Ekpanhạ iyaạr dị aBaibul phọ aghaạph aghol pọ Omhạr phọ k’Enhaạn. Dị eego esi Omhạr phọ opọ phọ, aZihova kaḍighi idị ade phọ ketọl ipẹ odị agbiighi bọ. Omhạr phọ opọ phọ p’eeghe? Yira ulhegheri ika mọ mamhiigh itooghị? Omhạr phọ maḍighi eeghe? Kụ kaḍighi eeghe ghisigh? Emhuoghaạph phọ ephẹn phọ r’iyạl phọ ipẹ etum bọ siẹn kepanyanhaạn ni sipuru phọ iphẹn phọ.

1. Omhạr phọ k’Enhaạn p’eeghe, kụ anhiạn kụ Otooghiạ phọ?

Omhạr phọ ophọn phọ aḍighi gomẹt dị aZihova Enhaạn phọ kụ aphighi. Otooghiạ phọ pọ aZizọs Kraist, kụ odị katọl k’akẹ kụ atooghị. (Matiu 4:17; Jọn 18:36) ABaibul phọ aḅẹm mọ aZizọs: “Kụ kadạ . . . k’agee-pọ.” (Luk 1:32, 33) Idiphọ Otooghiạ Omhạr phọ k’Enhaạn, aZizọs katooghị ni apoghomhiom torobọ oye siẹn ade phọ.

2. Abuọ anhiạn kụ kotooghị bọ r’aZizọs?

Oginha aZizọs bịn kụ ka/tooghị. Awe ‘oomo arughunughun r’arunhụ r’aramạ r’areelhe . . . kụ kotooghị’ r’aZizọs opoghomhiom de phọ. (Ogananami 5:9, 10) Ika awe kụ kotooghị r’aKraist? Egbi k’amem mọ aZizọs arọl bọ siẹn ade phọ, irubal aKristẹn moḍighi ni bumatuạn odị. Kuolọ oginha 144,000 abidị bịn kụ kokị k’akẹ otooghị r’aZizọs. (Ibạl Ogananami 14:1-4.) Oomo abueriphọ aKristẹn phọ odi bọ siẹn ade phọ kotọl eeḍiạn itooghị Omhạr phọ k’Enhaạn.—Psalm 37:29.

3. Eeghe kụ iḍighi kụ itooghị Omhạr phọ k’Enhaạn enighẹ bọ epu itooghị awe?

Ghalhamọ r’amem dị abutooghiạ aḅirinhi phọ rokparaghạ ni oḍighi igey araraạr, iikpọ abidị re/si ghan oḍighinhom oomo ipẹ bidị rowạ bọ. Oḅilhẹ kẹn ni ronme ghan bidị kodaamhị bunhọn abutooghiạ dị eeni u/moọgh ḍiḅeraạn abuẹn bidị rotooghị bọ kongọ. Kuolọ elọ aZizọs, Otooghiạ Omhạr phọ k’Enhaạn, ko/nme nyodị odaamhị onhọn oye. Enhaạn “maphighi omhạr dị ko/tue opiemhi.” (Daniel 2:44) AZizọs katooghị apoghomhiom oomo ade phọ, kụ odị kazoọm oomo awe eten dị eeleeny. Ephomhoghiạn, igbiririph, ḅilhẹ r’elhiom ooruẹn kụ araagharạ dị odị amhoọgh, kụ odị katughemhị ni we ozoọm ghan oniin atum nyoniin r’ephomhoghiạn, igbiririph, ḅilhẹ r’elhiom ooruẹn.—Ibạl Isaiah 11:9.

4. Omhạr phọ k’Enhaạn kụ katooghị apoghomhiom de phọ

AZizọs Kraist kụ amhoọgh iikpọ otooghiọm apu torobọ otooghiạ dị marọl ghan. Ibạl Matiu 28:18, kụ eeḅeghiọn ḍipuru phọ aḍiẹn:

• Eeghe kụ iḍighi kụ itooghị phọ aZizọs enighẹ bọ epu itooghị awe?

Itooghị awe renmeeghian ghan ni, kụ torobọ otooghiạ ratooghị ghan pakirị aḅirinhi phọ bịn. Kuolọ kokaạph aani ika ilọ Omhạr phọ k’Enhaạn? Ibạl Daniel 7:14, kụ eeḅeghiọn sipuru phọ iphẹn:

• Uḍighi ika kụ eḍighi bọ iyaạr oḅaạl olhoghi olhegheri mọ iyaạr “ke/piemhi” Omhạr phọ k’Enhaạn?

• Nạ ragbi mọ eeghe kụ iḍighi kụ enighẹ bọ dị Omhạr phọ katooghị apoghomhiom oomo ade phọ?

5. Ewạ ni mọ onme itooghị awe

Uḍighi ika kụ ewạ bọ mọ Omhạr phọ k’Enhaạn asighẹ esi itooghị awe? Ipegh VIDIO phọ, kụ eeḅeghiọn ḍipuru phọ edaphạn bọ siẹn.

AVIDIO: Omhạr Phọ K’Enhaạn P’eeghe?—Ookpera phọ (1:41)

• Itooghị omhạr awe mekọm eeghe?

Ibạl Ecclesiastes 8:9, kụ eeḅeghiọn sipuru phọ iphẹn:

• Nạ ragbi mọ enighẹ ni dị Omhạr phọ k’Enhaạn kasighẹ esi itooghị awe? Eeghe kụ iḍighi?

6. Buẹn kotooghị bọ siphẹ Omhạr phọ k’Enhaạn unhaghanhạn iyira

Loor esi iduọn Otooghiạ phọ ayira Zizọs marọl ghan bọ ni siẹn ade phọ idiphọ oye, odị alegheri ni “mọ yira odugh ni.” (Hibru 4:15) Kụ 144,000 alhephiri r’anmariịr phọ okpẹ bọ oḍuomolhoghi phọ kotooghị bọ r’aZizọs oḍighi we dị aZihova asighẹ esi “oomo arughunughun r’arunhụ r’aramạ r’areelhe” isiẹn aḅirinhi phọ. —Ogananami 5:9.

• Ekpoomhị ni oḅio anạ olhegheri mọ aZizọs r’oomo abuphẹ kotooghị bọ r’odị onaghanhạn ni ipẹ yira rologhoma ghan bọ r’iiḅaghamhị dị yira rosoman ghan? Eeghe kụ iḍighi?

7. Iilhogh Omhạr phọ k’Enhaạn kụ inhighẹ epu ilọ awe

Abuọ itooghị phọ rolọgh ghan ni iilhogh dị bidị ootughiạn mọ kekoph eḅilhẹ engọ suọ we phọ. Omhạr phọ k’Enhaạn amoọgh aani ni iilhogh dị abuphẹ kotọl bọ eeḍiạn itooghị phọ kodạph. Ibạl 1 Korịnt 6:9-11, kụ eeḅeghiọn sipuru phọ iphẹn:

• Nạ ragbi mọ aḅirinhi phọ katọl ika eḍighi maạr dị torobọ oye kụ radạph iilhogh phọ Enhaạn?a

• Nạ ragbi mọ aZihova amoọgh ni elhiom oḅẹm mọ torobọ oye dị katọl aani eeḍiạn itooghị Omhạr phọ aako iilhogh phọ ḍughụm? Eeghe kụ iḍighi?

• Eeghe kụ iḍeenhaan mọ awe dị roo/ko ghan itọ phọ iphẹn phọ kotue ni onmia?—Miịn ekpịgh phọ 11.

OGHAẠPH OOKARAGH

Omhạr phọ k’Enhaạn aḍighi okạr agomẹt dị odi k’akẹ kụ katooghị apoghomhiom oomo ade phọ.

Ooḅula

• Abuọ anhiạn kụ abutooghiạ Omhạr phọ k’Enhaạn?

• Eeghe kụ iḍighi kụ itooghị Omhạr phọ k’Enhaạn enighẹ bọ epu itooghị awe?

• Ighẹn kụ iniin araraạr dị aZihova rawạ ḍighaạgh abuẹn kotọl bọ eeḍiạn itooghị Omhạr phọ?

WAAGHỊ AMHIỊN

Ḅeeḅeghiọn iyaạr dị aZizọs aghaạph ilọ ekpisi phọ ophighi bọ Omhạr phọ.

“Omhạr Phọ K’Enhaạn Aḍighi Iyaạr Dị Edi Ekpom Anạ Ḍughụm?” (Edi intanẹt)

Uḍighi ika kụ Abugbaanhaạn aZihova osopha bọ oḅạr Omhạr phọ k’Enhaạn kparipẹ r’itooghị awe?

Oḅạr Omhạr Phọ K’Enhaạn (1:43)

Ḅeeḅeghiọn idị aBaibul phọ aghaạph ilọ 144,000 awe phọ aZihova asaḅạr bọ otooghị r’aZizọs.

“Anhiạn Kụ Kakị K’akẹ?” (Edi intanẹt)

Eeghe kụ ikọm idị oniin anhịr dị odi ikoli amheeraam mọ oginha Enhaạn bịn kụ katue amiteom elhiom ooruẹn siẹn aḅirinhi phọ?

“Idị Mị Amhoọgh Ophagharanhaạn Aḍipuru Dị Mị Apuru Ghan Ilọ Ekeeny Ooruẹn” (Awake!, November 2011)

Omhạr phọ k’Enhaạn amhiigh itooghị epẹ k’akẹ lhạ phọ 1914. Opọ kẹn kụ amem dị eekunha asiḍio itooghị omhạr awe emhiigh. Yira ulhegheri ika? Ooḅeghiọn idị aBaibul phọ aghaạph ilọ asidọl r’aroozọ awe emhiigh 1914.

1. ABaibul phọ akaạph eeghe?

Aḍinyạ phọ aDaniel iḍeenhaan mọ Omhạr phọ k’Enhaạn kamiigh itooghị eekunha amem dị oghol mọ “oḍual asiạ.” (Daniel 4:16, 17) Ibadị asiạ reten, aZizọs aghaạph aghol mem mọ opọ phọ mọ ‘amem mọ omaanhaạn bọ reelhe phọ,’ kụ aḅilhẹ aḅarạm mọ amem mọ k”esi eekunha. (Luk 21:24) Iduọn yira komiịn bọ ni, oḍual asiạ phọ imunhughan lhạ phọ 1914.

2. Ighẹn asidọl r’aroozọ kụ imhiigh oganhanha emhiigh lhạ phọ 1914?

Abumatuạn phọ aZizọs upuru ni nyodị mọ: “Eeghe kụ kemite oḍeenaan mọ meteẹny mem mọ nạ katu bọ eekuna aḅirini phọ?” (Matiu 24:3) AZizọs aphagharanhaạn ni bidị kụ aghaạph raraạr dị kemite mem mọ odị kamiigh bọ itooghị siphẹ Omhạr phọ k’Enhaạn, epẹ k’akẹ. Iniin araraạr phọ iphẹn phọ pọ araaghạm, igbakurọ, r’ophiigha arere. (Ibạl Matiu 24:7.) ABaibul phọ aḅilhẹ kẹn ni akaạph mọ aroozọ awe mem “aruukuna phọ” kelọgh ni sighuḍum awe esi “ooto r’osooromineen.” (2 Timoti 3:1-5) Yira ukạr omhiigh omhiịn asidọl r’aroozọ phọ iphẹn phọ lhạ phọ 1914.

3. Uḍighi ika kụ asidọl phọ melhoghorị bọ emhiigh k’amem mọ Omhạr phọ k’Enhaạn amhiigh bọ itooghị?

AZizọs roḍighi bọ Otooghiạ Omhạr phọ k’Enhaạn, i/bia bịn odị eenhan Setan r’ikarạph aruwaloor phọ. Ukpạr ri opu Setan. ABaibul phọ aḅẹm ni mọ ‘uroph nyodị r’oomo aruukpaạny phọ odị osiemi ude.’ (Ogananami 12:9,10, 12) ASetan amoọgh iboom ighạgh ilhoghi loor esi dị alegheri mọ meteẹny dị kopiemhi nyodị. Loor iduọn phọ odị rakọm ghan riiphinha r’imhinhimhiịn siẹn ade phọ. Iikia i/lo asidọl aḅirinhi phọ ebeeph bọ iduọn phọ! Omhạr phọ k’Enhaạn kaḍighi ni idị araraạr keḅilhẹ enighẹ.

OLHEGHERI OBUGHẸ

4. Imiịn aBaibul eḍeenhaan mọ Omhạr phọ amhiigh itooghị lhạ phọ 1914

AVIDIO: Omhạr Phọ K’Enhaạn Amhiigh Itooghị 1914 (5:02)

Enhaạn aḍighi idị Uw-emhạ phọ Nebuchadnezzar kamalhạ malhạ epẹ Babilọn. Amalhạ phọ r’ipẹ aDaniel agbạ bọ eḍeenhaan mọ amalhạ phọ aghaạph ghan ilọ itooghị phọ aNebuchadnezzar r’Omhạr phọ k’Enhaạn.—Ibạl Daniel 4:17.a

Ibạl Daniel 4:20-26, kụ esighẹ igbe phọ ephanyanhaạm sipuru phọ edaphạn bọ siẹn:

• (A) ANebuchadnezzar amalhạ amhiịn eeghe?—Miịn ekpịgh phọ 20 r’21.

• (B) Eeghe kụ kemitenhaan oreeny phọ?—Miịn ekpịgh phọ 23.

• (C) Eeghe kụ kemite mem dị “oḍual asiạ” phọ esi eekunha?—Miịn ekpịgh phọ 26.

Idị Amalhạ Oreeny Phọ Agbolhomaam Omhạr Phọ K’Enhaạn

IMIỊN PHỌ (Daniel 4:20-36)

Itooghị phọ

(A) Ogbogh oreeny

Usophoghom itooghị phọ

(B) “Ler oreeny phọ,” kụ awilhẹ “oḍual asiạ eten”

Uḅulhemhi itooghị phọ

(C) “Itooghị phọ anạ keḅilhẹ ni eḍighi ilọ anạ”

Siphẹ oḅẹl omhunhughan imiịn phọ iphẹn phọ . . .

• (D) Oreeny phọ amheerạ esi anhiạn?—Miịn ekpịgh phọ 22.

• (E) Usophoghom ika itooghị phọ odị?—Ibạl Daniel 4:29-33.

• (F) Eeghe kụ imitenhaan aNebuchadnezzar siphẹ eekunha “oḍual asiạ” phọ?—Ibạl Daniel 4:34-36.

EḄẸL AMEM DỊ IMIỊN PHỌ EMHUNHUGHAN

Itooghị phọ

(D) Nebuchadnezzar, Uw-emhạ phọ aBabilọn

Usophoghom itooghị phọ

(E) Reten 606 B.C.E., aNebuchadnezzar aḍigh ni elhaạl bịn o/tooghị mun esi oḍual asiạ

Uḅulhemhi itooghị phọ

(F) Elhaạl phọ aNebuchadnezzar iḍuạ ni kụ aḅilhẹ amhiigh otooghị

Siphẹ omhunhenhiom iyạl omhunhughan imiịn phọ iphẹn phọ . . .

• (G) Oreeny phọ amheerạ esi anhiạn?—Ibạl 1 Chronicles 29:23.

• (H) Usophoghom ika itooghị phọ abidị? Yira ulhegheri ika mọ bidị u/miigh kẹn otooghị mem mọ aZizọs arọl bọ siẹn ade phọ?—Ibạl Luk 21:24.

• (I) Pụr amem ḅilhẹ eghẹn kụ edị itooghị phọ iphẹn phọ eḅilhẹ emhiigh itooghị?

OMUNHENHIOM IYẠL AMEM DỊ IMIỊN PHỌ EMHUNHUGHAN

Itooghị phọ

(G) Aruw-emhạ Izrạl dị Enhaạn angọ eepoogh otooghị

Usophoghom itooghị phọ

(H) Uphiemhi Jeruselem, bịn esophoghom ḍikoọl itooghị aruw-emhạ phọ Izrạl esi 2,520 asiạ

Uḅulhemhi itooghị phọ

(I) AZizọs amhiigh otooghị epẹ k’akẹ idiphọ Otooghiạ Omhạr phọ k’Enhaạn

5. Aḅirinhi phọ manmia ni emhiigh 1914

Ipegh VIDIO phọ.

AVIDIO: Aḅirinhi Phọ Manmia Ni Emhiigh 1914 (1:10)

AZizọs aghaạph ni idị aḅirinhi phọ katọl mem dị odị aḍighi Uw-emhạ. Ibạl Luk 21:9-11, kụ eeḅeghiọn ḍipuru phọ aḍiẹn:

• Ighẹn asidọl kụ edị nạ mamhiịn dị emite obobọ anhaghạn mọ emite?

Otelhedom mọ Pọl aghaạph ni idị awe kozọ mem dị eekunha itooghị awe meteẹny. Ibạl 2 Timoti 3:1-5, kụ eeḅeghiọn ḍipuru phọ aḍiẹn:

• Nạ mamhiịn ni dị awe rozọ reten phọ iphẹn phọ rodon?

6. Ḍeenhaan mọ nạ ameeraam ni mọ Omhạr phọ k’Enhaạn mamhiigh ni itooghị

Ibạl Matiu 24:3, 14, kụ eeḅeghiọn sipuru phọ iphẹn:

• Oghẹn oḍighi dị amhạn maạr kụ aḍeenhaan mọ Omhạr phọ k’Enhaạn mamhiigh ni itooghị?

• Nạ kapinhom aani ika bin oḍighi phọ ophọn phọ?

Omhạr phọ k’Enhaạn ratooghị ni nyiidiphọ, kụ aḍio phọ kamiigh bọ itooghị siẹn ade phọ metuman. Ibạl Hibru 10:24, 25, kụ eeḅeghiọn ḍipuru phọ aḍiẹn:

• Ewạ dị torobọ onyọ ayira kaḍighi eeghe iduọn yira ‘romiịn bọ mọ aḍio Omoọgh-we phọ mekpulhạn’?

OGHAẠPH OOKARAGH

Imiịn aBaibul, r’asidọl aḅirinhi phọ emạ ni emiteom mọ Omhạr phọ k’Enhaạn ratooghị ni nyiidiphọ. Yira roḍeenhaan ghan mọ yira omeeraam ni iphẹn phọ esi ogbeelhom ghan ilọ Omhạr phọ r’oḅilhẹ oghị ghan ituughạ.

Ooḅula

• Eeghe kụ imite mem mọ oḍual asiạ phọ oghaạph bọ aghol siphẹ aḍinyạ phọ aDaniel esi bọ eekunha?

• Uḍighi ika kụ nạ ameeraam bọ mọ Omhạr phọ k’Enhaạn amhiigh itooghị 1914?

• Nạ kaḍeenhaan ika mọ nạ ameeraam ni mọ Omhạr phọ ratooghị ni nyiidiphọ?

WAAGHỊ AMHIỊN

Tuughạ alhegheri idị awe iphirigba r’abunhọn awe oghaạph ilọ ipẹ aḅirinhi phọ ranmeeghian bọ emhiigh 1914.

“Mem Dị Aroozọ Repụ Ghan Bịn” (Awake!, April 2007)

Bạl amhiịn idị imiịn aBaibul phọ edi bọ Matiu 24:14 etir ghuḍum oniin oye.

“Mị Uphomhoghiạn Baseball Apu Enhọn Iyaạr!” (The Watchtower No. 3 2017)

Yira ulhegheri ika mọ imiịn phọ edi bọ Daniel emhụ phọ 4 egbolhomaam Omhạr phọ k’Enhaạn?

“Pụr Amem Kụ Edị Omhạr Phọ K’Enhaạn Amhiigh Itooghị? (Ekpịgh 1)” (The Watchtower, October 1, 2014)

Eeghe kụ iḍeenhaan bọ mọ “oḍual asiạ” phọ oghol bọ siphẹ Daniel emhụ phọ 4 isi eekunha 1914?

“Pụr Amem Kụ Edị Omhạr Phọ K’Enhaạn Amhiigh Itooghị? (Ekpịgh 2)” (The Watchtower, November 1, 2014)

Omhạr phọ k’Enhaạn mamhiigh ni itooghị nyiidiphọ. Moọny amem, kanmeeghi ni raraạr siẹn ade phọ. Ooḅeghiọn iniin imạ araraạr dị nạ katue agon omhiịn eeḍiạn itooghị Omhạr phọ.

1. Ika kụ idị Omhạr phọ k’Enhaạn kaḅulhemhi eephọ r’elhiom ooruẹn siẹn ade phọ?

Otooghiạ Omhạr phọ k’Enhaạn, aZizọs, kapiemhi ni buọ asipioghọm r’atorobọ iikpọ itooghị siphẹ eghạm Amagedọn. (Ogananami 16:14, 16) Mem mọ opọ phọ kụ edị oguan aBaibul phọ aḅẹm bọ mọ: “Esugha moọny enụm amem bịn kopiemhi ni buọ asipioghọm mọ” kakạr amunhughan. (Psalm 37:10) Dị eego esi Omhạr phọ, aZizọs kaḍighi idị eephọ r’elhiom ooruẹn ketọl siẹn ade phọ.—Ibạl Isaiah 11:4.

2. Aghuḍum katọl ika mem dị Enhaạn aḍighi ipẹ odị rawạ bọ siẹn ade phọ?

Eeḍiạn Omhạr phọ, “awe elhiom eḍighinhom iyaạr komoọgh de phọ, kụ otugh siẹn ade phọ k’agee-pọ.” (Psalm 37:29) Gbiom olhoghi orọl aḅirinhi dị awe elhiom eḍighinhom iyaạr dị ophomhoghiạn aZihova r’awe bịn kụ odi! Oye ka/tọl mun e/moon, kụ torobọ oye katọl bịn k’agee-pọ.

3. Omhạr phọ k’Enhaạn kaḍighi eeghe mem dị mophiemhi buọ asipioghọm mọ?

Rophiemhi buọ asipioghọm mọ, kụ aZizọs atooghị idiphọ Uw-emhạ esi 1,000 asiạ. Mem mọ opọ phọ, odị r’144,000 abuphẹ kotooghị bọ r’odị kologhonhaạn ḍighaạgh oḍighi idị awe komunhughan oḅilhẹ oḍuạ esi ikarạph. Tutụ amem mọ opọ phọ kesi eekunha, ade phọ meḍighi paradaịs, kụ awe phọ odi bọ omoọgh oḅaạl olhoghi loor esi onhaghanhạn iilhogh phọ aZihova. Ipẹ reten kụ aZizọs aḅulhemhi itooghị phọ angọ Odẹ phọ odị, Zihova. Dị k”erọl ghan, kopạm ni ‘ḍien phọ aZihova oḅaalhamhị.’ (Matiu 6:9, 10) Keegholhaan kẹn ni mọ aZihova aḍighi ni ogey Otooghiạ dị amhoọgh ogbolhomaam awe phọ odị. Opọ kụ amem dị aZihova kapiemhi Setan, ikarạph aruwaloor phọ, r’atorobọ oye dị asopha ogbagharạn itooghị phọ Odị. (Ogananami 20:7-10) Oomo imạ araraạr phọ Omhạr phọ k’Enhaạn kaḍighi bọ ketọl bịn k’agee-pọ.

OLHEGHERI OBUGHẸ

4. Omhạr phọ k’Enhaạn kasiemhi eekunha itooghị awe

“Siẹn aḅirinhi phọ, buniin omoọgh iikpọ kụ bunhọn romiinhọm ghan eeḍiạn abidị.” (Ecclesiastes 8:9) Dị eego esi Omhạr phọ, aZihova kaalemhi ni ekeeny ooruẹn phọ ephẹn phọ.

Ibạl Daniel 2:44 r’2 Tesalonikạ 1:6-8, kụ eeḅeghiọn sipuru phọ iphẹn:

• AZihova r’Oọny phọ odị, Zizọs, koḍighi eeghe itooghị awe r’abuphẹ oḍighan bọ bidị?

• Ika kụ idị iphẹn nạ matuughạ bọ ilọ aZihova r’aZizọs ekpoomhị oḅio anạ mọ bidị kozọ ni eten dị eeleeny?

5. AZizọs akpeanhaạn ni oḍighi Uw-emhạ

Idiphọ Otooghiạ Omhạr phọ k’Enhaạn, aZizọs kaloghonhaạn ni we ḍighaạgh ibadị areten. Ipegh VIDIO phọ olhegheri areten dị aZizọs maḍeenhaan mọ onọ amoọgh eephuạ r’iikpọ k’Enhaạn olhoghonhaạn awe ḍighaạgh.

AVIDIO: AZizọs Aḍeenhaan Raraạr Dị Omhạr Phọ Kaḍighi (1:13)

Araraạr phọ ipẹ aZizọs aḍighi bọ siẹn ade phọ eḍighi oogho araraạr dị Omhạr phọ kaḍighi. Aḍighẹn aḍisẹph dị oghol siẹn phọ kụ edị nạ ragon omhiịn? Ibạl riisi aBaibul phọ edaphạn bọ siẹn olhegheri ilọ aḍisẹph kirokirọ phọ obughẹ.

6. Omhạr phọ k’Enhaạn kaḍighi idị araraạr kenighẹ ghisigh

AVIDIO: Oogho Imạ Aghisigh (4:38)

Ibạl Psalm 145:16, kụ eeḅeghiọn ḍipuru phọ aḍiẹn:

• Etọl ika esi anạ olhegheri mọ aZihova “kagbaanyamhị ni eephuạ atorobọ oye”?

OGHAẠPH OOKARAGH

Omhạr phọ k’Enhaạn kaḍighi ipẹ Enhaạn agbiighi bọ. Kaḍighi idị ade phọ keten paradaịs dị abugey awe dị rooḅereghị ghan aZihova kotọl k’agee-pọ.

Ooḅula

• Ika kụ idị Omhạr phọ k’Enhaạn kaḅaalhamhị ḍien phọ aZihova?

• Uḍighi ika kụ yira komeeraam bọ mọ Omhạr phọ k’Enhaạn kaḍighi ni ipẹ aBaibul phọ aguan bọ?

• Eeghe iyaạr dị Omhạr phọ kaḍighi kụ edị nạ akạr ragon omhiịn?

WAAGHỊ AMHIỊN

Miịn iyaạr dị Amagedọn ramạ ghan.

“Eghạm Amagedọn P’eeghe?” (Edi intanẹt)

Bạl amhiịn raraạr dị kemiteghu mem igbogh iiḅaghamhị phọ aZizọs aghaạph bọ aghol.—Matiu 24:21.

Igbogh Iiḅaghamhị Phọ P’eeghe?” (Edi intanẹt)

Miịn idị arughunotu kotue ogbiom olhoghi dị bidị odi paradaịs.

Miịn Loor Anạ Paradaịs (1:50)

Siphẹ emhuoghaạph phọ “Mị Umhoọgh Ni Ibadị Asipuru Dị Iiḅaghamhị Ghan Imhị,” tuughạ alhegheri idị oye dị agbagharạn ghan buọ itooghị amhiịn ophanyanhaạn asipuru phọ odị awạ ghan bọ.

“ABaibul Phọ Ranme Ghan Ni Sighuḍum Awe” (The Watchtower, January 1, 2012)