Orophomhi Aḍighalhanyạ Phọ Ayira Epẹ Erugh Phọ—Owilẹ Oye Dị Ra/poph Ituughạ ABaibul Phọ Odị

IYAẠR PHỌ EMHẠN BỌ NI MAẠR: Torobọ oye lọ rawạ omoọgh apelieẹny amoọgh omạgh aḍien phọ aJihova. (Rom 10:13, 14) Ghalamọ r’iduọn phọ ni, k/oomo awe dị omeeraam otuughạ aBaibul phọ kụ rowạ orolọm asiigbu phọ aJihova. Yira omaạr rosighẹ ghan mem mọ ayira koḍighinom epẹ erugh phọ mem dị yira ologhonaạn ḍighaạgh buẹn okạr bọ rowạ onme adọl aghuḍum m’abidị oḍighi idị eḅeraạn aJihova. Eḍighi maạr lọ yira m’olhọgh muboom amem otughemhị oye Baibul kụ ra/poph kaghị ghisigh, pọ keḍighi ni osụ-ologhi owilẹ itughemhị phọ ooghiraan osoman abuphẹ aJihova rasighẹ bọ kalọgh siẹn ookpomhoghan phọ. (Jọn 6:44) Ii, eḍighi maạr dị ghisigh kụ oye phọ anmia idiphọ odị “Enaạn mesaḅạr omoọgh aghuḍum k’agee-pọ,” r’ibo yira koḅilẹ ni omiigh otughemhị odị.—Iiḍ 13:48.

IPẸ KOḌIGHI BỌ:

• Sereghiạn ni nyopọ nạ ratughemị bọ Baibul phọ idiphọ odị rawạ bọ omhoọgh ogey olhegheri iyaạr phọ.—1Tim 2:4

• Kaạph akparamhị iyaạr phọ emhạn bọ ni maạr osighẹ oḍighinhom ipẹ odị matuughạ bọ.—Luk 6:46-49

• Miigha loor aghaạph ḍidogh phọ aJizọs ilọ oḅephom iizo phọ, kụ aḅenị odị aatughiạn iyaạr phọ resophoghom bọ ophoph oghị aghisigh ph’odị.—Mat 13:18-23

• R’amagheel mạ aḍeenhaan iyaạr phọ eḍighi bọ kụ nạ rawạ bọ owilẹ itughemhị phọ

• Ḅenị ni nyodị mọ nạ katọ ghan ni mem apogh nyodị, ḅilẹ mọ ituughạ phọ ketue ni eḅilẹ emiigh eḍighi maạr lọ odị anmia

IPOGH VIDIO PHỌ KỤ EPHANYANAẠN SIPURU PHỌ EDAPHẠN BỌ SIẸN:

• Eeghe iyaạr siẹn araghaạph phọ kụ iḍeenhaan mọ opọ rotughemị bọ r/apoph okparamị asiya ph’odị r’aJihova?

• Ika kụ idị okaaphọm mọ aloghonhaạn ḍighaạgh nyopọ rotughemị bọ olegheri mọ ewạ ni onmeeghi iniin araraạr?

• Ika kụ idị okaaphọm mọ aseere eepoogh oḅilẹ omiigh ituughạ phọ r’odị ghisigh?