Iyaạr Phọ Yira Otuạn Bọ Rosereghiạn Osạr Owilhenhaạn Phọ AZihova

1-2. Eghẹn edọ eten kụ edị adọl phọ ayira eghighimaạm dọl onyọ ugheel oọny phọ oghaạph bọ oghol siphẹ eḅẹl ekpịgh phọ?

GBIOM olhoghi onyọ ugheel oọny dị odẹ r’onhiin phọ omhoọgh eboom eelạ. Kuolọ ḍiniin aḍio, bịn iyaạr emitenhaan odẹ r’onhiin phọ dị ekọm ḍuugh. Iphẹn phọ ikạr kụ eḅonyon nyodị ezu. Kuolọ iinhaghạn dị eeph epu iphẹn phọ edi ni. Odị anhaghạn mọ odẹ r’onhiin phọ odị molhiom oomo ikpoki eghunotu phọ omạn oḅilhẹ ole oboom omhụgh oḅarạm. Tuutughiạn idị ketọl esi oọny phọ, kparipẹ r’olhe erua eelạ, odẹ r’onhiin phọ odị oseenhaan ghụn nyodị iimhụgh okpẹ. Kụ buẹn bidị olhe bọ iimhụgh phọ royạgh nyodị okpẹ elhom elhom. Ikpoki phọ ebụgh iboom dị odị ka/tue ni bịn akpẹ siphẹ oomo aghuḍum mọ odị.

² Adọl phọ ayira ekịgh aani ḍiẹn oọny phọ ophọn phọ. Oḅẹl odẹ r’onhiin phọ ayira, Adạm r’Iv, umhunhughan ni, kụ useere bidị paradaịs. (Gen. 1:27; 2:7-9) Bidị umhoọgh ni eepoogh oghelhọm aghuḍum r’adọl oḅaạl olhoghi k’agee-pọ. Kuolọ oomo araraạr inmia ni eginha amem. Bidị uroph ni dọl aParadaịs phọ ḅilhẹ r’eepoogh oghelhọm aghuḍum k’agee-pọ. Kụ eeghe erua kụ edị bidị owilhenhaạn nmụny phọ abidị? ABaibul phọ aḅẹm mọ: “Oniin oye [Adạm] kụ aphạm bọ ikarạph phọ arumom siẹn aḅirini phọ, kụ ikarạph phọ odị iphamạm ni ḍuugh. Kụ aḍuugh phọ metuạn bọ ikarạph phọ odị eetura oomo aḅirini phọ dị oomo awe moḍighi aani ikarạph.” (Rom 5:12) Erua dị yira olhe ḍighaạgh Adạm pọ ikarạph, kụ ikarạph phọ repamạm ghan ḍuugh. Erua ikarạph r’aḍuugh phọ ekịgh idiphọ oboom omhụgh dị yira ko/tue okpẹ.—Ps. 49:8.

3. Eeghe kụ iḍighi kụ kotue bọ ni otomaạm ikarạph phọ ayira omhụgh?

³ Siphẹ aBaibul phọ, otomaạm ikarạph idiphọ omhụgh. (Mat. 18:32-35) Mem dị yira opiomạn, ekịgh mudị yira ole omhụgh aZihova. Kụ kewạ ni mọ okpẹ omhụgh phọ aZihova. Kụ eḍighi maạr dị yira u/kpẹ, pọ aḍuugh ayira kụ keḍighi iikpiạ omhụgh phọ. Bịn yira ko/moọgh mun oḍuomolhoghi oḅilhẹ orọl.—Rom 6:7, 23.

4. (a) Dị olhoghonhaạn aḍighaạgh kụ u/lo, eeghe kụ kimitenhaan iyira? (Psalm 49:7-9) (b) Ekpo onhụ phọ “ikarạph” remạ ghan eeghe siphẹ aBaibul phọ? (Miịn igbe phọ “Iyaạr Dị Ikarạph Remạ Ghan.”)

⁴ Yira kotue ni oḅilhẹ omoọgh ephua phọ Adạm r’Iv oroph bọ ḍughụm? Yira r’aloor bịn ko/tue. (Bạl Psalm 49:7-9.) Eḍighi maạr lọ olhoghonhaạn aḍighaạgh u/lo, kụ yira omhugh, pọ idiphọ inhạm mọ yira ko/moọgh oḍuomolhoghi oḅetenhu esi aḍuugh.—Eccl. 3:19; 2 Pit. 2:12.

5. Ika kụ edị Odẹ ephomhoghiạn phọ ayira mulhoghonhaạn iyira ḍighaạgh okpẹ omhụgh ikarạph phọ? (Miịn opoḍi phọ.)

⁵ Ootughiạn ilọ onyọ ugheel phọ yira oghaạph bọ oghol epẹ emhiighom mọ. Ketọl ika esi odị eḍighi maạr dị oye dị amhoọgh eboom eelạ aguanhaan mọ odị kakpẹ oomo iimhụgh phọ odẹ r’onhiin phọ odị olhe bọ? R’oboom oḅaạl olhoghi, oọny phọ kasighẹ ni olhoghonhaạn aḍighaạgh oye phọ. Eniin phọ eten phọ, Odẹ ephomhoghiạn phọ ayira, Zihova, mungọ iyira inmo dị kekpẹ iikpiạ ikarạph phọ yira olhe bọ erua ḍighaạgh Adạm. AZizọs aḅẹm mọ: “Enaạn iphomoghiạn iboom aḅirini phọ, dị tutụ engọ ogina Oọny phọ odị, idị torobọ oye lọ ameeraam nyodị ka/pe, kamoọgh ghụn ghuḍum k’agee-pọ.” (Jọn 3:16) Inmo phọ iphẹn phọ meḅilhẹ emiteom eepoogh dị yira komoọgh igey asiya r’aZihova.

6. Ighẹn ikpo onhụ aBaibul kụ edị yira kooḅeghiọn, kụ eeghe kụ iḍighi?

⁶ Ika kụ edị yira komooghọm suọ imạ inmo phọ iphẹn phọ kotuạn bọ kụ osạr ikarạph phọ ayira uwilhenhaạn iyira? Ophagharanhaạn aḍipuru phọ aḍiphẹ phọ omiịn esi eten phọ epẹ aBaibul phọ asighẹ bọ aḍighinhom ikpo onhụ phọ iphẹn ophomhoghị ayira r’Enhaạn, okpẹ iikpiạ phọ, ekiạ etagharạn phọ, ophẹl ayira osighẹ esi ikarạph r’aḍuugh, ḅilhẹ rosighenọm mọ yira awe aruukuan. Siẹn emhuoghaạph phọ ephẹn phọ, yira kooḅeghiọn idị ikpo onhụ phọ iphẹn phọ remạ ghan. Iduọn yira rogbirima bọ ilọ ikpo onhụ phọ iphẹn phọ, yira kokuamhị ni osereghiạn iyaạr phọ aZihova atuạn bọ kụ rasạr ghan ikarạph ayira kawilhenhaạn.

IYAẠR PHỌ OTỤ BỌ OSẠR IKARẠPH PHỌ AYIRA OWILHENHAẠN: OPHOMHOGHỊ AYIRA R’ENHAẠN

7. (a) Epel eepoogh omhoọgh aghuḍum k’agee-pọ, eeghe kụ enhọn iyaạr dị Adạm r’Iv oroph? (b) Idiphọ anmụny Adạm r’Iv, eeghe olhoghonhaạn aḍighaạgh kụ edị yira okạr omhoghi? (Rom 5:10, 11)

⁷ Adạm r’Iv uroph eepoogh oghelhọm aghuḍum k’agee-pọ ḅilhẹ roghelhọm imạ asiya r’Odẹ phọ abidị, Zihova. Emhiighom mọ, Adạm r’Iv uḍighi pakirị eghunotu phọ Enhaạn. (Luk 3:38) Kuolọ, tutụ bidị komiigh bọ emariạ, bidị uḅaạr ri emhụ oghị esi aZihova. Esi iduọn phọ, odị aphorogh ni bidị siphẹ eghunotu ph’odị. (Gen. 3:23, 24; 4:1) Idiphọ anmụny Adạm r’Iv, yira umhoghi ni dị oye kuphomhoghị iyira r’aZihova. (Bạl Rom 5:10, 11.) Yira omoghi ni oḍighi arighirị odị kparipẹ r’e/pomhoghiạn odị. Kụ eten dị yira u/seere olhoghi, aZihova amiteom iikolhobian dị eḍighi idị iphẹn phọ edugh. Ika?

IIKOLHOBIAN PHỌ: OKPẸ IIKPIẠ PHỌ

8. AZihova aḍighi eeghe orue okpẹ iikpiạ phọ?

⁸ Okpẹ iikpiạ phọ kụ iikolhobian phọ aZihova amiteom bọ pidị omhạr awe phọ u/munhughan bọ otue oḍighi righirị odị. Odị aḍighi iduọn phọ esi omiteom iyaạr dị eelenyan r’iyaạr phọ Adạm aroph bọ. Igẹ Iigbia aGrik phọ eḅilhẹ kẹn ni ekaạph ilọ iikolhobian phọ aZihova amiteom bọ pidị omhạr awe omoọgh igey asiya kụ oḅilhẹ otọl dọl eephọ r’odị. (Rom 3:25)

9. Eeghe iikolhobian kụ edị aZihova amiteom pidị osạr ikarạph awe phọ Izrạl obilhenhaạn?

⁹ Orue oḍighi idị awe phọ Izrạl kokelhọm igey asiya r’odị, aZihova amiteom ni iikolhobian dị ketọl ekulha amem, ilọ osạr ghan ikarạph abidị owilhenhaạn. Aḍio irọl li siphẹ Izrạl dị ooko ghan torobọ alhạ dị oghol mọ Aḍio Ophomhoghị Awe r’Enhaạn. Ḍio phọ aḍiphẹ phọ, ogbogh opinyọn rikiạ phọ kasighẹ inhạm kụ apinyonọm rikiạ pidị aZihova asạr ikarạph awe phọ abilhenhaạn. Ii, arikiạ inhạm ke/tue egbuurogh ikarạph oye emadạn loor esi dị oye kụ amhạn maạr apu enhạm. Kuolọ, onyọ Izrạl dị makiton kụ aphighirọn ekiạ dị aZihova rawạ, aZihova asạr ghan ni ikarạph odị awilhenhaạn. (Hib. 10:1-4) Oḅarạm isiphẹ, arikiạ phọ Enhaạn aḅenhị bọ we Izrạl mọ ophinyọn ghan iḍighi idị awe phọ Izrạl komiịn mọ bidị abuḍighinhom ikarạph ḅilhẹ mọ bidị omoghi ni ekiạ dị ketue ekạr esighẹ ikarạph phọ abidị.

10. Eeghe iikolhobian kụ edị aZihova amiteom pidị odị asạr ikarạph awe abilhenhaạn?

¹⁰ Ighẹn iikolhobian kụ edị aZihova amiteom osạr ikarạph oomo awe owilhenhaạn? Odị aakolhobian dị kosighẹ Oọny phọ odị aphomhoghiạn bọ, ‘opighironọm ekiạ mem bịn’ obọ otue osạr ikarạph ibadị awe obilhenhaạn. (Hib. 9:28) AZizọs asighẹ ghuḍum mọ odị angọ obọ ‘otanyanạm ḍita.’ (Mat. 20:28) Ekiạ etagharạn phọ p’eeghe?

IYAẠR PHỌ OKPẸ BỌ: EKIẠ ETAGHARẠN PHỌ

11. (a) Odaphạn Baibul phọ, ekiạ etagharạn phọ p’eeghe? (b) Emoghi eeghe orue ophighirọn ekiạ etagharạn phọ?

¹¹ Siphẹ aBaibul phọ, ekiạ etagharạn pọ iyaạr dị okpẹ oḅilhẹ ophomhoghị awe r’Enhaạn. Iyaạr dị aZihova katuạn aḅulhemhi iyaạr dị moroph memite. Ika? Adạm r’Iv uroph ghuḍum dị amhunhughan r’eepoogh orọl k’agee-pọ. Esi iduọn phọ, ekiạ etagharạn phọ keelenyan r’iyaạr phọ oroph bọ. (1 Tim. 2:6) Oye dị katue akpẹ pọ (1) kamunughan; (2) kamoọgh eepoogh orọl isiẹn ade phọ k’agee-pọ; (3) aakolhobian osighẹ aghuḍum mọ odị ophighironhọm ekiạ dị kiphẹl iyira. Oye dị amhoọgh iraạr phọ araraạr phọ iphẹn phọ kụ katue asighẹ ghuḍum mọ odị akpiọm obọ oḅulhemhi ghuḍum mọ oroph bọ.

12. Uḍighi ika kụ aZizọs arue bọ aphighirọn ekiạ etagharạn phọ?

¹² Ooḅeghiọn iraạr ariphigh phọ eḍighi bọ idị aZizọs arue bọ akpẹ ekiạ etagharạn phọ. (1) Odị amhunhughan kụ “ikarạph o/ḍighi.” (1 Pit. 2:22) (2) Esi iduọn phọ, odị mutue ni arọl siẹn ade phọ k’agee-pọ. (3) Odị aakolhobian ni osighẹ aghuḍum mọ odị ophighironhọm ekiạ dị kiphẹl iyira. (Hib. 10:9, 10) AZizọs amhunhughan idiphọ Adạm amhunhughan bọ kụ agbi bọ oḍighi ikarạph phọ. (1 Kọr. 15:45) Loor aḍuugh phọ aZizọs yira koḅilhẹ omoọgh oomo araraạr phọ Adạm aroph bọ. (Rom 5:19) AZizọs kụ maḍighi “Adạm mọ asughanam bọ omạn.” I/wạ mun onhọn oye oru ophighirọn ekiạ okpẹ ipẹ Adạm aroph bọ. AZizọs asighẹ ghuḍum mọ odị aphighironhọm ekiạ “mem bịn ḅeer amadạn.”—Hib. 7:27; 10:12.

13. Eeghe ogbaranhaạn kụ odi igbo iikolhobian okpẹ iikpiạ phọ r’ekiạ etagharạn phọ?

¹³ Eeghe ogbaranhaạn kụ odi igbo iikolobian okpẹ iikpiạ phọ ḅilhẹ r’ekiạ etagharạn phọ? Iikolhobian okpẹ iikpiạ phọ pọ iyaạr phọ Enhaạn aḍighi bọ pidị awe omoọgh igey asiya r’odị. Ekiạ etagharạn phọ pọ iyaạr phọ okpẹ bọ pidị edugh osạr ikarạph awe owilhenhaạn. Ukpẹ ekiạ phọ ephẹn phọ mem mọ aZizọs azu bọ iḅaạl phọ odị loor emhụ ayira.—Efẹ. 1:7; Hib. 9:14.

ASUỌ PHỌ: OTAGHARẠN AYIRA OSIGHẸ ESI IKARẠPH R’AḌUUGH ḄILHẸ ROSIGHENỌM MỌ YIRA AWE ARUUKUAN

14. Yira kooḅeghiọn eeghe, kụ eeghe kụ iḍighi?

¹⁴ Eeghe asuọ kụ edị yira omhoọgh loor ipẹ aZihova uḍighinhaan bọ iyira? Orue ophagharanhaạn aḍipuru phọ aḍiẹn phọ, ooḅeghiọn iyạl araraạr dị kilhoghonhaạn iyira ḍighaạgh onhaghanhạn asuọ dị yira romoọgh ghan loor esi osạr owilhenhaạn phọ aZihova.

15-16. (a) Mutagharạn iyira osighẹ esi eeghe loor esi ekiạ etagharạn phọ? (b) Kụ ipẹ phọ itir iyira ika?

¹⁵ ABaibul phọ aḅẹm mọ loor esi iduọn mokpẹ bọ ekiạ etagharạn phọ, mutagharạn iyira osighẹ esi ikarạph r’aḍuugh. Dị egbolhomaam iphẹn phọ, otelhedom mọ aPita aḅẹm mọ: “Nyina elegheri ni idị ophiemi kụ itagharanạm bọ inyina siphẹ adọl isa phọ aburudẹ aburudẹ phọ anyina irolomị bọ inyina. U/ḍighinom iyaạr dị keḅuurạ idiphọ ikpoki. Usighẹ ghụn iḅaạl phọ aKraist emạn bọ ni iboom kụ itagharanạm bọ inyina. AKraist phọ aghịgh moọny iyool ogạ dị r’iyaạr i/bịph, ḅilẹ kẹn eghạ u/ḍigh.”—1 Pit. 1:18, 19.

¹⁶ Loor esi ekiạ etagharạn phọ, kotue ni uphẹl iyira osighẹ esi ikarạph r’aḍuugh. (Rom 5:21) P’eeghe idị olhoghi ayira aḅaạl loor ipẹ aZihova r’aZizọs oḍighi bọ, otagharạn ayira osighẹ esi ikarạph r’aḍuugh dị eego esi iḅaạl phọ aZizọs.—1 Kọr. 15:22.

17-18. (a) Remạ ghan eeghe mem dị Enhaạn usighenhọm iyira mọ yira awe aruukuan? (b) Kụ eeghe asuọ kụ edị yira omhoọgh loor iduọn aZihova asighenhọm bọ mọ yira awe aruukuan?

¹⁷ ABaibul phọ aḅẹm mọ aZihova masighenọm rebenhẹ ph’odị mọ awe aruukuan. Iphẹn phọ remạ ghan mọ aZihova iyira ku/kpẹ iikpiạ ikarạph phọ ayira. Kuolọ iphẹn phọ i/mạ mọ aZihova ra/daphạn siigbu elhiom eḍighinhom iyaạr ph’odị. Odị usighẹ iyira mọ yira awe aruukuan loor esi ekiạ etagharạn phọ, ke/kpạr ayira. Eniin phọ amem mọ, aZihova rawạ mọ yira okiton. Kuolọ odị anyaaghiạn ni osạr ikarạph phọ ayira owilhẹ loor esi omheeraam mọ yira oḍeenhaan bọ esi odị r’ekiạ etagharạn phọ aZizọs akpẹ bọ.—Rom 3:24; Gal. 2:16.

¹⁸ Eeghe asuọ kụ edị yira omhoọgh loor iduọn aZihova asighenhọm bọ mọ yira awe aruukuan? AZihova masaḅạr buniin awe dị odị asighẹ mọ awe aruukuan dị kotooghị r’aKraist epẹ k’akẹ, kụ bidị moḍighi nmụny Enhaạn. (Taị. 3:7; 1 Jọn 3:1) Odị masạr ikarạph abidị abilhenhaạn. Eḅilhẹ ekịgh mudị bidị ko/ḍighi ghan ikarạph. Esi iduọn phọ, bidị osianhaan ni otooghị r’aKraist siphẹ Omhạr phọ. (Rom 8:1, 2, 30) Abunọn dị Enhaạn masighenhọm mọ awe aruukuan kotọl siẹn ade phọ k’agee-pọ. Enhaạn masạr ikarạph abidị abilhenhaạn, kụ bidị moḍighi righirị odị. (Jems 2:21-23) Aḍigbogh aḍita phọ kokpetenhaan bọ Amagedọn omoọgh eepoogh oghelhọm aghuḍum siẹn ade phọ k’agee-pọ. (Jọn 11:26) Koḅerion ni we elhiom r’ekeeny eḍighinhom iyaạr. (Iiḍ. 24:15; Jọn 5:28, 29) Eekunha phọ, oomo arebenhẹ phọ aZihova odi bọ siẹn ade phọ ko/tọl mun dọl arebenhẹ. Kparipẹ ghụn, bidị kokelhọm ghuḍum “idiphọ anmụny [Enhaạn] dị mokpetenaan.” (Rom 8:21) R’oḅaạl olhoghi yira okiọm ni ghisigh rokori mem dị yira kokạr omoọgh imạ asiya phọ iphẹn phọ r’Odẹ phọ ayira, Zihova!

19. Ika kụ edị araraạr minhighenhaạn iyira loor esi ipẹ aZihova r’aZizọs muḍighinhaan bọ iyira? (Miịn kẹn igbe phọ “Osạr Owilhenhaạn Phọ AZihova.”)

¹⁹ Okạr agey, adọl phọ ayira ighịgh ḍiphẹ onyọ ugheel oọny phọ oghaạph bọ oghol emhiighom mọ, aroph bọ torobọ iyaạr dị amhoọgh aḅilhẹ alhe erua oboom omhụgh dị odị ka/tue akpẹ. Kuolọ loor esi olhoghonhaạn aḍighaạgh phọ aZihova, adọl phọ ayira menmia. AZihova amiteom iikolhobian osạr ikarạph phọ ayira owilhenhaạn, kụ aZizọs akpẹ ekiạ etagharạn phọ. Omheeraam mọ yira omhoọgh bọ esi aZizọs, muphẹl iyira asighẹ esi ikarạph r’aḍuugh. AZihova masạr ikarạph ayira uwilhenhaạn iyira. Kụ mem dị osạr ikarạph ayira uwilhenhaạn iyira, ekịgh mudị ikarạph phọ yira u/ḍighi. Kụ edị emhạn maạr epelhom, yira kotue ni omoọgh nyiidiphọ imạ asiya r’Odẹ ephomhoghiạn phọ ayira, Zihova.

20. Eeghe iyaạr kụ edị yira kooḅeghiọn siphẹ emhuoghaạph phọ etum bọ siẹn?

²⁰ Mem dị yira ogbirima ipẹ aZihova r’aZizọs muḍighinhaan bọ iyira, olhoghi ayira raḅaạl ghan ni, kụ rinyu ghan iyira osereghiạn abidị. (2 Kọr. 5:15) Oḍuomolhoghi mu/tọl ḅẹm loor mọ aZihova r’aZizọs iyira m”ulhoghonhaạn bọ ḍighaạgh! Kuolọ eeghe iyaạr kụ edị osạr owilhenhaạn phọ aZihova ramạ ghan esi anạ r’aloor? Yira kopagharanhaạn ḍipuru phọ aḍiẹn phọ siphẹ emhuoghaạph phọ etum bọ siẹn.