Ropiemhi De Phọ—ABaibul Phọ Akaạph Aani Eeghe?

“Ibadị araraạr dị awe roḍighi ghan kekọm ni iboom iiḅaghamhị engọ okuaḍio phọ. Amuụm katoḅọl li ibadị igbogh aramhạ. Egholhoghọl ketọl ghan eedoọny amem. Ogbagarạ oghim. Amuụm kagbem ni iminhighạn arikpisi. Ibadị irubal odọ kirokirọ ireeny ḅilhẹ r’inhạm kepenhi. Iphẹn phọ i/ḍighi raghaạph iitụ olhoghi obobọ ophogh eḅạm iyaạr bịn obughẹ. Iphẹn phọ araraạr dị asayẹns uḅenhị iyira mọ kemite eru maạr lọ agomẹt phọ uu/ḅenhion iilhogh phọ osighẹ bọ roḍighinhom iikpọ aḍiḅaạl phọ.”—Ikpo-onhụ António Guterres, asecretary-general aUnited Nations, dị egbolhomaam iinhaghạn phọ omiteom bọ April 4, 2022 ilọ Intergovernmental Panel on Climate Change.

“Asayẹns okiọm ni ghisigh rongọ iphụr arurụ mọ iphurukpu asiạ ghisigh onmia katọl li epẹ okuaḍio phọ dị ketir ri ibadị ariisi ophoghoghom olhẹm [epẹ United States] dị kemạn ni 423, loor esi eboom egholhoghọl dị keḅilhẹ etọl ghan. Iphẹn phọ ekịgh iiḅaghamhị dị yira maạl ghan ni omhiịn siphẹ aBaibul phọ mọ kemite: onuzạ r’aḍigho, arooḅoogh ibikpo dị r’egbọ, arumuụm ophiiny kebuphogh ḅilhẹ r’egholhoghọl.”—“Iiḅaghamhị Aḍigho Phọ aYellowstone, Eḍeenhaan Mọ Igbogh Iiḅaghamhị Edi Ni Ghisigh,” The New York Times, June 15, 2022.

Koḅilhẹ ni otue oselhemhi de phọ aḍiẹn roopụ bọ ḍughụm? Eru maạr lọ kotue ni, anhiạn kụ kaselhemhi bọ? Ḅeeḅeghiọn idị aBaibul phọ aghaạph aani.

Idị moghaạph ghan ilọ iiḅaghamhị ade phọ

ABaibul phọ akaạph mọ Enhaạn ‘kapiemi buphẹ ropiemi bọ aḅirini phọ.’ (Ogananami 11:18) Ekpịgh aBaibul phọ ephẹn phọ itughemhị iyira iraạr araraạr:

1. 1. Eḍighan ni elhegh m’iiḍighi awe repuẹ de phọ.

2. 2. Ophiemi ade phọ kasi ni eekunha.

3. 3. Oye phọ kaakonhom bọ iiḅaghamhị ade phọ Enhaạn k/omhạr awe.

Imạ rekori ni de phọ ayira ghisigh

ABaibul phọ aḅẹm mọ “ade phọ ketọl li k’agee-pọ.” (Ecclesiastes 1:4) Kụ awe kotọl ghan siẹn phọ bịn k’iiḍuul.

• “Abuọ elhiom eḍighinhom iyaạr phọ kụ kole erua ade phọ, kụ otọl siphẹ phọ k’agee-pọ”—Psalms 37:29.

Ade phọ ayira kemoon phaghaphaghạ.

• “Aradalạ phọ ḅilhẹ r’aḍigharaghạr ade phọ kebo ni, ḅilhẹ ade okpaghạ phọ kemoọgh ni ibo eḅilhẹ emuza r’odọ kirokirọ atuḍiil arooghọ.”—Isaiah 35:1.