ESI ITUUGHẠ PHỌ 22
Ika Kụ Idị Nạ Katue Akaạph Iiḅi Iinhaghạn Phọ Aḅenhị Aani Bunhọn?
Iduọn nạ ratuughạ bọ igey aBaibul phọ, eeni nạ kaḅẹm ni mọ, ‘Enighẹ ni dị abunhọn konaghạn aani iphẹn phọ!’ Okạr agey, rewạ ni mọ torobọ oye anhaghạn aani! Ghalhamọ r’iduọn phọ ni, eeni oghiilhaan katọl li oḅenhị aani abunhọn ipẹ nạ matuughạ bọ. Ooḅeghiọn idị nạ katue akpạr apu oghiilhaan phọ kụ amiigh oghaạph aani iiḅi iinhaghạn phọ oḅenhị abunhọn.
1. Ika kụ idị nạ katue aḅenhị aani we dị nạ alhegheri ipẹ nạ matuughạ bọ?
Abumatuạn aZizọs uḅẹm mọ: “Yoor ko/biIẹ oghaạph araraạr phọ ipẹ yoor momiịn bọ oḅiIẹ onaghạn.” (Iiḍighi 4:20) Bidị umhaghamhị maạr igey phọ kụ owạ ghan torobọ eepoogh oḅenhị aani abunhọn. Nạ aloghoma aani ni iduọn phọ? Eḍighi idiphọ, pọ wạ roopoogh oḅenhị aani abuọ eghunotu r’arighirị anạ iphẹn nạ matuughạ bọ r’eten olhọgh eegu.—Ibạl Kolosị 4:6.
Iniin areten omhiighom
Mem dị nạ raḅaanhaạn siya anạ, nạ atue ni amiigh oghaạph ilọ aBaibul phọ esi oḅẹm mọ: “Mị atuughạ ni eekiạ iyaạr wiki phọ ophọn phọ.”
Nạ atue ni asighẹ esi aBaibul aadereghiọm oyaghirị anạ dị u/moon obobọ raaḅaghamhiạn loor.
Ḅenhị buọ otu oḍighi anyinha dị opuru nyinhạ idị awiki phọ aghị iyaạr dị nạ atuughạ siphẹ ituughạ aBaibul phọ anạ obobọ otu ituughạ.
Ḍeenhaan righirị anạ osoph intanẹt phọ Mạgh aani ghan bunhọn oḍighan anạ mem dị nạ ratuughạ Baibul phọ obobọ ḍeenhaan bidị ilọ olhọm ituughạ aBaibul siphẹ jw.org.
Mạgh aani ghan bunhọn oḍighan anạ mem dị nạ ratuughạ Baibul phọ obobọ ḍeenhaan bidị ilọ olhọm ituughạ aBaibul siphẹ jw.org.
2. Uḍighi ika kụ oḍighan ookpomhoghan phọ omite epẹ erugh phọ eḍighi bọ ḍimạ aḍiigbu?
Abumatuạn phọ aZizọs ughaạph ni iiḅi iinhaghạn phọ oḅenhị we dị bidị olhegheri, kuolọ i/munheen pạ. AZizọs adi ghan bidị iyạl yạl kụ “arom . . . oḍiemi ghan oghị atorobọ ekpisi” oghaạph iiḅi iinhaghạn phọ. (Luk 10:1) Eten phọ ephẹn osighẹ bọ oghaaphọm iiḅi iinhaghạn phọ ilhoghonhaạn ḍighaạgh bunhọn onhaghạn aani iiḅi iinhaghạn phọ. Oḅọph ghan oghaạph iiḅi iinhaghạn phọ ingọ ni iboom ibo bumatuạn phọ. (Luk 10:17) Nạ katue ni akoọr ḍiigbu odạph ookpomhoghan phọ omite epẹ erugh phọ?
OLHEGHERI OBUGHẸ
Ooḅeghiọn idị nạ katue akpạr apu oghiilhaan kụ amoọgh aani ibo oghaạph iiḅi iinhaghạn phọ oḅenhị aani abunhọn.
3. AZihova katọl li r’anạ
Abuniin awe dị rowạ oghaạph aani iiḅi iinhaghạn phọ otue ni omoọgh oghiilhaan okị esi eten phọ epẹ awe komiịn bọ bidị r’idị awe kozoọm bidị.
Nạ rakiilhaan ni oghaạph ipẹ nạ matuughạ bọ oḅenhị aani abunhọn ḍughụm? Eeghe kụ iḍighi?
Ipegh VIDIO phọ, kụ eeḅeghiọn ḍipuru phọ edaphạn bọ siẹn.
Ika kụ idị iḍoọgh Abugbaanhaạn phọ abuẹn phọ okpạr opu oghiilhaan phọ abidị?
Ibạl Isaiah 41:10, kụ eeḅeghiọn ḍipuru phọ aḍiẹn:
Eeghe kụ iḍighi kụ nạ kaaḅereghị bọ mem dị nạ rakiilhaan oḅenhị abunhọn ipẹ nạ matuughạ bọ?
Nạ alegheri ni?
Abuniin Abugbaanhaạn aZihova uutughiạn ghan mọ bunọ ko/tue omoọgh akpọ oḅio oḅenhị aani abunhọn iiḅi iinhaghạn phọ. Esi omaạm, aSergey alhoghoma m’onọ o/mhạn maạr, esi iduọn phọ ikparanhaạn ni nyodị oḅaanhaạn ghan awe. Kuolọ odị atuughạ ni Baibul phọ. Odị aḅẹm mọ: “Etigheri oghiilhaan phọ, mị umhiigh ni oḅenhị aani abunhọn ipẹ mị ratuughạ bọ. Dị olhoghi mị u/seere, oḅenhị aani ghan abunhọn ipẹ mị atuughạ bọ ingọ ghan ghụn imhị akpọ oḅio. Iḅilhẹ kẹn ni ekparamhị omheeraam amhị.”
4. Ḍeenhaan olhọgh eegu
Mem dị nạ rakaạph iiḅi iinhaghạn phọ, tuutughiạn ni iyaạr phọ nạ kakaạph bọ, r’eten oghaạph iyaạr phọ. Ibạl 2 Timoti 2:24 r’1 Pita 3:15, 16, kụ eeḅeghiọn sipuru phọ iphẹn:
Nạ kaḍighinhom ika siikpịgh phọ iphẹn phọ mem dị nạ raḅenhị bunhọn ilọ aBaibul phọ?
Eḍighi maạr dị abuniin abuọ eghunotu r’arighirị anạ u/meeraam, nạ kaḍighi ika? Kụ eeghe kụ edị i/wạ mọ ḍighi?
Eeghe kụ iḍighi kụ enighẹ bọ oḍighinhom amagheel kparipẹ rokpaariọm abidị?
5. Oḅenhị aani abunhọn iiḅi iinhaghạn phọ rengọ ghan ibo
AZihova aḅọgh oḍighi iiḅi iinhaghạn phọ angọ Zizọs. AZizọs asighẹ ika oḍighi phọ opọ phọ? Ibạl Jọn 4:34, kụ eeḅeghiọn sipuru phọ iphẹn:
Olhe ghan egey eḍien ringọ ghan iyira omhoon aloor r’ibo. Eeghe kụ iḍighi kụ aZizọs atomaạm bọ oḍighi ogbi phọ Enhaạn, eḅarạm bọ ni oghaạph iiḅi iinhaghạn phọ, eḍien?
Nạ ragbi mọ eeghe araraạr otuạn obo kụ keḍuạ emite esi oghaạph ghan iiḅi iinhaghạn phọ?
Ilọ Oḍighi
Siphẹ ituughạ ogbo awiki phọ, tuughạ reten dị nạ katue amiighom raghaạph.
Kaaphạn r’otughemhiạ phọ anạ ilọ ophạm aani ghan apakirị siphẹ ituughạ ogbo awiki phọ. Ophạm aani ghan apakirị siphẹ ituughạ ogbo awiki phọ keḍighi idị kedughanhaan nyinhạ oḅenhị aani abunhọn ipẹ nạ ratuughạ bọ.
Sighẹ ghan ipẹ edi bọ gạ phọ “Abuniin Awe Ootughiạn Mọ” ḅilhẹ “Oye Atue Ni Apuru Mọ” atuughaạm ghan ilọ ophanyanhaạm iniin asipuru dị awe rogbor ghan kopuru.
OYE ATUE NI APURU MỌ: “Nạ odi aani ika?”
Ika kụ idị nạ katue asighẹ eepoogh phọ ephẹn phọ akaaphọm ipẹ nạ matuughạ bọ?
OGHAẠPH OOKARAGH
Oghaạph iiḅi iinhaghạn phọ oḅenhị aani abunhọn rengọ ghan ni ibo, kụ nạ kamiịn ni mọ i/kpạr iboom idiphọ nạ aatughiạn bọ.
Ooḅula
Uḍighi ika kụ nạ kaḅenhị aani bọ bunhọn iiḅi iinhaghạn phọ?
Ika kụ idị nạ katue akaạph r’olhọgh eegu?
Ika kụ idị nạ katue akpạr apu torobọ oghiilhaan dị nạ amhoọgh oghị oghaạph iiḅi iinhaghạn phọ?
WAAGHỊ AMHIỊN
Miịn inya areten dị edugh osighẹ ajw.org kontạkt kạd phọ oghaaphọm iiḅi iinhaghạn phọ.
Tuughạ alhegheri inya araagharạ dị ketue elhoghonhaạn nyinhạ ḍighaạgh oḅenhị aani iiḅi iinhaghạn phọ bunhọn.
“Nạ Aakolhobian Ni Oḍighi Okoniọm Awe Ḍughụm?” (Otu Okoriom, September 2020)
Miịn idị eḍeenhaan aBaibul ketue ingọ iyira akpọ oḅio oghaaphọm iiḅi iinhaghạn phọ ghalhamọ yira oḍighi ni iḍoọgh.
Miịn idị nạ katue aḅenhị aani buọ eghunotu anạ dị u/legheri aZihova ipẹ nạ matuughạ bọ siphẹ aBaibul phọ.
“Oteẹny Ekpom Abuọ Eghunotu Anạ Dị U/legheri AZihova” (The Watchtower, March 15, 2014)