EMHUOGHAẠPH ITUUGHẠ PHỌ 7
AḌUỌR PHỌ 15 Praise Jehovah’s Firstborn!
Osạr Owilhenhaạn Phọ AZihova—Iyaạr Dị Remạ Ghan
“Nạ kụ rakạr ghan kasạr uwilhenhaạn iyoor.”—PS. 130:4.
EGBON
Raraạr oghaạph omaaniọm dị aBaibul phọ aḍighinhom oogholhomhi ipẹ osạr owilhenhaạn phọ aZihova agbatanhaạn bọ. Emhuoghaạph phọ ephẹn phọ kebughẹ osereghiạn phọ yira omhoọgh bọ oghị esi osạr owilhenhaạn phọ aZihova.
1. Eeghe kụ iḍighi kụ rekpạr ghan bọ olhegheri mughumọ oye makạr asạr abilhenhaạn oye?
“MỊ MASẠR AWILHENHAẠN NYINHẠ.” P’eeghe idị ikpo onhụ phọ iphẹn redụgh ghan onhaghạn, ekạr ekpaariọm mem dị nạ aḍighi obobọ aghaạph iyaạr dị ephin esi oye! Ikpo onhụ phọ “mị masạr awilhenhaạn nyinhạ” ekạr remạ ghan eeghe? Iduọn phọ pọ oye phọ nạ aḍighi bọ idị ephin esi odị r’anạ meḅilhẹ eḍighi righirị ḍughụm? Obobọ odị aghaạph idiphọ phọ obọ iboom araghaạph ke/tọl, kuolọ ipẹ edi bọ ekpom odị edi ni ḍughụm? Osạr owilhenhaạn awe rakpạr ghan ni onhaghanhạn eeni amem.
2. ABaibul phọ akaạph eeghe ilọ osạr owilhenhaạn phọ aZihova? (Miịn kẹn igẹ phọ edi bọ ude.)
2 Eten phọ epẹ aZihova rasạr ghan bọ kuwilhenhaạn iyira egbatanhaạn ni r’ipẹ yira rosạr ghan bọ kowilhenhaạn we. Osạr owilhenhaạn phọ aZihova akạr kụ agbatanhaạn. Okọ suọr phọ aghaạph ilọ aZihova mọ: “Nạ kụ rakạr ghan kasạr uwilhenhaạn iyoor, pọ kụ iyaạr phọ yoor roghuenhi ghan bọ nyinhạ.”a (Ps. 130:4) Ii, aZihova “rakạr ghan kasạr uwilhenhaạn” iyira. Odị kụ uḍeenhaan bọ iyira iyaạr dị osạr owilhenhaạn aru. Iniin ariisi siphẹ aBaibul phọ, abugeọm mọ uḍighinhom ghan ekpo onhụ aHibru dị egbatanhaạn, mem dị bidị rokaạph ilọ osạr owilhenhaạn phọ aZihova.
3. Ika kụ idị osạr owilhenhaạn phọ aZihova agbatanhaạn r’ophọn ayira? (Isaiah 55:6, 7)
3 Mem dị aZihova asạr awilhenhaạn oye, pọ magbuurogh ikarạph oye phọ. Kụ asiya oye phọ r’odị ekạ bọ meḅilhẹ eḅula imhoom. Yira rosereghiạn ni aZihova iduọn odị raagborion ghan bọ osạr owilhenhaạn ayira oomo amem.—Bạl Isaiah 55:6, 7.
4. Ika kụ idị aZihova mulhoghonhaạn iyira ḍighaạgh onhaghanhạn iyaạr dị osạr owilhenhaạn phọ odị aru?
4 Eḍighi maạr dị osạr owilhenhaạn phọ aZihova agbatanhaạn r’opọ ayira, ika kụ edị yira phọ u/munughan bọ kokạr onaghanhạn iyaạr phọ osạr owilhenhaạn phọ odị aru bọ? AZihova aḍighinhom oghaạph omaaniọm kirokirọ olhoghonhaạn ayira ḍighaạgh onhaghanhạn iyaạr phọ osạr owilhenhaạn phọ odị aru bọ. Siẹn emhuoghaạph phọ ephẹn phọ, yira kooḅeghiọn ilọ iniin araraạr phọ aZihova aghaạph bọ amaaniọm. Yira komiịn kẹn idị aZihova ragbuurogh ghan ikarạph phọ ayira kasighẹ, kaḅilhẹ amheera mọ oḅilhẹ oḍighi righirị odị. Ooḅeghiọn araghaạph omaaniọm mọ iphẹn phọ, kebughẹ ipẹ yira osereghiạn bọ Odẹ onmạ ighirigiir phọ ayira, ruḍeenhaan ghan bọ iyira osạr owilhenhaạn ibadị areten.
AZIHOVA RASIGHẸ GHAN IKARẠPH
5. Eeghe kụ remite ghan mem dị aZihova asạr uwilhenhaạn iyira ikarạph phọ ayira?
5 Ibadị amem siphẹ aBaibul phọ, romaaniọm ghan ikarạph dool dị eemọr. Uw-emhạ phọ Devid aghaạph ilọ ikarạph phọ odị mọ: “Asipiomạn phọ amhị kụ irọl ghan anyụ emhụ phọ amhị idiphọ adool dị eemọr, dị mị ka/tue atool.” (Ps. 38:4) AZihova rasạr ghan ni kawilhenhaạn ikarạph oye lọ makiton. (Ps. 25:18; 32:5) Ekpo onhụ aHibru phọ ogbạ bọ mọ ‘sạr uwilhenhaạn’ remạ ghan “ophoophe osighẹ” obobọ “oroolhanhaan.” Esi iduọn phọ, mem dị aZihova asạr uwilhenhaạn iyira ikarạph phọ ayira, yira romiịn ghan nyodị idiphọ oye dị amhoọgh inyaạm dị aru uroolhanhaan iyira dool ikarạph phọ ayira asighẹ.
‘Masạr abilhenhaạn’ (Ps. 32:5)
6. AZihova rasighẹ ghan ikarạph phọ ayira karoph eghẹn?
6 Onhọn oghaạph omaaniọm dị aBaibul phọ aḍighinhom aḍeenhaan mọ aZihova rasighẹ ghan ikarạph phọ ayira kakelẹ. Psalm 103:12 iḅenhị iyira mọ: “Idiphọ emitenhom erumuḍio phọ ekelhạn bọ emheelhom mọ, idiphọ kụ edị odị rasighẹ ghan ikarạph phọ ayira kakelẹ.” Epẹ erumuḍio phọ reḍuạ ghan bọ kemite ekelhạn ni iboom r’epẹ erumuḍio phọ remeel ghan bọ. Iyạl phọ arikpisi phọ ke/tue ni bịn etuman. Iphẹn phọ remạ ghan mọ aZihova rasighẹ ghan ikarạph ayira karoph ekpisi dị ekẹl. Iphẹn phọ meḍighi idị yira okuphom owol mọ aZihova rasạr ghan ikarạph phọ ayira kawilhenhaạn amhạn!
“Idiphọ emitenhom erumuḍio phọ ekelhạn bọ emheelhom mọ” (Ps. 103:12)
7. ABaibul phọ akaạph ika ilọ ipẹ aZihova raḍighi ghan bọ ikarạph phọ ayira? (Micah 7:18, 19)
7 Ghalhamọ r’iduọn oghaạph bọ omaaniọm mọ aZihova rasighẹ ghan ikarạph phọ ayira karoph, odị aḅilhẹ ni raatughiạn ghan ilọ ikarạph phọ ḍughụm? Eeye. Uw-emhạ phọ aHezekiah aghaạph ilọ aZihova mọ: “Nạ masighẹ oomo ikarạph phọ amhị atoph epẹ omhạn anạ.” (Isa. 38:9, 17; igẹ dị edi ude) Oghaạph omaaniọm mọ ophọn phọ amạ amiteom mọ aZihova rasighẹ ghan ikarạph oye dị makiton karoph akelẹ ḅilhẹ ra/pogh ghan mun. Kotue kẹn ni oḅilhẹ oḅẹm mọ: “Nạ maḍighi idị eghịgh mudị mị u/ḍighi ikarạph.” Oghaạph okparamhị iphẹn phọ, aBaibul phọ aḅilhẹ ni aḍighinhom onhọn oghaạph omaaniọm dị ogẹ siphẹ Micah 7:18, 19. (Bạl) Esi aBaibul phọ ephẹn phọ emạ emiteom mọ aZihova rasighẹ ghan ikarạph phọ ayira karoph asumeeny olhạ ophiịny. Iḍiodi phọ, i/dugh ghan osighẹ iyaạr dị moroph osumeeny olhạ ophiịny.
“Nạ masighẹ oomo ikarạph phọ amhị atoph epẹ omhạn anạ” (Isa. 38:17)
“Nạ kasighẹ ni ikarạph phọ ayoor atoph asumeeny olhạ ophiịny” (Mic. 7:19)
8. Yira motuughạ eeghe siẹn phọ?
8 Dị eego esi oghaạph omaaniọm kirokirọ phọ iphẹn phọ, yira motuughạ omiịn mọ mem dị aZihova asạr ikarạph phọ ayira uwilhenhaạn iyira, pọ odị museere iyira eemọr adool ikarạph phọ. Okạr oghaạph, idiphọ aDevid aghaạph bọ, “ibo k’Enaạn edianaan ni buphẹ dị mawilenaạn bọ sipioghọm mọ abidị, ḅilẹ r’abuphẹ dị maakpereghi bọ ikarạph phọ abidị; ibo edianaan ni oye phọ opọ Omoọgh-we phọ ikarạph phọ odị ka/balạm bọ.” (Rom 4:7, 8) Opọ phọ kụ osạr owilhenhaạn phọ aZihova!
AZIHOVA RAGBUUROGH GHAN IKARẠPH
9. Eeghe oghaạph omaaniọm kụ edị aZihova aḍighinhom omạ omiteom idị odị katue asạr uwilhenhaạn iyira?
9 AZihova aḍighinhom kẹn oghaạph omaaniọm kirokirọ olhoghonhaạn ayira ḍighaạgh okuamhị osereghiạn ipẹ odị asighẹ bọ ekiạ etagharạn phọ ragbuuroghom ghan ikarạph abulọ okiton. Esi omaạm, aBaibul phọ akaạph mọ aZihova raatol ghan kaḅilhẹ agun ikarạph phọ ayira asighẹ siphẹ aloor phọ ayira. Iphẹn phọ reḍighi ghan idị opọ aḍighi bọ ikarạph phọ kasererẹ. (Ps. 51:7; Isa. 4:4; Jer. 33:8) AZihova r’aloor akaạph ni ipẹ remite ghan bọ mem dị odị aḍighi iduọn phọ. Odị aḅẹm mọ: “Ghalhamọ nyinha mebiphighạ ikarạph dị etọgh idiphọ oodor, mị kiitol inyinha kụ nyinha eḅaạl idiphọ ibikpo.” (Isa. 1:18) Ekpạr agey ootol ukpe dị aḍighi oodor dị kaḅaạl idiphọ ibikpo. Kuolọ dị eego esi oghaạph omaaniọm mọ ophọn phọ, aZihova rungọ ghan iyira okuphom owol mọ odị katue ni aatol ikarạph phọ ayira asighẹ eten dị ko/miịn mun.
“Ghalhamọ nyinha mebiphighạ ikarạph dị etọgh idiphọ oodor, mị kiitol inyinha eḅaạl idiphọ ibikpo” (Isa. 1:18)
10. Eeghe oghaạph omaaniọm kụ edị aBaibul phọ aḍighinhom oḍeenhaan idị osạr owilhenhaạn phọ aZihova abụgh?
10 Idiphọ oghaạph bọ siphẹ emhuoghaạph phọ eten bọ, omaaniọm ikarạph phọ ayira omhụgh dị yira olhe. (Mat. 6:12; Luk 11:4) Esi iduọn phọ, torobọ amem dị yira oḍighi ikarạph oghị esi aZihova, omhụgh phọ ayira rabụgh ghan bịn. Yira ole nyodị oboom omhụgh! Kuolọ mem dị aZihova asạr uwilhenhaạn iyira, eḅilhẹ rekịgh ghan mudị odị muwilhenhaạn iyira omhụgh phọ odị mutue bọ ni ugun iyira okpẹ. Odị ra/ḅilhẹ ghan kusiph iyira okpẹ ikarạph phọ odị masạr bọ uwilhenhaạn iyira. Idiphọ olhoghi oye rapooph ghan bọ mem dị owilhenhaạn nyodị omhụgh, kụ edị yira rologhoma ghan mem dị aZihova asạr ikarạph ayira uwilhenhaạn iyira!
“Ikarạph lọ yoor oḍighi, sạr uwiIenaạn iyoor” (Mat. 6:12)
11. Remạ ghan eeghe mem dị aBaibul phọ aghaạph mọ mogbuurogh ikarạph phọ ayira osighẹ? (Iiḍighi 3:19)
11 AZihova iyira ru/wilhenhaạn ghan ikarạph bịn; odị ragbuurogh ghan kẹn. (Bạl Iiḍighi 3:19.) Mem dị owilhenhaạn oye omhụgh, eḅilhẹ rekịgh ghan mudị ogororọph esi phọ ogẹ bọ ḍien oye phọ mudị o/lhe mun omhụgh. Toroboiperolbọ, nạ aphogh siphẹ phọ ogororọph bọ nạ katue ni amiịn onhụ ikpoki phọ owilhenhaạn bọ nyodị. Kuolọ ogbuurogh iyaạr osighẹ egbatanhaạn ni. Orue onhaghanhạn oghaạph omaaniọm mọ ophọn phọ, ewạ ni molhegheri mọ iki phọ ogeọm ghan bọ iyaạr iḍiodi phọ urue ghan ni bịn osighẹ muụm ogbuuroghom osighẹ. Oye katue ni asighẹ asapụ r’amuụm bịn agbuuroghom igẹ phọ asighẹ. Esi iduọn phọ, mem dị oghaạph mọ ‘ogbuurogh’ iyaạr, pọ igẹ phọ i/lo mun. R’eeteḅa ipẹ ogẹ bọ i/lo mun. Eḅilhẹ ekịgh mudị oye phọ o/lhe ghan omhụgh. P’eeghe idị olhoghi ayira aḅaạl olhegheri mọ aZihova iyira ru/wilhenhaạn ghan ikarạph bịn, kuolọ aḅilhẹ ragbuurogh ghan kasighẹ!—Ps. 51:9.
“Obọ Omoọgh-we phọ agbuurogh ikarạph phọ anyina” (Iiḍ. 3:19)
12. Oghaạph omaaniọm mọ oḍighinhom bọ ootụ remạ ghan eeghe?
12 AZihova aḍighinhom oniin phọ oghaạph omaaniọm mọ oḍeenhaan idị odị ragbuurogh ghan ikarạph phọ ayira kasighẹ. Odị aḅẹm mọ: “Mị masighẹ ootụ aakpereghiọm ikarạph phọ anyinha.” (Isa. 44:22) Mem dị aZihova asạr ikarạph ayira awilhẹ, rekịgh ghan mudị odị asighẹ ootụ kụ aakpereghiom ikarạph phọ ayira.
“Mị masighẹ ootụ aakpereghiọm ikarạph phọ anyinha” (Isa. 44:22)
13. Yira rologhoma ghan ika mem dị aZihova asạr ikarạph ayira uwilhenhaạn iyira?
13 Iphẹn phọ remạ ghan eeghe esi ayira? Mem dị aZihova asạr ikarạph ayira uwilhenhaạn iyira, yira ku/kiọm mun ghisigh uloghoma apum siphẹ oomo adọl aghuḍum mọ ayira. Dị eego esi iḅaạl phọ aZizọs Kraist, mogbuurogh oomo ikarạph lọ yira oḍighi. Kụ mem dị aZihova asạr uwilhenhaạn iyira, rekịgh ghan mudị yira u/ḍighi ikarạph phọ. Pọ kụ iyaạr dị osạr owilhenhaạn phọ aZihova ramạ ghan esi ayira eḍighi iyaạr dị yira okiton esi ikarạph phọ ayira.
AZIHOVA RAḌIGHI GHAN IDỊ YIRA KOḄILHẸ OMOỌGH IGEY ASIYA R’ODỊ
Osạr owilhenhaạn Odẹ k’akẹ phọ ayira rungọ ghan iyira eepoogh dị yira komoọgh igey asiya r’odị (Miịn ekpịgh phọ 14)
14. Eeghe kụ iḍighi kụ yira koḍuom bọ olhoghi osạr owilhenhaạn phọ aZihova? (Miịn kẹn afoto phọ.)
14 Osạr owilhenhaạn phọ aZihova rulhoghonhaạn ghan iyira ḍighaạgh omhoọgh igey asiya r’odị. Eḅilhẹ rilhoghonhaạn ghan iyira ḍighaạgh dị yira ko/loghoma oboom apum. I/wạ mọ oḅio ayira akaph mọ aZihova amian ni rawạ reten olhiọm ayira esi ikarạph phọ yira oḍighi bọ. R’amem r’amem odị ka/ḍighi iyaạr dị erọl idiphọ. Eeghe kụ iḍighi kụ yira koḍuom bọ olhoghi aZihova mem dị odị asạr uwilhenhaạn iyira? AZihova aḅenhị oyil phọ Jeremiah mọ: “Mị kasạr opiomạn abidị abilhenhaạn, kụ mị kaa/tughiạn mun ikarạph phọ abidị.” (Jer. 31:34) APọl aghaạph ghan aghol ikpo-onhụ phọ iphẹn phọ mem mọ odị aḅẹm bọ mọ: “Mị kaa/tughiạn mun ikarạph phọ abidị.” (Hib. 8:12) Kuolọ iphẹn phọ ekạr remạ ghan eeghe?
“Mị kaa/tughiạn mun ikarạph phọ abidị” (Jer. 31:34)
15. Remạ ghan eeghe mem dị aZihova aḅẹm mọ onọ kaa/tughiạn mun ikarạph phọ ayira?
15 Siphẹ aBaibul phọ, k/oomo amem kụ edị ekpo-onhụ phọ “ootughiạn” remạ ghan ogbiighi obobọ ootughiạn iyaạr dị emite epẹ omhạn. Kparipẹ ghụn, ketue ni emạ oḍighi iyaạr omiteom. Osoroghuom iilhogh phọ okạn bọ otumeriom Zizọs alhọm mọ: “Jizọs, uutughiạn aani ni imị mem mọ nạ katu bọ idiphọ odaạm emạ phọ.” (Luk 23:42, 43) Odị o/ḅenhị ghan Zizọs mọ aatughiạn nyodị mem mọ amuphẹ phọ. Ophagharanhaạn phọ aZizọs aḍeenhaan mọ odị kaḍighi ni iyaạr amiteom oḅeton osoroghuom iilhogh phọ. Esi iduọn phọ, mem dị aZihova aḅẹm m’onọ kaa/tughiạn mun ikarạph phọ ayira, pọ odị raḅẹm ghan mọ odị iyira ku/ḍighi iyaạr. Odị ka/kol emhụ ikarạph dị yira oḍighi epẹ omhạn ulhiọm iyira ghisigh.
16. Eeghe asuọ kụ edị yira romoọgh ghan loor osạr owilhenhaạn phọ aZihova?
16 ABaibul phọ aḍighinhom kẹn onhọn oghaạph omaaniọm olhoghonhaạn ayira ḍighaạgh onhaghanhạn asuọ phọ yira romoọgh ghan bọ mem dị aZihova asạr uwilhenhaạn iyira. Loor iduọn ukpoom bọ iyira ikarạph ḅilhẹ yira rootughiạn ghan bọ oomo amem oḍighi ikarạph, yira oḍighi “rebenẹ [ongọ] ikarạph.” Kuolọ loor osạr owilhenhaạn phọ aZihova, yira moḍighi rebenhẹ dị motagharạn “osighẹ ḍighaạgh ikarạph.” (Rom 6:17, 18; Ogan. 1:5) Ii, mem dị yira olhegheri mọ aZihova masạr uwilhenhaạn iyira, yira romoọgh ghan ni oboom oḅaạl olhoghi loor esi dị yira u/ḍighi mun rebenhẹ ikarạph.
“Itagharạn ni inyina osighẹ ḍighaạgh ikarạph” (Rom 6:18)
17. Ika kụ idị osạr owilhenhaạn ruukonhom ghan iyira? (Isaiah 53:5)
17 Bạl Isaiah 53:5. Oghaạph omaaniọm dị asughanham omhạn dị yira kooḅeghiọn umaaniọm iyira idiphọ awe dị omhoọgh egbagarạ ezẹgh. Loor esi ekiạ etagharạn phọ aZihova amiteom bọ dị eego esi Oọny phọ odị, kotue ni oḅẹm mọ muukonhom iyira. (1 Pit. 2:24) Idiphọ egbagarạ ezẹgh repuẹ ghan bọ loor oye kụ edị ikarạph dị yira oḍighi repuẹ ghan siya phọ ayira r’aZihova. Kuolọ etagharạn phọ reḍighi ghan idị ridughanhaan ghan iyira oselemhi asiya phọ ayira r’Odị, ezẹgh phọ mephuẹ bọ. Idiphọ oye dị amhoọgh egbagarạ ezẹgh ramoọgh ghan bọ iboom ibo mem dị ookonhom, kụ edị yira romoọgh ghan iboom ibo mem dị uukonhom iyira eten aruwaloor kụ yira oḅilhẹ omhoọgh kuuḅi aghisigh aZihova loor esi osạr owilhenhaạn phọ odị.
“Yira momhoon loor ipẹ okuphogh bọ nyodị” (Isa. 53:5)
IPẸ OSẠR OWILHENHAẠN PHỌ AZIHOVA REMẠ GHAN BỌ ESI ANẠ
18. Yira motuughạ eeghe esi oghaạph omaaniọm kirokirọ phọ omhiịn bọ siphẹ aBaibul phọ dị egbolhomaam osạr owilhenhaạn phọ aZihova? (Miịn igbe phọ “Ipẹ AZihova Rasạr Ghan Bọ Kuwilhenhaạn Iyira.”)
18 Yira motuughạ eeghe esi oghaạph omaaniọm kirokirọ phọ omhiịn bọ siphẹ aBaibul phọ dị egbolhomaam osạr owilhenhaạn phọ aZihova? Mem dị aZihova asạr ikarạph phọ ayira awilhẹ, odị rasạr ghan bịn kamhạn ḅilhẹ ra/tuạn ghan mun ipẹ phọ kaḅilhẹ usiph iyira olhogh. Iphẹn phọ ringọ ghan iyira ogẹl oḅilhẹ omhoọgh igey asiya r’Odẹ k’akẹ phọ ayira. Eniin phọ amem mọ, olhegheri mọ osạr owilhenhaạn eḍighi inmo. Iḍuạ esi ephomhoghiạn phọ aZihova r’onmạ ighirigiir phọ odị u/kpeanhaạn bọ kụ eru, odị aḍeenhaan bọ oomo omhạr awe, ke/kpạr ayira.—Rom 3:24.
19. (a) Yira kokol eeghe iyaạr kụ omoọgh oḅaạl olhoghi? (Rom 4:8) (b) Yira kooḅeghiọn eeghe siphẹ emhuoghaạph phọ etum bọ siẹn?
19 Bạl Rom 4:8. P’eeghe idị ewạ mọ torobọ onyọ ayira amhoọgh oḅaạl olhoghi iduọn aZihova aḍighi bọ Enhaạn dị “rakạr ghan kasạr awilhenhaạn”! (Ps. 130:4) Toroboiperolbọ, eḍighi maạr dị yira rowạ ni osạr owilhenhaạn phọ aZihova, pọ yira omoọgh oḍighi eniin iyaạr dị emhạn maạr. Lọgh elhegh ipẹ aZizọs aḅẹm bọ: “Nyina i/bilenaạn ghan bunọn awe Iọ iḍighi inyina ikarạph, pọ Odẹ phọ anyina ka/sạr ikarạph iwilenaạn inyina.” (Mat. 6:14, 15) Eegholhaan ni mọ emạn maạr agey dị yira kotuughaạny osạr owilhenhaạn phọ aZihova. Kuolọ, yira kotuughaạny ika nyodị? Emhuoghaạph phọ etum bọ siẹn kemạ ni emiteom ipẹ yira kotue bọ otuughaạny osạr owilhenhaạn phọ aZihova.
AḌUỌR PHỌ 46 We Thank You, Jehovah
a Okạr igẹ aHibru phọ eḍighinhom ekpo onhụ phọ “osạr owilhenhaạn phọ,” oḍeenhaan mọ ogina aZihova bịn kụ katue akạr asạr ikarạph abilhenhaạn.