Odoghoḍi Aruutu Dị Rilhoghonhaạn Ghan Iyira Ḍighaạgh Ogbeelhom Iiḅi Iinhaghạn Phọ

Aloor Phọ Repogh Bọ rowạ ni r’ikpupkụ osighẹ iisogh phọ ayira olhoghoḍiọm aruutu dị kilhoghonhaạn iyira ḍighaạgh ogbeelhom iiḅi iinhaghạn Omhạr phọ. Esi omaạm, lhạ arukumuan phọ 2023, asikompinị dị ilạ agadạ Abugbaanhaạn aZihova roḍighinhom ghan ulheom ni ikpoki dị epel li 500 erubal adollạ oghoom, olhoghoḍiọm, oselemiom ḅilhẹ r’omhaạr ophạm asiKindọm Họl r’Asemblị Họl oomo isiẹn aḅirinhi phọ.a Idị arookpomhoghan phọ oomo isiẹn aḅirinhi phọ olheom aani omhaạr ophogh asiKindọm Họl phọ bịn u/lọgh.

Opumhom isiphẹ, oḅilhẹ kẹn rosighẹ ghan iisogh phọ komhaạr ophamhạm ruutu ilạ agadạ phọ relọgh ghan bọ ḍighaạgh ooḅakị r’obakị oḍighi iphelhegbeel oomo isiẹn aḅirinhi phọ. Yira mowilhẹ yogh iniin iiḍighi siphẹ ilạ agadạ phọ pidị osighẹ iniin ikpoki phọ olọgh agạ odoghoḍi r’oselemhi asiKindọm Họl r’Asemblị Họl. Ghalhamọ r’iduọn phọ ni, resighẹ ghan ni iboom ikpoki oselemhi, onme elhoghọm, obobọ olhọgh inhọn imhoom aruutu dị ilạ agadạ phọ kookoroghian okị. Eeghe kụ iḍighi kụ iiḍighi phọ iphẹn phọ emhạn bọ ni maạr? Ika kụ idị ilạ agadạ phọ rebakị ghan iiḍighi phọ iphẹn phọ epẹ erugh phọ? Uguạ owaaghị omhiịn.

“Oḅilhẹ Ooḅulhemhi Otu Phọ”

Aruutu ibadị ilạ agadạ mepel li 30 obobọ 40 asiạ! Umor phọ Nicholas, oniin siphẹ Ekpịgh Omakạ R’odoghoḍi Aruutu Oomo Aḅirinhi Phọ, aḅẹm mọ: “Ghalhamọ otu dị omhaạr ri ropogh bịn raḍighi ghan ni ogbaany kamhiigh owonyonhụ idiphọ amem mọ rekị bọ. Oselemi otu reloghonhaạn ghan ḍighaạgh oḅilhẹ ooḅulhemhi otu phọ pidị atọl abia.”

Rewạ ni kẹn m’ooḅenhion ruutu aBetẹl odaphạn ipẹ araraạr renmeeghian bọ siẹn ookpomhoghan phọ. Onhụ abạl abukaaphọm oomo isiẹn aḅirinhi phọ maghị ni anyụ iboom esighẹ k’amem mọ olhoghoḍị bọ ibadị ilạ agadạ phọ ayira. Loor aḍiphoph phọ, remoghi ni ibadị awe dị komiteom loor okumuan ghan epẹ ilạ agadạ phọ. Esi iduọn phọ nyiidiphọ, aruutu dị eḍigh ghan ni we phọ i/ḍigh mun!

Enhọn ephigh iyaạr pọ okoronhaan. Iduọn yirạ oḍuraan bọ rokpụl eekunha aḅirinhi phọ, yira kosoman ni ekperenhom iiḅaghamhị kirokirọ dị keekperemhi ghuḍum ayira. (Luk 21:11) Mem dị yira odaphạn imhoom areten olhoghọm aruutu phọ mem dị yira roselemhi ruutu ayira, reloghonhaạn ghan ni ḍighaạgh oghoph asighuḍum abuphẹ roḍighi bọ siphẹ phọ. Ooḅenhion phọ etue kẹn ni eḍighi idị ariisi phọ kenighẹ orọl ookolhobian ilọ ongọ olhoghonhaạn aḍighaạgh mem ekperenhom iiḅaghamhị, oḅilhẹ okiọm ghisigh obakị oḍighi epẹ erugh phọ mem dị iiḅaghamhị phọ meten.

“AZihova Masẹph Osopha Phọ”

Eeḍiạn iiḅakiọm Aloor Phọ Repogh Bọ, udoghoḍi ni ibadị aruutu ilạ agadạ dị remạn ni 43 siphẹ alhạ arukumuan phọ 2023. Iphẹn phọ remạ ghan mọ oolemhi odi ilạ agadạ phọ edi bọ oomo aḅirinhi phọ, uselemi ni oḅilhẹ odoghoḍi ruutu dị rekị ni omhạn amuniin abin. Miịn iniin areḍeenhaan dị eḍeenhaan idị oḍighi phọ ophọn phọ amhạn maạr.

Angola. AMatt, oniin siphẹ Ekụ Phọ Repogh Bọ olạ agadạ Angola, aḅẹm mọ: “Yoor momhoọgh eepoogh omhiịn omhunhughan imiịn phọ edi bọ Haggai 2:7 eten dị egbatanhaạn. Esi aḍioph asiạ bịn, yoor umhiịn ni dị onhụ abạl abukaaphọm mọ maphoph aḅarạm odiiny abin esi aḍioph abin! Orue obakị abukaaphọm mọ roḍigh bọ, iwạ ni mọ eghunotu aBetẹl phọ epu ipẹ erọl ghan bọ iraạr amem. Kuolọ loor iduọn esi phọ eghom bọ, idị kotue omạgh bunhọn awe i/tọl. Iphẹn phọ ileti buọ aBetẹl phọ ḍiboom adool oḅilhẹ kẹn okumuan ghan mem dị epelhom mem arukumuan phọ abidị.”

Ulhọgh ni buniin abumor mọ owaaghị omhiịn idị koḍighi kụ obughẹ olạ agadạ phọ. Eḅẹl amem mọ bidị uutughiạn mọ idị koḍighi kụ eegboron eḅilhẹ enighẹ epu pọ oselemhi olạ agadạ phọ. Kuolọ roḅilhẹ omhaạr ooḅeghiọn raraạr ophogh, kụ omhiịn mọ oselemhi esi phọ kụ ke/ḍighi egey eten oḍighinhom iisogh phọ ayira. Kparipẹ ghụn, bidị uutughiạn mọ ogho oniin otu dị atumhan esi phọ kụ oselemhi kụ kenighẹ epu. Umor phọ Matt aḅẹm mọ, “Eḅẹl amem mọ oḅenhị bọ Ekụ Phọ Repogh Bọ olạ agadạ phọ ilọ ogho otu kụ oselemhi, yoor umhoọgh ni ogbolhomaam mọ otu phọ ka/kạr anighẹ idiphọ odị yira kụ olhọgh r’aloor. Kuolọ nyiidiphọ momadạn bọ yoor momhiịn m’otu phọ akạr bịn anighẹ aḅilhẹ akasiạn. AZihova masẹph osopha phọ.”

Eeni olạ agadạ phọ Angola kamoghi ni esi dị erẹgh epu siẹn siphẹ ghisigh. Toroboiperolbọ, omhoom otu phọ, r’ipẹ olhọgh bọ eten dị kotue ni ooḅenhion epẹ ghisigh, r’inhọn aruutu dị okpẹ ikpoki kụ roḍighinhọm ghan dị i/lo aani olhoghi aBetẹl phọ, meḍighi idị olạ agadạ phọ aatoọl orọl ongọ olhoghonhaạn aḍighaạgh phọ rewạ bọ epẹ erugh phọ.

Japan. Olhọgh bọ okaraghị iḅẹl aruutu olạ agadạ phọ rekị ni 40 asiạ kụ ko/kạr ghan oselemhi ibadị aruutu phọ. Ghalhamọ r’iduọn molhọgh bọ ni iboom inyaạm omhaạr ophogh aruutu phọ, moḍighinhom ruutu phọ dị mepel siạ phọ ekpẹ bọ orọl phọ. Esi iduọn phọ, roḍighi ni oboom oḍighi oselemhi araraạr siphẹ aruutu phọ iduọn rokaạph bọ.

Iduọn asiạ phọ rekị bọ eten oḍighi araraạr Betẹl menmia kẹn ni. Kụ egbi oteẹny 2015, usaanhaạn ghan ni eghunotu aBetẹl phọ oomo ariiḍien abidị. Esi iduọn phọ, ibadị iisoph aBetẹl aJapan imhoọgh ghan ibạm ariisi orọl osạ eḍien bịn. Kuolọ nyiidiphọ, abuọ aBetẹl phọ kụ rosạ ghan ibadị ariiḍien abidị. Siẹn roselemhi bọ, moḅarạm riisi iisạ dị eetoọl siphẹ iisoph phọ, obọ edughanhaan bumor phọ osạ ghan eḍien. Onyọ umaranhi dị oghol mọ Kumiko, dị rakumuan ghan olạ agadạ aJapan, aḅẹm mọ, “Esi osạ eḍien phọ meḍighi idị mị malhoghoma mọ isiẹn phọ okạr otọ k’amhị, ḅilhẹ milhoghonhaạn imhị ḍighaạgh obakị imhoom iikolhobian phọ siẹn Betẹl.”

Oḍighi phọ roḍighi bọ olạ agadạ aJapan aḍighi ni ephigh oḍighi siẹn arukumuan oomo aḅirinhi phọ. (Matiu 28:19, 20) AJapan aḍighi oniin esi iyạl ilạ agadạ phọ roprint ghan bọ okpom aBaibul phọ. Esi iduọn phọ, oniin agạ oḍighi phọ aḅarạm okpamhaghị araraạr dị keegbo ghan rinyạ phọ eḅilhẹ esigheọgh ipherepẹ phọ r’ophugh obọ ekoph buphẹ roḍighi bọ siphẹ aPrintery phọ. Aḍighi oghoom oḅilhẹ okpamhaghiọm araraạr phọ rekị omhạn oniin erubal adollar, kuolọ keḍighi idị olạ agadạ phọ kokiọm ghisigh oprint ghan oḅilhẹ osighẹ eḍien aruwaloor okiọm bumor phọ.

Umhiịn ni mọ u/sophe oprint ghan asiBaibul mem mọ rolọgh bọ esi phọ. Umor phọ Trey, oniin olọ Ekụ Phọ Repogh Bọ Olạ Agadạ aJapan, aḅẹm mọ: “Mem mọ rolọgh bọ esi phọ, oḍighom mọ umiteom ghan ni siBaibul dị mogbạ oteneghi inhọn arunhụ, kụ awe dị omhoghi siBaibul oomo isiẹn aḅirinhi phọ ophogh ghan bịn obụgh. Iwạ ni mọ abuọ agạ iḍiighi kirokirọ r’akompinị phọ aphạm bọ oḍighi phọ omhaạr ghan oopuruan ilọ amem dị kokpamaghị imhoom araraạr phọ ḅilhẹ r’amem dị koprint ghan rinyạ.” Etigheri ipaanhaạn phọ iphẹn phọ uprint ni omiteom siBaibul dị remạn ni 220,000 torobọ unwanyụ igbo aMarch kụ esi August 2023—mem mọ okạr bọ ophạm oḍighi oselhemhi phọ siphẹ aPrintery phọ. Umadạn ni oomo oḍighi phọ ophọn bịn dị u/bughẹ maleom mọ.

Enhọn ekpanhạ iyaạr dị ogbon oḍighi siẹn roselemhi bọ ruutu phọ pọ oḍighi idị ko/piemi ghan iikpọ eletrịk. Kologhoḍị imhoom asolar panel bịn eḍighi idị ko/leom ghan mun ikpoki dị remạn $120,000 loor alaịt torobọ alhạ. Kodoghoḍi siwinda dị oogbiim mọ aḍighi iraạr inẹ kụ oniin, obọ emaạr ekome iikpọ eletrịk phọ koḍighinhom ghan bọ, bịn eḍighi idị ko/leom ghan mun ikpoki dị remạn $10,000 torobọ alhạ. Ghalhamọ r’iduọn araraạr phọ iphẹn phọ mebughẹ bọ ni ikpoki oselemhiom aruutu phọ, keḍighi idị ko/leom mun ikpoki dị repel li 3.5 erubal adollar oomo asiạ phọ araraạr phọ iphẹn phọ ketọl bọ. Keḅilhẹ kẹn ekome etirom mọ aruutu phọ kemoọgh bọ ekị esi araraạr phọ edi bọ ekool phọ.

“Oḍighi Dị Asugha Abụgh Ni”

Iiḍighi phọ ophạm bọ epẹ iyạl ilạ agadạ phọ iphẹn phọ eḍeenhaan odọ oḍighi phọ yira omhoọgh bọ omhiịn mọ aruutu aBetẹl phọ ekiọm ni ghisigh ebakị rukumuan epẹ erugh phọ. Toroboiperolbọ, oḍighi phọ koo/munheen. Umor phọ Aaron, dị rakumuan ghan r’Ekpịgh Omakạ R’odoghoḍi Aruutu Oomo Aḅirinhi Phọ, aḅẹm mọ “Moḍighi ni oboom oḍighi, kuolọ oḍighi dị asugha abụgh ni.” Komadạn bọ ika oomo iiḍighi phọ iphẹn phọ? Odị aghiọm ghisigh aḅẹm mọ: “Oḅarạm iisogh phọ ayira, reloghonhaạn ghan bọ ḍighaạgh ophạm iiḍighi phọ iphẹn phọ, yira oḅilhẹ kẹn ni rosereghiạn oomo abuphẹ omiteom bọ siloor dị u/kpaariọm epẹ omhạn, ḅilhẹ r’abuphẹ rookolhobian bọ ni ilọ omiteom aani aloor epẹ ghisigh. Iisogh ikpoki phọ r’omiteom aloor abumor phọ ingọ iyoor okuphom owol mọ aZihova rasẹph ni oḍighi phọ.”—Psalm 110:3.

Oomo oḍighi olhoghoḍị r’oselemhi aruutu phọ ayira robakiọm ghan iisogh dị u/kpaariọm, ibadị rosogh ghan bọ siphẹ donate.jw.org Meḍighi eegharạ inmo phọ anyinha.