Ariisi Oghị Omhiịn Ophanyanhaạn Asipuru Aḍinyạ Ituughạ Ogboku Awiki Phọ
NOVEMBER 4-10
ARUPHUA DỊ OSIGHẸ SIPHẸ EKPO-ONHỤ PHỌ ENHAẠN | 1 JỌN 1-5
“Ke/pomoghiạn Dọl Aḅirini Phọ r’Araraạr Phọ Odị”
(1 Jọn 2:15, 16) Ke/pomoghiạn dọI aḅirini phọ r’araraạr phọ odị. Nyina ephomoghiạn dọI aḅirini phọ, pọ nyina i/moọgh mun ephomoghiạn Odẹ phọ siphẹ iloghi phọ anyina. 16 Araraạr aḅirini phọ, pọ aruuphuạ kirokirọ, r’ephogh-aḍien, r’obaga. R’eniin iphẹn phọ re/ḍuạ ghan esi Odẹ phọ kụ keru. Iphẹn phọ ilọ isiẹn aḅirini phọ bịn.
w05 1/1 10 ¶13
Pamhanhạm Okol Phọ AZizọs Aphighi Bọ
13 Ibadị kotue ni ootughiạn mọ k/oomo araraạr aḅirinhi phọ kụ eeph. Ghalamọ r’iduọn phọ ni, aḅirinhi phọ r’inmẹ ph’odị k’etue ni bịn iḍạ iyira esighẹ esi okumu aZihova. Kụ iyaạr aḅirinhi phọ i/lo dị ketue isighẹ iyira egbiemị Enhaạn. Esi iduọn phọ, eḍighi maạr dị ephomhoghiạn phọ yira omhoọgh bọ esi araraạr aḅirinhi phọ kụ ebụgh, ghalhamọ r’araraạr dị raloor abidị i/beeph ni, pọ iduọn phọ yira moḍigh okol aḍuugh aḍuugh. (1 Timoti 6:9, 10) Opumom isiẹn, ibadị araraạr aḅirinhi phọ ebeeph ni, ḅilhẹ kẹn ketue ni iipụ iyira. Eḍighi maạr dị yira ropogh ghan sifim dị reḍeenhaan iigamaniạn, omoọgh eelạ, obobọ orolạn esi dị u/ḅaạl, yira ko/miịn mun raraạr phọ iphẹn m’ebeeph—bịn m’eḍighi odẹgh ophogh. Eḍighi maạr dị yira rooḅughonaan ghan r’awe dị onhighemhị adọl aghuḍum mọ abidị obobọ obughẹ aroopoogh omuul aḍighi kụ eḍighi ekpanạ iyaạr, pọ yira kotue ni omoọgh aani oboom ogbolhomaam ilọ araraạr phọ ipẹ phọ kẹn.—Matiu 6:24; 1 Korịnt 15:33.
(1 Jọn 2:17) Aḅirini phọ r’oomo aruuphuạ phọ odị rape, kụ oye phọ opọ raḍighi ghan bọ ipẹ Enaạn rewạ bọ katọI li k’agee-pọ.
w13 8/15 27 ¶18
Kiririom Aphogh Odọ Adọl Phọ Ewạ Bọ Dị Nạ Katọl
18 Enhọn iyaạr dị kilhoghonhaạn iyira ḍighaạgh oghel “araraạr aḅirini phọ” pọ oseere ologhi ikpo onhụ phọ iphẹn ophum bọ Jọn kụ agẹ bọ mọ: “Aḅirini phọ r’oomo aruuphuạ phọ odị rape, kụ oye phọ opọ raḍighi ghan bọ ipẹ Enaạn rewạ bọ katọI li k’agee-pọ.” (1 Jọn 2:17) Aḅirinhi phọ aSetan akịgh mudị katọl ghan bịn ka/pe. Toroboiperolbọ, k’asi ni eekuna r’eniin aḍio. Iyaạr i/lo dị aḅirinhi phọ aSetan k’angọ dị ketọl ghan bịn. Ootughiạn ghan ipẹ phọ kilhoghonhaạn iyira ḍighaạgh dị yira k/okpoph iḅạl phọ Eru etebenheghi bọ.
Oguphogh Owạ Imạ Araraạr Dị Edi Siphẹ ABaibul Phọ
(1 Jọn 2:7, 8) Iiḅi asiya, ophọn mị agẹ bọ riruomaan inyina k/omoom ologh: ogina phọ ogbaany ologh phọ opọ olọgh bọ ni ingọ inyina k’eḅẹl emiighom mọ. Aḍiniin phọ adom mọ aḍiphẹ nyina menaghạn bọ ni. 8 Kụ olọ ophọn mị ragẹ bọ, omoom ologh ni dị aganana siphẹ aroozọ phọ aKraist r’ipẹ anyina, mọ ufiri phọ raḍuạ kụ aḍigey aḍiḅaạl phọ memiigh osoor.
w13 9/15 10 ¶14
Ighiọm Iloghi Phọ AZihova Ekpẹ Ni Oḍuom Olhoghi
14 Igẹ aBaibul aKristẹn Grik phọ emuza r’ighiọm iloghi dị oniin kaḍeenaan ghan nyoniin ephomhoghiạn. AZizọs aḅẹm mọ ologh dị aḅilhẹ amạn maạr pọ ‘ophomoghiạn onọn oye idiphọ aIoor phọ anạ.’ (Mat. 22:39) Oọny onhiin phọ aZizọs, aJems aghol aani mọ “okpanạ ologh.” (Jems. 2:8) Otelhedom mọ aJọn aḅẹm mọ: “Iiḅi asiya, ophọn mị agẹ bọ riruomaan inyina k/omoom ologh: ogina phọ ogbaany ologh phọ opọ olọgh bọ ni ingọ inyina k’eḅẹl emiighom mọ.” (1 Jọn 2:7, 8) Oghẹn kụ edị aJọn aghaạph ghan bọ aghol mọ “ogbaany ologh phọ”? Odị aghaạph ghan aghol ologh ophomhoghiạn ghan onhọn oye. Aḍighi “ogbaany” loor esi dị aZizọs m’angọ ni k’epẹ omạn, “k’eḅẹl emiighom mọ.” Kuolọ aḅilhẹ ni aḍighi “omoom” loor esi dị ewạ mọ abumatuạn phọ oḍeenhaan ephomhoghiạn osighẹ aloor ophighironọm ekiạ, iyaạr dị bidị owạ orue okaran imoom asidọl phọ k’emite bọ. Idiphọ abumatuạn aKraist, yira romaghamị ghan ni maạr iphụr arurụ phọ iphẹn kiloghonaạn bọ iyira ḍighaạgh oḍuạ esi eegharạ owạ ilọ aloor phọ emuza bọ siẹn aḅirini phọ, ketue bọ ni egbuurogh esighẹ ephomhoghiạn phọ yira omhoọgh bọ oghị esi abunhọn.
(1 Jọn 5:16, 17) Oye lọ amiịn onyọ asiya odị lọ aḍighi ikarạph dị i/tu ilọ aḍuugh-aḍuugh aaḅereghinaạn ghan idị Enaạn kengọ nyodị ghuḍum! Iphẹn phọ ekpulughiọm buphẹ ikarạph phọ abidị i/tu bọ ilọ aḍuugh-aḍuugh. Ikarạph aḍuugh-aḍuugh edi ghan ni kụ mị ratoma ghan mọ ke/kol ghan odọ ikarạph phọ iphẹn eeḅereghinaạn onyọ asiya anyina. 17 Torobọ opiomạn pọ ikarạph ni; kụ ikarạph edi ghan ni dị i/ḍighi ilọ aḍuugh-aḍuugh.
it-1 862 ¶5
Osạr Owilhenhaạn
Ekpeanaạn ni otuạn ikarạph abunhọn awe olọm m’Enhaạn asạr awilhenhaạn bidị, ghalamọ oomo ookpomhoghan phọ. AMozis aaḅereghinaạn ni eelhe phọ Izrạl, aghaạph amiteom ikarạph eelhe phọ alọm osạr owilhenhaạn, kụ aZihova anaghạn ni ilọm m’odị. (Nu 14:19, 20) Ḅilhẹ kẹn, mem mọ aSolomon r’aḅọgh bọ otu iiḅereghị phọ k’angọ, aaḅereghị ni mọ aZihova asạr awilhenhaạn we phọ odị mem lọ bidị oḍighi ikarạph kụ owilhẹ okarạph okol phọ abidị ooghiraan osoman nyodị. (1Ki 8:30, 33-40, 46-52) Ezra ameerạ ni enye awe phọ aghaạph amiteom esi ogbo ikarạph abuọ aJu phọ abuphẹ origheel bọ. Iiḅereghị phọ odị eḍuạ bọ k’epẹ ekpom mọ r’ilọm mọ iḍighi ni idị awe phọ oḍighi iyaạr omiteom omoọgh osạr owilhenhaạn aZihova. (Ezr 9:13–10:4, 10-19, 44) AJems alhọm nyopọ asiya phọ odị r’aZihova m’edugh bọ m’amạgh ikumor awe ookpomhoghan phọ ooḅereghinaạn nyodị ‘kụ eḍighi dị ikarạph odị kụ ekọm emoon phọ, pọ kosạr ri obilenaạn nyodi.’ (Jems 5:14-16) Toroboiperolbọ, “ikarạph aḍuugh-aḍuugh edi ghan ni,” ikarạph dị oḍighi oghị esi uwaloor iigbia phọ, ikarạph dị olegheri kụ u/bilẹ osạr owilenaạn o/lonaan mun. Onyọ aKristẹn ku/ḅereghinaạn buẹn roḍighi ghan bọ odọ ikarạph phọ iphẹn.—1Jọn 5:16; Mat 12:31; Hib 10:26, 27.
Ibạl ABaibul
(1 Jọn 1:1–2:6) Yoor ogẹ ḍinyạ phọ aḍiẹn riruomaan inyina ilọ Ekpo Onhụ aghuḍum mọ epẹ edi ghan bọ ni k’eḅẹl emiighom mọ: yoor monaghạn ni, oḅilẹ opogh omiinọm riḍien ayoor, oḅilẹ osighẹ raghaạgh oḅoghọm. 2 Mem mọ aghuḍum mọ akuẹn aganana bọ, yoor umiịn ni. Kụ yoor rokaạph ghan bọ kiḅenị inyina ilọ aghuḍum k’agee-pọ phọ arolạn ghan bọ Odẹ phọ kụ mogananami bọ yoor olegheri. 3 Yoor riḅenị ghan inyina ipẹ yoor momiịn bọ, oḅilẹ onaghạn, pidị nyina r’ayoor oḅarạn muḅọph phọ yoor omoọgh bọ r’odẹ phọ ḅilẹ r’aJizọs Kraist Oọny phọ odị. 4 Yoor rogẹ iphẹn phọ, obọ ibo phọ ayira emunughan. 5 Ḍiẹn kụ adom mọ yoor onaghạn bọ esi Oọny phọ odị, kụ ogbeel bọ riḅenị ghan inyina, mọ Enaạn phọ aḍiḅaạl bịn, r’enụm ufiri o/lo ghan esi odị. 6 Oye lọ odi ni ekụ ufiri kụ raḅẹm ghan mọ onọ amoọgh muḅọph r’Enaạn, pọ ragbạ ni okpẹ siphẹ ikpo onhụ phọ odị ḅilẹ eḍighinom iyaạr phọ odị i/sooran. 7 Kụ yira orọl ghụn dọl ephalaḅaạl, idiphọ odị odi bọ dọl ephalaḅaạl phọ, pọ oniin mamoọgh muḅọph r’oniin, ḅilẹ kẹn iḅaạl phọ aJizọs Oọny phọ Enaạn kụ regbuurogh ghan ikarạph iloghi phọ ayira keḅaalamị. 8 Yira oḅẹm mọ yira ikarạph u/moọgh, pọ yira robia ni loor. Igey phọ iyira i/loonaan. 9 Kụ yira ogbạ ghụn ikarạph phọ ayira omiteom, Enaạn kesạr ri ikarạph phọ ayira iwilenaạn iyira eḅilẹ igbuurogh iyira eḅaalamị esi ekarạph eḍighinom iyaạr phọ ayira, idị eḍighi bọ odị ra/bi ghan ruguan phọ odị, ḅilẹ iiruẹn odị reeleeny ghan ni. 10 Kụ yira oḅẹm mọ yira ikarạph k”oḍighi ghan, pọ yira rolọgh ghan Enaạn okpẹ. Oghaạph phọ Enaạn k”oḍigh iloghi phọ ayira.
2 Ibạm anmụny amị, mị agẹ iphẹn phọ riruomaan inyina, obọ nyina ewilẹ oḍighi ghan ikarạph; kụ olọ aḍighi ikarạph, yira omoọgh ni oye dị ameerạ enye ogbạ ophelọm ayira ghisigh Odẹ phọ. Ophọn phọ aJizọs Kraist, oye aghuḍuul phọ. 2 Idị eḍighi bọ aKraist r’aloor odị kụ omụr r’iphorobo dị owophom ikarạph phọ ayira osighẹ. U/woph ikarạph phọ ayira bịn, owoph kẹn ni ikarạph oomo aḅirini phọ. 3 Oye lọ raako ghan iilogh phọ Enaạn aḍuom ni ologhi mọ onọ alegheri ni nyodị. 4 Oye lọ raa/ko ghan iilogh phọ Enaạn kụ aḅẹm mọ onọ alegheri ni Enaạn pọ rakue ni. Igey nyodị i/loonaan. 5 Oye phọ opọ ranaghanạn ghan bọ oghaạph phọ Enaạn raḍeenaan ghan mọ onọ apomoghiạn ni nyodị amadạn. Iduọn kụ idị yira koḍuom ologhi mọ yira omoọgh ni muḅọph r’odị: 6 oye phọ opọ raḅẹm ghan bọ mọ onọ aḅophoghạn ni Enaạn atuụgh dọl phọ aḍiphẹ aJizọs Kraist arọl ghan bọ kụ arọl aani!
NOVEMBER 11-17
ARUPHUA DỊ OSIGHẸ SIPHẸ EKPO-ONHỤ PHỌ ENHAẠN | 2 JỌN 1–JUD
“Yira Omoọgh Omherenyạn Obeanhaan Igey Phọ”
(Jud 3) Iiḅi asiya, irọl ghan ni ologhi amị ogẹ anyina ilọ apelieẹny phọ yira oḅophoghạn bọ omoọgh, kụ mikpaariọm bọ imị nyiidiphọ ogẹ okparamiọm iloghi phọ anyina lọ nyina kemerenyạn ebeanaan igey phọ ipẹ Enaạn engọ bọ we phọ odị mem bịn ḅeer emadạn mọ omeeraam ghan phọ.
w04 9/15 11-12 ¶8-9
“Iineghị Ghan Inyaạm Mọ Anyina Esi Omoogh-we phọ”
8 Yira olegheri ni okuphom owol mọ aSetan amạn ikalạ loor esi dị aBaibul phọ agananami ni ikeḍi phọ odị. (2 Korịnt 2:11) Esi oye aruukuan phọ Job, Eru phọ isighẹ eḍighinom ḍigbagarạ adọl ekulhom, ḍuugh awe ephomhoghiạn odị, isophoghom eghun otu, eephina aloor, ḅilhẹ r’iḍaghạ ḍighaạgh arighirị okpẹ. Iphẹn phọ iḍighi idị aJob amhoọgh mukum ologhi aḅilhẹ alhoghoma mọ Enhaạn m’ewilhẹ nyodị. (Job 10:1, 2) Ii obọ aSetan kụ r/akọm ghan iiḅaghamị phọ iphẹn raloor rodon, odọ aḍikparamineẹn phọ aḍiẹn retir ghan ni Kristẹn, kụ Eru phọ ketue ni esighẹ eḍighinom omhoọgh ipẹ odị rawạ bọ.
9 Asighini dị ketue epuẹ siya phọ ayira r’Enhaạn emuza ni siẹn amem eekuna phọ. Yira odi aḅirinhi dị ophorogh eelạ kụ m’aạr boọr we apu oghonyị asiigbu okumu aZihova. Siphẹ igbe iinaghạn phọ roḍeenhaan ghan mọ orolạn esi dị u/ḅaạl rangọ ghan oḅaạl ologhi kparipẹ r’eephina ekpom. Kụ oboom opol ‘opomoghiạn eedughạ opu Enaạn.’ (2 Timoti 3:1-5) Eḍighi maạr dị yira ro/wạ dị eten iitughiạn phọ iphẹn phọ keekperemhi siya phọ ayira r’aZihova dị ke/miigh mun pọ ‘omerenyạn obeanhaan igey phọ.’—Jud 3.
Oguphogh Owạ Imạ Araraạr Dị Edi Siphẹ ABaibul Phọ
(Jud 4) Buniin awe dị Enaạn u/legheri momian oḍigh ogbo phọ ayira. Bidị mosighẹ dom mọ Enaạn eḅẹm bọ mọ yira mokpetenaan iilogh phọ otene dọl ipesi rokel ghan Jizọs Kraist ogina Omoọgh-we phọ r’Odẹ-otu phọ ayira. Mebia ni aḍinyạ iigbia phọ eghaạph bọ emiteom ilọ aghelhẹ phọ akuẹn mateẹny bọ bidị.
(Jud 12) [“Bidị phọ asighiigh dị aaghiạn ude umuụm mem amale ephomhoghiạn phọ anyina idiphọ bidị role bọ r’anyina,” NWT], ḅilẹ kẹn bidị umugholoor ro/kiil ghan oogborion osughugha ile phọ. Bidị okịgh ootụ dị oghim rakimom kụ olophiạ u/ḅarạm. Bidị okịgh ireeny dị iimuma i/muum ghalamọ r’amem osoor ri, dị emuughu ḅeer emadạn kụ modenyọn olereghi.
it-2 279
Amale Ephomhoghiạn
ABaibul phọ o/ghaạph ilọ amale ephomhoghiạn phọ ephẹn phọ, kụ o/ḍeenhaan kẹn onhụ amem lọ olhe ghan. (Jud 12) Uw-emhoọgh phọ aZizọs obobọ abutelhedom mọ kụ u/tọ uḅẹm m’olhe ghan, ḅilhẹ kẹn ni ekạr ri eegholaan mọ k/usighẹ idiphọ iyaạr dị ekpaariọm mọ oḍighi ghan obobọ dị ketọl ghan bịn. Ibadị uḅẹm mọ iḍighi ghan simem dị aKristẹn phọ abuphẹ omheel bọ eelạ phọ kụ ophamạgh ghan rookpomhoghan amale dị omạgh aani ghan rukulom mọ r’abidị oḅọph bọ omeeraam mọ oghị aani. Oomo phọ abidị, abuphẹ aburudẹ phọ u/lo bọ, arukpukele anmariịr phọ, araalhạ phọ, r’abuẹn i/kạr bọ inighenọm uḅophoghạn ghan olhe male idiphọ abumor.
it-2 816
Aḍighiigh
Enhọn ekpo onhụ aGrik, spi·lasʹ, onaghanạn mọ remạ ghan sighiigh dị aaghiạn ude umuụm. AJud asighẹ aḍighinom oghaạph ilọ abuniin awe dị m’omiigha loor bịn oḍigh ookpomhoghan aKristẹn phọ r’ikarạph igbiighi. Idiphọ asighiigh dị aaghiạn eḍighi bọ iiḅaghamị engọ unwunyarụ, iduọn phọ kụ idị awe phọ abuẹn phọ oḍighi ooto r’osoromineen ongọ bunhọn siphẹ ookpomhoghan phọ. AJud aḅẹm iduọn ilọ odọ awe phọ abuẹn mọ: [“Bidị phọ asighiigh dị aaghiạn ude umuụm mem amale ephomhoghiạn phọ anyina idiphọ bidị role bọ r’anyina,” NWT.]—Jud 12.
(Jud 14, 15) Buẹn phọ kẹn kụ edị Inọk, opọ amuneniom bọ oḍual oghiil phọ emiigh k’orụgh Adạm, amiịn bọ ni imiịn ilọ abidị mọ, “Inaghạn! Omoọgh-we phọ kapạm ni simuonịr aruukpaạny phọ odị atumom, 15 oogbonaan iiruẹn oomo awe, ophume yogh oomo abuḍighinom ikarạph phọ Enaạn u/legheri bọ loor oomo ikarạph elegheri Enaạn phọ abidị, r’oomo ikarạph phọ bidị moghaạph bọ ophuenọm Enaạn.”
wp17.1 12 ¶3
“Odị Aḅaalamị Ni Ologhi Enhaạn”
Omeeraam mọ Inọk unyu iyira opuruan asiloor mughumọ yira omiịn aani ni aḅirinhi phọ eten phọ epẹ Enhaạn emiịn bọ. Ooruẹn phọ opọ Inọk agbeelhom bọ r’oḅom emhụ phọ odi ni ameerạ; odianaan aani ni aḅirinhi phọ arodon idiphọ erolhonhaạn bọ siḍio phọ Inọk. Idị eḅọph r’iphụr arurụ phọ Inọk, aZihova asighẹ ni mugbogh amuụm Aḍigho aruom aḅirinhi phọ siḍio phọ aNoa. Kuolọ amuphe phọ amuphẹ phọ aphighi okol amugbogh amuphe dị ratu. (Matiu 24:38, 39; 2 Pita 2:4-6) Rodon, idiphọ asiḍio phọ ipẹ phọ, Enhaạn eekolobian ni r’aḍita abuọ iigbia phọ odị osighẹ ooruẹn oruomaan aḅirinhi phọ Enhaạn u/legheri bọ. Ewạ ni mọ torobọ onyọ ayira asighẹ iphụr arurụ phọ Inọk alọgh ologhi kụ aḅilhẹ ghan aghaạph aḅenhị aani bunhọn awe. Eeni amem eghun otu r’arighirị phọ ayira iyira k/unaghanạn. Yira kologhoma ni dọl igini eeni amem. Kuolọ aZihova o/wilhẹ Inọk; kụ ka/bilhẹ kẹn ni rebenhẹ phọ odị okpẹ bọ ni oḍuom ologhi rodon!
Ibạl ABaibul
(2 Jọn 1-13) Mị okumor oye phọ kụ ugẹ ḍinyạ phọ aḍiẹn raruomaan nyinạ anịr phọ Enaạn esaḅạr bọ, r’anmụny phọ anạ. Mị iphomoghiạn ni inyina igey. K/amị bịn, oomo phọ abuphẹ molegheri bọ igey phọ iphomoghiạn ni inyina, 2 idị eḍighi bọ igey phọ edi ni iloghi phọ ayira kụ kirolonaạn ni iyira k’agee-pọ. 3 Enaạn Odẹ phọ r’aJizọs Kraist Oọny phọ odị, kungọ ghan iyira oghọr r’onmạ ighirigiir r’eephọ, idiphọ yira odimom bọ igey r’ephomoghiạn phọ. 4 Mị ubo ni iboom mị amiịn bọ mọ buniin anmụny anạ rodạph ni igey phọ, idiphọ Odẹ phọ atọ bọ ungọ iyira. 5 Nịr phọ, nyiidiphọ mị ralọm ni nyinạ mọ oniin aphomoghiạn ghan nyoniin. Ophọn phọ mị ragẹ bọ k/omoom ologh. Ophọn kụ ologh phọ olọgh bọ ni ungọ iyira k’eḅẹl emiighom mọ. 6 Ooko ghan iilogh phọ odị kụ ephomoghiạn phọ ephẹn. Ophọn kụ ologh phọ, idiphọ nyina menaghạn bọ ni k’eḅẹl emiighom mọ: mọ itolọm ghan ephomoghiạn. 7 Ibadị awe dị roparanaạn mọ aJizọs aateneghian ni amite idiphọ oye momite siẹn aḅirini phọ rookeleghi we. Odọ phọ oye phọ ophọn phọ, oye areekeleghian r’Amuloghḍien aKraist. 8 Igona loor, obọ nyina kepiemi ghan bọ raraạr phọ ipẹ nyina eghol ghan bọ rekumuan, emoọgh ghụn ruunmo phọ emadạn. 9 Torobọ oye lọ apel ghan ḅilẹ u/loonaan itughemị phọ aKraist, pọ o/moọgh muḅọph r’Enaạn. Oye phọ opọ odianaan bọ itughemị phọ odị amoọgh ni muḅọph r’Odẹ phọ r’Oọny phọ. 10 Oye lọ aphạm inọn odọ itughemị kụ aru iteenyọm inyina, ke/lọgh otu, ḅilẹ kẹn ke/ngọ nyodị ophuọ, 11 idị eḍighi bọ oye lọ angọ nyodị ophuọ amoọgh aani bin siphẹ ikarạph iiḍighi phọ odị. 12 Obọ mị amoọgh ni iboom araraạr oḅenị anyina kụ epel osighẹ aḍinyạ r’iki kụ ogeọm oruom anyina. Mị aḍuom ghụn ni ologhi mọ mị katu ni yira omiinạn, oḅilẹ oghaaphạn, obọ ibo phọ ayira emunughan. 13 Anmụny umarani phọ anạ Enaạn esaḅạr bọ mopuru nyinạ.
NOVEMBER 18-24
ARUPHUA DỊ OSIGHẸ SIPHẸ EKPO-ONHỤ PHỌ ENHAẠN | OGANANAMI 1-3
“Mị Alegheri Ni Iiḍighi Phọ Anyina”
(Ogananami 1:20) Mogananami emụ oḍual araanaạn phọ nạ amiịn bọ ḍighaạgh eliom mọ amị, ḅilẹ r’emụ oḍual itozị phọ okaaghiọm bọ gol phọ iduọn: oḍual araanaạn phọ, pọ aruukpaạny phọ Enaạn repogh bọ oḍual asiosị phọ, ḅilẹ oḍual itozị phọ, pọ oḍual asiosị phọ.
w12 10/15 14 ¶8
Oghẹn Odọ Uwaloor Kụ Edị Nạ Raḍeenhaan Ghan?
8 Oḍuạ esi odọ uwaloor phọ opọ phọ, pọ ootughiạn mọ aBaibul phọ aḍeenhaan mọ aZizọs apạm “oḍual araanaạn ḍighaạgh eliom mọ odị.” Kụ “araanaạn” phọ iphẹn phọ remạ ghan bupoghom mọ abuphẹ osagharạn bọ uwaloor phọ, kụ opumom isiẹn, oomo abupoghom mọ u/sagharạn aani bọ uwaloor phọ odiighi bọ rookpomhoghan phọ. AZizọs katue ni aaḅakị “raanaạn” phọ edi bọ ḍighaạgh odị eten lọ odị amiịn mọ ekpeanaạn. (Ogan. 1:16, 20) Esi iduọn phọ, idiphọ Oḍiemiom ookpomhoghan aKristẹn phọ, aZizọs kụ raaḅakị oomo aloor ikumor awe phọ. Eḍighi maạr dị ewạ mọ oolemhi oniin siphẹ aloor ikumor awe phọ, pọ Opọ ‘ariḍien phọ reemor bọ idiphọ aniạn’ kamiịn ni mọ oḍighi iphẹn phọ mem mọ, reten phọ epẹ Odị rawạ bọ. (Ogan. 1:14) Siẹn amem mọ amuẹn phọ, olhọgh eegu dị ekpeanaạn buẹn phọ uwaloor iigbia phọ m’amạ bọ, loor esi dị aPọl agẹ mọ: “lnaghanạn ghan buọ arumụ phọ anyina, edạph itooghị phọ abidị. Bidị kụ abukoriom aruwaloor phọ anyina, siẹn dị bidị kogbạ bọ ni ipẹ bidị oḍighi bọ oḍighi phọ oḅenị Enaạn. Nyina enaghanạn bidị, pọ bidị koḍighi ni oḍighi phọ abidị r’ophalaḅaạl ologhi. ldiphọ i/lo, pọ bidị koḍighinom r’iḅiphighụ, bịn ke/ḍighi suọ ingọ inyina.”—Hib. 13:17.
(Ogananami 2:1, 2) “Gẹ iphẹn aghiọm ookpaạny phọ Enaạn rapọgh bọ siosị phọ Efesọs mọ, ‘Opọ aphạm bọ oḍual araanaạn phọ ḍighaạgh eliom mọ odị kụ ratelhe yogh bọ ogbo oḍual itozị phọ okaaghiọm bọ gol phọ, asighẹ dọm mọ aḍiẹn kụ ratu: 2 Mị alegheri ni iiḍighi phọ r’arukumuan phọ r’okparạm mọ anyina, ḅilẹ r’idị nyina ke/tue eminoghọm ikarạph awe. Mị alegheri ni mọ nyina meeḅeghiọn ni emiịn emạn mọ buphẹ oghophora bọ mọ abunọ abutelhedom mọ rokue ni.
w12 4/15 29 ¶11
AZihova Ruuḅakị Ghan Iyira Ongọ Apelieẹny
11 Siphẹ uḍien phọ ogẹ bọ pạ Ogananami phọ arumuoghaạph phọ 2 ḅilhẹ 3, umiịn dị aZizọs Kraist phọ moghueni bọ ratelhe yogh ghan ophogh oḍual arookpomhoghan phọ Esia Mainọ. Uḍien phọ aḍeenhaan mọ aZizọs ramiịn ghan ni raraạr dị remiteghu, k’aḅilhẹ alhọgh elhegh sidọl dị edi. Iniin ariisi, odị akạr ghan akol siḍien awe phọ, kụ asereghiạn esi lọ ewạ aḅilhẹ angoọm iromhoghiom. Iphẹn phọ reḍeenhaan ghan eeghe? Siphẹ omunughan uḍien phọ, oḍual phọ arookpomoghan phọ remạ ghan Kristẹn phọ abuphẹ osagharạn bọ uwaloor phọ emiigh 1914 kụ rekị, kụ oroma phọ ongọ bọ oḍual arookpomoghan phọ, oomo awe phọ Enhaạn siẹn ade phọ rodon kotue ni osighẹ oḍighinom. Esi iduọn phọ, i/beeph oḅẹm mọ, aZihova dị eego esi Oọny phọ odị akạr ri raaḅakị we phọ odị. Ika kụ idị yira k’omooghọm aani suọ iiḅakiọm mọ ipẹ phọ?
w01 1/15 20-21 ¶20
Daphạn Aani Oḍighom Mọ AZihova
20 Odaphạn aani oḍighom mọ aZihova rakị bọ ni ghisigh pọ ewạ olhọgh elhegh oḍighi phọ opọ Enhaạn engọ bọ Zizọs Kraist idiphọ odị ‘amoọgh ookpomoghan phọ.’ (Efesọs 5:22, 23) Dị eḍighan kẹn ni elhegh pọ iphẹn edi bọ Isaiah 55:4, siphẹ phọ uḅenhị iyira mọ: “Imiịn! Idiphọ ogbaanhaạn areelhe phọ kụ edị mị [aZihova] maḍighi nyodị, idiphọ oḍiemiom ḅilhẹ r’ongoọm itọ rugu areelhe phọ.” AZizọs akạr kụ alegheri ilọ oḍiemiom. Alegheri kẹn iyool phọ odị r’iiḍighi phọ abidị. Okạr agey, mem mọ odị arelhe yogh bọ ophogh oḍual phọ arookpomoghan phọ epẹ Esia Mainọ, oogh amem odị aḅẹm mọ: “Mị alegheri ni iiḍighi phọ anyina.” (Ogananami 2:2, 19; 3:1, 8, 15) AZizọs alegheri kẹn ni raraạr dị ikuom iyira, idiphọ Odẹ phọ odị Zihova. Kụ odị agbi bọ ongọ Okol Iiḅereghị phọ, aZizọs aḅẹm mọ: “Odẹ phọ anyina alegheri ni raraạr phọ ikuom bọ inyina, kụ nyina egbi bọ opuru odị.”—Matiu 6:8-13.
Oguphogh Owạ Imạ Araraạr Dị Edi Siphẹ ABaibul Phọ
(Ogananami 1:7) Imiịn, odị ratumom ni r’ootụ. Oomo awe, oḅarạm buphẹ ogimogh bọ nyodị, komiịn ni nyodị. Oomo areelhe aḅirini phọ komeelom ni otọ loor emụ odị. Iduọn phọ ni. Erọl li idiphọ!
kr 226 ¶8, 10
Omhạr Phọ Enhaạn Kapiemhi Mulhọgh Ḍien Odị
8 Imiịn phọ aZizọs ilọ asiḍio eekunha phọ eḍeenhaan mọ ibadị araraạr dị eḍighan ni elhegh kemite ni dị ketorori ekị esiemhi Amagedọn. Iḅẹl iyạl araraạr phọ yira kooḅeghiọn bọ dị kemite okaạph ni okol siphẹ igẹ phọ aMatiu, Mạk ḅilhẹ r’aLuk.—Bạl Matiu 24:29-31; Mạk 13:23-27; Luk 21:25-28.
10 Igbeelhom ooruẹn. K’ekpaariọm ni oomo amulhọgh ḍien Omhạr phọ Enhaạn omiịn araraạr dị k’ebughẹ eephina phọ abidị. AZizọs aḅẹm mọ: “[komiịn] dị Oọny phọ Oye aḍuạ epẹ okuaḍio phọ kụ ratu r’iboom iikpọ r’igbogh phọ odị.” (Mạk 13:26) Oḍighi oḍeenhaan iikpọ phọ iphẹn ebụgh bọ ni iboom keḍeenhaan mọ aZizọs m’aru ogbeelhom iiruẹn phọ. Enhọn agạ iniin phọ imiịn asiḍio eekuna phọ iphẹn, aZizoṣ aghaạph ni iboom ilọ iiruẹn phọ iphẹn k’ogbeelom bọ siẹn amem mọ amuẹn. Yira umiịn ipẹ phọ siphẹ aḍidogh ilọ iyool igạ phọ r’arutụ phọ. (Bạl Matiu 25:31-33, 46.) Abuẹn oḅạr bọ kụ obakị Omhạr phọ Enhaạn k’osoph mọ bidị oḍighi “iyool” kụ ‘k’omeremị rumụ abidị,’ loor esi dị olegheri mọ ‘amem mọ kopẹl bọ bidị osighẹ meebeẹph.’ (Luk 21:28) Toroboiperolbọ, buọ igbagharạn Omhạr phọ kosoph mọ bidị oḍighi “rutụ” kụ “komoọgh ni otọ,” loor esi dị olegheri mọ ‘amuphe k’agee-pọ’ kụ rakori bidị.—Mat. 24:30; Ogan. 1:7.
(Ogananami 2:7) ‘Oye lọ amoọgh rurụ anaghanạn ipẹ Uwaloor phọ raḅenị bọ siosị emạ kirokirọ phọ! ‘Mị kangọ ni iimuma oreeny aghuḍum mọ opọ odi bọ siphẹ ologhi oghoony phọ Enaạn mọ buphẹ okpạr bọ opu ole.’
w09 1/15 31 ¶1
Oghaạph Ookaragh Araraạr Dị Edi Ḍinyạ Ogananami Phọ—I
2:7—Eeghe kụ “oghoony phọ Enhaạn”? Eḍighi bọ idị roḅenhị ghan Kristẹn phọ abuphẹ osagharạn bọ uwaloor phọ, pọ eḍeenhaan mọ oghoony phọ Enhaạn ophọn ramạ ghan dọl epẹ k’akẹ phọ—siphẹ okaraghị aghisigh phọ Enhaạn raloor. Buẹn osagharạn bọ uwaloor phọ okpẹ bọ oḍuom olhoghi phọ k’osephọm bidị r’olhe aani “iimuma oreeny aghuḍum mọ.” K’oonmenhemhi bidị ilọ aḍuugh i/loonaan ghan.—1 Kọr. 15:53.
Ibạl ABaibul
(Ogananami 1:1-11) Iphẹn ilọ araraạr phọ Enaạn eḍeenaan bọ Jizọs Kraist mọ kenuụn ni emiteghu phọ. AJizọs Kraist arom ni oniin ookpaạny Enaạn mọ aghị ateẹny Jọn oye oḍighi phọ onọ aḅenị mọ agananami iphẹn phọ aḍeenaan buphẹ roḍighi bọ oḍighi kongọ Enaạn. 2 AJọn magbạ oomo ipẹ dị amiịn bọ amiteom rakaạph ghan oghaạph phọ Enaạn r’ipẹ aJizọs Kraist agananami bọ. 3 Ibo k’Enaạn edianaan ni torobọ oye lọ rabạl ikpo onhụ imiịn phọ iphẹn kamiteom, r’abuphẹ ronaghanạn bọ, r’abuphẹ rodạph bọ oroma aḍinyạ phọ aḍiẹn, idị eḍighi bọ esugha enụm bịn oomo araraạr phọ iphẹn kemiteghu ni. 4,5 Mị aJọn kụ ugẹ ratuomaan buọ oḍual asiosị phọ Esia. Aḍisẹph r’eephọ k’Opọ odi bọ kụ arọl bọ kụ katu bọ, ḅilẹ k’oḍual aruwaloor phọ edi bọ ghisigh agadạ odaạm emạ phọ, ḅilẹ k’aJizọs Kraist phọ u/gbạ ghan bọ uloghọm kuoọm mọ, Okpanạ siphẹ abuphẹ oḅerion bọ esi aḍuugh phọ, Odaạm abudaạm aḅirini phọ, irolonaạn inyina! Odị ruphomoghiạn ghan iyira kụ masighẹ iḅaạI phọ odị utagharanạm iyira esi ikarạph phọ ayira, 6 aḅilẹ uḍighi iyira omạr abupinyọn rikiạ dị roḍighi ghan oḍighi kongọ Enaạn r’Odẹ phọ odị. Igbogh r’iikpọ erolonaạn Jizọs Kraist k’agee-pọ k’agee-pọ! Erọl li idiphọ! 7 Imiịn, odị ratumom ni r’ootụ. Oomo awe, oḅarạm buphẹ ogimogh bọ nyodị, komiịn ni nyodị. Oomo areelhe aḅirini phọ komeelom ni otọ loor emụ odị. Iduọn phọ ni. Erọl li idiphọ! 8 Enaạn oomo iikpọ, Omoọgh-we phọ opọ odi bọ kụ arọl bọ kụ katu bọ, eḅẹm mọ, “Mị kụ Alfạ r’Omega, emiighom mọ r’eekuna phọ.” 9 Mị aJọn, onyọ asiya phọ, opọ r’anyina eḅophoghạn bọ Jizọs ephin bin iminimiịn phọ r’omạr phọ r’okparạm mọ, utuạn ni oghaạph phọ Enaạn r’ipẹ aJizọs Kraist agananami bọ arọl ekpu-ogbo dị oghol mọ aPatmọs. 10 Ḍughul otu phọ rooseeny ghan bọ Omoọgh-we phọ, Uwaloor phọ uphum ni imị kụ mị anaghạn eboom eḍọgh dị eḅạ ghan omạn amị idiphọ okuodụ, 11 kụ eḅẹm mọ, “Gẹ iphẹn nạ ramiịn bọ kụ asighẹ ḍinyạ phọ aghiọm oḍual asiosị phọ iphẹn: Efesọs, r’aSimana, r’aPagamom, r’aTiatira, r’aSadịs, r’aFiladelfia, r’aLodisia.”
NOVEMBER 25–DECEMBER 1
ARUPHUA DỊ OSIGHẸ SIPHẸ EKPO-ONHỤ PHỌ ENHAẠN | OGANANAMI 4-6
“Eghiil Inya Awe Phọ Oḍigh Bọ Rusụ Phọ”
(Ogananami 6:2) Mị uphogh ni kụ amiịn ophalaḅaạl asụ. Opọ aḍigh bọ asụ phọ aphạm kumụgh, kụ ongọ nyodị eghoony iphelegbe. Odị anyeene idiphọ ookparạ okaaghị areelhe.
wp17.3 4 ¶3
Abuọ Anhiạn Kụ Inya Phọ Awe Phọ Oḍigh Bọ Rusụ Phọ?
Anhiạn kụ aḍigh bọ ophalaḅaạl asụ phọ? Iyaạr dị kosighẹ olegheriom nyodị edi ni siphẹ aḍinyạ Ogananami phọ, esi phọ ekol nyopọ aḍigh bọ asụ phọ mọ “Ekpo-onhụ phọ Enaạn.” (Ogananami 19:11-13) Ekpo Onhụ phọ eḍighi ḍitaanheẹn aḍien aZizọs Kraist loor esi dị odị kụ rakaaphanaạn ghan Enhaạn. (Jọn 1:1, 14) Opumom isiẹn, okol kẹn ni nyodị mọ “Odaạm emạ r’Omoọgh-we” kụ oḅilhẹ kẹn okaạph m’aḍighi “O/bi r’O/kue.” (Ogananami 19:16) Dị eegholaany ni, odị amoọgh ni iikpọ ozoọm idiphọ ophelegbe uw-emhạ, kuolọ ra/ḍighinom ghan iikpọ phọ odị eten iḅua-ḅua r’arigilaạm. Kuolọ, asipuru emite ni.
wp17.3 4 ¶5
Abuọ Anhiạn Kụ Inya Phọ Awe Phọ Oḍigh Bọ Rusụ Phọ?
Abuẹn oḍigh bọ rusụ phọ umhiigh pụr amem eghiil ph’abidị? Lọgh elhegh mọ oḅẹl okiilom mọ, aZizọs, amhiigh eghiil phọ odị mem mọ ongọ bọ nyodị eghoony iphelhegbe phọ. (Ogananami 6:2) Apụr amem kụ edị ongọ bọ Zizọs eghoony phọ idiphọ Uw-emhạ epẹ k’akẹ? I/ḍighi mem mem mọ odị aḅuạ bọ siẹn ade phọ aḅulha epẹ k’akẹ. ABaibul phọ aḍeenhaan mọ imoọgh ni mem dị odị akori ghan. (Hibru 10:12, 13) AZizọs angọ ni bumatuạn phọ odị iyaạr olegheriom eekuna okori phọ odị ḅilhẹ r’emiighom itooghị phọ odị epẹ k’akẹ. Odị aḅẹm mọ siphẹ emhiighom itooghị phọ odị, asidọl aḅirini phọ k’ekitonhu ni ebeeph eloghorị. Odị aḅẹm mọ araaghạm, r’igbakurọ, ḅilhẹ r’areezẹgh ogogo ketọl li. (Matiu 24:3, 7; Luk 21:10, 11) Ee bọ I Eghạm Aḅirinhi phọ emite bọ 1914 omhạn, i/bia bịn ekạr eganhanha mọ omhạr awe m’oḍigh mem mọ amuphẹ phọ, amem iiḅaghamhị siẹn ade phọ dị aBaibul aghol mọ “aruukuna phọ.”—2 Timoti 3:1-5.
(Ogananami 6:4-6) Kụ ototọgh asụ aru amite. Ungọ ni nyopọ aḍigh bọ asụ phọ iikpọ mọ aler eghạm siẹn aḅirini phọ, mọ awe ozeạn siloor. Ungọ kẹn ni nyodị eboom elool-eghạm. 5 Kụ Oọny Iyool Ogạ phọ aḅilẹ akpagharạn oba phọ amuneniom bọ iraạr phọ, kụ mị anaghạn dị elọ aḍiphooghu dị emuneniom iraạr eḅẹm mọ, “Tue!” Mị uphogh ni kụ amiịn oḍiil asụ. Opọ aḍigh bọ aphạm iyaạr dị rotooghiọm ghan eemọr ḍighaạgh odị. 6 Kụ mị anaghạn iyaạr dị eḅạ idiphọ eḍọgh dị eḍuạ esi inya araraạr phọ emoọgh bọ ḍiphooghu phọ kụ eru. Iḅẹm mọ, [“Akọp awit mamhạn oniin adinariọs ḅilhẹ iraạr akọp abali memhạn oniin adinariọs; kuolọ ka/lọgh ḍighi amunụm oliv r’amiim!” nwt]
wp17.3 5 ¶2
Abuọ Anhiạn Kụ Inya Phọ Awe Phọ Oḍigh Bọ Rusụ Phọ?
Ophọn aḍigh bọ nyoọn phọ ameerạ enye araaghạm. Lọgh elhegh mọ o/sighẹ eephọ iniin areelhe bịn kuolọ oomo isiẹn ade phọ. Siẹn iphirigba phọ oye, lhạ phọ 1914 kụ edị eghạm emite dị oomo aḅirinhi phọ kụ ee. Kụ eghạm aḅirinhi dị emhunhenhiom iyạl dị eeph epu eḅẹl phọ kụ idaphạn. Odaphạn idị awe ogbiighi, onhụ abạl awe dị omhugh loor araaghạm r’areenemạ emhiigh 1914 opel li 100 erubal! Opumom isiẹn, oboom onhụ abạl awe uḍighima yogh ni raraạr dị elhọgh bidị raaghạ.
wp17.3 5 ¶4-5
Abuọ Anhiạn Kụ Inya Phọ Awe Phọ Oḍigh Bọ Rusụ Phọ?
“Mị uphogh ni kụ amiịn oḍiil asụ. Opọ aḍigh bọ aphạm iyaạr dị rotooghiọm ghan eemọr ḍighaạgh odị. Kụ mị anaghạn iyaạr dị eḅạ idiphọ eḍọgh dị eḍuạ esi inya araraạr phọ emoọgh bọ ḍiphooghu phọ kụ eru. Iḅẹm mọ, [“Akọp awit mamhạn oniin adinariọs ḅilhẹ iraạr akọp abali memhạn oniin adinariọs; kuolọ ka/lọgh ḍighi amunụm oliv r’amiim!’ ” nwt]—Ogananami 6:5, 6.
Ophọn aḍigh bọ nyoọn phọ ameerạ enye igbakurọ. Siẹn phọ yira omiịn etoọm eḍien dị ekpạr iboom dị akọp (1.08 L) awit amạn oniin adinariọs, ikpoki oḍighi emhụ aḍio siphẹ oḅẹl okuron asiạ phọ! (Matiu 20:2) Oniin adinariọs phọ opọ phọ katue ni ako iraạr akọp (3.24 L) abali, ibiakpạ dị i/mạn ghan ḍighi otomaạm wit pho. Nạ ragbi mọ iphẹn phọ ketue ni engọ eḍien eghun otu dị ebụgh? Epẹ kụ iyaạr phọ ophụr bọ rurụ we phọ omiigha aloor ilọ amaliom eḍien atorobọ aḍio, ikpanạ ariiḍien r’eḍighinom iyaạr amem mọ opọ phọ otuụgh bịn oḍeenaan idiphọ amunụm oliv r’amiim.
(Ogananami 6:8) Mị uphogh ni kụ amiịn okpaghaghaany asụ. Ḍien opọ aḍigh bọ ughol mọ Aḍuugh, kụ Omạr Iḍim makpulạn ni omạn odị. Udi ni aḅirini phọ inya abin kụ ongọ bidị iikpọ mọ osighẹ eghạm r’igbakurọ r’areezẹgh r‘ilhom inạm ozeọm muniin abin.
wp17.3 5 ¶8-10
Abuọ Anhiạn Kụ Inya Phọ Awe Phọ Oḍigh Bọ Rusụ Phọ?
Opọ aḍigh bọ nyoọn amuneniom bọ inya phọ ameerạ enye aḍuugh loor areezẹgh r’inhọn araraạr aḍuugh aḍuugh dị redạph nyodị. Alhạ phọ 1914 eten bọ i/bia bịn, aSpanish influenza azeeghị riisi aḍioph erubal awe. Uḅẹm mọ awe dị ezẹgh phọ ephạm romạn ni 500 erubạl awe, iduọn phọ pọ 1 esi 3 awe dị orọl mem mọ opọ phọ amhoọgh ni!
Kuolọ aSpanish influenza phọ aḍighi emhiighom. Awe dị rowaaghị ghan raraạr dị osiloor uḅẹm mọ ariisi erubal kụ umuughu loor ezẹgh uke siphẹ okuron asiạ phọ amuneniom bọ 20 phọ. Kụ k’aḍio arodon, sighuḍum erubal awe AIDS, okarạph okoneẹn, ḅilhẹ r’osipheeny kụ resoph ghan k’ekpere, etigheri oghị aghisigh esi arookonhom.
Oomo phọ araraạr phọ iphẹn phọ rekọm ghan eniin phọ iyaạr phọ, ḍuugh—mughumọ iḍuạ esi eghạm, igbakurọ, obobọ areezẹgh. I/pẹr Oḍi phọ omhinhọgh ghan abulọ omheel oḍigh ḍigheẹl odị, dị r’ilọ oḍighi i/lo mun.
Oguphogh Owạ Imạ Araraạr Dị Edi Siphẹ ABaibul Phọ
(Ogananami 4:4) Kụ [iyạl-dị] r’inya inọn asigadạ odaạm emạ phọ dị [iyạl-dị] r’inya ikumor awe kụ orologhọm iko ni agadạ odaạm emạ phọ elọgh ogbo. Bidị uunmenan iphalaḅaạl kụ ozuughian roghoony odaạm emạ dị okaaghiọm sigol.
(Ogananami 4:6) Iyaạr dị eghịgh ophiịny asitamaḍiki dị anmananmanạ idiphọ akiristẹl irọl kẹn ni pạ aghisigh agadạ odaạm emạ phọ. Inya araraạr dị emoọgh ḍiphooghu iko ni agadạ odaạm emạ phọ ekitonom. Ariḍien imuza ni omạn r’ighisigh.
re 76-77 ¶8
Arughuenhian Agadạ Itooghị Phọ AZihova Epẹ K’akẹ
8 AJọn alhegheri ni mọ abupinyọn rikiạ kụ edị omaaghị ghan okumuan isiphẹ ogbogo iiḅereghị iḍiodi phọ. Esi iduọn phọ, eeni iphẹr aani ni nyodị omiịn iphẹn odị aḅilhẹ bọ aghaạph siẹn: “Kụ [iyạl-dị] r’inya inọn asigadạ odaạm emạ phọ dị [iyạl-dị] r’inya ikumor awe kụ orologhọm iko ni agadạ odaạm emạ phọ elọgh ogbo. Bidị uunmenan iphalaḅaạl kụ ozuughian roghoony odaạm emạ dị okaaghiọm sigol.” (Ogananami 4:4) Ii, kparipẹ r’abupinyọn rikiạ, 24 ikumor awe kụ edị omiịn, dị orolomị sigadạ idiphọ aruw-emhạ. Abuọ anhiạn kụ ikumor awe phọ abuẹn phọ? Abuẹn phọ abudị osagharạn bọ uwaloor phọ odi bọ siphẹ ookpomoghan aKristẹn phọ, dị moḅerion oḅilhẹ orologhọm sigadạ phọ aZihova aguanaan bọ bidị epẹ k’akẹ. Yira ulegheri ika ipẹ phọ?
re 80 ¶19
Arughuenhian Agadạ Itooghị Phọ AZihova Epẹ K’akẹ
19 Inya araraạr phọ emoọgh bọ ḍiphooghu phọ remạ ghan eeghe? Uḍien dị oyil phọ Ezekiel amiịn kuloghonaạn ni iyira ḍighaạgh omoọgh ophagharanaạn phọ. Ezekiel phọ amiịn aZihova dị arolhọm odeghedeghẹ oghuugh eghạm, dị inya phọ araraạr phọ emoọgh bọ ḍiphooghu phọ kụ redạph, ekighimaạm raraạr phọ ipẹ aJọn amiịn bọ. (Ezekiel 1:5-11, 22-28) Ipẹ phọ eten bọ, Ezekiel aḅilhẹ ni amiịn agadạ itooghị phọ dị inya phọ araraạr phọ emoọgh bọ ḍiphooghu phọ kụ redạph. Toroboiperolbọ, egi phọ ephẹn phọ, odị aghaạph aghol inya phọ araraạr phọ emoọgh bọ ḍiphooghu mọ asicherub. (Ezekiel 10:9-15) Inya phọ araraạr phọ emoọgh bọ ḍiphooghu phọ aJọn amiịn bọ remạ ghan sicherub Enhaạn—olhẹm aruwaloor dị adọl abidị eghị ni anyụ iboom siphẹ ookpomoghan aruwaloor phọ Odị. I/ḍigh iikia esi aJọn omiịn asicherub dị erọl etuman aZihova, loor esi dị siphẹ ogbogo iiḅereghị iḍiodi phọ, iyạl asicherub dị oḍighinom gol kụ irọl anyụ ekpereghi igbe iyọ phọ, ipẹ emạ ghan bọ agadạ itooghị phọ aZihova. Igbo iyạl asicherub phọ iphẹn phọ kụ edị eḍọgh aZihova eḍuạ ghan emite engọ ghan itọ kirokirọ eelhe phọ.—Exodus 25:22; Psalm 80:1.
(Ogananami 5:5) Kụ oniin okumor oye phọ uudereghị imị mọ, “Ka/moghi mun. Poronọ Idimini-ḅuagụ eghun phọ k’aJuda, ogbogh onyọ eemarạ eemarạ phọ aDevid, makpạr apu, katue ni aakpaghiọn oḍual ariisi phọ oḅirighiọm bọ oba phọ akpegheron ḍinyạ phọ.”
cf 36 ¶5-6
“Poronọ Idimini-ḅuagụ Eghun Phọ k’AJuda”
5 Ogbor ghan rosighẹ idimini-ḅuagụ phọ k’oghaaphọm ilọ akpọ oḅio. Nạ m’ameerạ ghan ni ghisigh aḍilhephiri idimini-ḅuagụ dị memhanhạm ḍughụm? Eḍighi maạr lọ nạ m’ameerạ ghan ni, pọ eeni arọl olhoghi esi dị oghoonyom rukuron. Kụ ghalamọ r’iduọn phọ ni bịn eeni nạ ughiilaan ni. Iduọn nạ rapogh bọ ghisigh olhẹm mọ ophọn aḍigh bọ ni ḍiigu, kụ odị aḅilhẹ bọ raphogh aani nyinhạ, ke/kparanhaạn ni nyinhạ ootughiạn mọ idimini-ḅuagụ kekiilhaan aani ni iyaạr. ABaibul phọ akaạph ni ilọ “idimini-ḅuagụ phọ, eḍighi bọ egbogh enhạm elhegheḍum dị re/kiilaan ghan oye.” (Proverbs 30:30) Ophọn kụ odọ phọ akpọ oḅio phọ aKraist amoọgh bọ.
6 Oghị ooḅeghiọn ophogh ipẹ aZizọs aḍeenhaan bọ akpọ oḅio idiphọ idimini-ḅuagụ esi iraạr areten: mem dị odị ameerạ agạ igey phọ, aphamanạm elhiom iiruẹn, aḅilhẹ amerenyạn isophoghom. Yira komiịn kẹn ni, mọ oomo phọ ayira—mughumọ umarạm nyinạ akpọ oḅio obobọ u/marạm—kotue ni otuughaạny aani Zizọs oḍeenhaan akpọ oḅio.
Ibạl ABaibul
(Ogananami 4:1-11) Mem dị iphẹn phọ meten, mị umiịn ni uḍien dị onhụ aḍibuo k’akẹ aghughuronu. Kụ eḍọgh dị eḅạ ghan idiphọ okuodụ, dị mị managhạn ghan ni eḅilẹ iḅenị imị mọ, “Tue ephẹn anyụ mị kaḍeenaan nyinạ idị keḅilẹ emite mem dị iphẹn phọ meten.” 2 Egina amem bịn mị aloghoma dị Uwaloor Iigbia phọ musiịny imị. Epẹ k’akẹ phọ, agadạ odaạm emạ arọl li dị oye arolọm. 3 Aḍimite oye phọ iraphạn idiphọ araraạr dị oghol mọ ajaspạ r’akaniliọn. Aghozogh oburukeeny dị aghịgh iyaạr dị oghol mọ emerạld akitonom ni agadạ phọ. 4 Kụ [iyạl-dị] r’inya inọn asigadạ odaạm emạ phọ dị [iyạl-dị] r’inya ikumor awe kụ orologhọm iko ni agadạ odaạm emạ phọ elọgh ogbo. Bidị uunmenan iphalaḅaạl kụ ozuughian roghoony odaạm emạ dị okaaghiọm sigol. 5 Kụ aniạn iḍuạ ghan ni meleleph pạ agadạ odaạm emạ phọ emite r’aḍiaḅạ r’oraphạn oomaạny, kụ oḍual imurẹ eemor ghan pạ aghisigh agadạ odaạm emạ phọ. Iphẹn phọ kụ oḍual aruwaloor phọ Enaạn. 6 Iyaạr dị eghịgh ophiịny asitamaḍiki dị anmananmanạ idiphọ akiristẹl irọl kẹn ni pạ aghisigh agadạ odaạm emạ phọ. Inya araraạr dị emoọgh ḍiphooghu iko ni agadạ odaạm emạ phọ ekitonom. Ariḍien imuza ni omạn r’ighisigh. 7 Eḅẹl iyaạr phọ erọl mudị idimini-ḅuagụ; edị etum pạ mudị anạm; aghisigh edị emuneniom iraạr idiphọ akuọ oye; kụ epẹ emuneniom bọ inya phọ mudị uga lọ rapeẹph. 8 Siphẹ inya araraạr phọ, eniin imoọgh ghan odiiny araphaaph ḅilẹ r’ariḍien dị emuza ologhi r’anyụ aloor phọ ekitonom. I/soph mem ḍughul r’ootaany omoọr ghan mọ, “Iigbia, iigbia, iigbia kụ Enaạn oomo iikpọ, Omoọgh-we phọ opọ arọl bọ ni kụ odi bọ ni, kụ keḅilẹ bọ kẹn ni etu.” 9 Torobọ amem lọ inya araraạr phọ iphẹn phọ emoọr ḍuọr eghuan r’igbogh r’aḍisẹph engọ nyopọ arolọm bọ agadạ odaạm emạ phọ kụ katọl bọ k’agee-pọ k’agee-pọ phọ, 10 [iyạl-dị] r’inya ikumor awe phọ rokpuḍughian ghan pạ aghisigh opọ arolọm bọ agadạ phọ kụ kooseeny nyopọ katọl bọ ni k’agee-pọ k’agee-pọ phọ. Bidị rozunyonaan ghan roghoony odaạm emạ phọ abidị kotebeneghi ghisigh opọ arolọm bọ agadạ phọ komoọr ghan mọ. 11 “Nạ, Enaạn r’Omoọgh-we phọ ayoor, amạn ni lọ yoor kongọ ghan eghuan r’igbogh r’iikpọ, idị eḍighi bọ nạ kụ ulẹm bọ oomo araraạr phọ. Esi itooghị phọ anạ kụ edị bidị edi ghan bọ repooghu.”