Areelhe Phọ Kotue Ni Oḅophoghạn Obean Iiḅaghamhị Phọ Onmeeghian Okuaḍio Phọ Rakọm Bọ Ḍughụm?—ABaibul Phọ Akaạph Aani Ika?

Sondị phọ, November 20, 2022 kụ edị aUnited Nations omadạn ruupuruan aCOP27 dị egbolhomaam Onmia Okuaḍio pho. Abuḍiemhom aḅirinhi phọ r’awe dị otuughạ ilọ okuaḍio phọ orọl bọ pạ ookpomhoghan phọ opọ phọ umeeraam ni mọ ongọ ikpoki reelhe dị ikpoki u/moọgh pidị bidị otue obeanhaan iiḅaghamhị phọ onmia okuaḍio phọ rakọm bọ kangọ bidị. Ghalhamọ r’iduọn phọ ni, ibadị awe okaạph ni omiteom mọ iphẹn phọ ke/siemhi eekunha iiḅaghamhị phọ edi bọ epẹ okuaḍio phọ.

• Unwanyụ November 19, 2022, António Guterres, ogeọm arinyạ aUnited Nations phọ aḅẹm mọ, “Eḅaạl li iboom olhoghi amhị iduọn osopha bọ mọ osighẹ ikpoki oseere pidị mem dị iiḅaghamhị dị eḍuạ esi onmia okuaḍio phọ emheelhom ekpisi, osighẹ ikpoki phọ ipẹ phọ ologhonhaạn ḍighaạgh. Kuolọ ekạr ri eganhanha mọ iphẹn phọ bịn ke/gbaanyạn . . . Ade phọ ayira edi ni esi ooto r’osooromhinheen.”

• “Moọny amem okuaḍio phọ kanmia ni iboom dị ketir de phọ eten dị torobọ oye kaloghoma ni.”—Mary Robinson, anhịr dị adạ ghan Ireland aḅilhẹ aḍighi ghan UN High Commissioner for Human Rights, November 20, 2022.

Ekạr ri reeḅaghamhị iḍoọgh phọ olhegheri idị ade phọ ketọl ghisigh. Toroboiperolbọ, areelhe phọ kotue ni oḅophoghạn omunhenhi oguan phọ abidị osiemhi eekunha iiḅaghamhị phọ onmia okuaḍio phọ rakọm bọ ḍughụm? ABaibul phọ akaạph aani ika?

Areelhe phọ kotue ni oḅọph onhụ oḅilhẹ omoọgh ekol ḍughụm?

ABaibul phọ aganhanhamhi mọ ghalhamọ areelhe phọ urue ni oḍighi eẹny iyaạr ophamhaghạn iiḅaghamhị phọ, bidị ko/tue osiemhi eekunha. Miịn iyạl araraạr dị eḍeenhaan mọ bidị ko/tue:

• “Ko/tue oolemhi iyaạr dị meekulhughiạn.”—Ecclesiastes 1:15.

  Iphẹn phọ remạ ghan mọ: Abuọ itooghị phọ u/si umanhanhaạm loor esi dị u/lẹm oye otooghị ongọ onhọn oye. (Jeremiah 10:23) Ghalhamọ oomo areelhe aḅirinhi phọ uḅophạn ni kụ olhọgh igey inyaạm, bidị ko/tue ni bịn osiemhi eekunha iiḅaghamhị aḅirinhi phọ.

• ‘Awe kobeeph ni ikarạph, omoọgh ekpooko ikpoki, . . . obi ghan oguan.’—2 Timoti 3:2, 3.

  Iphẹn phọ remạ ghan mọ: ABaibul phọ aghaạph ni mọ awe ḍio phọ arodon koḍighi we dị kowạ ghan ilọ aloor abidị bịn, ko/wạ oḅophạn abunhọn awe oḍighi idị kengọ oomo awe suọ.

Iyaạr otuạn oḍuom olhoghi

Toroboiperolbọ, iyaạr dị kemitenhaan de phọ ghisigh i/moọgh maạr oḍighinhom r’aruguanhaan itooghị awe. Enhaạn memiteom ogey otooghiạ, opọ phọ pọ aZizọs Kraist. ABaibul phọ akaạph ilọ odị mọ:

• “Itooghị phọ ketọl siphẹ aruphạ phọ odị. Kụ ḍien odị kokol mọ Ookiạ Otomoghiom, Enhaạn Iikpọ, Odẹ K’agee-pọ, Okpanhạ Eephọ.”—Isaiah 9:6.

AZizọs kụ Uw-emhạ Omhạr phọ Enhaạn, obobọ itooghị epẹ k’akẹ phọ. (Matiu 6:10) Odị amoọgh iikpọ, osụ-olhoghi ḅilhẹ r’aḍiḅeraạn ophogh ade phọ r’awe phọ odi bọ de phọ. (Psalm 72:12, 16) Idiphọ uw-emhụ itooghị epẹ k’akẹ phọ, odị kasiemhi eekunha oomo abuphẹ “ropiemi bọ aḅirini phọ” kụ aḅilhẹ aselhemhi de phọ.—Ogananami 11:18; Isaiah 35:1, 7.

Otuughạ obughẹ ipẹ kosiemhi bọ eekunha iiḅaghamhị phọ onmia okuaḍio phọ rakọm ghan bọ, bạl emhuoghaạph phọ “Climate Change and Our Future—What the Bible Says.”