EMHUOGHAẠPH ITUUGHẠ PHỌ 16
AḌUỌR PHỌ 87 Come! Be Refreshed
Oḍuraan Ghan Otuman ABumor R’aBumaranhi Phọ Ayira Kụ Inhighenhaạn Iyira!
“P’eeghe idị enhighẹ eḅilhẹ edụgh dị abumor odimom r’amuḅọph!”—PS. 133:1.
EGBON
Raraạr dị kilhoghonhaạn iyira ḍighaạgh oḍuraan otuman abumor r’abumaranhi phọ ayira r’aḍisẹph kirokirọ dị yira kokelhọm mem dị yira oḍigh righirị r’abidị.
1-2. Eeghe kụ eniin iyaạr dị emhạn maạr agey esi aZihova, kụ odị rawạ mọ oḍighi eeghe?
IPẸ yira rozoọm ghan bọ bunhọn emạn maạr agey esi aZihova. AZizọs atughemhị mọ ophomhoghiạn bunhọn idiphọ aloor ayira. (Mat. 22:37-39) Iphẹn phọ remạ ghan mọ ozoọm ghan ni egey eten ghalhamọ r’awe dị u/moọgh oniin phọ omheeraam mọ r’ayira. Yira oḍighi iduọn phọ, pọ yira rotuughaạny ghan aZihova Enhaạn phọ ‘ogogo phọ odị amụ rasoorom ghan bọ bugey r’abukarạph, ḅiIẹ oIophiạ phọ raIophọm ghan bọ bugey r’abukarạph.’—Mat. 5:45.
2 Ghalhamọ r’iduọn aZihova aphomoghiạn bọ ni oomo awe, abuphẹ ronaghanhạn ghan bọ nyodị kụ ukạr oḅeraạn nyodị. (Jọn 14:21) Odị rawạ mọ yira otuughaạny nyodị. Esi iduọn phọ, odị uḅenhị iyira mọ omhoọgh ephomhoghiạn dị eḍiinyan oghị esi abumor r’abumaranhi phọ ayira. (1 Pit. 4:8; Rom. 12:10) Edọ phọ ephomhoghiạn phọ ephẹn phọ, kekighimaạm nyepẹ yira romoọgh ghan bọ koghị esi asiya ayira, nmụny onhiin ayira obobọ ogbogh oyaghirị ayira.
3. Eeghe iyaạr ilọ ephomhoghiạn kụ edị ewạ mọ ootughiạn ghan?
3 Orue ophamhanhạm ephomhoghiạn abumor phọ ayira, etọl idiphọ yira komaạr bọ opogh falawạy dị yira ozụph, pidị aḍum. Otelhedom mọ aPọl aroma Kristẹn mọ: “Oniin aphomoghiạn ghan ni nyoniin, idiphọ abuọ asiya esi aKraist.” (Hib. 13:1) AZihova rawạ mọ oghiọm ghisigh obughẹ ephomhoghiạn phọ yira omhoọgh bọ esi abunhọn. Siẹn emhuoghaạph phọ ephẹn phọ, yira kooḅeghiọn iyaạr phọ ewạ bọ mọ oḍuraan otuman bumor r’abumaranhi phọ ayira ḅilhẹ r’idị yira kokiọm ghisigh oḍighi ghan iduọn phọ.
IYAẠR PHỌ EWẠ BỌ MỌ OḌURAAN OTUMAN BUMOR R’ABUMARANHI PHỌ AYIRA
4. Ika kụ idị yira kokiọm ghisigh osereghiạn ghan muḅọph phọ odi bọ igbo ayira oghaạph bọ siphẹ Psalm 133:1? (Miịn kẹn sifoto phọ.)
4 Bạl Psalm 133:1. Yira omeeraam ni ipẹ okọ suọr phọ aḅẹm bọ mọ oḍigh arighirị r’abuphẹ ophomhoghiạn bọ aZihova “enighẹ” kụ eḅilhẹ “edụgh.” Kuolọ, oḅẹm odi ni dị aḅẹm mọ ogbor omhiịn aḍikia, kụ iduọn phọ ni. Ogbor ghan omhiịn abumor r’abumaranhi phọ ayira etue ni ekọm idị yira ko/maghamhị maạr muḅọph phọ odi bọ igbo ayira. Esi iduọn phọ, ika kụ idị yira kokiọm ghisigh osereghiạn ghan bumor r’abumaranhi phọ ayira? Ephomhoghiạn phọ ayira esi abumor r’abumaranhi phọ kebụgh mem dị yira ootughiạn ghan idị bidị omhạn maạr esi ayira r’ookpomhoghan phọ.
Kiọm ni ghisigh amhaghamhị maạr muḅọph phọ odi bọ igbo ayira (Miịn ekpịgh phọ 4)
5. Ephomhoghiạn phọ edi bọ igbo ayira retir ghan ika bunhọn?
5 Ephomhoghiạn phọ yira roḍeenhaan ghan bọ retir ghan ni we dị eḍighi eḅẹl amem oru aani ituughạ . Bidị rokol ghan iphẹn phọ koḅẹm mọ bidị momhiịn igey phọ. AZizọs aḅẹm mọ: “Oniin aphomoghiạn ghan nyoniin kụ oomo awe oIegheriom mọ nyina kụ abumatuạn phọ amị ni.” (Jọn 13:35) Ooḅeghiọn eḍeenhaan aChaithra, onyanhị dị arọl ogbogh askul kụ amhiigh otuughạ aBaibul phọ r’Abugbaanhaạn AZihova. Abugbaanhaạn phọ umhạgh ni nyodị oghị aani ookpomhoghan eephugh dị ophạm. Odị r’oghị eḅẹl aḍio phọ, odị aḅenhị opọ ratughemhị ghan bọ nyodị Baibul phọ mọ: “K’ekulha odẹ r’onhiin amhị imhị k”uḅol ghan. Kuolọ mị aru bọ ookpomhoghan eephugh phọ anyinha, 52 awe kụ uḅol imhị ḍio bịn! Mị ukạr kụ alhoghoma ephomhoghiạn phọ aZihova igbo abumor r’abumaranhi phọ. Mị rawạ oḍighi aani apakirị eghunotu phọ ephẹn phọ.” AChaithra aphoph ni aghị ghisigh aḍiiny muụm lhạ phọ 2024. Ii, mem dị awe dị purukụ oḍigh siẹn ookpomhoghan phọ omhiịn imạ iiḍighi phọ ayira, eḅaramaạm bọ ephomhoghiạn phọ yira omhoọgh bọ igbo ayira, renyu ghan ni bidị okumu aZihova.—Mat. 5:16.
6. Ika kụ idị oḍuraan otuman abumor r’abumaranhi phọ ayira ketue ighoph iyira?
6 Oḍuraan otuman abumor r’abumaranhi phọ ayira ketue ni ighoph iyira. APọl aromha Kristẹn phọ mọ: “Kparipẹ dị ikarạph kiikeleghi inyina . . . oniin aloghonaạn ghan ghụn nyoniin ḍighaạgh ḍio etum ḍio.” (Hib. 3:13) Eḍighi maạr dị yira oḅonyonhu ozuan bịn enụm enụm yira roḍuạ isiẹn igey phọ, aZihova katue ni anyu onyọ umor obobọ umaranhi olhoghonhaạn ayira ḍighaạgh mem dị amhiịn dọl phọ ayira. (Ps. 73:2, 17, 23) Odọ olhoghonhaạn aḍighaạgh phọ opọ phọ akạr kụ unhighenhaạn iyira.
7. Eeghe amuḅọph kụ odi igbo ephomhoghiạn r’oḅọph onhụ? (Kolosị 3:13, 14)
7 Loor iduọn yira odi bọ igbo egu awe dị rolọgh ghan ikuph oḍeenhaan ephomhoghiạn oniin atum nyoniin, yira rokelhọm ghan ni ḍisẹph kirokirọ. (1 Jọn 4:11) Esi omaạm, ephomhoghiạn rinyu ghan iyira omhinhoghọm ghan r’osạr ikarạph abunhọn owilhenhaạn. Kụ ipẹ phọ relọgh ghan kephophe oḅọph onhụ phọ ayira. (Bạl Kolosị 3:13, 14; Efẹ. 4:2-6) Esi iduọn phọ, esi i/lo siẹn ade phọ dị repọ ghan keeleeny mem dị yira oghị ituughạ.
ONIIN AGHUENHI GHAN NYONIIN
8. Ika kụ idị aZihova rulhoghonhaạn ghan iyira ḍighaạgh omhoọgh amuḅọph r’abumor r’abumaranhi phọ?
8 Amuḅọph phọ yira rokelhọm bọ igbo abumor r’abumaranhi phọ siẹn oomo aḅirinhi phọ ekạr kụ eḍighi iiḍaạny. AZihova kụ aḍighi bọ idị iphẹn phọ edugh etigheri e/munughan phọ ayira. (1 Kọr. 12:24, 25) ABaibul phọ aḅẹm mọ “Enaạn mitughemị ni [iyira] ilọ oniin kaphomoghiạn ghan nyoniin.” (1 Tẹs. 4:9) Iduọn phọ pọ, aZihova asighẹ Baibul phọ rutughemhị ghan iyira raraạr dị ewạ dị yira koḍighi obọ oniin aḍuraan atuman nyoriphọ. Yira rongọ ghan eepoogh dị aZihova kutughemhị iyira mem dị yira omhiigha loor otuughạ kụ oḅilhẹ osighẹ oḍighinhom raraạr phọ ipẹ odị aghaạph bọ ilọ oḍeenhaan ghan ephomhoghiạn. (Hib. 4:12; Jems 1:25) Kụ ipẹ kụ idị Abugbaanhaạn AZihova rokparaghạ ghan oḍighi.
9. Rom 12:9-13 itughemhị iyira eeghe ilọ ophurọm oghuenhi ghan ophoriphọ oye phọ?
9 Ika kụ idị Ekpo Onhụ phọ Enhaạn ritughemhị ghan iyira oḍuraan otuman abumor r’abumaranhi phọ ayira? Ooḅeghiọn idị aPọl aghaạph ilọ oghaạph phọ ophọn phọ, idiphọ edi bọ Rom 12:9-13. (Bạl.) Lọgh elhegh mọ odị aḅẹm mọ “oniin aphurọm ghan aghueni nyoniin.” Ikpo onhụ phọ iphẹn phọ remạ ghan eeghe? Remạ ghan mọ yira owạ ghan roopoogh oḍeenhaan ephomhoghiạn “idiphọ anmụny onhiin,” esi osạr ghan owilhenhaạn, olhọgh ghan awe otu, r’onmo ghan inmo bumor r’abumaranhi phọ. (Efẹ. 4:32) Iphẹn phọ remạ ghan mọ ka/koriom mọ onyọ umor obobọ umaranhi kụ aphụr aḍuraan atuman nyinhạ, nạ kụ kem aḍighi iduọn phọ. Bịn nạ kamooghọm ni suọ iphẹn aZizọs aḅẹm bọ mọ: “Ibo k’Enaạn edianaan buphẹ rongọ bọ epu buphẹ roboọr bọ.”—Iiḍ. 20:35.
10. Ika kụ idị yira kolọgh inyaạm oghuenhi ghan ophoriphọ oye phọ? (Miịn kẹn afoto phọ.)
10 Eḍighi ni iyaạr aḍiḅeraạn olhegheri mọ mem mọ aPọl uromha bọ iyira mọ ophurọm ghan oghuenhi ophoriphọ oye phọ, odị aḅilhẹ ni aḅẹm mọ “ikpạr ḍighaạgh, oye ku/gboghoIeẹr ghan.” Oye dị akpạr ḍighaạgh raḍighinhom ghan iyaạr r’oophugh. Mem dị ongọ nyodị iyaạr oḍighi ralọgh ghan inyaạm oḍighi iyaạr phọ. Proverbs 3:27, 28 uromha iyira mọ: “Torobọ amem lọ nạ katue ni, ḍighi iiḅi angọ bulọ owạ.” Esi iduọn phọ, mem dị yira omhiịn oye dị amhoghi olhoghonhaạn aḍighaạgh, yira roḍighi ghan ni oomo ipẹ yira kotue bọ olhoghonhaạn odị ḍighaạgh. Yira roo/binyemhiom ghan obobọ roo/tughiạn ghan mọ onhọn oye kaloghonhaạn ni ḍighaạgh.—1 Jọn 3:17, 18.
Yira ophurọm ghan olhoghonhaạn ghan ḍighaạgh bumor r’abumaranhi dị omhoghi olhoghonhaạn aḍighaạgh (Miịn ekpịgh phọ 10)
11. Eeghe kụ kilhoghonhaaạn iyira ḍighaạgh oḍuraan otuman abunhọn?
11 Enhọn eten oghuenhi ghan abunhọn pọ onhuụn ghan osạr owilhenhaạn mem dị bidị upiomạn iyira. Efesọs 4:26 eḅẹm mọ: “lghạgh iloghi phọ anyina ki/tọI ghan oomo emụ aḍio.” Eeghe kụ iḍighi? Ekpịgh phọ 27 eḅẹm mọ oḍighi iduọn phọ kengọ “eepoogh Eru phọ.” Siphẹ aBaibul phọ, aZihova uḅenhị ni iyira ibadị amem mọ osạr ghan owilhenhaạn bunhọn. Kolosị 3:13 uromha iyira mọ “Iminoghọm ghan esạr ghan ewilenaạn ikarạph Iọ awe iḍighi inyina.” Iyaạr i/lo dị reḍur ghan we kegbiemhị kepu mem dị oniin asạr ghan opiomạn oniin awilhenhaạn. Yira osạr ghan owilhenhaạn bunhọn, kilhoghonhaạn iyira ḍighaạgh ophamhanhạm “oḅọph onhụ phọ Uwaloor Iigbia phọ rangọ ghan bọ, loor eephọ phọ epẹ iḅạr bọ [iyira] eḅophoghị.” (Efẹ. 4:3) Eegholhaan ni mọ osạr ghan ikarạph oniin owilhenhaạn relọgh ghan kephophe muḅọph r’eephọ phọ ayira.
12. Ika kụ idị aZihova rulhoghonhaạn ghan iyira ḍighaạgh osạr ghan owilhenhaạn abunhọn?
12 Ogbạ agey, re/dugh ghan osạr owilhenhaạn oye dị upiomạn iyira. Kuolọ r’olhoghonhaạn aḍighaạgh uwaloor iigbia phọ Enhaạn, yira kotue ni. ABaibul phọ ruromha bọ iyira mọ “oniin aphomoghiạn ghan nyoniin idiphọ anmụny onhiin” ḅilhẹ mọ ‘okpạr ḍighaạgh,’ aBaibul phọ aḅilhẹ ni aḅẹm mọ: “Isighẹ eenyuụm UwaIoor Iigbia phọ eḍighinom ghan oḍighi.” Oye dị “eenyuụm uwaloor iigbia phọ” edi loor, oophugh phọ odị raganana ghan ni. (Rom 12:11.) Esi iduọn phọ, uwaloor iigbia phọ Enhaạn katue ni ulhoghonhaạn iyira ḍighaạgh oḍeenhaan ghan ephomhoghiạn r’osạr ghan owilhenhaạn abunhọn. Kụ iḍighi kụ, olhọm ghan aZihova ulhoghonhaạn iyira ḍighaạgh orue oḍighi iduọn phọ.—Luk 11:13.
“AMADIA KU/TỌL” SIPHẸ IGBO PHỌ ANYINHA
13. Eeghe kụ ketue ni ekọm madia siẹn igbo phọ ayira?
13 Awe arikpisi kirokirọ kụ odi bọ siẹn ookpomhoghan phọ. (1 Tim. 2:3, 4) Esi iduọn phọ, eḍighi iyaạr dị yira u/gona loor, eten iinmenan abidị, eten arookonhoma, ḅilhẹ r’eten ozaamiạn aloor abidị ketue ni ekọm madia siphẹ ookpomhoghan phọ. (Rom 14:4; 1 Kọr. 1:10) Loor iduọn ‘Enaạn mitughemị bọ iyira ilọ oniin kapomoghiạn ghan nyoniin,’ yira ogonha loor pidị yira ko/ḅo ghan mudị ilọ ayira bịn kụ inhighẹ obobọ ko/kpaariọm ghan bunhọn odaphạn iḍighinhom araraạr ilọ ayira bịn.—Fil. 2:3.
14. Eeghe kụ edị ewạ mọ yira oḍighi ghan, kụ eeghe kụ iḍighi?
14 Yira kotue ni oḍighi idị amadia ka/tọl siẹn ookpomhoghan phọ esi okparamhị ghan r’olhọgh ghan abunhọn ophophe. (1 Tẹs. 5:11) Ibadị awe dị moophoọm obobọ ogbatạn osighẹ siẹn ookpomhoghan phọ moḅilhẹ oḅula. Kụ yira rosighẹ ghan ni bidị r’eenyuụm! (2 Kọr. 2:8) Lọgh elhegh idị emitenhaan oniin onyọ umaranhi dị aaphoọm siẹn igey phọ esi aḍioph asiạ, kụ aḅilhẹ amhiigh oru ituughạ. Odị aḅẹm mọ, “abumor r’abumaranhi phọ uyighọgh kụ oru ulhọgh imhị ḍighaạgh.” (Iiḍ. 3:19) Ika kụ idị iphẹn phọ etir nyodị? Odị aḅẹm mọ, “Iphẹn phọ iḍighi idị mị alhoghoma mọ aZihova rawạ mọ mị uḅilhẹ umoọgh oḅaạl olhoghi.” Yira olhọgh ghan ophophe oomo awe, pọ aKraist kusighẹ ni iyira aamhanhamhiom buphẹ rokunumạ bọ kụ okporokporọ bọ.—Mat. 11:28, 29.
15. Eghẹn kụ enhọn eten olhọgh ophophe amuḅọph phọ ayira? (Miịn kẹn afoto phọ.)
15 Enhọn eten dị yira rolọgh ghan kophophe muḅọph phọ ayira pọ esi ikpo onhụ phọ ayira. Job 12:11 eḅẹm mọ: “Idiphọ anem relegheri ghan bọ eḍien dị edụgh kụ edị aḅeri phọ ralegheri ghan ikpo onhụ dị edụgh.” Idiphọ oye rasạ eḍien raanemạ ghan bọ enụm kụ agbi okorogh ongọ abunhọn, kụ edị ewạ mọ ophụr ghan ootughiạn ikpo onhụ phọ ayira kụ ogbi oḅạ. (Ps. 141:3) Aḍiigbu ayira pọ omhiịn mọ ikpo onhụ phọ ayira elọgh ni epophe, eemhanhamhi, ḅilhẹ engọ suọ “buphẹ ronaghạn bọ.”—Efẹ. 4:29.
Tuutughiạn ghan ikpo onhụ kụ aḅạ (Miịn ekpịgh phọ 15)
16. Abuọ anhiạn kụ edị ekạr ekpaariọm oḅạ ghan ikpo onhụ dị kelọgh bunhọn epophe?
16 Ekạr ekpaariọm dị aburulom ḅilhẹ aburudẹ r’aburunhiin kooḅeghiọn ghan ikpo onhụ phọ abidị kụ ogbi oḅạ obọ elhọgh ephophe bunhọn. (Kọl. 3:19, 21; Taị. 2:4) Ikumor awe ookpomhoghan phọ kẹn oomhanhamhi ghan oḅilhẹ oodereghị ghan iyool phọ aZihova. (Isa. 32:1, 2; Gal. 6:1) ABaibul phọ uḅenhị iyira mọ: “Ekpo onhụ dị oḅạ mem mọ opọ ekpeanhaạn bọ—p’eeghe idị enhighẹ!”—Prov. 15:23.
EḌIGHI “EPHOMOGHIẠN DỊ KOMIỊN GHAN SIPHẸ EḌIGHINOM IYAẠR PHỌ AYIRA”
17. Yira koḍighi ika kụ ephomhoghiạn phọ ayira esi abumor phọ eḍuạ ghan k’ekpom kụ emite?
17 Otelhedom mọ aJọn uromha iyira mọ “ku/pomoghiạn ghan ephomoghiạn onhụ r’onhụ; eḍighi ghụn egey ephomoghiạn dị komiịn ghan siphẹ eḍighinom iyaạr phọ ayira.” (1 Jọn 3:18) Ephomhoghiạn phọ ayira esi abumor r’abumaranhi phọ eḍuạ ghan k’ekpom kụ emite. Yira koḍighi ika kụ ephomhoghiạn phọ ayira eḍuạ k’ekpom kụ emite? Mem dị yira ogbor ghan omiteom mem orọl ghan r’abumor r’abumaranhi phọ ayira, kụ oḅilhẹ ghan oghaaphạn bidị, yira koḍuraan ni iboom otuman bidị ḅilhẹ ephomhoghiạn phọ ayira ekpạr. Esi iduọn phọ, wạ ghan roopoogh orọl r’abidị, emhiigh mem dị oghị ituughạ Kindọm Họl ḅilhẹ r’amem dị omite epẹ erugh phọ. Mite aani ghan k’abidị. Yira oḍighi ghan iduọn phọ, pọ yira roḍeenhaan ghan mọ ‘Enaạn mitughemị iyira ilọ oniin kapomoghiạn ghan nyoniin.’ (1 Tẹs. 4:9) Kụ kẹn, yira kokạr kụ okelhọm iphẹn okọ suọr phọ aḅẹm bọ mọ, “p’eeghe idị enhighẹ eḅilhẹ edụgh dị abumor odimom r’amuḅọph!”—Ps. 133:1.
AḌUỌR PHỌ 90 Encourage One Another