Ariisi Oghị Omhiịn Ophanyanhaạn Asipuru Aḍinyạ Ituughạ Ogboku Awiki Phọ
OCTOBER 7-13
ARUPHUA DỊ OSIGHẸ SIPHẸ EKPO-ONHỤ PHỌ ENHAẠN | JEMS 3-5
“Ḍeenhaan Olegheri Iyaạr Phọ Opọ k’Enhaạn”
(Jems 3:17) Esi omiighom, iyaạr re/ḅiph ghan olegheri iyaạr phọ opọ aḍuạ bọ k’akẹ kụ aru, ḅilẹ kẹn sighiton ra/wạ ghan. Ranmạ ghan ghụn ighirigiir kamoọgh eeḅi ezọ r’igbiririph, kụ kamuum iimuma igey iiḍighi. O/moọgh iiseẹny r’okulakulạ ologhi.
cl 221-222 ¶9-10
“Olegheri Iyaạr Phọ Opọ Aḍuạ Bọ k’Akẹ Kụ Aru” Raḍighi ni Oḍighi Ghuḍum Anạ Ḍughụm?
9 “Esi omiighom, iyaạr re/bịph ghan.” Oḍighi oye dị iyaạr i/bịph pọ remạ ghan osererẹ ḅilhẹ r’orọl adọl dị uu/puạn anyụ r’anyụ ḅilhẹ r’isiphẹ ekpom mọ. ABaibul phọ akomọm olegheri iyaạr r’ekpom mọ, kuolọ olegheri iyaạr phọ k’Enhaạn ka/tue atọl ekpom dị ebiphighạ r’ikarạph iitughiạn, aruuphuạ, ḅilhẹ r’igbiighi. (Proverbs 2:10; Matiu 15:19, 20) Toroboiperolbọ, ekpom mọ ayira kụ iyaạr i/bịph—iduọn phọ pọ, odaphạn ipẹ yira kotue bọ idiphọ awe dị u/munughan—yira “kokiton oḍuạ esi ikarạph kụ oḍighi ghan igey.” (Psalm 37:27; Proverbs 3:7) Nạ ragbi mọ i/kpeanaạn dị eegharạ dị iyaạr i/bịph kụ keḍighi eḅẹl siphẹ oomo araagharạ phọ olegheri iyaạr amoọgh bọ ḍughụm? Loor esi dị, eḍighi maạr dị yira u/sererẹ siphẹ aroozọ phọ ayira ḅilhẹ r’eten aruwaloor, ika kụ idị yira k’ooghironaan bọ olegheri iyaạr phọ k’Enhaạn?
10 “Sighiton ra/wạ ghan.” Olegheri iyaạr phọ k’Enhaạn runyu ghan iyira dị yira kowạ eephọ, epẹ phọ eḍighi eemuma Uwaloor iigbia phọ. (Galetia 5:22) Yira rokparaghạ ghan dị yira ko/gbaragbaramị “eephọ phọ epẹ” eḅophoghị bọ we phọ aZihova. (Efesọs 4:3) Yira rokparaghạ ghan ipẹ yira koḍighi bọ oḅilhẹ oḅulhemi eephọ mem lọ iiḅaghamị emite. Eeghe kụ iḍighi kụ emạn bọ ni maạr? ABaibul phọ aḅẹm mọ: “imaạr . . . erolọm eephọ. Kụ Enaạn ephomoghiạn r’eephọ kiroIonaạn ni inyina.” (2 Korịnt 13:11) Esi iduọn phọ yira oghiọm ni ghisigh orolọm ghan reephọ, pọ Enhaạn eephọ phọ ketọl li r’ayira. Eten phọ epẹ yira rozoọm ghan bọ buẹn r’ayira oḅọph bọ omeeraam mọ kemoọgh ni etirom siphẹ asiya phọ ayira r’aZihova. Yira koḍeenhaan bọ ika mọ yira awe eephọ? Ooḅeghiọn ophogh eḍeenhaan.
(Jems 3:17) Esi omiighom, iyaạr re/bịph ghan olegheri iyaạr phọ opọ aḍuạ bọ k’akẹ kụ aru, ḅilẹ kẹn sighiton ra/wạ ghan. Ranmạ ghan ghụn ighirigiir kamoọgh eeḅi ezọ r’igbiririph, kụ kamuum iimuma igey iiḍighi. O/moọgh iiseẹny r’okulakulạ ologhi.
cl 223-224 ¶12
“Olegheri Iyaạr Phọ Opọ Aḍuạ Bọ k’Akẹ Kụ Aru” Raḍighi ni Oḍighi Ghuḍum Anạ Ḍughụm?
12 “Ranmạ ghan ghụn ighirigiir.” Oḅẹm mọ ranmạ ghan ghụn ighirigiir pọ remạ ghan eeghe? Odaphạn we dị rowaaghị ghan raraạr ilọ aBaibul, okaraghị ekpo onhụ aGrik phọ ogbạ bọ mọ “ranmạ ghan ghụn ighirigiir” siẹn Jems 3:17 ekpạr igey ogbạ. Abuẹn rogbạ ghan bọ Baibul koteneghi inhọn arunhụ usighẹ oḍighinom ikpo onhụ phọ iphẹn “oyoghoyoghọ,” “ominoghọm,” ḅilhẹ “omoọgh ogbolomaam.” Igẹ dị opumom siphẹ aNew World Translation eḍeenhaan mọ okaraghị emhụ ekpo onhụ phọ remạ ghan “odaphạn ghan.” Ika kụ idị yira koḍeenhaan mọ agạ olegheri iyaạr phọ k’Enhaạn ophọn raḍighi ni oḍighi loor ayira?
cl 224-225 ¶14-15
“Olegheri Iyaạr Phọ Opọ Aḍuạ Bọ k’Akẹ Kụ Aru” Raḍighi ni Oḍighi Ghuḍum Anạ Ḍughụm?
14 “Kamoọgh eeḅi ezọ.” Ekpo onhụ aGrik phọ ogbạ bọ mọ “kamoọgh eeḅi ezọ” u/miịn enhọn esi siphẹ Igẹ aBaibul aKristẹn Grik phọ. Odaphạn we dị rowaaghị ghan raraạr ilọ aBaibul, ekpo onhụ phọ ephẹn “rogbor ghan koḍighinom mem dị rokaạph ilọ onaghanạn phọ opọ ratọl ghan bọ igbo awe eghạm r’oḍiemiom mọ abidị.” Epamanạm ḍiitughiạn dị eḅẹm mọ “adugh oḍighi idị kameeraam iyaạr” ḅilhẹ mọ “osooromi aloor ongọ.” Oye dị olegheri iyaạr phọ ophọn k’Enhaạn kụ rateleom rasooromi ghan loor kangọ ipẹ aBaibul phọ aḅẹm bọ. R/olegheriom ghan oye phọ opọ phọ idiphọ odị raḅẹm ghan mọ iphẹn amhị bịn, dị u/meera mọ enhọn iyaạr eru enme nyodị. Kparipẹ ghụn, raagborion ghan onmia mem lọ oḍeenhaan iyaạr dị aBaibul aghaạph dị eegholaan ilọ ekarạph edạ dị odị agbatạn obobọ ameeraam. Ipẹ kụ idị olegheriom ni nyinạ ḍughụm?
“Amoọgh Igbiririph Ḅilhẹ Ramuum Ghan Iimuma Igey Iiḍighi”
15 “Amoọgh igbiririph ḅilhẹ ramuum ghan iimuma igey iiḍighi.” Igbiririph phọ eḍighi ni pakirị olegheri iyaạr phọ k’Enhaạn dị emạn maạr, odọ olegheri iyaạr phọ opọ phọ uḅẹm mọ “amoọgh igbiririph.” Lọgh elhegh mọ oḅạr “igbiririph” phọ ‘r’iimuma igey iiḍighi’ kụ okol. Iphẹn phọ ekạr ekpeanaạn, loor esi dị siphẹ aBaibul phọ, ogbor ghan rokol igbiririph phọ mem dị oye phọ amoọgh ogbolomaam dị aḅarạm oophugh aghị esi abunhọn awe, aghusạn dị ramuum iimuma igey iiḍighi. Aḍinyạ dị eghaạph ilọ iyaạr phọ ephẹn phọ egbạ igbiririph phọ idiphọ “ologhoma okururu oghị esi aḍikarạph adọl dị oye asoman kụ okparaghạ oḍighi ilọ ologhonaạn aḍighaạgh.” Esi iduọn phọ, olegheri iyaạr phọ k’Enhaạn i/ḍighi egbagarạ eegharạ, dị re/loghoma aani ghan idị etir bunhọn, obobọ oopho olegheri aani bịn. Kparipẹ ghụn, raloghoma ghan k’epẹ ologhi phọ, k’etir, k’aḅilhẹ aatughiạn ilọ ipẹ phọ. Ika kụ idị yira koḍeenhaan mọ yira omoọgh ni igbiririph phọ?
(Jems 3:17) Esi omiighom, iyaạr re/bịph ghan olegheri iyaạr phọ opọ aḍuạ bọ k’akẹ kụ aru, ḅilẹ kẹn sighiton ra/wạ ghan. Ranmạ ghan ghụn ighirigiir kamoọgh eeḅi ezọ r’igbiririph, kụ kamuum iimuma igey iiḍighi. O/moọgh iiseẹny r’okulakulạ ologhi.
cl 226-227 ¶18-19
“Olegheri Iyaạr Phọ Opọ Aḍuạ Bọ k’Akẹ Kụ Aru” Raḍighi ni Oḍighi Ghuḍum Anạ Ḍughụm?
18 “O/moọgh iiseẹny.” Olegheri iyaạr phọ k’Enhaạn ra/pogh ghan we kasikị. Odọ phọ olegheri iyaạr phọ ophọn phọ kụ rureleom iyira, yira k’okparaghạ ghan oruphuron osighẹ isiphẹ iloghi phọ ayira torobọ eeteḅa olọgh awe iiseẹny. (Jems 2:9) Yira ku/tuạn askul dị oye aghị, ikpoki dị amoọgh obobọ dool arukumuan dị aphạm siphẹ ookpomhoghan phọ bịn omaghamị maạr bidị opu bunhọn; ḅilhẹ kẹn ka/pogh buẹn r’ayira rooseeny bọ aZihova asooromi loor adọl phọ abidị. Eḍighi maạr dị aZihova kụ m’aḍeenhaan ni odọ phọ abuẹn ephomhoghiạn phọ odị, pọ omhiịn aani mọ bidị okpeanaạn aani ni oḍeenhaan ephomhoghiạn phọ ayira.
19 “O/moọgh okulakulạ ologhi.” Ekpo onhụ aGrik phọ ogbạ bọ mọ “okulakulạ ologhi” phọ remạ ghan oye dị “ragbạ ghan egberi.” Iḍiodi phọ, awe egberi abuọ aGrik r’aRom mọ uzua ghan eboom iyaạr ghisigh phọ. Esi iduọn phọ, ekpo onhụ aGrik phọ ogbạ bọ mọ “okulakulạ ologhi” phọ remạ ghan oye dị aghophora bịn azua iyaạr dị odị u/tu, obobọ oye dị rakue siphẹ iyaạr phọ odị raḍighi bọ. Odọ olegheri iyaạr phọ k’Enhaạn ophọn k”ureleom ghan iyira ipẹ yira rozọ bọ k’oghị esi abumor phọ ayira bịn, kuolọ ipẹ yira rologhoma ghan bọ ilọ abidị.
Oguphogh Owạ Imạ Araraạr Dị Edi Siphẹ ABaibul Phọ
(Jems 4:5) Ke/gbiom ghan ologhi mọ ipẹ aḍinyạ iigbia phọ eghaạph bọ i/mạn maạr mọ, “Uwaloor Iigbia phọ opọ Enaạn elọgh bọ loor ayira o/wạ rowạ mọ enọn iyaạr r’onọ oopikian”?
w08 11/15 20 ¶6
Oghaạph Ookaragh Araraạr dị Edi Rinyạ Phọ AJems r’APita
4:5—Eghẹn esi aBaibul kụ edị aJems aghaạph ghan bọ aghol? AJems o/kạr omoọgh esi dị aghaạph ghan bọ aghol. Toroboiperolbọ, eeni aḍiitughiạn phọ edi bọ siphẹ Genesis 6:5; 8:21; Proverbs 21:10; ḅilhẹ r’aGaletia 5:17 kụ irọl ologhi odị mem mọ ophum bọ nyodị ogẹ ikpo onhụ phọ iphẹn.
(Jems 4:11, 12) Buọ asiya, ke/gbaanaạn ghan oye ikarạph. Olọ agbaanaạn onọn oye ikarạph kụ asophonaan okarạph ooruẹn, pọ maghaạph apuenọm iilọgh phọ, akolaam mọ onọ oye iiruẹn. Eḍighi dị nạ raaḅeghiọn ghan iilogh phọ kaphogh, pọ nạ ra/naghanạn mun iilogh phọ, nạ maghola ḍien mọ anạ oye iiruẹn. 12 Enaạn bịn kụ reloghoḍị ghan iilogh keḅilẹ eeḅeghiọn we ephogh. Odị bịn kụ amoọgh iikpọ ophiemi ghan r’oḍume ghan. Nạ ragbiom ghan ologhi mọ nạ anhiạn kụ raagbo ghan bọ ikarạph iiruẹn kaḅạm rumụ abunọn awe phọ?
w97 11/15 20-21 ¶8
Omeeraam Raḍighi Ghan Idị Yira K’okparạm Oḅilhẹ Ooḅereghị
8 Ogbaanaạn onhọn oye ikarạph ebeeph ni. (Jems 4:11, 12) Ghalamọ r’iduọn phọ ni, abuniin aKristẹn roḍaghạ yogh ghan ni bunhọn, loor esi araraạr dị bidị omhiịn mọ ipẹ kụ ikpeanaạn oḍighi obobọ loor esi dị bidị rowạ oḍeenhaan idị bidị omạn esi ophogh ghan abunhọn osooromhi. (Psalm 50:20; Proverbs 3:29) Ekpo onhụ aGrik phọ ogbaạm bọ mọ ‘ogbaanaạn onhọn oyẹ ikarạph’ phọ reḍeenhaan ghan ophin ologhi ḅilhẹ remạ ghan osiphigha onhọn oye obobọ ogbạ onhọn ophuẹ. Iphẹn phọ eḍighi ni iniin rosophonaan oyọ umor okarạph ooruẹn. Ika kụ idị iphẹn phọ eḍighi ‘ogbaanaạn onhọn ikarạph ḅilhẹ r’ophuenọm iilogh phọ Enhaạn’? Eten ikeḍi, abutughemiạ iilogh phọ r’aFarisi phọ uphogh ghan ‘ogumọm omạn iilogh phọ Enhaạn’ kụ osighẹ ghan eḍighinom iyaạr abidị kụ oḍighinom. (Mạk 7:1-13) Iniin phọ kẹn ni, eḍighi maạr dị yira ophogh ogumọm omạn onyọ umor dị aZihova u/kel, pọ iduọn phọ yira ‘r’opuenọm iilogh phọ Enhaạn’ koḅilhẹ oḍighi ikarạph esi ophogh obeephemị? Kụ esi oḍaghạ ghan umor phọ ayira eten dị i/kpeanaạn, pọ iduọn phọ yira role omụgh ephomhoghiạn.—Rom 13:8-10.
Ibạl ABaibul
(Jems 3:1-18) Buọ asiya amị, i/kpẹ dị ibadị anyina kụ keḍighi butughemiạ, idị eḍighi bọ yira abutughemiạ phọ kụ opiomạn iikpiạ phọ kebụgh epu ilọ abunọn. 2 Oomo phọ ayira ro/gbạ ghan mem opiomạn, kụ oye lọ raako ghan nem odị aseleman ni kụ katue kẹn ni apamaghạn oomo aloor phọ odị. 3 Yira osighẹ ghan igbaḅiri rokasiọm onhụ asụ, obọ ameera ghan anyeene ekpisi lọ yira rowạ oghị. 4 Osighẹ aani odeghedeghẹ oghuugh dị oghim rapiphoghọm kụ omaạm. Otolọm eti phọ asighẹ opeḅerẹ olhọm bịn kapịph ni oghuugh phọ akiọm ekpisi lọ eḅeraạn nyodị. 5 Iduọn phọ kẹn kụ idị anem oye erọl. Ekom ni igey, kụ oghaạph ogbogh ogbogh. Iitughiạn elegheri mọ aḍighiil anem aniạn ketue ni ele onuzạ eboom eekpuạ. 6 Anem oye ekịgh niạn. Ikarạph bịn kụ imuza loor odị. Anem mọ kụ okaraghị esi aloor phọ resighẹ ghan bọ ikarạph keleenye oomo phọ oye phọ. Aniạn phọ eḍuạ [epẹ aGehena NW ] phọ redạph ghan nem kụ kesuughị oomo areten aghuḍum mọ ayira. 7 Awe kotue ni otughemị opoomị kụ mophoomị ni torobọ enạm, r’enụn, r’ena, r’elọ rekuura. 8 Kụ oye o/lo dị marue aako nem odị. Anem emoọgh ikạ r’ophueghị araraạr. Reḅeleghu ghan oḍighi yogh ikarạph. 9 Eeni amem yira rosighẹ ghan nem koboomiom Omoọgh-we Odẹ phọ ayira; eeni amem kootuunyiom bunọn awe dị Enaạn elẹm ni eghighimạ aani.” 10 Ikpo onhụ aḍisẹph r’ikpo onhụ iitunyian eḍuạ ghan ni pạ oniin phọ onhụ phọ kụ remite. Buọ asiya amị, iphẹn ki/mite ghan! 11 Nyina memiịn ghan ni dị oniin phọ aghuḍia phọ kụ amiteom muudughạ r’amughiḍim ghiḍim amuụm ḍughụm? 12 Buọ asiya amị, uman k”omuum ghan oḅusi, oogiri k”omuum ghan uman. Amuụm alạ ra/ḍighi ghan mubọ. 13 Mọ uwo-ologhi odi ni ogbo phọ anyina, pọ aḍeenaan esi egey erolọm r’osooromi aloor siphẹ iiḍighi olegheri iyaạr phọ odị! 14 Kụ eḍighi maạr dị nạ amoọgh ologhi eḍịm r’ikaạgh, pọ ka/ḅom emụ akaạph ilọ ophuenọm igey phọ. 15 Odọ olegheri iyaạr phọ ophọn, olọ isiẹn aḅirini phọ, o/ḍuạ epẹ k’akẹ kụ aru; olọ Eru, k/olọ Uwaloor Iigbia phọ. 16Esi lọ ologhi eḍịm r’ikaạgh edi, ogbaragbarạ r’ikarạph kirokirọ kụ retọl ghan. 17 Esi omiighom, iyaạr re/bịph ghan olegheri iyaạr phọ opọ aḍuạ bọ k’akẹ kụ aru, ḅilẹ kẹn sighiton ra/wạ ghan. Ranmạ ghan ghụn ighirigiir kamoọgh eeḅi ezọ r’igbiririph, kụ kamuum iimuma igey iiḍighi. O/moọgh iiseẹny r’okulakulạ ologhi. 18 Kụ buphẹ ophomoghiạn bọ eephọ roḅeph ghan eephọ kụ kobugha ruukuan.
OCTOBER 14-20
ARUPHUA DỊ OSIGHẸ SIPHẸ EKPO-ONHỤ PHỌ ENHAẠN | 1 PITA 1-2
“Iikuan Ghan”
(1 Pita 1:14, 15) Idiphọ nyina meḍighi bọ nmụny eeḅi ezọ phọ, inaghanạn ghan Enaạn. Ke/meera mun mọ ikarạph aruuphuạ phọ nyina emoọgh bọ mem mọ opọ nyina Enaạn k”elegheri bọ kụ eḅilẹ ekpophonom ghuḍum mọ anyina. 15 Itọl ghụn dọl aruukuan esi atorobọ iyaạr lọ nyina reḍighi, idiphọ Enaạn phọ imạgh bọ inyina eḍighi bọ oye aruukuan phọ.
w17.02 9 ¶5
Etagharạn phọ—‘Inmo Dị Emunughan’ Dị Eḍuạ Esi Odẹ Phọ Kụ Eru
5 Ika kụ idị yira koḍeenhaan mọ yira opomhoghiạn ni ḍien phọ aZihova? Esi aroozọ phọ ayira. AZihova rawạ mọ oḍighi we aruukuan. (Bạl 1 Pita 1:15, 16.) Iphẹn phọ remạ ghan mọ yira kooseeny aZihova bịn, ḅilhẹ kẹn mọ yira konaghanạn nyodị roomo ekpom ayira. Ghalamọ rugbiphoghọm ni iyira, yira rokparaghạ ghan orolọm asinị iilogh ḅilhẹ r’iilogh phọ odị eḍighi bọ ilọ elhiom eḍighinom iyaạr. Esi oḍighi ghan iiḍighi elhiom eḍighinom iyaạr, pọ yira romeera mọ aḍiḅaạl phọ ayira emhụ esighẹ eghuan eruom ḍien phọ aZihova. (Mat. 5:14-16) Idiphọ awe aruukuan, yira roḍeenhaan ghan siphẹ adọl aghuḍum mọ ayira mọ iilogh phọ aZihova enighẹ ni ḅilhẹ mọ ipẹ aSetan agbạ bọ okpẹ. Mem lọ yira opiomạn, idiphọ oomo ayira ropiomạn ghan bọ ni, yira rokạr ghan kokiton oḍuạ esi ikarạph iiḍighi dị k/ekueni aZihova.—Ps. 79:9.
(1 Pita 1:16) Idiphọ aḍinyạ iigbia phọ reḅẹm ghan bọ mọ, “Iikuan ghan, idị eḍighi bọ mị oye aruukuan.”
lvs 77 ¶6
Ipẹ Yira Kosaḅạr Ghan Bọ Ozaamhiạn Aloor Phọ Ayira
6 AZihova uḅenị iyira mọ: “Iikuan ghan, idị eḍighi bọ mị oye aruukuan.” (1 Pita 1:14-16; 2 Pita 3:11) AZihova kasighẹ iiseeny phọ ayira eḍighi maạr dị eekuan obobọ esererẹ. (Deuteronomy 15:21) Iiseeny phọ ayira ke/tue esererẹ eḍighi maạr lọ yira roḍighi ghan raraạr dị aZihova aghel, idiphọ aroozọ dị i/ḅaạl, igamaniạn, obobọ omhoọgh amuḅọph r’iiḍighi aruru. (Rom 6:12-14; 8:13) Kuolọ ke/ḅeraạn kẹn aZihova eḍighi maạr dị ophogh ghan odọ asifim dị erọl idiphọ phọ kụ iḅeraạn iyira. Iphẹn phọ ketue ni eḍighi idị iiseeny phọ ayira k”esererẹ ḅilhẹ kẹn aZihova ka/sighẹ, bịn kẹn epuẹ siya phọ ayira r’odị.
Oguphogh Owạ Imạ Araraạr Dị Edi Siphẹ ABaibul Phọ
(1 Pita 1:10-12) Ariil phọ Enaạn uḅiligha ni owaaghị ghan ilọ olegheri emụ apelieẹny phọ ophọn phọ, kụ bidị umiịn ni imiịn dị ekpulughiọm inmo phọ iphẹn phọ Enaạn kingọ bọ inyina. 11 Bidị uwaaghị ghan ni olegheri amem mọ Uwaloor phọ aKraist arọl bọ loor phọ abidị aghaạph ghan bọ aghol, r’odọ phọ erumom mọ. Uwaloor phọ aKraist aḅenị ghan ni bidị iminimiịn dị aKraist kamiinọm, ḅilẹ r’igbogh dị kedaphạm siphẹ. 12 Enaạn ighaạph ni emiteom eḍeenaan riil phọ abuẹn phọ mọ oḍighi phọ bidị roḍighi bọ k/olọ asuọ abidị, olọ asuọ anyina ghụn ni. Kụ nyiidiphọ buphẹ Uwaloor Iigbia phọ k’akẹ angọ bọ iikpọ oghaaphọm ooḅi oghaạph phọ, momiteom iphẹn phọ ogananami iḅenị inyina. Iphẹn phọ araraạr dị r’aruukpaạny phọ Enaạn bịn roḍula ni loor owạ olegheri aani.
w08 11/15 21 ¶10
Oghaạph Ookaragh Araraạr dị Edi Rinyạ Phọ AJems r’APita
1:10-12. Aruukpaạny phọ Enhaạn bịn roḍula ni loor owạ olegheri aani igey phọ ipẹ ariil iḍiodi phọ ogẹ bọ idị egbolomaam ookpomhoghan aKristẹn phọ osagharạn bọ uwaloor phọ. Toroboiperolbọ, iphẹn phọ ikạr eegholaan mem mọ aZihova amiigh bọ oḍighi araraạr r’ookpomhoghan phọ. (Efẹ. 3:10) Yira k”odạph aani eḍeenhaan aruukpaạny phọ okparaghạ owaaghị aani “eekuna iitughiạn ibooghiạn phọ Enaạn”?—1 Kọr. 2:10.
(1 Pita 2:25) Obọ nyina ighịgh iyool igạ dị repe eten, kụ nyiidiphọ nyina meḅula eteẹny Okoriom Iyool Igạ phọ r’Opoghom aruwaloor phọ anyina.
it-2 565 ¶3
Opoghom
Ogbogh Opoghom mọ. Dị eegholaan ni, ikpo onhụ phọ aPita edi bọ siphẹ 1 Pita 2:25, eḍighi oghaạph oghol ipẹ edi bọ siphẹ Isaiah 53:6, pạ eghaạph bọ ilọ awe dị ‘oghịgh iyool igạ dị repe eten,’ kuolọ aPita aḅarạm mọ: “kụ nyiidiphọ nyina meḅula eteẹny Okoriom Iyool Igạ phọ r’Opoghom aruwaloor phọ anyina.” Iphẹn phọ rekaạph ghan ilọ aZihova Enhaạn phọ, loor esi dị abuẹn aPita agẹ bọ aghiọm k/ophe oḍuạ esi aKraist Zizọs, kparipẹ ghụn, iigo esi aKraist kụ bidị oḅilhẹ bọ oḅulha ḍighaạgh aZihova Enhaạn phọ, opọ aḍighi bọ Ogbogh Okoriom awe phọ odị. (Ps 23:1; 80:1; Jer 23:3; Eze 34:12) AZihova phọ kẹn aḍighi ni opoghom obobọ odị aḅilhẹ rawaaghị ghan k’aphogh. (Ps 17:3) Owaaghị ophogh phọ ophọn (Gr., e·pi·sko·peʹ) kotue ni okomọm oḍighi oḍeenhaan ogbagarạ ooruẹn Enhaạn, idiphọ emite bọ ni siphẹ oḅẹl okuron asiạ phọ C.E. ilọ aJeruselem, opọ phọ u/lọgh bọ elhegh mem mọ oru bọ ‘ophẹl odị [Gr., e·pi·sko·pesʹ].’ (Luk 19:44) Obobọ ketue ni eḍighi ilọ imạ abuphẹ ronaghanhạn bọ Enhaạn, idiphọ kemitenhaan bọ buphẹ rokuenhi bọ Enhaạn “ḍio phọ odị katu bọ [Gr., e·pi·sko·pesʹ].”—1Pit 2:12.
Ibạl ABaibul
(1 Pita 1:1-16) Mị aPita otelhedom mọ aJizọs Kraist kụ ugẹ ḍinyạ phọ aḍiẹn riruomaan inyina phọ Enaạn esaḅạr bọ kụ erughogh bọ ewalalạ reelhe phọ aPontọs r’aGaletia r’aKapadosia r’Esia r’aBaitinia. 2 Enaạn Odẹ phọ melegheri ni etene igbaany kụ isaḅạr bọ inyina, kụ Uwaloor Iigbia phọ iḍighi inyina we aruukuan, pidị nyina enaghanạn Jizọs Kraist, osighẹ iḅaạl phọ odị iwophom inyina. Aḍisẹph r’eephọ ebalabalạ ni irolonaạn inyina! 3 Aḍisẹph erolonaạn Enaạn r’Odẹ phọ aJizọs Kraist Omoọgh-we phọ ayira. Loor oboom onmạ ighirigiir phọ odị, idiphọ odị aḅeton bọ Jizọs Kraist siphẹ aḍuugh phọ, moḅilẹ umạr iyira olọgh ghuḍum oḍuom ologhi, 4 mọ yira kopin aani bin araraạr phọ Enaạn eseenaan bọ epẹ k’akẹ we phọ odị. Araraạr phọ edi ni esi dị ko/piemi, ḅilẹ ke/ḅọr epuughị. 5 Iphẹn phọ iseenaan ni inyina abuphẹ motuạn bọ omeeraam mọ oḍigh ḍibuo iikpọ phọ Enaạn, kụ rokori ghan bọ pelieẹny phọ opọ mookolobian bọ oseere ilọ ogananami ruukuna phọ. 6 Ituạn ni iphẹn phọ emoọgh oḅaạl ologhi, ghalamọ idiphọ ekpẹ bọ ni okururu moọny amem mọ amuẹn loor iminimiịn kirokirọ phọ nyina remiinọm bọ. 7 Iphẹn phọ ilọ olegheriom mọ omeeraam mọ anyina ogey ni. Gol dị kapụ ghan ni bịn osighẹ ghan ni niạn kụ ropoghom mọ ogey ni. Iduọn phọ kẹn kụ edị kopogh aani ni omeeraam mọ anyina amạn bọ ni iyaạr iboom apu gol, pidị olegheriom mọ katue ni akparạm ateẹny ḍio phọ kogananami bọ Jizọs Kraist obọ nyina emoọgh ḍisẹph r’eegu ḅilẹ r’eghuan. 8 Nyina nyodị k”emiịn ghan ni kụ nyina epomoghiạn ni nyodị. Nyina nyodị nyiidiphọ re/miịn ni, kụ nyina emeeraam bọ ni nyodị. Kụ nyina rebo ni iboom ibo dị anem ke/tue ekaạph. 9 idị eḍighi bọ aruwaloor phọ anyina remoọgh pelieẹny phọ opọ aḍighi bọ ibugha omeeraam mọ anyina. 10 Ariil phọ Enaạn uḅiligha ni owaaghị ghan ilọ olegheri emụ apelieẹny phọ ophọn phọ, kụ bidị umiịn ni imiịn dị ekpulughiọm inmo phọ iphẹn phọ Enaạn kingọ bọ inyina. 11 Bidị uwaaghị ghan ni olegheri amem mọ Uwaloor phọ aKraist arọl bọ loor phọ abidị aghaạph ghan bọ aghol, r’odọ phọ erumom mọ. Uwaloor phọ aKraist aḅenị ghan ni bidị iminimiịn dị aKraist kamiinọm, ḅilẹ r’igbogh dị kedaphạm siphẹ. 12 Enaạn ighaạph ni emiteom eḍeenaan riil phọ aḅuẹn phọ mọ oḍighi phọ bidị roḍighi bọ k/olọ asuọ abidị, olọ asuọ anyina ghụn ni. Kụ nyiidiphọ buphẹ Uwaloor Iigbia phọ k’akẹ angọ bọ iikpọ oghaaphọm ooḅi oghaạph phọ, momiteom iphẹn phọ ogananami iḅenị inyina. Iphẹn phọ araraạr dị r’aruukpaạny phọ Enaạn bịn roḍula ni loor owạ olegheri aani. 13 Loor iphẹn phọ, ipạm ni iloghi anyina ekparamị kụ ekoriom mem oḍighi omiteom mọ. Igona loor, ekpasị oomo oḍuom ologhi phọ anyina esi ooḅi oghọr phọ nyina kemoọgh bọ mem mọ kogananami bọ Jizọs Kraist. 14 Idiphọ nyina meḍighi bọ nmụny eeḅi ezọ phọ, inaghanạn ghan Enaạn. Ke/meera mun mọ ikarạph aruuphuạ phọ nyina emoọgh bọ mem mọ opọ nyina Enaạn k”elegheri bọ kụ eḅilẹ ekpophonom ghuḍum mọ anyina. 15 Itọl ghụn dọl aruukuan esi atorobọ iyaạr lọ nyina reḍighi, idiphọ Enaạn phọ imạgh bọ inyina eḍighi bọ oye aruukuan phọ. 16 Idiphọ aḍinyạ iigbia phọ reḅẹm ghan bọ mọ, “Iikuan ghan, idị eḍighi bọ mị oye aruukuan.”
OCTOBER 21-27
ARUPHUA DỊ OSIGHẸ SIPHẸ EKPO-ONHỤ PHỌ ENHAẠN | 1 PITA 3-5
“Eekuronom Oomo Araraạr Mekpulạn”
(1 Pita 4:7) Eekuronom oomo araraạr mekpulạn, kụ isereghian emiigha loor kụ eeḅereghị ghan.
w13 11/15 3 ¶1
“Emiigha Loor Kụ Eeḅereghị Ghan”
“AMEM dị rekpạr ghan iboom ogon siphẹ aḍughul phọ pọ amem dị retu oḅaạl,” iphẹn kụ idị oye dị rakori ghan ḍughul aḅẹm. Dị eegholaan ni, awe dị morọl ghan oomo aḍughul ogon omeeraam ni ipẹ phọ. AKristẹn ḍio arodon osoman aani iniin phọ iiḅaghamị phọ loor esi dị aḍiidoọny aḍughul aḅirini phọ aSetan m’esi mem dị eeph iboom siẹn iphirigba aḅirinhi phọ. (Rom. 13:12) P’eeghe idị k’ebeeph omeel aralạ odọ phọ oogho phọ ophọn! Emoọgh igey maạr oḍighinom dị yira ‘kosereghian’ oḅilhẹ onaghanạn iphụr arurụ aBaibul phọ ilọ ‘omiigha loor kụ ooḅereghị ghan.’—1 Pit. 4:7.
(1 Pita 4:8) Idị epu oomo araraạr, oniin aphamanạm ni ophomoghiạn oniin, idị eḍighi bọ ephomoghiạn kụ reekpereghi ghan ibadibadị ikarạph!
w99 4/15 22 ¶3
Ilọ Olegheri Kụ Oḅilhẹ Okpạr Opu Esi Lọ Yira M’odugh Pạ Asiya Phọ Ayira r’AZihova
Okureriom, seere ni ologhi ikpo onhụ ephomhoghiạn phọ otelhedom mọ aPita angọ bọ: “Eekuronom oomo araraạr mekpulạn, kụ isereghian emiigha loor kụ eeḅereghị ghan. Idị epu oomo araraạr, oniin aphamanạm ni ophomoghiạn oniin, idị eḍighi bọ ephomoghiạn kụ reekpereghi ghan ibadibadị ikarạph.” (1 Pita 4:7, 8) R’edugh ghan igey omeera mọ e/munughan oye—iphẹn ayira r’ilọ abunhọn awe—eru eḍigh rokpom r’iloghi phọ ayira bịn eḍighi sighiigh okpeteghaan r’aranạ. ASetan alegheri igey ḍidugh phọ oye aḍiẹn. Okọm amadia obọ odị akpạr apu eḍighi iniin ikeḍi dị odị raḍighinom ghan. Esi iduọn phọ, oogborion ghan ookpereghi odọ phọ ikarạph phọ iphẹn r’ephomoghiạn dị eḍiinyan, bịn “r’amem r’amem ke/ngọ eepoogh Eru phọ.”—Efesọs 4:25-27.
(1 Pita 4:9) Oniin alọgh ghan nyoniin otu, kụ ku/gum ghan!
w18.03 14-15 ¶2-3
Eegharạ Dị Oniin kalọgh Ghan Nyoniin Otu—Ekạr Kụ Ewạ!
2 Igbo inọn odọ araraạr, aPita akpaariọm bumor phọ odị mọ: “Oniin alọgh ghan nyoniin otu.” (1 Pit. 4:9) Ekpo onhụ aGrik phọ ogbạ bọ mọ “olọgh otu” phọ remạ ghan “omoọgh aḍiḅeraạn, obobọ igbiririph oghị esi aruuruen.” Toroboiperolbọ, lọgh elegh mọ aPita akpaariọm bumor r’abumarani dị oḍighi Kristẹn dị “oniin” kalọgh “nyoniin” otu, buẹn bidị olegheri bọ ḅilhẹ rooḅughonaan ghan bọ. Ika kụ idị olọgh ghan otu phọ keloghonaạn bidị ḍighaạgh?
3 K’egbiemị bidị. Ooḅeghiọn edị memitenaan aani ghan nyinạ. Nạ maghelọm aani ghan ni ḍimạgh oghị aani ologhi otu oye? Ipẹ nạ aghelọm bọ i/lo ghan iitughiạn anạ ḍughụm? Mem dị nạ akọ igoni olọ ookpomoghan anyina, ogọ amuḅọph phọ anyina ogbiạn ḍughụm? Esi oḍeenaan ghan eegharạ okọ ghan igoni, yira rolegheri ghan bumor r’abumarani phọ ayira reten dị yira k/otue olegheri inhọn odọ asimem. AKristẹn phọ orọl bọ siḍio phọ aPita iwạ mọ ogbiạn siloor mem mọ asidọl phọ rebeeph bọ. Iniin phọ kẹn ni kụ idị ewạ esi aKristẹn phọ odi bọ siḍio “aruukuna phọ.”—2 Tim. 3:1.
Oguphogh Owạ Imạ Araraạr Dị Edi Siphẹ ABaibul Phọ
(1 Pita 3:19, 20) Kụ odị arọl dọl uwaloor kụ aḍuạ bọ aghị agbeel aḅenị ruwaloor phọ ipẹ okasaghiọm bọ. 20 Iphẹn phọ aruwaloor phọ [ipẹ NWT] Enaạn u/naghanạn bọ mem mọ dị amoọgh bọ ni okparạm akori riiḍio phọ ipẹ aNoa rakạ bọ oboom oghuugh phọ. Ophanyạ awe ni bịn kụ urọl bọ ologhi oghuugh phọ. Buẹn phọ kụ edị ophẹl bọ otene siphẹ amuụm mọ.
w13 6/15 23
Asipuru Dị Abuẹn Robạl Ghan Bọ Rinyạ Phọ Ayira Opuru
ABaibul phọ aḅẹm mọ aZizọs “agbeel ghan aḅenị ruwaloor phọ ipẹ okasaghiọm” bọ. (1 Pit. 3:19) Iduọn phọ pọ reḅẹm ghan ika?
▪ Otelhedom mọ aPita aḅẹm mọ iphẹn phọ pọ “aruwaloor phọ [ipẹ NWT] Enaạn u/naghanạn bọ mem mọ dị amoọgh bọ ni okparạm akori riiḍio phọ ipẹ aNoa rakạ bọ oboom oghuugh phọ.” (1 Pit. 3:20) Dị eegholaan ni, aPita aghaạph ghan aghol ruwaloor phọ ipẹ eḍighan bọ Setan ekitonaan Enhaạn. AJud aghaạph ilọ aruukpaạny phọ ipẹ “u/tuụgh bọ iikpọ phọ ongọ bọ bidị kụ orolọm, kụ oḅilẹ bọ oghelogh marugh phọ abidị,” kụ aḅẹm mọ “Enaạn mesighẹ izime dị ketọl li k’agee-pọ ekasaghiọm bidị, elọgh okikikị ufiri okoriom ghan aḍiboom mọ aḍio iiruẹn phọ.”—Jud 6.
Eghẹn eten kụ edị aruwaloor phọ Enhaạn u/naghanạn riiḍio phọ aNoa? Kụ aḍigho phọ egbi bọ oḍigh phọ, ikarạph aruwaloor phọ iphẹn phọ iru bịn eeteneghian we—eḍighi raraạr dị Enhaạn i/lemọm bidị. (Gen. 6:2, 4) Oghiọm aghisigh, aruukpaạny phọ ipẹ erolạn bọ esi nmariịr uḍighi ghan raraạr dị egbọl r’ipẹ olẹm bọ bidị. Enhaạn i/lẹm ruwaloor orolạn ghan esi nmariịr. (Gen. 5:2) Ikarạph aruukpaạny phọ iphẹn i/naghanạn bọ, k’opiemi ni mem dị amem mọ Enhaạn eteẹny. Nyiidiphọ, idiphọ aJud aḅẹm bọ bidị edi “okikikị ufiri”—dọl ikoli aruwaloor.
Apụr amem ḅilhẹ ika kụ idị aZizọs agbeelom bọ aḅenị “ruwaloor phọ ipẹ okasaghiọm bọ”? APita agẹ mọ iphẹn phọ imite mem mọ ongọ bọ “ghuḍum uwaloor phọ odị.” (1 Pit. 3:18, 19) Lọgh elegh kẹn ni mọ aPita aḅẹm mọ aZizọs “agbeel.” Siẹn phọ aPita aḅạ eten dị eḍeenhaan mọ igbeel phọ imite epẹ omhạn, esi iduọn phọ iphẹn phọ meten ni kụ aPita agbi bọ ogẹ aḍiḅẹl aḍinyạ phọ odị. Esi iduọn phọ ekịgh mudị idiphọ oḅeton bọ nyodị bịn, aZizọs agbeel li igbeel phọ iphẹn phọ aḅenị ikarạph aruwaloor phọ ilọ ilhioghọm mọ m’omaanaạn bọ mọ k’emeelom bidị. I/ḍighi igbeelom dị ephamanaạn bidị oḍuom ologhi. Iḍighi igbeelom ooruẹn. (Jonah 1:1, 2) Idiphọ aZizọs maphạm bọ ni ḍimeeraam mọ odị r’adọl oḅạr phọ odị k’aḍuugh kụ oḅilhẹ oḅeton siphẹ aḍuugh phọ—emạ emiteom mọ esi lọ iikpọ phọ Eru emoọgh iyaạr oḍighinom odị i/lo—aZizọs akạr kụ amoọgh emụ otuạn kụ ogbeelom igbeel amuphe phọ ipẹ phọ.—Jọn 14:30; 16:8-11.
Epẹ ghisigh, aZizọs k’asiph ni Setan r’aruukpaạny phọ ipẹ apaḍị kụ atoph asumeeny siphẹ ooni phọ. (Luke 8:30, 31; Ogan. 20:1-3) Kụ egbi oteẹny amem mọ amuphẹ phọ, aruwaloor phọ Enhaạn u/naghanạn bọ edi okikikị ufiri, kụ amuphe phọ abidị iyaạr re/kikima.—Ogan. 20:7-10.
(1 Pita 4:6) Ogbạ agey, iduọn kụ iḍighi kụ oghaạph bọ ni iiḅi iinaghạn phọ oḅenị buphẹ m’omuughu bọ, pidị ghalamọ r’iduọn m’osophonaan bọ ni bidị ooruẹn ephẹn iphulupul phọ esi awe, bidị otue otolạn idị emhoọgh muḅọph r’uwaloor phọ esi Enhaạn [NWT].
w08 11/15 21 ¶8
Oghaạph Ookaragh Araraạr dị Edi Rinyạ Phọ AJems r’APita
4:6—Abuọ Anhiạn kụ abuphẹ “momuughu bọ” oghaạph bọ “ooḅi oghaạph phọ oḅenị”? Abuẹn phọ abudị omuughu bọ ‘loor esi asipioghọm r’ikarạph phọ’ abidị obobọ abudị u/moọgh igey asiya r’aZihova, kụ ogbi bọ onaghạn ooḅi oghaạph phọ. (Efẹ. 2:1) R’omoọgh omeeraam esi ooḅi oghaạph phọ, bịn oḅilhẹ “omoọgh igey asiya” r’aZihova.
Ibạl ABaibul
(1 Pita 3:8-22) Ilọ oseereom oghaạph phọ: oomo phọ anyina iḅọph iloghi, emoọgh ghan igbiririph. Ipomoghiạn idiphọ anmụny-onhiin. Oniin anmạ ghan nyoniin ighirigiir, esooromi ghan loor anyina. 9 Ke/sighẹ ghan ikarạph ekpeọm ikarạph. Ke/sighẹ ghan kẹn igurughian ekpeọm igurughian. Ingọ ghan ghụn bidị ḍisẹph, idị eḍighi bọ mem mọ Enaạn imạgh bọ inyina odị aguanaan ongọ anyina ḍisẹph. 10 Idiphọ aḍinyạ iigbia phọ reḅẹm ghan bọ mọ, “Oye lọ rawạ oghelọm aghuḍum mọ odị r’orọl oteẹny aani igey, asoph okarạph oghaạph r’ogbaaghị ghan okpẹ akureri! 11 Odị awilẹ yogh oḍighi ghan ikarạph aḍighi ghan igey! Odị awạ ghan eephọ kụ aphorogh akpaariọm, 12 idị eḍighi bọ Omoọgh-we phọ agbi ni riḍien odị esi awe aruukuan phọ, aḅilẹ ranaghanạn ghan iiḅereghị phọ abidị, kụ raḅitonaạn ghan ni buọ asipioghọm mọ.” 13 Anhiạn nuụn kụ kiḍighi inyina iyaạr, eḍighi iyaạr dị ekpom anyina eghologhọl ghan ni oḍighi ipẹ enighẹ bọ. 14 Kụ ghalamọ nyina ighol li oḍighi ghan ipẹ enighẹ bọ kụ remiinọm, pọ ibọ k’Enaạn kirolonaạn ni inyina. Ke/kiilaan ghan we. Ke/meera mọ bidị ingọ inyina okaphian oomiigh. 15 Ilọgh eegu Kraist siphẹ iloghi phọ anyina, eḍighi nyodị Omoọgh-we phọ anyina. Iikolobian ghan oomo amem ophagharanaạn dị nyina kengọ ghan torobọ oye lọ iḅenị inyina mọ ikaạph emụ oḍuom ologhi phọ nyina emoọgh bọ eḅenị nyinọ. 16 Kụ ikaaphọm ghan osooromi aloor r’eghuan. Iloghi anyina inyina ki/gurọgh r’amem, pidị mem lọ ironyon inyina osiphe ghan umugholoor buphẹ olegheri bọ mọ nyina abuọ aKraist kụ rokaạph ghan bọ ophuenọm iiḅi aroozọ phọ anyina. 17 Iyaạr phọ eḍighi bọ, lọ Enaạn emeera ni, pọ iminimiịn dị oghol oḍighi igey kụ romiinọm kụ inighẹ epu ilọ oḍighi ikarạph. 18 AKraist aghol emụ anyina kụ amugh bọ. Odị asighẹ loor phọ odị, aḍighi omụr r’iphorobo dị owophom ikarạph mem bịn ḅeer omadạn. Ogey oye kụ aạr ḍuugh abukarạph awe amugh, pidị isighẹ inyina osiemi k’Enaạn. Ughiigh ni ḍizu phọ odị, kụ ongọ ghuḍum uwaloor phọ odị. 19 Kụ odị arọl dọl uwaloor kụ aḍuạ bọ aghị agbeel aḅenị ruwaloor phọ ipẹ okasaghiọm bọ. 20 Iphẹn phọ aruwaloor phọ [ipẹ NW ] Enaạn u/naghanạn bọ mem mọ dị amoọgh bọ ni okparạm akori riiḍio phọ ipẹ aNoa rakạ bọ oboom oghuugh phọ. Ophanyạ awe ni bịn kụ urọl bọ ologhi oghuugh phọ. Buẹn phọ kụ edị ophẹl bọ otene siphẹ amuụm mọ. 21 Amuụm mọ amuẹn phọ akighọm muphẹ robur ghan bọ ophelọm anyina. Owur amuụm mọ k/oogbirinaạn eenịr aloor bịn, ogbạ ghan omiteom r’ophooph ologhi mọ omeeraam ni Enaạn. Owur amuụm mọ ratuạn ghan idiphọ aJizọs Kraist aḅetenu bọ siphẹ aḍuugh phọ kụ kiphẹl inyina. 22 AJizọs Kraist phọ magheel k’akẹ odi ḍighaạgh eliom Enaạn, rapogh ghan oomo aruukpaạny phọ Enaạn, r’itooghị phọ r’iikpọ phọ edi bọ k’akẹ.
OCTOBER 28–NOVEMBER 3
ARUPHUA DỊ OSIGHẸ SIPHẸ EKPO-ONHỤ PHỌ ENHAẠN | 2 PITA 1-3
“Eekuronom Oomo Araraạr Mekpulạn”
(2 Pita 3:9, 10) Omoọgh-we phọ raa/binya ghan oḍighi ilọ dị aguanaan, idiphọ buniin anyina reetughiạn ghan bọ, Odị raminoghọm ghan ghụn ikarạph phọ anyina, idị eḍighi bọ odị ọ/wạ ophiemi r’oniin oye, odị rawạ ghan ghụn mọ oomo phọ awe phọ okiton esi ikarạph phọ abidị. 10 Kụ aḍio phọ Omoọgh-we phọ katu bọ keḍighi ekperenom idiphọ oḅạ. Ḍio phọ aḍiphẹ phọ akẹ phọ kaḍua-nạm ni ḍigbagara aḍiaḅạ, kụ iikpọ phọ edi bọ k’akẹ kenuughị ni eḅilẹ egbọ, kụ ade phọ r’oomo phọ ipẹ odị kepe ni emuneen.
w06 12/15 27 ¶11
AZihova ‘Kasoph Ni Ooruẹn Akeelemi We Phọ Odị’
11 Ika kụ idị yira k’onaghanạn ikpo onhụ okparamị phọ aZizọs iphẹn mọ aZihova “kaagborion” ni asoph ooruẹn akeelemi bidị? Ekpo onhụ phọ Enhaạn eḍeenaan mọ ‘ghalamọ iduọn aZihova rakparạm bọ ni’ odị kaa/binya osoph ooruẹn mem lọ eteẹny. (Luk 18:7, 8; 2 Pita 3:9, 10) Siḍio phọ aNoa, mem mọ amuụm aḍigho phọ aru bọ, uphuemi ni buọ asipioghọm mọ dị uu/binya. Iniin phọ kẹn ni, siḍio phọ aLọt mem mọ asikẹ phọ elọph bọ niạn, uphiemi ni buọ asipioghọm mọ. AZizọs aḅẹm mọ: “Ketọl iduọn ḍio phọ Oọny phọ Oye kamite bọ egaan phọ.” (Luk 17:27-30) Iniin phọ kẹn ni, abuọ asipioghọm mọ kosoman “ekperenom amuphe.” (1 Tesalonikạ 5:2, 3) Okạr agey, yira okuphom ni owol mọ aḅirini phọ aSetan ka/sighẹ r’aḍiniin aḍio aḅeenyọm ipẹ ewạ bọ m’odị arọl.
(2 Pita 3:11, 12) Iduọn kopiemi bọ ni oomo araraạr phọ iphẹn, nyina ketọl eeghe odọ adọl nuụn? Itọl dọl aruukuan eḅọgh ghuḍum mọ anyina elọgh ḍighaạgh Enaạn, 12 kụ ekoriom ghan ekparamị ḍighaạgh oḍighi ghan ilọ aḍio phọ Enaạn kenuụn eteẹny, ḍio phọ aḍiphẹ akẹ phọ kanụ bọ aḅilẹ ape kụ eghologhọl phọ kegboomị bọ iikpọ phọ edi bọ k’akẹ.
w06 12/15 19 ¶18
“Aḍigbogh Aḍio Phọ AZihova M’ekpulạn”
18 Iikia i/lo otelhedom mọ aPita ukpaariọm bọ iyira okparamị aḍighaạgh oḍighi ghan ilọ “aḍio phọ aZihova k’enuụn eteẹny”! Ika kụ idị yira koḍighi bọ iphẹn phọ? Eniin eten pọ ophinom aani abin ‘dọl aruukuan kụ oḅọgh aghuḍum mọ ayira olọgh aḍighaạgh Enaạn.’ (2 Pita 3:11, 12) Ophinom aani abin odọ iiḍighi phọ iphẹn kiloghonaạn iyira ḍighaạgh okori ghan r’ikpukpụ eesianaan “aḍio phọ aZihova.” Ekpo onhụ aGrik phọ ogbạ mọ “k’enuụn eteẹny” kotue ni oḅilhẹ oḅẹm mọ “oogborionom”. Yira raloor bịn k/otue oḍighi idị amem eesianaan aḍio phọ aZihova esugha bọ k’eegborion. Kuolọ, idiphọ yira rokori bọ ḍio phọ aḍiphẹ phọ, amem mọ k’ekịgh mudị reegborion ni iboom eḍighi maạr lọ yira osighẹ oomo inyaạm mọ ayira oḍighinom ongọ Omoọgh-we phọ.—1 Korịnt 15:58.
Oguphogh Owạ Imạ Araraạr Dị Edi Siphẹ ABaibul Phọ
(2 Pita 1:19) Esi ayoor, oomo phọ iphẹn phọ ikparamiọm ghan dom mọ ariil phọ Enaạn ogbeelom ghan bọ. Ekpeanaạn ni dị nyina keler rurụ enaghanạn, idị eḍighi bọ ekịgh idiphọ otozị dị asoor esi ufiri, tutụ aḍiroọr phọ eḅaạl kụ eenaạn aḍiroọr phọ emụ siphẹ iloghi phọ anyina.
w08 11/15 22 ¶2
Oghaạph Ookaragh Araraạr Dị Edi Rinyạ Phọ AJems r’APita
1:19—Anhiạn kụ “eenaạn aḍiroọr phọ,” amụ pụr amem, kụ yira ulegheri ika mọ iphẹn phọ imite ni? “Eenaạn aḍiroọr phọ” pọ aZizọs Kraist dị ratooghị pạ Omhạr phọ. (Ogan. 22:16) Lhạ phọ 1914, aZizọs aḍeenhaan loor odị oomo olhẹm idiphọ Uw-emhạ itooghị aMesaya phọ, elegh mọ aḍiroọr aḍimoom aḍio m’eḅaạl. Onmia phọ odị anmia bọ angọ uḍien omiịn eghuan phọ aZizọs r’iikpọ Omhạr phọ, iphẹn phọ ekaạph ghan rekparamị odọ idị ekpo onhụ imiịn phọ Enhaạn ekpẹ obeḍenọm. Olher ghan arurụ ongọ ekpo onhụ phọ epẹ phọ reḍighi ghan idị aḍiḅaạl kesoorom rokpom mọ ayira, kụ iphẹn kụ iḍighi bọ idị yira olegheri mọ Eenaạn aḍio phọ m’emiigh remụ.
(2 Pita 3:17) Kụ nyina, iiḅi asiya, miphụr inyina rurụ otene igbaany. Igona ni loor anyina, obọ nyina kekorọm ghan bọ siphẹ aḍiphaghaphaghạ adọl phọ anyina emeel eḍighanaan reten amabi abukarạph awe.
w08 11/15 22 ¶3
Oghaạph Ookaragh Araraạr dị Edi Rinyạ Phọ AJems r’APita
3:17—APita aghaạph ghan eeghe, mem mọ aḅẹm bọ mọ “miphụr inyina rurụ otene igbaany”? APita aghaạph ghan ilọ igẹ araraạr phọ ipẹ k’emite bọ ghisigh ophum bọ nyodị r’abuerị phọ awe phọ ogẹ aani bọ Baibul phọ ogẹ oseere. Loor esi dị iphẹn phọ kụ i/ḍighi bọ oomo olegheri iyaạr ilọ ipẹ araraạr k’ekị bọ, olegheri iphẹn phọ i/ḍighi idị abuḅẹl aKristẹn phọ olegheri oomo ilọ araraạr dị kemiteghu ghisigh. Bidị ulegheri oopho ikpanạ araraạr phọ ipẹ k’ogon bọ omiịn phọ bịn.
Ibạl ABaibul
(2 Pita 1:1-15) Mị aSaimọn Pita, onyọ oḍighi r’otelhedom mọ aJizọs Kraist, kụ ugẹ ḍinyạ phọ aḍiẹn riruomaan inyina abuphẹ metuạn bọ ruukuan phọ [Enaạn ḅilhẹ r’aJizọs Kraist Opeliạ phọ ayira NW ], emoọgh aani omeeraam dị mamạn iyaạr aalenyan nyoọn ayoor. 2 Aḍisẹph r’eephọ etuạn olegheri ghan Enaạn r’aJizọs Omoọgh-we phọ ayira ebalabalạ ni irolonaạn inyina! 3 Idiphọ yira molegheri bọ nyopọ umạgh bọ iyira ophin aani abin igbogh phọ r’iiḅi aroozọ phọ odị, iikpọ phọ Enaạn mingọ iyira oomo araraạr phọ ipẹ kegbaanyạn bọ ghuḍum mọ r’adọl aruukuan phọ ayira. 4 Iduọn phọ, pọ muguanaan iyira iboom aruguan dị emạn iyaạr iikiạ, pidị nyina ekpetenaan iḅoriạ aroozọ phọ redạph ghan bọ ikarạph aruuphuạ aḅirini phọ, emoọgh aani roozọ phọ Enaạn. 5 Loor emụ ekpo phọ ephẹn phọ, ikparamị ḍighaạgh emoọgh iiḅi aroozọ eḅarạm omeeraam mọ anyina, emoọgh olegheri iyaạr eḅarạm iiḅi aroozọ phọ, 6 emoọgh omiighe aloor eḅarạm olegheri iyaạr phọ, emoọgh okparạm eḅarạm omiighe aloor phọ, emoọgh ruukuan eḅarạm okparạm mọ, 7 emoọgh igbiriiriph eḅarạm ruukuan phọ, emoọgh ephomoghiạn eḅarạm igbiririph phọ. 8 Iphẹn kụ aroozọ phọ ikpeanaạn bọ inyina, kụ nyina emoọgh ni ebalabalamị, pọ, idiphọ nyina elegheri bọ Jizọs Kraist Omoọgh-we phọ ayira rekiọm ghisigh, aloor phọ anyina kekologhọl li, nyina emuum kẹn igey iimuma. 9 Kụ oye lọ roozọ phọ iphẹn phọ u/moọgh, pọ ariḍien odị eḅaaghaph ni dị odị ramiịn iigho, mawulanam kẹn mọ moogbiriọn igbaany ikarạph phọ onọ. 10 Loor iphẹn phọ, buọ asiya, ikururụ ni eephaghamị ghan oḍuom ologhi phọ mọ Enaạn mimạgh inyina esaḅạr esighẹ. Kụ nyina eḍighi ghan iphẹn phọ, nyina ke/pe oopho esi. 11 Enaạn ketuạn iphẹn phọ kụ ingọ inyina eboom eghuan oḍighom r’ewoọr omạr k’agee-pọ phọ aJizọs Kraist Omoọgh-we r’Opeliạ phọ ayira. 12 Kụ esi iduọn phọ, mị raa/kpukiạn oghiọm ghan anyina ologhi, ghalamọ idiphọ nyina melegheri bọ ni iphẹn phọ etene igbaany, eḅilẹ ekuạ phaghaphaghạ siphẹ igey phọ nyina menaghạn bọ. 13 Mị aatughiạn mọ ikpeanaạn ni imị, siẹn mị odi bọ ni rapooghu, oghiọm ghan anyina ologhi raraạr phọ iphẹn phọ, ilọ oghologholomiọm aloor anyina, 14 idị eḍighi bọ mị alegheri ni mọ moọny amem komạgh ni uwaloor phọ amị osighẹ, idiphọ aJizọs Kraist Omoọgh-we phọ ayira aghaạph bọ ni amiteom uḅenị imị. 15 Mị kakparamị ghụn ḍighaạgh oḍighi ilọ mem dị mị amugh nyina keẹ-tughiạn ghan raraạr phọ iphẹn oomo amem.