AKạt Dị ‘Rongoọm Ogbaanhaạn Oomo Areelhe Phọ’

Repel li ḍioph asiạ, akạt dị rologhoḍị ghan rinyạ maḍighi aani bọ pakirị eten oghaạph iiḅi inhaghạn phọ dị reḍạ ghan riḍien awe. Oomo isiẹn aḅirinhi phọ, mem dị awe omhiịn kạt phọ rolhegheri ghan ni we phọ omhoọgh bọ. Omakạ kạt phọ eten dị raḍạ ghan riḍien awe kụ aḅilhẹ adugh oḍighinhom. Eeni nạ kameeraam aani ni iphẹn Asenata, umaranhi epẹ Poland, aḅẹm bọ mọ: “AKạt phọ iyaạr dị otuụgh bịn omakạ, kụ anighẹ aḅilhẹ adụgh ophoghoghom. Adugh osighẹ oḍighinhom r’ophạm aḍuanhạm.”

Nạ maakia ghan ni ilọ ipẹ omakạ bọ oḅilhẹ olhẹm kạt phọ ḍughụm?

Amakạ Dị Okạr Oteenyọm

Lhạ phọ 2001, Aloor Phọ Repogh Bọ umheera ni mọ abumor r’abumaranhi ayira epẹ France omhiigh oḍighinhom ophogh inhọn areten ongọ ogbaanhaạn esi ogbo, eḅaramaạm osighẹ akạt oḍighinhom. Bidị uḍighinhom ni ophogh idị omakạ kirokirọ areten. Esi omaạm, bidị udoghoḍi ghan rinyạ phọ rukuru dị emhoọgh iidighilha, kụ odẹ ghan anyụ arokporomha dị emhoọgh iidighilha. Ekureriom mọ, olạ agadạ aFrance usaḅạr odị atuụgh arọl dị abukaaphọm mọ oḍighinhom ni esi ibadị asiạ.

Ipẹ eḍuạ bọ emite esi iphẹn bidị omakị bọ ophogh iḅaạl li ilhoghi abumor phọ epẹ France. Esi iduọn phọ lhạ phọ 2011, Aloor Phọ Repogh Bọ umheera ni mọ omakị aani ophogh oḍighi ongọ ogbaanhaạn esi ogbo phọ epẹ New York City, U.S.A., kụ uḍighinhom sikạt r’idaabilị. Abukọy eten phọ oḍighinhom bọ ophogh umhiịn ni suọ kirokirọ dị akạt phọ amhoọgh, eḅaramaạn iduọn adugh bọ ookilhemhi. Abukọy eten phọ uḅilhẹ ni osogh iitughiạn idị koḍighi kụ onighemhị eten phọ omakạ bọ kạt phọ. Iḅẹl asikạt phọ oḍighinhom ghan bọ ireeny phọ iimọr ghan ni, kụ i/dugh ghan ophạm otenhom esi lọ oodạ kụ rosiịny obobọ rosoor. Esi iduọn pho uḅilhẹ ni omakạ idị kaaphoogh, kuolọ oo/phoogh osi esi dị ookugh kakpooghi aḍuanhạm. Emhoom eten phọ omakạ bọ ibughẹ ni iidighilha phọ, oḅilhẹ oḍighi idị ke/kporokporo ghan iboom mem dị rotenhom esi dị egbughagbugha. Upumhom ni ibạm igbe dị kologhoḍị ghan rinyạ dị epeel.

Oḍighinhom ophogh phọ imhoọgh ni ekol! Esi iduọn phọ lhạ phọ 2012, Aloor Phọ Repogh Bọ umheera ni mọ omhiigh osighẹ akạt oḍighinhom oomo isiẹn aḅirinhi phọ. Ughị ni oteẹny oye dị kalẹm iboom, idị ephoogh ḅilhẹ ketọl ebia.

Idiphọ asiạ phọ rekị bọ, uḅilhẹ ni ooḅenhiom olhẹm akạt phọ. Esi omaạm, lhạ phọ 2015, uḅarạm ni iyaạr dị kokpereghiom ghan mem olophiạ dị emhooghọm iyaạr dị ophogh komiịn ni rinyạ phọ ephẹn arisigh phọ. Onyọ umaranhi dị oghol mọ Dina, dị odi ghan epẹ Georgia, asereghiạn ni emhoom iyaạr phọ oḅarạm bọ. Odị aḅẹm mọ, “Akạt phọ mamhoọgh ‘raincoat’ dị rakoph ghan rinyạ phọ.” Lhạ phọ 2017, umiteom ni rokpooghi akạt phọ dị i/moghi gọm iniin arunhụ aḍiaḅạ. Onyọ umor dị oghol mọ Tomasz, epẹ Poland, aḅẹm mọ: “I/dugh ghan onuụn onme arokpooghi phọ ipẹ awe phọ kụ olhọgh ghan bọ gọm mọ. Iphẹn oginha odị repamhạ ghan bọ loor kụ ikạr enhighẹ.” Lhạ phọ 2019, uḅilhẹ kẹn ni ooḅenhion olhẹm akạt phọ r’araraạr phọ rolemọm ghan bọ kạt phọ oḍighinhom idị kekuamhị etọl ebia.

Ipẹ Roteẹny Ghan Bọ Sikạt Phọ

Oniin oye bịn kụ ralẹm ghan sikạt phọ, kụ osighẹ odiemhi oomo aḅirinhi phọ. Iduọn rokaạph bọ, oniin akạt amạn $43 U.S., dị u/loghọm inhọn amaliom r’ikpoki osaanyọm osiemhi ekpisi phọ osighẹ bọ rokị. K’aḍio arodon, ikpoki dị mepel $16 erubal ikpoki U.S. kụ edị molheom esi asikạt, kụ asikạt dị repel li 420,000 kụ edị moghiọm rookpomhoghan oomo isiẹn aḅirinhi phọ.

Osighẹ ikpoki phọ rosogh ghan bọ oḍighinhom emạ eten, rokuamhị ghan k’ogho sikạt phọ obughẹ. Oḅarạm isiphẹ, kparipẹ rogẹ m’oghiọm bunọ omhoom, arookpomhoghan phọ kotue ni ogẹ m’oghiọm bunọ pakirị esi lọ ephụ obọ bidị oselemi.

Osighẹ Akạt Ongoọm Ogbaanhaạn

Abukaaphọm oomo isiẹn aḅirinhi phọ rokelhọm ni osighẹ akạt oḍighinhom. Onyọ umaranhi dị oghol mọ Martina, epẹ Ghana, aḅẹm mọ: “Ibadị apakirị arukumuan phọ yira kụ rokị ghan koteẹny we. Iyaạr dị iḅeraạn imhị ilọ akạt phọ pọ awe kụ rotu ghan kuteẹny iyira. Ghalhamọ awe dị roten bịn kotue ni omoọgh ogbaanhaạn.”

Enhọn eelhe Africa, oye aghị ni siphẹ akạt phọ asighẹ rinyạ dị ogẹ onhụ emhạ abidị. Awiki roten odị aḅulha ni kụ aḅẹm mọ: “Mị m’aạl oomo arinyạ phọ amadạn. Araraạr phọ eghaạph bọ emạn maạr agey. Mị rakị oghaạph oḅenhị aani abuọ eghunotu amhị r’abuọ emhạ ayoor,” ekpisi dị aḍikẹl phọ emhạn ni 500 itobi (311 mi). Iyạl arunwanyụ reten, odị aḅulha ni kụ aḅẹm mọ: “Awe emhạ phọ ayoor maạl oomo arinyạ phọ, kụ ipẹ bidị aạl bọ eḅeraạn bidị agey. Bidị rowạ oḍighi aani Abugbaanhaạn AZihova. Kuolọ bidị omoọgh ni sipuru. Esi omaạm, bidị onaghanhạn mọ oḍiiny amuụm, pọ ewạ mọ oḍiinye oomo aloor phọ siphẹ amuụm mọ. Kuolọ ophiịny o/tuman emhạ ayoor. Yoor kotu ephẹn kụ oḍiiny ḍughụm?” Abukaaphọm mọ uḍighi ni idị oniin okọy eten dị raḅạ ghan onhụ oye phọ aghị ateẹny nyodị. Esighẹ k’amem mọ amuphẹ phọ kụ rekị, iyạl phọ abidị rokelọm ni ogbor ghan otuughạ aBaibul phọ.

P’eeghe idị edụgh omhiịn idị mosighẹ kạt phọ rokaaphọm “ooḅi oghaạph omạr phọ k’Enaạn . . . [kolheenye] oomo aḅirini phọ.” (Matiu 24:14) Roteẹny ghan ika ikpoki phọ rokpẹ ghan bọ oye phọ ralẹm ghan bọ sikạt phọ? Reego ghan esi iisogh phọ rosogh ghan bọ oomo isiẹn aḅirinhi phọ, ibadị iisogh phọ rosogh ghan siphẹ donate.jw.org. Meḍighi esi eegharạ inmo phọ anyinha.