Jehovah’s Witnesses, r’osoph intanẹt phọ jw.org^® omhiịn imạ areten dị odị kasighẹ aḍighinhom. Mem dị okuamhị otughemhị oye phọ kụ agbi oḍiiny amuụm, keloghonhaạn ni nyodị ḍighaạgh omhoọgh imạ asiya r’awe isiphẹ ookpomhoghan phọ.

16. Eeghe kụ iḍighi kụ ekpẹ bọ ni ophạm aani ghan abunhọn abukaaphọm mem dị nạ rakị otughemhị oye Baibul?

¹⁶ Pạm aani ghan bunhọn siphẹ ookpomhoghan phọ anyinha, r’opoghom eghir phọ mem lọ aru ophogh anyinha, mem dị nạ rakị otughemhị oye phọ. Eeghe kụ iḍighi? Etigheri riphigh phọ ipẹ moghaạph bọ ni oghol epẹ omhạn, eeni etue ni eḍighi idị onhọn okaaphọm kụ odi esi olhoghonhaạn aḍighaạgh oye phọ nạ ratughemhị ghan bọ. Esi omaạm, eḍighi maạr dị ekparanhaạn oye phọ owilhẹ ipughọl asigeret. Pọ mạgh aani onyọ umor dị aphughọl aani ghan asigeret kuolọ alhọgh ni iboom inyaạm omhiịn mọ odị abilhẹ ni, adạph aani nyinhạ mem dị nạ rakị otughemhị oye phọ. Onyọ umor phọ nạ aphạm bọ aghimọm atue ni angọ opọ nạ ratughemhị ghan bọ imạ oromha dị odị kasighẹ aḍighinhom. Eḍighi maạr dị nạ rakiilhaan otughemhị oye phọ ghisigh onhọn okaaphọm dị asilor, pọ ḅenhị okaaphọm mọ kụ atughemhị. Mem dị nạ amhạgh aani ghan bukaaphọm dị osilor, opọ nạ ratughemhị bọ kamooghọm ni suọ ḍighaạgh abidị. Legheri mọ aḍiigbu ayira pọ olhoghonhaạn aḍighaạgh buphẹ yira rotughemhị ghan bọ okparamhị asiya phọ abidị r’aZihova.

MỊ KABILHẸ OTUGHEMHỊ OYE PHỌ ḌUGHỤM?

17-18. Eeghe araraạr kụ edị ewạ mọ ḅeeḅeghiọn aphogh kụ agbi owilhẹ oye dị ra/poph kaghị ghisigh?

¹⁷ Mem dị oye phọ nạ ratughemhị ghan bọ kụ u/poph ukị ghisigh, pọ kewạ ni mọ puruan loor anạ mọ, ‘Mị kabilhẹ otughemhị odị ḍughụm?’ Mem dị nạ raatughiạn ipẹ nạ kaḍighi bọ, tuutughiạn ni dọl r’inyaạm oye phọ. Legheri mọ oomo awe kụ ro/nuụn ghan kophoph. Esi iduọn phọ puruan loor anạ mọ: ‘Oye phọ mị ratughemhị ghan bọ Baibul phọ apoph ni rakị ghisigh, odaphạn inyaạm r’asidọl phọ odị ḍughụm?’ ‘Odị mamhiigh ni “ooko,” obobọ osighẹ oḍighinhom araraạr phọ odị ratuughạ bọ ḍughụm?’ (Mat. 28:20) Etue ni esighẹ mem kụ opọ rotughemhị bọ agbi ophoph oghị aghisigh, kuolọ omhiịn ni mọ odị rakparaghạ ni oḍighinhom ipẹ dị atuughạ bọ.

¹⁸ Kuolọ kokaạph ika eḍighi maạr dị oye dị nạ ratughemhị ghan kụ aḍeenhaan ephurukpu aḍiḅeeraạn bịn obobọ u/ḍeenhaan r’oḍeenhaan? Esi omaạm: Oye dị nạ ratughemhị ghan Baibul, kụ matuughạ ḍinyạ phọ What Can the Bible Teach Us amadạn, eeni kẹn aḅilhẹ amiigh otuughạ Remain in God’s Love, kuolọ k’ekula nyinhạ ko/dạph ghan oghị ituughạ—obobọ aMemorial! Nạ aghị kẹn otughemhị phọ, apogh egbaạm angọ. Eḍighi maạr dị eḍighi idiphọ, pọ ewạ ni mọ kaạph ipẹ edi bọ olhoghi anạ aḅenhị nyodị.b

19. Eeghe kụ edị nạ katue aḅenhị oye dị ra/poph siphẹ ituughạ aBaibul phọ odị, kụ ophagharanhaạn phọ abidị kaloghonhaạn nyinhạ ika ḍighaạgh?

¹⁹ Nạ atue ni amiighom esi opuru oye phọ mọ, ‘Eeghe kụ iphạm bọ nyinhạ eḅulhemhi omhạn oḍighi aani onyọ Ogbaanhaạn AZihova?’ Eeni odị kaḅẹm mọ, ‘Kiḅeeraạn ni imhị otuughạ ghan aBaibul phọ, kuolọ mị u/wạ oḍighi oniin onyọ Ogbaanhaạn AZihova!’ Eḍighi maạr dị epẹ kụ eru eegharạ odị ghalhamọ r’iduọn odị matuughạ bọ ni Baibul phọ esi ibadị asiạ, pọ nạ ragbi mọ ewạ ni oghiọm aghisigh otughemhị odị ḍughụm? Kuolọ kokaạph ika eḍighi maạr dị odị aḅenhị nyinhạ iyaạr phọ ephạm bọ nyodị eḅulhemhi omhạn? Esi omaạm, eḍighi maạr dị aḅenhị nyinhạ mọ odị ka/tue aḍuạ ghan otu agbạ otu. Mem dị odị aḅenhị nyinhạ iiḅaghamhị phọ, nạ kalegheri ni idị nạ kaḍighi kụ aloghonhaạn ḍighaạgh.

20. Ika kụ idị Iiḍighi 13:48 kilhoghonhaạn iyira ḍighaạgh olhegheri mughumọ yira kokiọm ni ghisigh otughemhị oye dị ra/poph kaghị ghisigh?

²⁰ Dị eeph ni iboom, abuniin abuphẹ yira rotughemhị ghan bọ otọl idiphọ awe phọ Izrạl, orọl bọ mem mọ Ezekiel. Idị egbolhomaam bidị, aZihova aḅenhị Ezekiel mọ: “Pogh! Nạ akịgh esi abidị idiphọ aḍuọr ephomhoghiạn iḍọ, dị omhoorọm imạ eḍọgh r’onẹ dị omhaạr opheghom. Bidị konaghạn ni ikpo onhụ phọ anạ, kuolọ r’onyọ abidị ka/daphạn.” (Ezek. 33:32) Eeni kikparanhaạn ni iyira oḅenhị oye dị yira rotughemhị ghan Baibul mọ yira ko/kị ghan mun otughemhị odị. Toroboiperolbọ, “oọny enụm amem bịn kụ mesugha.” (1 Kọr. 7:29) Kparipẹ rophiemhi amem otughemhị ghan oye dị ra/poph k’aghị ghisigh, ewạ mọ yira oghị ghụn oteẹny buphẹ “[Enhaạn] mesaḅạr bọ omoọgh aghuḍum k’agee-pọ phọ.”—Bạl Iiḍighi 13:48.

21. Emhuoghaạph alhạ phọ 2020 eḅẹm ika, kụ kilhoghonhaạn iyira ḍighaạgh oḍighi eeghe?

²¹ Emhuoghaạph alhạ phọ 2020, kiloghonhaạn iyira ḍighaạgh ogbon idị yira kotue onighemhị eten phọ epẹ yira roḍighi ghan bọ we bumatuạn aKraist. Epamanạm iniin ikpo onhụ dị aZizọs aḅạ siphẹ ogbogh ookpomhoghan phọ, odị aphạm bọ siphẹ eeḅarạph phọ, epẹ Galili: “Ikị oomo areelhe aḅirini phọ [eḍighi we] bumatuạn amị . . . [eḍiinye] bidị muụm.”—Mat. 28:19.