Omhaạr Oghoph Asikindọm Họl Mem ACOVID-19 Phọ

“Aloor Phọ Repogh Bọ mosopha mọ emhiigh wiki April 1 yira komiigh ookpomhoghan ophạm ghan ituughạ siphẹ asiKindọm Họl phọ emuton lọ agomẹt ekpisi phọ u/meera.” Iinhaghạn phọ ipẹ phọ olhọgh bọ siphẹ jw.org emiighom unwanyụ aMarch 2022 iḅaạl agey olhoghi Abugbaanhaạn AZihova oomo isiẹn aḅirinhi phọ. Kuolọ ezẹgh ACOVID-19 phọ ke/si eekunha.a Eeghe odọ ooḅenhion r’araraạr kụ edị ewạ orue oghoph awe phọ kokị ghan bọ ituughạ osighẹ esi ezẹgh phọ? Kotue ni opạm ituughạ Kindọm Họl dị awe koo/kpoghomhan esi iyạl asia ḍughụm?

Okạr oghaạph, abumor phọ ayira momiigh ni rookolhobian esi ibadị aruwanyụ ilọ oḅilhẹ omhiigh ophạm ituughạ siphẹ asiKindọm Họl phọ.

Araraạr Kirokirọ Dị Ewạ, Araraạr Kirokirọ Dị Omiteom

Oniin unwanyụ roten emhiigh mem mọ yira owilhẹ bọ oghị ituughạ siphẹ asiKindọm Họl phọ lhạ phọ 2020, bịn Ekpịgh Omakạ R’odoghoḍi Aruutu Oomo Aḅirinhi Phọ (WDC) epẹ Warwick, New York, omhiigh ooḅeghiọn idị aCOVID-19 phọ katir eten phọ epẹ yira roḍighinhom ghan bọ Sikindọm Họl phọ ayira ḅilhẹ r’idị koḍighi kụ okoph riisi iiseeny phọ ayira.

Araraạr dị emhoghi oniin apakirị aḅirinhi phọ igbatanhaạn ghan ni r’idị emhoghi onhọn apakirị. Onyọ umor dị oghol mọ Matthew De Sanctis, dị rakumuan ghan r’WDC phọ aḅẹm mọ: “Iniin aside, iyaạr dị reeḅaghamhị iboom pọ ariisi ootolha araghaạgh. Eḍighi maạr dị aKindọm Họl u/moọgh muụm dị rakil, pọ keḍighi edị koko obobọ kokị esiḍia obobọ wuḍia kụ okpạ muụm. Inhọn areelhe, abuniin abuọ itooghị phọ uuḅenhion ipẹ koḍighinhom ghan bọ AC, raraạr ookugh, r’idọ araraạr dị kogẹ ooḅakiọm omhoon aloor r’oḅaạl aloor.”

Ika kụ idị abumor phọ ayira okaran ipaanhaạn phọ ipẹ phọ? AMatthew aḅẹm mọ umhiịn mọ ibadị asiKindọm Họl kotue ni oḍighinhom “raraạr dị ikpoki i/mạn kuolọ ketue ni ekuamhị oḍighi phọ eḍighi.” Esi omaạm, epẹ Papua New Guinea, usighẹ kuruma dị ramhạn ni 20 alita kụ olhọgh tạp bịn oḍighinhom esi ootolha ghan araghaạgh. Esi iduọn phọ abumor phọ ayira usighẹ $40 (U.S.) bịn oḍighinhom raraạr dị rewạ siKindọm Họl dị edi rikpisi dị ke/ghughuronhu. Sikindọm Họl dị edi Africa, ugho ni ikạr igey araraạr dị rootolhaam ghan raghaạgh dị repel li 6,000 ḍighaạgh oye olọ Asia.

Uḅilhẹ ni oḍighi obobọ oselhemhi sifạn r’inhọn araraạr ookugh obọ ookugh amhaạr ghan aten siKindọm Họl phọ. Ibadị arookpomhoghan ughooghi ni raraạr dị edoọny dị kokpororị ghan simaịk phọ bịn ke/ḍighi mụn idị amaịk phọ ka/ḍuạ ghan ḍighaạgh aḍigh ḍighaạgh. Ulhọgh ni ikuph omhiịn m’ogbor ghan ogbuurogh riisi dị rogbor ghan koḅọgh, idiphọ arokorọ eghuugh r’ariisi dị ropụr ghan muụm dị ezẹgh phọ ketue ni etọl. Iniin arookpomhoghan udoghoḍi idọ asitạp dị oginha odị bịn kụ rekagharanhụ ghan epẹ aruutu amunum mọ. Epẹ Chile, torobọ aKindọm Họl ulheom ikpoki dị remhạn ni $1,400 (U.S.) omneeghi araraạr phọ rewạ bọ.

Ghalhamọ r’iduọn ekpanhạ iyaạr phọ eḍighi bọ oḍighi idị asiKindọm Họl phọ keḍighi esi oghoph, abumor phọ ayira ukparaghạ ni omhiịn mọ u/leom ikpoki phọ osogh bọ ilọ ateẹny. Esi omaạn, iniin areelhe abumor phọ usighẹ ni oḍighinhom eepoogh dị abuọ itooghị phọ ongọ mọ awe dị roko raraạr ootolhaam araghaạgh r’iidoọny araraạr okpororị asimaịk ku/kpẹ tạs. Ilạ agadạ phọ ulhoghonhaạn ni ḍighaạgh oḍighi idị ko/leoghiom ikpoki ilọ ateẹny esi ogho ghan araraạr iboom. Ilạ agadạ phọ r’Ekụ Ikooghi Epẹ Emhụ Agadạ Phọ uukolhobian ilọ ogho ghan araraạr ḍighaạgh abuphẹ rolẹm ghan bọ, bịn eḍighi idị eghomhe siḍighi phọ eḅilhẹ edugh osighẹ oru phọ.

“Oghoph Phọ Mị Awạ Bọ”

Iikolhobian oḍighi idị asiKindom Họl phọ keḍighi esi oghoph mekạr ekoph eḅilhẹ ekparamhị buphẹ omhiigh bọ oghị ituughạ siphẹ aruutu ituughạ phọ. Onyọ umaranhi dị oghol mọ Dulcine epẹ Peru, aḅẹm ni mọ oḅio onọ akaph ni enụm mem mọ odị anhaghạn bọ mọ koḅilhẹ omiigh oghị ituughạ Kindọm Họl. Odị aḅẹm mọ, “Ezẹgh aCOVID-19 phọ emiigh bọ i/bia bịn mị amhoọgh. Esi iduọn phọ imhị i/dughanhaan oghị aKindọm Họl phọ, loor esi dị mị atue ni aḅilhẹ amoọgh ezẹgh phọ. Kuolọ mị aghị bọ asi Kindọm Họl phọ, mị umhiịn mọ ikumor awe phọ modoghoḍiyogh raraạr oghophom awe phọ, idiphọ ariisi osighẹ asanitizạ ogbulha raghaạgh r’araraạr dị edoọny okpororị asimaịk phọ, ḅilhẹ r’edeọm osighẹ ghan izạl ogbuuroghom otu ituughạ phọ kụ ituughạ phọ egbi omhiigh r’amem lọ momiteghu. Oomo phọ iphẹn phọ iḍighi idị mị alhoghomha oghoph phọ mị awạ bọ.”b

Onyọ umaranhi dị oghol mọ Sara epẹ Zambia, asoman ni inhọn odọ ipaanhaạn. Odị aḅẹm mọ: “Ezẹgh aCOVID-19 phọ ighiigh olom amhị runwanyụ dị meten. Esi iduọn phọ mị umhoọgh ni ogbolhomhaam ilọ ipẹ ketọl bọ mem dị oginha amhị kakị bọ otu iituughạ.” Imite ika mem mọ odị aghị bọ? Odị aḅẹm mọ: “Oghị ituughạ siphẹ otu ituughạ phọ mingọ imhị okuphom owol mọ aZihova odi ni r’ayira siẹn eekunha asiḍio phọ. Nyiidiphọ, idị epelhom idị merọl ghan, mị aloghoma mọ mị ramoọgh ghan olhọgh oḅeton, eenyuụm, ḅilhẹ r’olhoghonhaạn aḍighaạgh ikumor awe r’abumor r’abumaranhi phọ amhị.”

Abuẹn r’ayira oḅọph bọ iiseeny phọ oomo isiẹn aḅirinhi phọ rosereghiạn ni eepoogh oḅilhẹ oḅulha isiphẹ aKindọm Họl phọ. Meḍighi iisogh phọ anyinha, ipẹ opol abin nyinha resogh ghan bọ siphẹ donate.jw.org. Iisogh phọ anyinha kụ rilhoghonhaạn ghan bọ iyira ḍighaạgh omhiịn mọ ariisi ookpomhoghan ophạm igey iiseeny eetoọl li eḅilhẹ emoọgh oghoph.