Ongọ Olhoghonhaạn Aḍighaạgh Igbo Araaghạm R’oghaạph Araaghạm

Siẹn asiḍio eekunha phọ yira ogon ni onhaghạn “oghụr araaghạm lọ meebeẹph, r’oghaạph araaghạm.” (Matiu 24:6) Ghalhamọ r’iduọn phọ ni mem dị abumor phọ ayira osoman iiḅaghamhị loor araaghạm, bidị romoọgh ghan ni olhoghonhaạn aḍighaạgh phọ bidị omhoghi bọ. Omhunheniom 3 Iinhaghạn Dị Aloor Phọ Repogh Bọ Ongọ 2022 iphamhanhạn ni iinhaghạn okparamhị ilọ oḍighi olhoghonhaạn aḍighaạgh phọ rongọ bọ buphẹ eghạm Ukraine phọ etir bọ epẹ Eastern Europe. Ika kụ idị orue bọ rongọ olhoghonhaạn aḍighaạgh phọ ophọn phọ iduọn eghạm mọ rekị bọ ni? Ika kụ idị olhoghonhaạn aḍighaạgh phọ matir bumor phọ ayira odi bọ Ukraine?

Awe phọ Omoghi Eeghee? Kụ Ungọ Ika?

February 24, 2022, ḍio phọ eghạm mọ emhiigh bọ Ukraine, Ekụ Abuukpomhoghiom mọ umheera ni m’osighẹ oḍighinhom onhụ araraạr dị ogbiighi osighẹ olhoghonhaạn aḍighaạgh bumor phọ epẹ Ukraine. Dị eego esi 27 Aruukụ Abulọgh Ḍighaạgh Mem Ekperenhom Iiḅaghamhị phọ bidị momạ bọ, olạ agadạ Ukraine ukem ni omhiigh oghooghi araraạr epẹ arokool phọ odiighi abidị.

Opumhom ipẹ bidị roḍighi bọ, Emhụ Agadạ Abugbaanhaạn AZihova umhiigh ni oḍighi owaaghị olhegheri areten dị kotue ologhonhaạn ḍighaạgh. Ekụ Abuukpomhoghiom Mọ r’Ekụ Phọ Romiteom Ghan Bọ Rinyạ Phọ siphẹ Aloor Phọ Repogh Bọ, uḅenhị ni Ekụ Abuọ Ikooghi Oomo Aḅirinhi phọ mọ okumuan r’abuẹn omheerạ bọ enye olạ agadạ phọ Ukraine r’aPoland mọ owaaghị raraạr phọ kụ oghaạph ilọ oḍighi. Abumor phọ siphẹ Ekụ Ikooghi phọ, buẹn Rosaanyọgh ghan bọ, r’Ekpịgh Iilhogh atorobọ olạ agadạ phọ, oniin siphẹ Abumor phọ Ropogh Bọ Olạ Agadạ phọ Ukraine, r’abumor phọ odi bọ Ekụ Ikooghi Oomo Aḅirinhi phọ uphạm ghan raghaạph torobọ aḍio oopuruan ipẹ koḍighi bọ.

Umor phọ Jay Swinney, olọ Ekụ Ikooghị Oomo Aḅirinhi phọ aḅẹm mọ “Omhiighom, iwạ mọ yoor ulhegheri idọ araraạr phọ emhoghi bọ. Yoor uwạ ghan omiteom ariiḍien r’araraạr oḅaalhamhiọm aloor ongọ dị abumor phọ odi bọ ekool phọ olhegheri ni ilọ oḍighinhom. Toroboiperolbọ, olhegheri araraạr phọ rewạ bọ iḍighi eniin apakirị iiḅaghamhị phọ bịn. Iwạ kẹn ni mọ olhegheri ipẹ araraạr phọ kenuụn bọ esi epẹ Ukraine idiphọ eghạm mọ rekị bọ ni dị abumor phọ iyaạr ko/ḍighima.”

Unwanyụ aMarch 9, 2022, molhegheri raraạr phọ rewạ bọ. Ewạ mọ oghiọm bumor phọ raraạr ariiḍien, idiphọ enhạm dị edi olhoghi akoto, ibiakpạ, arusụ, ḅilhẹ r’abeans, ḅilhẹ kẹn r’inhọn araraạr oḅaalhamhiọm aloor idiphọ asaḅạ r’atisu. Mem mọ opọ phọ, ugbiighi mọ araraạr dị oniin oye kaḍighinhom inya awiki rekị ni omhạn $65 (U.S.). Mem dị omhiịn bọ mọ kemoghi olhoghonhaạn aḍighaạgh asimuunịr abumor, Ekụ Abuukpomhoghiom Mọ umheera ni mọ osighẹ iboom ikpoki oḍighinhom omiteom olhoghonhaạn aḍighaạgh ongọ abumor phọ. Kuolọ ika kụ idị araraạr phọ keteẹny bọ bumor phọ ayira dị ko/lọgh sighuḍum abumor phọ osighẹ bọ rokiọm esi ootor r’osooromineen?

March 13, iyạl abumor abuọ aPoland ukparaghạ ni ophogh mughumọ bidị kotue ni osighẹ raraạr olạ agadạ aPoland okimọm otu dị rokpol ghan raraạr dị atuman Lviv, epẹ Ukraine. Kụ bidị ogbi bọ oḍuạ, abumor dị rokumuan ghan ilạ agadạ aPoland r’Ukraine ulhoghonhaạn ni ḍighaạgh iyạl phọ abumor phọ omiteom bọ loor ookolhobian ilọ eghị phọ. Olạ agadạ phọ ugeeghị ni r’aGomẹt phọ dị komeera mọ bidị oḍigh eelhe phọ olhoghonhaạn we ḍighaạgh, oḅilhẹ omhiịn mọ ogẹ ni loor asimoto abumor phọ mọ awe dị rokị olhoghonhaạn awe ḍighaạgh, kụ oḅilhẹ oghaaphạn bumor phọ odi bọ Ukraine ilọ eten dị keegborion epu mem lọ bidị oḅeẹny oḍigh eelhe phọ. R’imạ iikolhobian phọ iphẹn phọ ḅilhẹ r’aḍisẹph aZihova, esi 24 awạ bịn araraạr phọ esi Lviv eteẹny Ruukụ Phọ Rolhoghonhaạn Ghan Bọ Ḍighaạgh We Dị Ekperenhom Iiḅaghamhị Emitenhaan, bịn abumor phọ ayira oḅulha Poland r’ewoọr.

Ghalhamọ r’iduọn eḅẹl eghị phọ emhoọgh bọ ni ekol, araraạr phọ abumor phọ osighẹ bọ oghị i/mạn 1000 kg (1 U.S. ton). Kemoghi ni dị koḅilhẹ osighẹ raraạr dị eemhọr phọ emhạn 200,000 kg (220 U.S. tons) okiọm! Ika kụ edị kotue oḅilhẹ oogboronhom osaạny osighẹ okị kụ oḅilhẹ odiighi raraạr dị elheeny idiphọ?

“Awe Phọ Anạ Komiteom Siloor Abidị Dị U/kpaariọm”

Iduọn awe aạl bọ siphẹ jw.org ilọ ipẹ eghạm mọ etir bọ bumor phọ ayira epẹ Ukraine, awe oomo isiẹn aḅirinhi phọ uwạ ni olhoghonhaạn aḍighaạgh. Ibadị dị okelhạn osogh iisogh ongọ siphẹ oḍighi oomo aḅirinhi phọ Abugbaanhaạn aZihova, loor esi dị bidị olegheri mọ kosighẹ ni ikpoki phọ oḍighinhom raraạr phọ ipẹ rewạ bọ. Abunhọn abudị orugh otumhan eelhe phọ umiteom ni mem, inyaạm, r’araraạr emhoọgh abidị obọ olhoghonhaạn aani ḍighaạgh. Miịn iyạl ikpo areḍeenhaan.

Epẹ Poland, awe dị omiteom loor umiteoghom ni riisi asimuunịr araraạr ophogham aloor, ibạm anmụny odorọ yogh raraạr sikạd. Oniin siphẹ Ekụ Ikooghi Olạ Agadạ Phọ aPoland dị oghol mọ Bartosz Kościelniak, aḅẹm mọ “Mị maạl li ibadị amem ḍinyạ aPsalm 110:​3, eḅẹm bọ mọ awe phọ aZihova ‘komiteom siloor abidị dị u/kpaariọm.’ Kuolọ omhiịn r’aloor dị arukuron awe oogboronhom omiteom loor olhoghonhaạn aḍighaạgh oḍighi phọ, ikạr kụ iḍeenhaan imhị mọ ikpo-onhụ phọ ipẹ phọ etu ni inẹ.”

Oniin onyọ Ogbaanhaạn aZihova dị amhoọgh kompinị dị rokooghinhaan ghan we raraạr koseere koḅilhẹ osaanyọgh oghimhọm reelhe kirokirọ dị amiteom rughuugh odị aḅilhẹ alhọgh fuel, aḅẹm mọ: “Esi amhị, ephẹn phọ eḍighi eepoogh oḍeenhaan ephomhoghiạn oghị esi abumor phọ r’aZihovah. Kụ mị aḅaạl ni olhoghi olhoghonhaạn aani aḍighaạgh.” Repel li 7,700 aliters (2,034 gal) afuel awe osogh bọ, kụ abumor phọ usighẹ ni inyaạm r’amem abidị oghiilhom eghiil dị remạn ni 48,000 itobi (30,000 mi) omhiịn mọ araraạr phọ esi ni epẹ phọ!

Loor esi oḅọgh aloor omiteom r’ephomhoghiạn phọ abumor r’abumaranhi phọ oḍighinhom bọ oḍighi phọ, reteẹny bọ March 28 iduọn phọ pọ esi 15 aḍughul otu egbi k’amem mọ osighẹ bọ iḅẹl araraạr phọ oghiọm, bịn oḅilhẹ osighẹ riiḍien, raraạr ophoghaam aloor ḅilhẹ r’asirooghọ dị eemhọr phọ emhạn 100,000 kg (110 U.S. tons) oghimhọm epẹ Ukraine! Loor iisogh phọ abumor phọ osogh bọ, ikpoki phọ ewạ bọ olhoghonhaạn aḍighaạgh we dị ekperenhom iyaạr emitenhaan isoorom ni iboom. K’aḍio arodon, Abugbaanhaạn aZihova osigheọgh ni raraạr dị eemhọr phọ repel li 190,000 kg (209 U.S. tons) okimọm epẹ Ukraine. Ika kụ idị araraạr phọ ongọ bọ etir bumor phọ ayira?

“Iḅaramaạm Kẹn Igẹ Dị Eḍeenhaan Ephomhoghiạn Phọ Anyinha!”

Araraạr phọ esi bọ Lviv, abuọ olhọgh aḍighaạgh mem ekperenhom iiḅaghamhị phọ odi bọ oomo Ukraine udiemhi ni buphẹ rewạ bọ. Mosighẹ ni raraạr phọ iphẹn phọ okiomaạn ibadị igbogh aramhạ, iniin arikpisi oḅuạ Lviv kụ rokị aḍikẹl phọ repel li 1,300 itobi (800 mi). Ghalhamọ r’iduọn omhiịn bọ ni mọ obilhẹ u/piemhi mem r’inyaạm odi araraạr phọ, isighẹ ni mem.a

AMarkus Reinhardt, oniin siphẹ Ekụ Phọ Repogh Bọ Olạ Agadạ phọ Ukraine aḅẹm mọ: “Siẹn iiḅaghamhị phọ iphẹn phọ, ibadị abumor momhiịn r’aloor ephomhoghiạn phọ aZihova ḅilhẹ r’asuọ omhaạr odaphạn iiḅakiọm oḍighom mọ odị​—ghalhamọ r’amem dị iiḅaghamhị k/emite. Esi omaạm, uroma ni oomo awe phọ mọ oseenhaan riiḍien r’amuụm dị kotue otolhọm ibadị asiwiki ilhoghi aruutu abidị. Idị egbolhomhaam iiḅakiọm mọ iphẹn phọ oniin okumor oye dị oghol mọ Anton epẹ Kyiv aḅẹm mọ: ‘oḍighom mọ aZihova muukolhobian ni iyoor ilọ osomhan igbagarạ asidọl kụ yoor rosereghiạn ni. Oseenhaan eḍien r’amuụm ḅilhẹ r’aradio mekạr kụ epẹl sighuḍum ayoor.’ Ilhoghi ayoor eḅaạl li iduọn abumor phọ odaphạn bọ iiḅakiọm mọ loor esi dị ingọ mem olạ agadạ phọ ookpomhoghi araraạr phọ kosighẹ bọ okiomaạn bidị.”

Abumor phọ ulhoghomha ika mem mọ ongọ bọ bidị raraạr phọ? AMykola r’aZinaida, dị orugh Kharkiv, rokaạph bọ ipẹ bidị olhoghoma bọ uḅẹm mọ: “Ogbolhomhaam mọ anyinha akạr kụ utir iyoor. Meḍighi r’iiḍien phọ r’asirooghọ phọ nyinha iruom bọ iyoor. Okạr agey, yoor omiịn ni ḍighaạgh phọ aZihova esi iphẹn phọ.” AValentyna atugh aani eniin phọ ekool phọ. Odị aḅẹm mọ: “Mem mọ eghạm mọ emhiigh bọ, awe uḍigh ghan ḍikoọl ogho iyaạr. K/oomo amem kụ edị edugh ghan ogho iyaạr lọ oye phọ rawạ. Kuolọ aZihova alhegheri ni aḅilhẹ amhiịn iiḅaghamhị phọ. Odị amạ ni bumor dị odiighi ghan raraạr orolhọm we ilhoghi aruutu abidị, kụ araraạr phọ bidị ongọ ghan bọ ikạr ghan bịn eḍighi raraạr phọ ipẹ rewạ bọ! Mem dị meghịgh mudị oḍuomolhoghi o/lo mụn, oye phọ ramiịn ghan kaḅilhẹ alhoghoma ogbolhomhaam mọ aZihova r’oḍighom mọ odị eten dị egbatanhaạn. . . . edụgh iikiạ olhoghoma olhoghonhaạn aḍighaạgh phọ odị mem mọ opọ ekạr bọ rewạ.”

AYevhen, Iryna, ḅilhẹ r’aMykyta, dị osuma oḅuạ Mariupol, uḅẹm mọ: “Yoor okạr kụ osereghiạn olhoghonhaạn aḍighaạgh phọ nyinha engọ bọ eghunotu phọ ayoor. Oḅenhị anyinha, ikạr kụ eru mem mọ ewạ bọ. Okạr oghaạph, eḅẹl amem mọ yoor ugbi mọ araraạr bịn kụ edi ilhoghi asikatọn phọ, kuolọ mem mọ yoor okpenyon bọ yoor umhiịm mọ iḅaramaạm kẹn igẹ dị eḍeenhaan ephomhoghiạn phọ anyinha!”

Dị iikia i/lo, eḍeenhaan ni mọ aZihova kụ asighẹ uwaloor phọ odị aaḅakiọm bumor phọ oghị bọ odiighi araraạr phọ eḍighi bọ ilọ ephomhoghiạn igbo “oghụr araaghạm lọ meebeẹph, r’oghaạph araaghạm.” Iisogh phọ nyinha resogh ghan bọ r’ophooph olhoghi obakiọm oḍighi oomo isiẹn aḅirinhi phọ, ibadị amem siphẹ donate.jw.org, kụ iḍighi bọ idị iphẹn phọ edugh. Okạr kụ rosẹph eegharạ inmo phọ anyinha!

Oogboronhom Ongọ Olhoghonhaạn Aḍighaạgh Eten Dị Ke/lọgh Ghuḍum Oye Ootor’osooromineen

1. 

   February 24, 2022: Ekụ Abuukpomhoghiom Mọ umheera ni m’osighẹ oḍighinhom idị mogbiighi olhoghonhaạn aḍighaạgh bumor phọ epẹ Ukraine, bịn engọ eepoogh dị olạ agadạ phọ komiigh ongọ olhoghonhaạn aḍighaạgh phọ

2. 

   February 24–March 8, 2022: Olạ agadạ Ukraine ughooghi ni raraạr epẹ arokool phọ abidị, bịn omhiigh odiighi abumor phọ dị eego esi Aruukụ Abulọgh Ḍighaạgh Mem Ekperenhom Iiḅaghamhị. Olạ agadạ phọ oḅilhẹ ookolhobian osighẹ araraạr dị eḅuạ Poland retu odiighi

3. 

   March 9, 2022: Ekụ Abuukpomhoghiom Mọ umheera ni m’osighẹ raraạr dị remoghi olhoghonhaạn aḍighaạgh bumor phọ oghị Ukraine

4. 

   March 10–12, 2022: Ugbiighi ilọ kokparaghạ opogh mughumọ kotue ni osighẹ raraạr Poland okimọm Lviv, epẹ Ukraine

5. 

   March 13, 2022: Urom ni mọ oghị ophogh mughumọ kotue ni osighẹ raraạr Poland okimọm Lviv, epẹ Ukraine

6. 

   March 14–16, 2022: Ookpomhoghi buẹn rodoghoḍi ghan bọ koḅilhẹ omakạ ruutu ookpomhoghan phọ, Asemblị Họl dị atumhan Poznan, epẹ Poland, ilọ ophurughi yogh ariiḍien r’inhọn araraạr dị kokiọm olhoghonhaạn aḍighaạgh

7. 

   March 17, 2022: Inya aḍughul otu reten mem mọ osighẹ bọ raraạr phọ oghị ophoghom ilọ eten phọ edi, umhiigh ni osigheọgh 13, 000 kg (14 U.S. tons) araraạr olhoghonhaạn aḍighaạgh oghimhọm epẹ okụ eelhe phọ Ukraine

8. 

   March 21–27, 2022: Odaphạn eniin phọ eten phọ orọl Poland ophurughi raraạr phọ esugha bọ oghimhọm Ukraine, kụ odiemhi rokool phọ emhoghi bọ esi 24 awạ

9. 

   March 28, 2022: Esi 20 aḍughul otu egbi k’amem mọ omheera bọ m’osighẹ raraạr phọ oghị, bịn osighẹ riiḍien, araraạr oḅaalhamhiọm aloor, r’asirooghọ dị remhạn ni 100,000 kg (110 U.S. tons) oghị Ukraine

K’aḍio arodon, Abugbaanhaạn aZihova osigheọgh ni raraạr dị eemhọr phọ repel li 190,000 kg (209 U.S. tons) okimọm epẹ Ukraine.