Nạ Matuughạ Ni Ilọ Omhoọgh Ghan Ogbaanyạn Ḍughụm?

1. Remạ ghan eeghe omhoọgh ogbaanyạn, kụ eeghe kụ idị re/mạ ghan?

NẠ AḌIGHI ni oye dị ramoọgh ghan ogbaanyạn ḍughụm? Oye dị amhoọgh ogbaanyạn ramoọgh ghan ibo r’eephọ loor esi dị odị agbon ipẹ aZihova masephọm bọ nyodị. Odị ra/kunhumạ ghan obobọ ra/kạgh ghan olhoghi loor esi dị odị k”omhoọgh iniin araraạr dị odị rawạ. Omhoọgh ogbaanyạn re/mạ ghan mọ oye phọ ka/kumuan ghan omhoọgh araraạr phọ ipẹ odị amhoghi bọ. Esi omaạm, i/beeph dị onyọ aKristẹn kawạ osianhaan omhoọgh aroopoogh arukumuan siẹn ookpomhoghan phọ. (Rom. 12:1; 1 Tim. 3:1) Kuolọ eḍighi maạr dị odị amhoọgh ogbaanyạn, pọ odị ka/toph ibo odị mem dị aroopoogh arukumuan phọ k”eru.

2. Eeghe kụ ketue emite mem lọ yira u/moọgh ogbaanyạn?

² E/moọgh ogbaanyạn retorori ghan oye kelhọgh esi iiḅaghamhị. Esi omaạm, ketue ni eḍighi idị oye kalọgh muboom amem okumuan omhoọgh araraạr dị odị u/kạr umoghi. Dị eeph ni, e/moọgh ogbaanyạn meḍighi ni idị abunhiin aKristẹn momhi ikpoki r’inhọn araraạr dị bidị rowạ. Eeni bidị rootughiạn ghan mọ, ‘mị makpẹ ni omhoọgh iyaạr phọ ephẹn,’ ‘mị makori apughạn,’ obobọ ‘mị usighẹ ikpoki phọ iphẹn phọ, moọny amem kụ mị akpẹ.’ Kuolọ, oomo areten imhi, i/ḅeraạn aZihova. (Prov. 30:9) Bunhiin moḅonyonhu ni ozuan loor aroopoogh dị bidị k”omhoọgh, bịn obilhenhọm okumu aZihova. (Gal. 6:9) Nạ ragbi ghan mọ eeghe kụ kekọm dị ebenhẹ aZihova kamiigh oḍighi iphẹn phọ? Remiigh ghan mem dị oye phọ u/moọgh mun ogbaanyạn.

3. Eeghe iyaạr kụ idị yira otuughạ siphẹ Filipai 4:11, 12?

³ Oomo phọ ayira kotue ni otuughạ ilọ omhoọgh ghan ogbaanyạn. Otelhedom mọ aPọl agẹ mọ “mị matuughạ dọI dị iIọ mị amoọgh rigbaanyạn ghan ni imị.” (Bạl Filipai 4:11, 12.) Odị aḅạ ikpo-onhụ phọ iphẹn phọ mem dị odị odi ikoli. Ghalhamọ r’iduọn phọ ni bịn odị o/roph ibo phọ odị. Odị atuughạ ilọ omhoọgh ghan ogbaanyạn esi atorobọ iyaạr dị odị amhoọgh. Eḍighi maạr dị ikparanhaạn iyira omhoọgh ogbaanyạn, pọ ikpo-onhụ r’eḍeenhaan phọ aPọl ketue ni ilhoghonhaạn iyira ḍighaạgh. Ii, re/dugh ghan omhoọgh ogbaanyạn, kuolọ yira kotue ni otuughạ ilọ omhoọgh ogbaanyạn. Ika? Ooḅeghiọn iyạl araagharạ dị kilhoghonhaạn iyira ḍighaạgh omhoọgh ogbaanyạn.

MOỌGH EEGHARẠ OSEREGHIẠN GHAN

4. Ika kụ idị eegharạ osereghiạn ghan rilhoghonhaạn ghan iyira ḍighaạgh omhoọgh ogbaanyạn? (1 Tesalonikạ 5:18)

⁴ Eegharạ osereghiạn ghan reḍighi ghan idị oye ramoọgh ghan ogbaanyạn. (Bạl 1 Tesalonikạ 5:18.) Esi omaạm, mem dị yira okạr osereghiạn iịny araraạr dị yira momhoọgh, yira koo/ḅaghamhiạn ghan loor ilọ araraạr dị yira rowạ kụ k”omhoọgh. Eḍighi maạr dị yira okạr osereghiạn roopoogh arukumuan dị yira rokelhọm nyiidiphọ siẹn ookpomhoghan phọ, pọ yira kogbon ghụn oḍighi okuamhị oḍighi phọ kparipẹ r’ogbon ipẹ yira k”omhoọgh bọ. Iikia i/lọ aBaibul phọ uromha bọ iyira mọ ongọ ghan Enhaạn ḍisẹph mem dị yira rooḅereghị! Eegharạ osereghiạn ghan rilhoghonhaạn ghan iyira ḍighaạgh olhoghoma “eephọ phọ k’Enaạn epel bọ dị oye katue alegheri.”—Fil. 4:6, 7.

5. Eeghe ariphigh kụ edị awe phọ Izrạl mukol osereghiạn ipẹ bidị omhoọgh bọ? (Miịn kẹn afoto phọ.)

⁵ Ooḅeghiọn eḍeenhaan awe phọ Izrạl. Ibadị amem bidị ugum ghan ni oḅenhị aZihova mọ bidị ro/le ghan mun riiḍien phọ bidị oghelhọm ghan bọ epẹ Ijipt. (Num. 11:4-6) Ii obọ adọl aghuḍum epẹ edalạ phọ ikpạr ri. Kuolọ eeghe kụ miloghonhaạn ḍighaạgh we Izrạl omhoọgh ogbaanyạn? Bidị muutughiạn imạ phọ ipẹ aZihova maḍighinhaan bọ bidị epẹ omhạn. Epẹ Ijipt, bidị uḍighi rebenhẹ kụ omhiinhẹ ghan bidị kẹn, kuolọ aZihova asighẹ ni ḍioph araraạr alhiọm we phọ Ijipt. Mem mọ eteẹny bọ dị bidị koḅuạ, awe phọ Ijipt ungọ ni bidị torobọ iyaạr dị bidị olhọm, idiphọ agol, siliva, r’iinmenhian. (Ex. 12:35, 36) Mem mọ awe phọ Ijipt mophorogh bọ we phọ Izrạl roteẹny siphẹ ophiịny igbilha phọ, aZihova adi ni muụm mọ eten iiḍaạny kụ amiteom eten ogbo ophiịny phọ. Kụ mem mọ bidị odi bọ epẹ edalạ phọ, aZihova amiteom ni kẹn manạ dị bidị olhe ghan. Kuolọ uḍighi ika kụ awe phọ Izrạl ogum ghan bọ etigheri oomo iphẹn phọ? Bidị u/moọgh ogbaanyạn. I/ḍighi edị oḅẹm mọ bidị u/moọgh eḍien olhe, kuolọ bidị u/sereghiạn ipẹ bidị omhoọgh bọ mem mọ amuphẹ phọ.

6. Ighẹn kụ iniin areten dị kilhoghonhaạn iyira ḍighaạgh omhoọgh eegharạ osereghiạn ghan?

⁶ Ika kụ idị nạ katue amoọgh eegharạ osereghiạn ghan? Eḅẹl phọ, miteom ghan mem torobọ aḍio aatughiạn ghan imạ araraạr dị nạ rakelhọm. Nạ atue kẹn ni agẹ iyạl obobọ iraạr ikpo araraạr dị nạ aghol rasereghiạn. (Lam. 3:22, 23) Iyạl, ḍighi aḍeenhaan mọ nạ rasereghiạn ni. Kem ghan asẹph we dị oḍighinhaan nyinhạ iyaạr. Edị epelhom pạ, sẹph ghan aZihova egbạ gbạ mem. (Ps. 75:1) Iraạr, saḅạr righirị dị omhoọgh eegharạ osereghiạn ghan. Arighirị ayira kụ omhoọgh eegharạ osereghiạn ghan, pọ yira komoọgh aani ni, kụ omhoọgh eegharạ e/gbaanyạn, pọ kiten aani ni iyira. (Deut. 1:26-28; 2 Tim. 3:1, 2, 5) Mem dị yira ogbon osereghiạn ghan ipẹ yira omhoọgh bọ r’osẹph ghan awe lọ uḍighinhaan iyira iyaạr, pọ yira k”okạr ooḅaghamhiạn ghan loor ilọ iiḅaghamhị ayira r’araraạr dị yira u/moọgh.

7. Ika kụ idị Aci arue amhoọgh eegharạ osereghiạn ghan, eeghe asuọ kụ edị odị amhooghọm?

⁷ Ooḅeghiọn eḍeenhaan Aci, epẹ Indonesia. Odị aḅẹm mọ: “Mem ezẹgh aCOVID-19 phọ, mị umhiigh ni osighẹ adọl phọ amhị otomaạm ilọ abunhọn abumor r’abumaranhi. Iphẹn phọ ikọm idị mị u/moọgh mun ogbaanyạn.” (Gal. 6:4) Eeghe kụ ilhoghonhaạn Aci ḍighaạgh onme iitughiạn phọ odị? Odị aḅẹm mọ: “Mị umhiigh ogbon aḍisẹph phọ mị ramoọgh ghan bọ torobọ aḍio, mị aḅilhẹ kẹn aatughiạn ilọ asuọ phọ mị mamhoọgh bọ oḍighom aani ookpomhoghan phọ aZihova. Mị ughol li iphẹn phọ asẹph aZihova, bịn mị amhoọgh ogbaanyạn.” Eḍighi maạr dị olhoghi anạ u/ḅaạl ilọ adọl phọ anạ, nạ atue ni aḍighi aani iphẹn Aci aḍighi bọ orue omhoọgh eegharạ osereghiạn ghan.

GBON OGBI PHỌ AZIHOVA KỤ AGHIỌM GHISIGH ASOOROMHI LOOR

8. Eeghe aḍiphil kụ idị aBaruch amheel?

⁸ ABaruch, ogeeghiạ oyil phọ Jeremiah, amheel li ḍiphil e/moọgh ogbaanyạn. ABaruch amhoọgh ni ogbagarạ oḍighi, oḍighi obakị aJeremiah phọ ragbeelhom bọ dom ooruẹn phọ kaḅenhị eelhe phọ Izrạl u/sereghiạn bọ ipẹ aZihova maḍighinhaan bọ bidị. Amem irọl li dị aBaruch u/gbon mun oḍighi phọ odị. Kparipẹ rogbon ipẹ aZihova rawạ bọ mọ odị aḍighi, odị amhiigh ootughiạn ilọ aloor odị r’araraạr dị odị rawạ omhoọgh. Kụ aZihova arom aJeremiah mọ aḅenhị nyodị mọ: “Nạ rawạ ghan igbogh araraạr. Ka/ḍighi idiphọ.” (Jer. 45:3-5) Iduọn phọ pọ aZihova raḅenhị ghan Baruch mọ: “Moọgh ogbaanyạn esi adọl phọ anạ r’araraạr phọ nạ amhoọgh bọ.” ABaruch asighẹ ni oromha phọ kụ aghiọm ghisigh aghelhọm kuuḅi aghisigh phọ aZihova.

9. Yira otuughạ eeghe esi ipẹ ogẹ bọ siphẹ 1 Korịnt 4:6, 7? (Miịn kẹn sifoto phọ.)

⁹ Eeni amem, onyọ aKristẹn atue ni aatughiạn mọ epeẹr eepoogh arukumuan esi nyinhọ. Eeni odị amoọgh ni ḍighalhanyạ phọ, akpạr ḍighaạgh, eeni makumu aZihova kẹn esi ibadị asiạ. Toroboiperolbọ, eeni abunhọn kụ komoọgh eepoogh phọ ephẹn odị rawạ bọ. Odị kaḍighi eeghe pidị iphẹn phọ ke/ḅonyon nyodị ezu? Odị atue ni aatughiạn ipẹ otelhedom mọ aPọl agẹ bọ siphẹ 1 Korịnt 4:6, 7. (Bạl.) AZihova kụ rungọ ghan iyira torobọ eepoogh arukumuan r’aḍighalhanyạ dị yira omhoọgh. U/ḅẹm mọ aloor idị yira onhighẹ opu bunhọn. Kuolọ eḍighi reten dị aZihova runmạ ghan iyira ighirigiir.—Rom 12:3, 6; Efẹ. 2:8, 9.

10. Ika kụ idị yira kotue omoọgh eegharạ osooromhi aloor?

¹⁰ Yira kotue ni omoọgh eegharạ osooromhi aloor esi ootughiạn ghan ilọ eḍeenhaan phọ aZizọs uphighinhaan bọ iyira. Ooḅeghiọn ipẹ emite bọ ḍughul phọ aZizọs aatol bọ ruwol abutelhedom mọ odị. Otelhedom mọ aJọn agẹ mọ: “AJizọs malegheri mọ [1] Odẹ phọ masighẹ oomo araraạr aIọgh raghaạgh onọ ḅiIẹ [2] mọ onọ aḍuạ k’Enaạn kụ aru kụ [3] kakeeI k’Enaạn . . . amiigh ootol aruwoI abumatuạn phọ odị.” (Jọn 13:3-5) AZizọs mutue ni aatughiạn mọ abunhọn kụ ukpẹ ootol aruwol onọ. Kuolọ mem mọ odị arọl bọ siẹn ade phọ, odị o/lhoghoma ghan mọ odị akpeanhaạn omhoọgh adọl dị eboghoghọ eḅilhẹ eetoọl. (Luk 9:58) AZizọs asooromhi loor aḅilhẹ amhoọgh ogbaanyạn. Odị uphighinhaan iyira emạ eḍeenhaan.—Jọn 13:15.

11. Ika kụ idị osooromhi aloor alhoghonhaạn ḍighaạgh Dennis omhoọgh ogbaanyạn?

¹¹ Onyọ umor dị oghol mọ Dennis epẹ Netherlands, rakparaghạ ghan odạph eḍeenhaan osooromhi aloor phọ aZizọs, kuolọ re/dughanhaan ghan nyodị. Odị aḅẹm mọ: “Mem dị onhọn oye kụ amhoọgh eepoogh arukumuan dị mị rawạ, repin ghan ni esi amhị, loor esi dị mị raloghoma ghan mọ isi imhị. Mem dị ipẹ phọ emite, mị raḅilhẹ ghan kaaḅeghiọn emhuoghaạph osooromhi aloor. Siphẹ aJW Library^® phọ, mị masighẹ riisi aBaibul dị eghaạph ilọ osooromhi aloor alọgh esi dị mị kanuụn ghan amiịn. Mị masighẹ alọgh fon amhị iniin asividio dị eghaạph ilọ osooromhi aloor, kụ mị ragbor ghan kanhaghạn.a Mị matuughạ amiịn mọ torobọ iyaạr dị mị raḍighi eḍighi elọ oghuenhi aZihova, ka/loor amhị. AZihova kụ raḍighi ghan idị torobọ iyaạr dị yira oḍighinhaan nyodị kemoọgh ekol.” Eḍighi maạr dị nạ alhoghoma e/ḅaạl olhoghi loor eepoogh arukumuan dị nạ k”omhoọgh, pọ gbariọn radạ obughẹ eegharạ osooromhi aloor phọ anạ. Iphẹn phọ kekparamhị siya phọ anạ r’aZihova eḅilhẹ eḍighi idị nạ kamoọgh ogbaanyạn.—Jems 4:6, 8.

GBIRIMA ILỌ OḌUOMOLHOGHI AGHISIGH PHỌ

12. Eeghe oḍuomolhoghi ilọ aghisigh phọ kụ kulhoghonhaạn iyira ḍighaạgh omhoọgh eegharạ ogbaanyạn? (Isaiah 65:21-25)

¹² Ogbirima ghan ilọ ookiạ oḍuomolhoghi phọ ayira ilọ aghisigh phọ rebughẹ ghan eegharạ ogbaanyạn phọ ayira. Ikpo onhụ phọ aZihova oyil phọ Aizayạ agẹ bọ ekaạph ilọ oḅonyonhu ozuan adọl aghuḍum mọ arodon, kụ eḅilhẹ ingọ iyira okuphom owol mọ aZihova kutagharạn ni iyira. (Bạl Isaiah 65:21-25.) Yira komoọgh oghoph oḅilhẹ otughogh imạ aruutu. Yira komoọgh igey iiḍighi, oḅilhẹ okelhọm ghan riiḍien dị enhuụm. Yira koo/ḅaghamhiạn ghan mun loor ilọ ikarạph araraạr dị kimitenhaan iyira obobọ anmụny ayira. (Isa. 32:17, 18; Ezek. 34:25) Imạ aruguanhaan phọ iphẹn phọ ketu ni onọ.

13. Ighẹn asidọl kụ edị kekạr emoghi mọ ogbon oḍuomolhoghi phọ ayira?

¹³ Uḍighi ika kụ emhạn bọ maạr dị yira kogbon oḍuomolhoghi phọ ayira ilọ aghisigh phọ? Loor esi dị yira odi siḍio “aruukuna phọ,” kụ yira osoman iiḅaghamhị kirokirọ dị ekpạr ri okaran. (2 Tim. 3:1) AZihova rulhoghonhaạn ghan iyira ḍighaạgh okparạm esi ongọ ghan ayira iiḅakiọm r’inyaạm mọ yira omhoghi phọ. (Ps. 145:14) Oḅarạm isiphẹ, oḍuomolhoghi phọ ayira rukparamhị ghan iyira mem dị yira osomhan iiḅaghamhị. Eeni ekparanhaạn ni nyinhạ omiteom ghan ongọ eghunotu phọ anạ. Iphẹn phọ remạ ghan mọ oomo amem kekparanhaạn ghan nyinhạ omiteom ongọ eghunotu phọ anạ ḍughụm? Eeye! AZihova maguanhaan ongọ anạ raraạr phọ ipẹ nạ amhoghi bọ,r’idị ekạr enhighẹ epelheghiomsiphẹ Paradaịs. (Ps. 9:18; 72:12-14) Eeni nạ asoman riiphinha dị ke/mheera eḍuạ obobọ beeph olhoghi. Nạ kamiinhọm ghan iduọn bịn k’agee-pọḍughụm? Eeye. Ariiphinha r’aḍuugh ke/tọl mun siphẹ omhoom aḅirinhi phọ. (Ogan. 21:3, 4) Oḍumolhoghi phọ ophọn phọ raḍighi ghan idị yira komoọgh ogbaanyạn,ḅilhẹ yira ko/moọgh olhoghi eghiḍimnyiidiphọ. Yira kotue ni omoọgh eephọ olhoghi mem dị yira osomhan ekeeny ooruẹn, e/moon, oye umhughanhaan iyira obobọ inhọn iiḅaghamhị. Eeghe kụ iḍighi? Loor esi dị etigheri iiḅaghamhị dị yira osoman nyiidiphọ, yira olegheri ni mọ eḍighi elọ “ekulha amem” bịn, ḅilhẹ mọ siphẹ omhoom aḅirinhi phọ yira ko/miinhọm mun.—2 Kọr. 4:17, 18.

14. Ika kụ idị yira kotue okparamhị oḍuomolhoghi phọ ayira?

¹⁴ Ika kụ idị yira kokparamhị oḍuomolhoghi phọ ayira rulhoghonhaạn ghan bọ iyira ḍighaạgh omhoọgh ogbaanyạn? Idiphọ kewạ bọ dị oye kaloghạ riḍien aḅekeeny orue okuamhị omhiịn araraạr dị ekelhạn nyodị, kụ edị ewạ dị yira kogbariọn radạ okparamhị oḍuomolhoghi phọ ayira, pidị yira otue omaạr omiịn ipẹ adọl phọ ketọl bọ siphẹ Paradaịs. Mem dị iitughiạn e/moọgh ikpoki riḅonyon iyira kezu, yira otue ni ootughiạn ipẹ adọl phọ ketọl bọ siphẹ omhoom aḅirinhi phọ, mem dị ikpoki, iimhụgh, r’ekulhom ke/tọl mun. Eḍighi maạr dị yira rooḅaghamhiạn loor ilọ aroopoogh dị yira rowạ siẹn ookpomhoghan phọ kụ iyira ki/teẹny, yira otue ni ootughiạn dị iphẹn phọ ke/mạn mun maạr mem dị yira momhunhughan oḅilhẹ okumu aZihova esi asimuonịr asiạ siphẹ Paradaịs. (1 Tim. 6:19) Re/dugh ghan ogbirima ilọ aghisigh phọ mem dị yira rooḅaghamhiạn loor ilọ araraạr dị riiḅaghamhị iyira nyiidiphọ, kuolọ esighẹ rekị kidughanhaan ni iyira.

15. Nạ atuughạ eeghe esi ipẹ aChrista aghaạph bọ?

¹⁵ Omhiịn idị oḍuomolhoghi aghisigh phọ alhoghonhaạn ḍighaạgh Christa anhịr phọ aDennis oghaạph bọ oghol epẹ omhạn. AChrista aḅẹm mọ: “Mị amoọgh ezẹgh dị meḍighi iyaạr dị mị raḍigh ghan agadạ iidighilha, kụ ibadị amem mị odi ghan emhinhạ. Mị odimom ghan eephinha. Oyil arookonhom mọ amhị uḅenhị imhị mọ onọ o/gbiom mọ mị kaḍum ni. Kuolọ mem mem mọ mị uutughiạn ni mọ, ‘Odị o/lhegheri aani oḍuomolhoghi phọ mị amhoọgh bọ.’ Mị agbon oḍuomolhoghi aParadaịs phọ, kụ ringọ ghan imhị eephọ olhoghi. Ii, rodon mị ramiinhọm ni, kuolọ siphẹ omhoom aḅirinhi phọ mị kakạr kụ akelhọm!”

“BUPHẸ ROKIILHAAN BỌ NYODỊ IYAẠR KE/KUOM”

16. Eeghe kụ iḍighi kụ aDevid agẹ bọ mọ buphẹ rokiilhaan bọ aZihova iyaạr ke/kuom?

¹⁶ Ghalhamọ yira umhoọgh ni ogbaanyạn bịn yira kosoman ni iiḅaghamhị. Ooḅeghiọn eḍeenhaan Uw-emhạ phọ Devid, iraạr anmụny odị umhugh ni. Ogbạ okpẹ oḅạm emhụ odị, arighirị odị obi nyodị, odị aḅilhẹ arọl dọl iisokụ esi ibadị asiạ. Ghalhamọ r’iduọn odị asoman bọ ni iphẹn phọ, odị aḅẹm ni mọ: “Buphẹ rokiilhaan bọ aZihova iyaạr ke/kuom.” (Ps. 34:9, 10) Uḍighi ika kụ odị aḅẹm bọ iduọn phọ? Loor esi dị ghalhamọ r’iduọn yira oḍighi bọ ni rebenhẹ aZihova, yira ro/gon orọl adọl aghuḍum dị iiḅaghamhị i/lo, kuolọ yira okuphom ni owol mọ araraạr phọ yira omhoghi bọ iyira ki/kuom. (Ps. 145:16) Yira oḍuom olhoghi mọ aZihova kuphogh ni iyira etigheri torobọ adọl dị yira osoman. Ipẹ phọ ringọ ghan iyira eephọ olhoghi r’ibo.

17. Eeghe kụ iḍighi kụ nạ rawạ bọ ni otuughạ ghan ilọ omhoọgh ghan ogbaanyạn?

¹⁷ AZihova rawạ mọ moọgh ghan ogbaanyạn. (Ps. 131:1, 2) Esi iduọn phọ, lọgh ikuph atuughạ ilọ omhoọgh ghan ogbaanyạn. Eḍighi maạr dị nạ alhọgh inyaạm asereghiạn ghan ilọ nạ amhoọgh, agbon ogbi phọ aZihova, asooromhi loor, kụ aḅilhẹ akparamhị oḍuomolhoghi phọ anạ, pọ nạ katue ni aḅẹm aani mọ: “Ii, mị amoọgh ni ogbaanyạn.”—Ps. 16:5, 6.