Kuphom Ni Owol Mọ A Jehova Mạsar Ri Ạwilhenhaan Nyịnha

1-2. Rẹtol ghan ika esi ayira mem dị yira olhegheri mọ a Jehova mạsar ịkaraph phọ ayira ụwilhenhaan iyira? (Mịin kẹn opoḍi phọ.)

UWO ẹmha phọ Devid alhegheri ni ịdi olhoghi oye rabeeph ghan mem dị oye phọ ạatughian ịkaraph dị aḍighi igbaany. (Ps. 40:12; 51:3) ADevid aḍighi ni ịkaraph. Ghạlhamo r’ịduon phọ ni, ọdi akiton ni r’oomo ekpom ọdi kụ a Jehova ạsar ri ạwilhenhaan. (2 Sam. 12:13) Esi ịduon phọ, a Devid alegheri ni ọḅaal olhoghi dị rạtol ghan mem dị a Jehova ạsar ạwilhenhaan oye.—Ps. 32:1.

² Ịdipho a Devid, yira kotue ni ọmoogh ọḅaal olhoghi mem dị yira okuphom owol mọ a Jehova mụnma iyira ighirigiir ạḅilhe ạsar ịkaraph ayira ụwilhenhaan iyira. P’eeghe ịdi rịngo ghan iyira ịidereghi olhegheri mọ a Jehova ạnya ni ọsar ọwilhenhaan ayira ghạlhamo r’igbogh ịkaraph, eḍighi mạar dị yira okiton r’oomo ekpom, ọghaaph ịkaraph phọ ayira, ḅịlhe oḍighi oomo ịpe yira kotue bọ dị yira kóḅula mụn oḍighi ịkaraph phọ! (Prov. 28:13; Iiḍ. 26:20; 1 Jọn 1:9) Kụ p’eeghe ịdi ịkparamhi iyira olhegheri mọ a Jehova rạsar ghan ịkaraph phọ ayira kụwilhenhaan iyira. Mem dị ọdi ạsar ụwilhenhaan iyira, rẹkigh ghan mụdi yira úḍighi ịkaraph phọ!—Ezek. 33:16.

3-4. Ika kụ ịdi oniin ọnyo umaranhi alhoghoma mem mọ aḍiiny bọ mụum, kụ yira kọoḅeghion eeghe sịen ẹmhuoghaaph phọ ẹphen phọ?

³ Eeni amem rẹkparanhaan ghan ni buniin ayira omheeraam mọ a Jehova mạkar ri ạsar ạbilhenhaan bịdi. Ọoḅeghion eḍeenhaan a Jennifer, dị ookonhom sịen igey phọ. Ịduon odị rạmanham bọ bịn ọdi amhiigh oḍighi yogh ạraraar dị ị́nighe, bịn arọl dọl ughelhe. Ạsia reten kụ ọdi ạwilhe oḍighi ạraraar phọ ịpe phọ, aḅula esi a Jehova ạḅilhe asi ạmhanhanhaam oḍiiny ạmuum. A Jennifer ạḅem mọ: “Mem mọ ạmuphe phọ, mị uphorogh ghan ruphua, apesi ipesi, ạphughol ghan miim atenhom ọku, ạḅilhe ạmhoogh ghan ịghagh ilhoghi dị ụ́pamaghan. Mị ulhegheri ni olhoghi ạmhi mọ a Jehova mạsar ri ụwilhenhaan ịmhi dị eego esi ẹkia ẹtagharan phọ ạ Krạịst mem mọ mị ạkar bọ akiton kụ ạaḅereghi bọ ạḅenhi nyọdi. Kụolo siphẹ ekpom mọ ạmhi mị ụ̋kar umeeraam mọ a Jehova mạsar ri ụwilhenhaan ịmhi.”

⁴ Rẹkparanhaan ghan ni nyịnha eeni amem omheeraam kekpom ạna mọ a Jehova mạsar ri ạwilhenhaan nyịnha ịkaraph phọ nạ aḍighi bọ ẹpe ọmhan ḍụghum? Eḍighi ịdipho, pọ a Jehova rạwa mọ kuphom owol ọnma ighirigiir phọ ọdi ịdipho a Devid. Sịen ẹmhuoghaaph phọ ẹphen phọ, yira kọoḅeghion ịyaar phọ eḍighi bọ kụ ẹmhan bọ mạar dị yira kokuphom owol mọ a Jehova mạsar ri ụwilhenhaan iyira ḅịlhe r’ịyaar dị ketue ịlhoghonhaan iyira ḍịghaagh orue oḍighi ịduon phọ.

UḌIGHI IKA KỤ ẸMHAN BỌ MẠAR OKUPHOM OWOL MỌ A JEHOVA MẠSAR RI ỤWILHENHAAN IYIRA?

5. Eeghe ịyaạr kụ ẹdi a Setạn rạwa mọ yira omheeraam? Ngọ eḍeenhaan.

⁵ Mem dị yira okuphom owol mọ a Jehova mạsar ụwilhenhaan iyira, yira kómeel oḍighanhaan ḍiphil a Setạn. A Setạn rạwa ghan dị yira kọbilhe ọoḅereghi a Jehova. Oḍighi ịduon phọ, ọdi rạkparagha ghan oḍighi ịdi yira komeeraam mọ a Jehova kátue ạsar ịkaraph ayira ụwilhenhaan iyira. Tụutughian oye ọlo ạKorint phọ ọgbatan bọ osighẹ sịphe ookpomhoghan phọ loor ọrolhan esi dị ụ́ḅaal. (1 Kọr. 5:1, 5, 13) Mem mọ ọdi akiton bọ, a Setạn ạwa ghan dị ạbuo ookpomhoghan phọ kọ́sar ọbilhenhaan nyọdi. Iphin ni esi ạbidi iboom dị tụtu bịdi ụ́wa ọmhagh ọdi oḅulhemhi. Ọdi ạwa kẹn dị oḍighinhom ịkaraph phọ makiton bọ kaloghoma mọ kọ̋sar ọwilhenhaan nyọdi, bịn olhoghi ọdi ạgurogh nyọdi akiigh, pịdi eekunha phọ ạbilhe ọoḅereghi a Jehova. Rodon, a Setạn rạwa kẹn dị yira kologhoma mọ a Jehova kátue ạsar ụwilhenhaan iyira, pịdi yira ọbilhe ọoḅereghi ọdi. Kụolo yira “olegheri ni okuphom owol mọ ọdi ạman ịkala.”—2 Kọr. 2:5-11.

6. Eḍighi mạar dị nạ alhoghoma oboom apum, eeghe kụ kẹlhoghonhaan nyịnha ḍịghaagh?

⁶ Mem dị yira okuphom owol mọ a Jehova mạsar ụwilhenhaan iyira, yira kóloghoma mụn oboom apum. Mem dị yira oḍighi ịkaraph, yira rologhoma ghan ni oboom apum. (Ps. 51:17) Kụ ịduon phọ ẹnighe ni, loor esi dị ọoruen olhoghi phọ ayira kunyu iyira ọgbarion ạrada onmia. (2 Kọr. 7:10, 11) Tọrobo ịpe ẹrol bọ, eḍighi mạar dị nạ ạghiom ghisigh alhoghoma ghan oboom apum esi ịkaraph dị nạ makiton ni, pọ ketue ni eḍighi ịyaar dị nạ kạbilhe ọoḅereghi a Jehova. Nạ akuphom owol mọ a Jehova mạsar ạwilhenhaan nyịnha pọ keḍighi ịdi nạ káloghoma mụn oboom apum. Bịn nạ katue ni akumu a Jehova ịpe ọdi rạwa bọ r’ọoruen olhoghi dị ạḅaal ḅịlhe r’ibo. (Kọl. 1:10, 11; 2 Tim. 1:3) Kụolo eeghe kụ kẹlhoghonhaan nyịnha ḍịghaagh okuphom owol sịphe ekpom mọ ạna mọ a Jehova mạsar ri ạwilhenhaan nyịnha?

YIRA KOKUPHOM OWOL IKA MỌ A JEHOVA MẠSAR ỤWILHENHAAN IYIRA?

7-8. A Jehova ạḅenhi Mozis mọ ọdi aḍighi eege oye, kụ ịphen phọ ịngo iyira eeghe okuphom owol? (Exodus 34:6, 7)

⁷ Gbirima ghan ịpe a Jehova ạghaaph bọ ịlo oye phọ ọdi aru bọ. Esi ọmaam, tụutughian ịpe a Jehova ạghaaph bọ ịlo ọdi mem mọ ạḅaanhaan bọ Mozis sịphe Ẹeḅaraph phọ aSinai.a (Bạl Exodus 34:6, 7.) Ghạlhamo r’ịduon a Jehova ạmhoogh bọ ni ịbadi ịma ạraaghara, ọdi ạḅenhi Mozis mọ ọdi “Ẹnhaan ọnma ighirigiir r’igbiririph.” Nạ ragbi mọ ọdo Ẹnhaan dị ạrol ịduon phọ kạ́sar ạbilhenhaan oye dị makiton r’oomo ekpom ḍụghum? Eḍighi mạar dị a Jehova ụ́sar ụbilhenhaan, pọ keḍeenhaan mọ ọdi ọkaraph oye ḅịlhe ọ́mhoogh igbiririph oye. Kụ yira olegheri mọ a Jehova ọ́rol ịdipho.

⁸ Yira kotue ni okuphom owol mọ a Jehova kátue uukelheghi iyira, loor esi dị ọdi Ẹnhaan dị rạ́gba ghan ọkpe. (Ps. 31:5) Esi ịduon phọ, yira kotue ni omeeraam ikpo ọnhu phọ ọdi. Eḍighi mạar dị ẹkparanhaan nyịnha omheeraam mọ a Jehova mạsar ạwilhenhaan nyịnha ịkaraph dị nạ aḍighi ẹpe ọmhan, pọ puruan loor mọ: ‘Mị ameeraam ni mọ a Jehova aḍighi Ẹnhaan ọnma ighirigiir r’igbiririph dị kạ́bilhe ọsạr ọwilhenhaan oye dị aḍighi ịkaraph kụ akiton ḍụghum? Eḍighi mạar dị mị amheeraam ni, eeghe kụ iḍighi kụ ịkparanhaan bọ ịmhi omheeraam mọ ọdi mạsar ri ụwilhenhaan ịmhi?’

9. Rẹma ghan eeghe mem dị ọḅem mọ a Jehova mạsar ịkaraph phọ ayira ụwilhenhaan iyira? (Psalm 32:5)

⁹ Gbirima ghan ịpe ạbugeom a Bạịbul phọ ọghaaph bọ ịlo ọsar ọwilhenhaan phọ a Jehova. Esi ọmaam, ọoḅeghion ịpe a Devid ạghaaph bọ ịlo ọsar ọwilhenhaan phọ a Jehova. (Bạl Psalm 32:5.) A Devid ạḅem mọ: “Nạ ụsar ri ịkaraph phọ ạmhi ụwilhenhaan ịmhi.” Ekpo ọnhu a Hibru phọ ọgba bọ mọ “sạr ụwilhenhaan” rẹma ghan “ophoophe ọsighe,” “orool,” ọbobo “ọsighe ọḍuanham.” Mem mọ a Jehova ạsar bọ ạwilhenhaan Devid, a Devid alhoghoma mụdi a Jehova maphoophe ịkaraph phọ ọdi ẹemor bọ ịdipho adool ạsighe ạḍuanham. Ịphen phọ iḍighi ni ịdi ekpom a Devid esoor loor ịduon ọdi alhegheri bọ mọ a Jehova mạsar ạbilhenhaan nyọdi. (Ps. 32:2-4) Eniin phọ eten phọ kẹn kụ ẹdi ekpom ayira kesoor ḅịlhe olhoghi ayira ạpo. Eḍighi mạar dị yira oḍighi ịkaraph kụ yira mokiton kekpom, kụ́kiom mụn ghisigh uloghoma oboom apum, loor esi dị a Jehova mạsar ụwilhenhaan iyira ạḅilhe apoophe ịkaraph phọ ayira eḍighi bọ dool ạsighe.

10-11. Ikpo ọnhu phọ “ạnya ọsar ọwilhenhaan” ịtughemhi iyira eeghe ịlo a Jehova? (Psalm 86:5)

¹⁰ Bạl Psalm 86:5. Sịen esi ạ Bạịbul phọ ẹphen phọ, a Devid ạḅem mọ a Jehova “ạnya ni ọsar ọwilhenhaan.” Aḍiniin ạḍinya dị ẹghaaph ịlo ikpo ọnhu phọ ịphen phọ ịḅem mọ: “[A Jehova] aḍighi Ẹnhaan ‘ọsar ọwilhenhaan’—pọ kụ ‘ọlhem ọdi.’” Uḍigh ika kụ eḍighi bọ ọlhem a Jehova ọsar ghan ọwilhenhaan? Ẹpheripho ạga ẹkpigh esi ạ Bạịbul phọ ẹpe phọ ẹkaaph ni, ẹḅem mọ: “Ẹphomhoghian ọḅar phọ ạna eepaany ni esi ạbuphe rọmagh bọ nyịnha.” Ịdipho yira ọtuugha bọ sịphe ẹmhuoghaaph phọ eten bọ, a Jehova rạ́bilhe ghan rẹbenhe phọ ọdi rọoḅereghi bọ nyọdi, loor esi ẹphomhoghian ọḅar phọ ọdi. Kụ ẹphomhoghian ọḅar phọ a Jehova renyu ghan nyọdi ọsar ọwilhenhaan oopho oomo abuḍighinhom ịkaraph dị mokiton. (Isa. 55:7) Eḍighi mạar dị ẹkparanhaan nyịnha omheeraam mọ a Jehova mạsar ri ạwilhenhaan nyịnha ịkaraph dị nạ aḍighi ẹpe ọmhan, pọ nạ atue ni apuruan loor mọ: ‘Mị ameeraam ni mọ a Jehova aḍighi Ẹnhaan ọsar ọwilhenhaan dị ạnya ọsar ọwilhenhaan oomo ạbulo mokiton kụ rọlom nyọdi ọnma ạbidi ighirigiir ḍụghum? Eḍighi ịdipho, eeghe kụ iḍighi kụ mị úmeeraam bọ mọ a Jehova ạsar ri ụwilhenhaan ịmhi mem mọ mị amhoghi bọ ạlhom nyọdi ọnma ạmhi ighirigiir?’

¹¹ Ạ Bạịbul phọ ạḅem mọ a Jehova ạkar kụ ạnaghanhan e/munughan phọ ayira. Kụ ịpe phọ rịidereghi ghan iyira. (Ps. 139:1, 2) Ọmhiin ḍịnhon ạḍuor dị a Devid ạmhoor. Ạḍuor phọ ạḍiphe phọ kịlhoghonhaan iyira ḍịghaagh omheeraam mọ a Jehova rạsar ghan ni kụwilhenhaan iyira.

A JEHOVA RẠATUGHIAN GHAN EEGHE ỊLO AYIRA?

12-13. Ọdaphan Psalm 103:14, eeghe kụ ịdi a Jehova rạatughian ghan ịlo ayira, kụ ịpe phọ renyu ghan nyọdi oḍighi eeghe?

¹² Bạl Psalm 103:14. A Devid ạkaaph ịlo a Jehova mọ “rạatughian ghan ni mọ yira ịisaar.” R’ikpo ọnhu phọ ịphen phọ kụ ẹdi a Devid ạma amiteom eniin ịyaar phọ eḍighi bọ kụ a Jehova aakolhobian bọ ọsar ọwilhenhaan abuseenyom ọdi dị mokiton. Ọdi alegheri ni mọ ụmharam iyira ịkaraph. Orue ọnhaghanhan ịphen phọ, okiririom ophogh ikpo ọnhu phọ a Devid.

¹³ A Devid ạḅem mọ a Jehova “alegheri ni ịyaar phọ ụlhemom bọ iyira.” Ọdi ạsighe ịisaar ade phọ kụ ạlhemhom bọ Ạdạm, esi ịduon phọ ọdi alegheri ni mọ awe dị omhunhughan ọmoogh ni riisi dị osughanham—esi ọmaam, kẹwa ni mọ olhe eḍien, ọnaanhi, ḅịlhe ophooghu. (Gen. 2:7) Kụolo mem mọ Ạdạm r’Iv oḍighi bọ ịkaraph phọ, bịdi uḍighi kẹn ni ịisaar phọ ẹnhon ọdo eten. Ịdipho ạnmuny ạbidi, bịdi ụmharam iyira ịkaraph, kụ ịkaraph phọ ịpe phọ rinyu ghan iyira oḍighi ạraraar dị ị́nighe. A Jehova ólhegheri bịn mọ ụmharam iyira ịkaraph; ọdaphan ikpo ọnhu phọ a Devid, ọdi rạatughian ghan ni. Ekpo ọnhu a Hibru phọ ọsighe bọ oḍighinhom sịen phọ reḍeenhaan ghan mọ a Jehova rạzo ghan karu esi ayira r’ạghusan. Ẹmhu ikpo ọnhu phọ a Devid ịphen phọ pọ: A Jehova ạnaghanhan ni mọ mem etum mem yira koḍighi ni ịkaraph; kụ mem lọ yira oḍighi ịkaraph phọ, igbiririph renyu ghan ni nyọdi ọsar ọwilhenhaan ayira mem dị yira okiton kekpom.—Ps. 78:38, 39.

14. (a) A Devid ạghaaph mọ ọsar ọwilhenhaan phọ a Jehova raleeny ghan ika? (Psalm 103:12) (b) Yira ọtuugha eeghe esi eten phọ a Jehova ạsar bọ ạwilhenhaan Devid? (Mịin igbe phọ “Ịpe A Jehova Rạsar Ghan Bọ Kạwilhenhaan Kạḅilhe Awulha Ịkaraph.”)

¹⁴ Ọsar ọwilhenhaan phọ a Jehova asi k’iḍighen? (Bạl Psalm 103:12.) A Devid ạḅem mọ “Ịdipho emitenhom erumuḍio phọ ẹkelhan bọ emheelhom mọ, ịdipho kụ ẹdi a Jehova rạsighe ghan ịkaraph phọ ayira kạkele.” Ẹpe erumuḍio phọ rẹḍua ghan bọ kemite ẹkelhan ni iboom r’ẹpe erumuḍio phọ remeel ghan bọ. Ịyal phọ arikpisi phọ kétue ni bịn etuman. Ịphen phọ ịtughemhi iyira eeghe ịlo eten phọ a Jehova rạsar ghan bọ ịkaraph ayira kụwilhenhaan iyira? Aḍiniin ạḍinya dị ẹghaaph ịlo esi a Bạịbul phọ ẹphen phọ ẹḅem mọ: “Mem dị Ẹnhaan ạsighe ịkaraph phọ ayira ạkele, eḍu ịkaraph phọ r’ịitughian ịlo ịkaraph phọ mẹḍua.” Eḍu dị yira ọnhaghan ketue ni ịitughianham iyira ịyaar. Esi ịduon phọ, mem dị a Jehova ạsar ịkaraph phọ ayira ụwilhenhaan iyira pọ ịyaar résugha ghan mụn dị keḍighi ịdi ọdi kạḅilhe ạnaghan eḍu ịkaraph phọ kụ ạatughian ịkaraph phọ ayira ạḅilhe ụlhiom iyira.—Ezek. 18:21, 22; Iiḍ. 3:19.

15. Yira koḍighi eeghe eḍighi mạar dị olhoghi ayira ạghiom ghisigh rụuḅaghamhi iyira loor ịkaraph dị yira oḍighi ẹpe ọmhan?

¹⁵ Ika kụ ịdi ikpo ọnhu phọ a Devid edi bọ Psalm 103 kịlhoghonhaan iyira ḍịghaagh okuphom owol mọ a Jehova mạsar ri ịkaraph phọ ayira ạbilhe? Eḍighi mạar dị olhoghi ayira ạghiom ghisigh rụuḅaghamhi ghan iyira ịlo ịkaraph dị yira oḍighi ẹpe ọmhan, yira otue ni opuruan loor mọ: ‘Mị mawulha ịpe a Jehova rạatughian ghan bọ ịlo ayira ḍụghum? A Jehova rạatughian ghan mọ yira úmunughan, ḅịlhe kạsar ri ạbịlhenhaan tọrobo oye dị akiton kekpom. Kẹwa kẹn mọ puruan loor mọ: Mị rạatughian ghan rạraar dị a Jehova ạḅem mọ ọno kạ́atughian mụn ḍụghum? Ịyaar dị a Jehova rạ́atughian ghan mụn pọ ịkaraph dị ọdi mạsar ụwilhenhaan iyira. Ọdi kạ́tuan ịkaraph dị ọdi mạsar ạwilhe ụlhiom iyira. A Jehova ráatughian ghan mụn ịkaraph dị yira oḍighi ẹpe ọmhan. Kụ yira kẹn kụ́utughian ghan mụn. (Ps. 130:3) Yira okuphom owol mọ a Jehova mạsar ụwilhenhaan iyira pọ kịlhoghonhaan iyira ḍịghaagh ọsar ọwilhenhaan aloor ayira, bịn yira mọghiom ghisigh okumu a Jehova r’ọḅaal olhoghi.

16. Kạaph ạmaaniom ooto r’osooromineen phọ odi bọ ọotughian ghan ịkaraph dị yira oḍighi ẹpe ọmhan. (Miịn kẹn afoto phọ.)

¹⁶ Tụutughian ọghaaph ọmaaniom mọ ọphon. Yira ọghiom ghisigh ọotughian ghan ịkaraph dị yira oḍighi ẹpe ọmhan pọ yira ọkigh oye dị rakiilhom moto kụ ạwilhe ophogh ghan ẹpe arisigh phọ bịn kụ agbon atamaḍiki phọ raḍeenhaan ghan bọ rạraạr dị remite ọmhan. Ii ọbo íbeeph ophogh ghan eeni amem atamaḍiki ọmhan phọ pịdi oye phọ ạmiin rạraar dị remite ẹpe ọmhan. Kụolo eḍighi mạar dị oye phọ agbon ophogh ghan atamaḍiki ọmhan phọ bịn, oye phọ atue ni akiil ạki ạzam ịyaar. Iniin phọ kẹn kụ edi aani esi ịkaraph phọ yira oḍighi bọ. Íbeeph ọotughian ghan eeni amem ịkaraph dị yira oḍighi ẹpe ọmhan, loor esi dị kịlhoghonhaan iyira ḍịghaagh dị yira kóḍighi mụn ịkaraph phọ ịpe phọ. Kụolo eḍighi mạar dị yira ogbon ọotughian ghan ịkaraph phọ yira oḍighi bọ ẹpe ọmhan, olhoghoma apum kámeera mọ ọmhoogh ọḅaal olhoghi ḅịlhe ọbughe rukumuan phọ yira rọngo bọ a Jehova. Esi ịduon phọ, ogbon ghụn sịphe eten phọ rirorori bọ iyira kẹlhogh omhoom aḅirinhi phọ Ẹnhaan. Sịphe phọ, yira “kọ́otughian ghan mụn” ịkaraph ạraraar dị imitenhaan ghan iyira.—Isa. 65:17; Prov. 4:25.

KỊOM GHISIGH AKUPHOM OWOL KEKPOM ẠNA

17. Uḍighi ika kụ ẹwa bọ mọ okuphom owol kekpom ịlo ẹphomhoghian r’ọsar ọwilhenhaan phọ a Jehova?

¹⁷ Ẹwa ni dị yira kọkiom ghisigh omeeraam kekpom mọ a Jehova ụphomhoghian ni iyira ạḅilhe rạsar ghan ịkaraph ayira kạwilhe. (1 Jọn 3:19) Eeghe kụ iḍighi? Loor esi dị a Setạn óphooghian. Ọdi ạkiom ni ghisigh rạkparagha ghan oḍighi ịdi yira kologhoma mọ a Jehova iyira úphomhoghian ḅịlhe mọ kátue ạsar ụwilhenhaan iyira ịkaraph ayira. Aḍiigbu a Setạn pọ oḍighi ịdi yira kọbilhe okumu a Jehova. Yira olegheri ni mọ ọdi kaḍighi ni ịduon phọ ạkiom ghisigh, ịdị eḍighi bọ ọdi alegheri mọ amem mọ ọdi mekper. (Ogan. 12:12) Kúmeera ọdi ạkpar upu iyira!

18. Nạ kaḍighi eeghe orue omheeraam kekpom mọ a Jehova ạphomhoghian ni nyịnha ạḅilhe rạsar ghan ịkaraph phọ ạna kạwilhe?

¹⁸ Orue okuphom owol mọ a Jehova ạphomhoghian ni nyịnha, pọ sịghe aḍighinhom rạraar phọ ọmaaghi bọ sịphe ẹmhuoghaaph phọ eten bọ. Orue okuphom owol mọ a Jehova mạsar ri ạwilhenhaan nyịnha, pọ tụutughian ịpe ọdi ạghaaph bọ ịlo ọdi sịphe ạ Bạịbul phọ. Agbirima ịpe ạbugeom ạ Bạịbul phọ ọghaaph bọ ịlo ạsar ọwilhenhaan phọ ọdi. Kábulha mọ ọdi alegheri ni mọ yira úmunughan, kụ ạnya ni ọsar ọwilhenhaan ayira. Legheri kẹn mọ, mem dị a Jehova ạsar ụwilhenhaan iyira, ọdi rạsar ghan bịn kạmadan. Bịn nạ kạmoogh ni ọḅaal olhoghi loor esi dị nạ akuphom owol mọ a Jehova mạsar ri ạwilhenhaan nyịnha. Kụ ịdiphọ a Devid, nạ katue ni ạḅem aani mọ, “Maḍighi wo, Jehova, ọsar ọwilhenhaan ạmhi!”—Ps. 32:5.