Sereghiạn Ipẹ AZihova r’AZizọs Moḍighinhaan Bọ Nyinhạ

Retọl ghan ika esi anạ, mem dị oyaghirị anạ anmo nyinhạ imạ inmo? Iikia i/lo, olhoghi anạ raḅaạl ghan ni, kụ nạ rawạ ghan kẹn ni reten oḍeenhaan odị mọ nạ asereghiạn ni inmo phọ. AZihova r’aZizọs unmo iyira inmo dị epelheghiom, ekiạ etagharạn phọ. Kuolọ ika kụ idị yira koḍeenhaan mọ yira rosereghiạn ni?

1. Eghẹn kụ eniin eten oḍeenhaan osereghiạn ipẹ Enhaạn r’aKraist muḍighinhaan bọ iyira?

ABaibul phọ aguan mọ “torobọ oye lọ ameeraam [Zizọs]” katọl li k’agee-pọ. (Jọn 3:16) Ika kụ idị yira kotue oḍeenhaan omheeraam? Yira kotue ni oḍeenhaan omheeraam mọ ayira esi atorobọ osopha ayira r’araraạr phọ ipẹ yira roḍighi ghan bọ. (Jems 2:17) Mem dị omheeraam mọ ayira aganhanha siphẹ iiḍighi r’araghaạph phọ ayira, asiya arighirị phọ ayira r’aZizọs ḅilhẹ r’Odẹ phọ odị Zihova, kekpạr ghan bịn.—Ibạl Jọn 14:21.

2. Eghẹn eḍighieeny dị egbatanhaạn kụ rilhoghonhaạn ghan iyira ḍighaạgh oḍeenhaan mọ yira osereghiạn ni ipẹ aZihova r’aZizọs oḍighi bọ?

Ḍughul phọ aḍiphẹ eḅaạl odị kamugh bọ, aZizọs aḅenhị bumatuạn phọ odị enhọn iyaạr oḍighi kụ oḍeenhaan mọ bidị osereghiạn ni ekiạ phọ odị. Odị amiteom eḍighieeny dị egbatanhaạn dị aBaibul phọ aghol mọ “Eḍien Adulhe Uw-emhoọgh phọ,” oḅilhẹ bọ ni olhegheriom idiphọ eḍighieeny Ootughianhạm aḍuugh phọ aKraist. (1 Korịnt 11:20) AZizọs aphighi eḍighieeny phọ pidị eetughianhạm ghan bumatuạn phọ odị—ḅilhẹ r’abugey aKristẹn phọ abuẹn kodaphạn bọ bidị—mọ onọ ungọ iyira ghuḍum mọ odị. Ilọ eḍighieeny phọ ephẹn phọ, aZizọs atọ mọ: “Iḍighi ghan iduọn ilọ ootughianạm amị.” (Luk 22:19) Nạ aghị aani mem dị ropạm eḍighieeny Ootughianhạm aḍuugh phọ aKraist, pọ nạ raḍeenhaan ghan mọ nạ asereghiạn ni eboom ephomhoghiạn phọ aZihova r’aZizọs omhoọgh bọ oru esi ayira.

OLHEGHERI OBUGHẸ

3. Osereghiạn rinyu ghan iyira oḍighi iyaạr omiteom

Oḅẹm mọ oye apẹl ghuḍum anạ. Nạ kabulha ni ipẹ oye phọ aḍighinhaan bọ nyinhạ ḍughụm? Obọ nạ kawạ reten oḍeenhaan oye phọ mọ nạ asereghiạn ni ipẹ odị aḍighi bọ?

Yira omoọgh ghuḍum loor esi aZihova. Ibạl 1 Jọn 4:8-10, kụ eeḅeghiọn sipuru phọ iphẹn:

• Uḍighi ika kụ ekiạ phọ aZizọs eḍighi bọ inmo dị egbatanhaạn?

• Ipẹ aZihova r’aZizọs oḍighinhaan bọ nyinhạ etọl aani ika esi anạ?

Yira koḍeenhaan ika mọ yira osereghiạn ni ipẹ aZihova r’aZizọs uḍighinhaan bọ iyira? Ibạl 2 Korịnt 5:15 r’1 Jọn 4:11; 5:3. Mem dị nyinha aạl eniin esi aBaibul, iiḅeghiọn ghan ḍipuru phọ aḍiẹn:

• Odaphạn esi aBaibul phọ, yira koḍighi eeghe oḍeenhaan osereghiạn?

4. Tuughaạny Zizọs

Enhọn eten oḍeenhaan ephomhoghiạn pọ otuughaạny ghan aZizọs. Ibạl 1 Pita 2:21, kụ eeḅeghiọn ḍipuru phọ aḍiẹn:

• Ighẹn areten kụ edị yira kotue odạph igbaranuọm aruwol phọ aZizọs?

5. Kiạ aani ghan mem dị ophạm eḍighieeny Ootughianhạm aḍuugh phọ aKraist

Omhiịn ipẹ emite bọ eḅẹl amem mọ ophighi bọ Eḍien Adulhe Uw-emhoọgh phọ, ibạl Luk 22:14, 19, 20. Kụ eeḅeghiọn sipuru phọ iphẹn:

• Eeghe kụ imite mem Eḍien Adulhe Uw-emhoọgh phọ?

• Abrẹd phọ r’amiim mọ emeerạ esi eeghe?—Miịn siikpịgh phọ 19 r’20.

AZizọs awạ mọ abumatuạn phọ odị olhe ghan Eḍien Adulhe Uw-emhoọgh phọ mem lhạ phọ, ḍio phọ aḍiphẹ odị amhugh bọ. Pọ kụ iyaạr phọ Abugbaanhaạn aZihova rookpomhoghan ghan bọ mem lhạ phọ ootughiạn aḍuugh phọ aKraist, odaphạn ipẹ odị atọ bọ. Olhegheri obughẹ ilọ eḍighieeny phọ ephẹn phọ, Ipegh VIDIO phọ. Kụ eeḅeghiọn ḍipuru phọ edaphạn bọ siẹn.

AVIDIO: Tuutughiạn Ḍuugh Phọ aJizọs (1:41)

• Eeghe kụ remite ghan mem lọ ookpomhoghan ophạm eḍighieeny Ootughianhạm aḍuugh phọ aKraist?

Abrẹd phọ r’amiim mọ emeerạ ni esi iyaạr. Abrẹd phọ ameerạ esi iphulhupul phọ aZizọs emhunhughan bọ, odị ughol bọ iyira aphighironhọm ekiạ. Amiim mọ ameerạ esi iḅaạl phọ odị

OGHAẠPH OOKARAGH

Yira rosereghiạn ghan ipẹ aZizọs muḍighinhaan bọ iyira esi omhoọgh omheeraam oghị esi odị ḅilhẹ r’oghị aani ghan amem dị ophạm eḍighieeny Ootughianhạm aḍuugh phọ odị.

Ooḅula

• Remạ ghan eeghe oḍeenhaan omheeraam oghị esi aZizọs?

• Keḅeraạn nyinhạ oḍighi eeghe kụ oḍeenhaan mọ nạ asereghiạn ni ipẹ aZihova r’aZizọs moḍighinhaan bọ nyinhạ?

• Uḍighi ika kụ emạn bọ ni maạr oghị aani ghan amem dị ophạm eḍighieeny Ootughianhạm aḍuugh phọ aKraist?

WAAGHỊ AMHIỊN

Aḍuugh phọ aKraist inyu iyira oḍighi eeghe?

Odị Asighẹ Loor Phọ Odị Aghuenhiom AZihova (9:28)

Tuughạ abughẹ ilọ omheeraam r’ipẹ yira koḍeenhaan bọ mọ yira omoọgh ni omheeraam.

“Moọgh Omheeraam Aghị Esi Aruguanhaan Phọ AZihova” (The Watchtower, October 2016)

Bạl emhuoghaạph phọ “Adọl Aghuḍum Amhị Iḅaạl Eḅilhẹ Emhoọgh Emhụ,” amhiịn idị olhegheri ilọ aḍuugh phọ aKraist etir dọl aghuḍum oniin anhịr.

“ABaibul Phọ Ranme Ghan Ni Sighuḍum Awe” (The Watchtower, August 1, 2011)

Tuughạ alhegheri iyaạr phọ eḍighi bọ kụ iphurukpu awe bịn kụ role ghan bọ abrẹd phọ koḅilhẹ ophughọl miim mọ.

“Uḍighi Ika Kụ Eten Phọ Abugbaanhaạn AZihova Role Ghan Bọ Eḍien Adulhe Uw-emhoọgh Phọ Egbatanhaạn Bọ r’Ipẹ Ipheriphọ Aruukụ Iiḅereghị Phọ?” (Edi intanẹt)