Aruutu Dị Rekuenhi Ghan Ogbogh Otughemhiạ Phọ Ayira

AZihova amoọgh ḍiḅeraạn otughemhị ghan awe phọ odị. Esi iduọn phọ, ookpomhoghan phọ odị momiteom ibadị asiskul dị retughemhị ghan we ilọ oḍighi oḍighi phọ abidị. Oniin askul phọ ophọn phọ pọ Askul Abukaaphọm Ilọ Omhạr Phọ (SKE). Idiphọ asiạ phọ rekị bọ ookpomhoghan phọ Enhaạn rakiririom ghan ni kaphogh raraạr phọ rotuughạ ghan bọ kuolọ ko/⁠ginha ipẹ bịn, rapoghom ghan ni riisi phọ rotọl ghan bọ kotuughạ. Aḍikpanhạ aḍiigbu phọ pọ onhighemhị ariisi phọ anmụny askul phọ r’abutughemhiạ phọ rotọl ghan bọ kotuughạ. Ika kụ idị iisogh phọ anyinha reloghonhaạn ḍighaạgh oteẹny aḍiigbu phọ aḍiphẹ phọ?

Anmụny Askul Phọ Mobụgh Kụ Odi Riisi Ituughạ Dị Menhighẹ

Esi ibadị asiạ, uphạm ghan siskul ookpomhoghan phọ Sikindọm Họl r’Asemblị Họl. Kụ uḍighi ika kụ yira moselhemhi yogh bọ oḅilhẹ ologhoḍị inhọn aruutu dị kopạm ghan oginha asiskul ookpomhoghan phọ? Ooḅeghiọn iraạr ariphigh.

Ewaạm Dị Ebụgh. Umor phọ Christopher Mavor oniin olhọgh ḍighaạgh Ekụ Arukumuan Aloor Phọ Repogh Bọ aḅẹm mọ “ilạ agadạ muḅenhị iyoor mọ bunọ omhoghi ibadị abumor r’abumaranhi olhoghonhaạn aḍighaạgh rokool phọ abidị. Esi omaạm, lhạ phọ 2019, olạ agadạ aBrazil uḅẹm mọ ekool oghaạph iiḅi iinhaghạn phọ abunọ eḅilhẹ emhoghi 7,600 abukaaphọm dị moghị SKE.” Olạ agadạ United States ughaạph ni mọ ekạr emoghi bukọy eten dị osilor dị kotughemhị aani bunhọn ilọ ongọ ogbaanhaạn riisi ogbo, risiḍia dị aruwunyarụ resul ghan, ḅilhẹ r’aruutu ikoli. Rowạ ni kẹn bumor dị kokumuan r’Ekpịgh Omakạ R’odoghoḍi Aruutu Ilạ Agadạ phọ ḅilhẹ r’aHospital Liaison Committee. Awe dị moghị SKE kotue ni oḍighi iiḍighi phọ iphẹn phọ.

Anmụny Askul Phọ Mobụgh. Ibadị ilạ agadạ, awe dị mogẹ oghị askul phọ mopel budị bidị kotue omạgh. Esi omaạm, epẹ Brazil, awe dị ogẹ oghiọm olạ agadạ phọ ilọ oghị aani askul phọ romạn ni 2,500 esi aḍiniin alhạ bịn. Kuolọ loor iduọn ariisi ophạm askul phọ i/⁠bụgh bọ, olạ agadạ phọ umhạgh 950 anmụny askul bịn.

Ariisi Amarugh Dị Ekuạ. Mem mọ anmụny askul phọ oghị ghan bọ askul phọ siKindọm Họl obobọ Asemblị Họl, bidị urughogh ghan k’abumor r’abumaranhi dị oḍighi buọ ekpisi phọ. Kụ iikolhobian phọ ipẹ phọ ighị ghan ni agey rikpisi dị u/⁠pạm ghan iboom aruukụ lhạ phọ. Kuolọ rikpisi dị kopạm ibadị aruukụ, ke/⁠tue edugh dị abumor r’abumaranhi phọ kolọgh otu nmụny askul phọ esi ibadị arunwanyụ siphẹ alhạ phọ. Esi iduọn phọ ulhoghoḍị ni ruutu dị etumhan esi phọ kopạm bọ ekụ phọ dị okạr otuạn nmụny askul phọ kụ olhoghoḍị.

Esi dị emhoọgh eniin ekụ, r’amarugh abutughemhiạ phọ, r’anmụny askul dị romạn ni 30 ḅilhẹ kẹn r’awe dị rologhonhaạn ghan ḍighaạgh inhọn areten, ketue ni emạn irubal asidollar (U.S.), odaphạn ekpisi phọ r’inhọn araraạr.

Araraạr Dị Rewạ Ghan Riisi Askul Phọ

Aruutu askul retọl ghan esi dị emhaạr ephọ, ke/⁠si dị awe orughogh iboom, kuolọ esi dị edugh oḍuạ oghị inhọn arikpisi. Rekạr ghan kenhighẹ rikpisi dị emhoọgh buboom abukaaphọm dị kotue olhoghonhaạn ḍighaạgh ophamhaghạn araraạr r’aruutu askul phọ.

Asiskul phọ remoọgh ghan ni riisi osereghi arinyạ, riisi orọl aạl aḍinyạ, sikomputa, siprinta r’inhọn araraạr. Ibadị amem, roḅarạm ghan ni riisi dị anmụny askul r’abutughemhiạ phọ kotọl olhe eḍien. Roseere ghan ni kẹn eboom esi orọl ozaamiạn aloor r’ophooghian.

Romaạr ghan kodẹ raraạr siphẹ ekụ phọ. ATroy, oniin odị rakumuan aani ghan r’Ekpịgh Omakạ R’odoghoḍi Aruutu Oomo Aḅirinhi Phọ epẹ Warwick, New York aḅẹm mọ “Yoor uteẹny Buọ Ekpịgh Phọ Ropogh Bọ Siskul Ookpomhoghan phọ olhoghonhaạn ayoor ḍighaạgh omakạ aruukụ dị kedughanhaan nmụny askul phọ orọl otuughạ. Abumor phọ ungọ ni iyoor iiḅakiọm ilọ ipẹ aruukụ phọ keleeny bọ, ipẹ kodeeghị bọ raraạr, ḍiḅaạl esi phọ r’araraạr iitia r’asividio.” Idị egbolhomhaam ipẹ kokpamaghị bọ raraạr iitia phọ, aZoltán, oniin otughemhiạ SKE epẹ Hungary, aḅẹm mọ: “Eḅẹl amem mọ iwạ mọ yoor uutughianhạm ghan nmụny askul phọ mọ bidị oḅạ omiteom, loor esi dị yoor u/⁠moọgh ghan maịk. Kuolọ nyiidiphọ yoor idiphọ ro/ḍighi ghan mun, loor esi dị amaịk odi torobọ idaabilị!”

“Aruuruen AZihova Dị Ogbatanhaạn”

Eghẹn eten kụ edị onhighemhị ariisi askul phọ metir nmụny askul phọ r’abutughemhiạ phọ? Umaranhi phọ Angela, dị aghị aani SKE epẹ Palm Coast, Florida, U.S.A. aḅẹm mọ “esi phọ emaạr epọ. Omaạr odeeghị oomo araraạr, emhiigh k’ekụ phọ kụ esi olhoghi iisoph phọ ayoor, obọ yoor otue ogbon ituughạ phọ ayoor.” Csaba, oniin otughemhiạ epẹ Hungary asereghiạn ni eepoogh olhe ghan eḍien r’anmụny askul phọ. Odị aḅẹm mọ mem olhe eḍien phọ, “anmụny askul phọ ugbor ghan ni oghaạph idị edi olhoghi abidị ḅilhẹ r’idị emiteghunhaan bidị. Iphẹn phọ iḍighi ghan idị yoor olhegheri ghan nmụny askul phọ agey. Bịn meḍighi idị yoor kolhegheri ilọ otughemhị abidị eten dị ketir bidị.”

Anmụny askul r’abutughemhiạ phọ omiịn riisi itughemhị phọ iphẹn phọ monighemhị bọ idiphọ aḍisẹph “Ogbogh Otughemhiạ,” phọ ayira, Zihova. (Isaiah 30:​20, 21) Onyọ umaranhi epẹ Philippines dị aghị aani SKE esi dị onme otenhe esi ophạm ghan askul aḅẹm mọ: “Amarugh otu askul phọ uutughianhạm imhị mọ yoor u/ḍighi oopho anmụny askul bịn kuolọ yoor oḍighi ruuruen aZihova dị ogbatanhaạn. Odị rawạ mọ yoor ukelọm siloor iduọn yoor omhaạr bọ rotuughạ Ekpo-onhụ phọ odị.”

Kotue ni ologhoḍị riisi ophạm askul, oḅilhẹ oselemhi loor esi iisogh phọ anyinha, ibadị rosogh ghan siphẹ donate.jw.org. Meḍighi esi eegharạ inmo phọ anyinha.