Mị Ụḍua Dọl Umugholoor Aḍighi Ọnyo Ạ Mịsọnạrị

Ụmhar ịmhi lhạ phọ 1951 ẹpe Vienna, Austria, eghun otu dị rọki ghan Catholic. Mị ughiil ghan umugholoor agey, kụolo mị umheeraam ni Ẹnhaan ạḅilhe agbor ghan ạaḅereghi. Mem dị mị ạmhan esugha ạsia, ọde ạmhi amhiigh ni ọtuugha ạ Bạịbul phọ r’Ạbugbaanhaan A Jehova, kụ ẹsighe rẹki bịn onhiin ạmhi amhiigh aani.

Íbia bịn yoor omhiigh ọghi ịtuugha ookpomhoghan a Döbling ẹpe Vienna. Ịdipho eghun otu, yoor ụḅophoghan ghan oḍighi ịbadi ạraraar. Yoor ụḅophoghan ghan ni ạal ọḅilhe ọtuugha Bạịbul phọ, ọghi ịtuugha, ọḅilhe omiteom ghan loor oḍighi iiḍighi mem dị ọghi ạsembili. K’ẹghoroghor ọde ạmhi ụlhoghonhaan ghan ni ịmhi ḍịghaagh ọmhoogh ẹphomhoghian dị eḍiinyan ọghi esi a Jehova. Ọkar ọghaaph, ọdi agbor ghan ni ạaḅereghi mọ mị r’umaranhi phọ ạmhi oḍighi bụkoy eten. Kụolo ạḍiphe phọ íḍighi ghan ḍiigbu ạmhi mem mọ ạmuphe phọ.

MỊ UMHIIGH RUKUMUAN OOMO AMEM

Mị uḍiiny mụum lhạ phọ 1965, mem dị mị ạmhan 14 ạsia. Torobọ ịpe ẹrol bọ, mị ughiilhaan ghan ni ọḅaanhaan aruuruen ẹpe erugh phọ. Ẹnhon ịyaar pọ, mị ụutughian mọ ạbunhon ịdoogh ọnighe upu ịmhi, kụ mị ạkparagha ghan oḍighi ịdi mị kạḅeraan bịdi. Mem mọ mị aḍiiny bọ mụum, íbia bịn mị amhiigh ooḍikuan r’awe dị a Jehova rọ́oḅereghi. Ghạlhamo r’ịduon ịḅeraan bọ ịmhi ooḍikuan ghan r’ạbidi, ọoruen olhoghi ạmhi ụuḅaghamhi ghan ni ịmhi. Kụolo ịkparanhaan ni ịmhi onmia. Eeghe kụ ịlhoghonhaan ịmhi ḍịghaagh?

Mem mọ ạmuphe phọ, oniin ọnyanhi dị ạmhan 16 ạsia, dị oghol mọ Dorothée amhiigh ni oru ookpomhoghan ayoor. Ạ Dorothée ạmhoogh oophugh omite ghan ẹpe erugh phọ. Mị akupheri nyọdi ẹnum, kụolo mị úgbor ghan umite ẹpe erugh phọ ịduon ọdi. Kụ mị amhiigh ọotughian mọ: ‘Ọde r’onhiin ạmhi oḍighi Bụgbaanhaan, kụolo eghun otu ạbuo a Dorothée úḍighi Bụgbaanhaan. Ọdi kụ rapogh ghan onhiin ọdi dị ụ́kua. Kụ ọdi ragbor ghan ni kamite ẹpe erugh phọ!’ Ẹma eḍeenhaan phọ ọdi inyu ni ịmhi ọbughe arukumuan phọ mị rạngo bọ a Jehova. Íbia bịn mị rạ Dorothée omhiigh ọkoy eten. Yoor umhiighom ọkoy eten ọpo ekulha amem mọ oghol ghan bọ mọ vacation pioneer, onyebel roten kụ yoor omhiigh ọkoy eten ọpo oomo amem mọ. Oophugh phọ ạ Dorothée aḍighi ni ịdi mị amhiigh ogbor ghan omite ẹpe erugh phọ. Ọdi ụlhoghonhaan ni ịmhi ḍịghaagh ọmhoogh oye dị mị kạtughemhi ghan Bạịbul. Ẹsighe rẹki bịn idughanhaan ịmhi ọḅaanhaan awe ẹpe erugh phọ, bụlo mị azuan eten r’ịnhon arikpisi.

Ḍịḅel ạlha phọ mị amhiigh bọ ọkoy eten, oniin ọnyo umor dị oghol mọ Heinz ọlo Austria aru ni ookpomhoghan ayoor. Ọdi ạtuugha igey phọ mem dị ọdi ạghi ophogh umor ọdi dị aḍighi ọnyo Ọgbaanhaan ẹpe Canada. Ụsighe Heinz oruom ookpomhoghan ạ Vienna ịdipho ọkoy eten dị ạgbatanhaan. Ẹḅel amem mọ mị ạmhiin bọ nyọdi bịn ọdi ụḅeraan ni ịmhi. Ọdi ạwa ghan oḍighi ọnyo ạ mịsọnạrị, kụolo mị ụ́moogh aani ghan ḍiigbu phọ ạḍiphe phọ. Loor ịduon phọ, ẹḅel amem mọ, mị úḍeenhaan nyọdi mọ ọdi ụḅeraan ni ịmhi. Onyebel roten, yoor uḍigh ni rịghiri r’ạḍiitughian apinien, kụ yoor ạalhan ọḅilhe omhiigh ọkoy eten ẹpe Austria.

AḌIIGBU OḌIGHI ỌNYO Ạ MỊSỌNẠRỊ

Ạ Heinz agbor ghan ni ạghaaph ịlo ẹephua oḍighi ọnyo ạ mịsọnạrị ụḅenhi ịmhi. Ọdi ị́mhi ụkpaariom ghan kụolo upuru ghan ni ịmhi sipuru dị kinyu ịmhi ọotughian ịlo aḍiigbu phọ ạḍiphe phọ, ọdi upuru ghan ịmhi mọ, “eḍighi bọ ẹdi yira ụ́moogh bọ ịbam ạmuny, yira kótue ọbughe rukumuan phọ yira rụngo bọ a Jehova ḍụghum?” Loor ịduon mị rakiil ghan bọ umugholoor, mị ughiilhaan ghan mọ mị kátue aḍighi oḍighi ạ mịsọnạrị phọ. Ghạlhamo r’ịduon mị rạkoy bọ ni eten, mị ụutughian ghan mọ oḍighi ạ mịsọnạrị phọ ạkpar iboom. Olom mọ ạmhi ạghiom ni ghisigh ụlhoghonhaan ịmhi ḍịghaagh pịdi mị arue ạsighe oḍighi ạ mịsọnạrị phọ aḍighi ḍiigbu ạmhi. Ọdi uroma ịmhi mọ kpạripe rọoḅaghamhian aloor mọ mị kátue aḍighi oḍighi phọ, mị ụmhoogh ghụn ogbolhomaam awe. Oroma phọ ọdi ạkar kụ ụlhoghonhaan ịmhi ḍịghaagh.

Ẹnum ẹnum bịn mị ạmhoogh ḍịḅeraan oḍighi ạ mịsọnạrị phọ, bịn yoor ọgeeghi ịlo ọghi askul a Gilead. Tọrobo ịpe ẹrol bọ, oniin ọnyo umor dị rakumuan ghan ẹpe ọla ạgada phọ uromha ịmhi mọ mị ukem ụtuugha ịlo ọḅa ọnhu abekeeny, kụ mị uḍighi ni ịpe ọdi ạghaaph bọ. Ịraar ạsia reten, dị olhoghi yoor úseere, ụḅenhi ni olom ạmhị r’ạmhi ọghi okumuan ookpomhoghan dị odi a Yugoslavia ẹpe Salzburg, Austria,. Yoor ukumuan ẹpe phọ oḍual ạsia, kụ sịphe oḍual ạsia phọ, yoor uḍighi ni oḍighi opoghom eghir esi aḍinhiin ạlha. Ọnhu a Serbo-Croatia ạkpar agey, kụolo yoor ụmhoogh ni ịbadi awe dị yoor ọtughemhi ghan Bạịbul.

Lhạ phọ 1979 abumor phọ ropogh bọ ọla ạgada phọ uruom ni iyoor ọghi ẹpe Bulgaria. Loor ịduon mosophoghom bọ oḍighi phọ ayira ẹpe phọ, bịdi ụḅenhi iyoor mọ yoor uḅo mụdi yoor ụghi ẹpe phọ “ophooghian.” Esi ịduon phọ, yoor ụ́kaaph iiḅi ịinhaghan phọ ẹpe phọ. Yoor ụsighe ghụn iniin ạrinya ookpomhoghan phọ ọghi ọngo eten ịbooghian oogh abumaranhi dị odi ẹpe Sofia, ẹkpanha ẹmha phọ a Bulgaria. Mị ughiilhaan ni, kụolo a Jehova ụlhoghonhaan ni ịmhi ḍịghaagh. Ạkpo oḅio r’ibo phọ abumaranhi phọ ọmhoogh bọ ghạlhamo r’ịduon bịdi olhegheri bọ ni mọ kotue ni ọlogh bịdi ikoli ịngo ni ịmhi ịbuom oḍighi ạ tọrobo oḍighi dị ụngo ịmhi sịen ookpomhoghan phọ.

Ẹsighe rẹki bịn yoor ụḅilhe ni ọgeeghi ọghi askul a Gilead, kụ egi phọ ẹphen phọ, ụmhagh ni iyoor. Yoor ụutughian ghan mọ yoor kọki askul phọ ọnhu abekeeny ẹpe United States. Kụolo ụnwanyu aNovember 1981, umhiigh ni ọpham aani askul a Gilead phọ ẹpe ọla ạgada phọ aWiesbaden, Germany. Esi ịduon phọ, ụḅa ọnhu ạ German askul phọ, kụ idughanhaan ịmhi agey ọnhaghanhan. Kụolo kụsighe iyoor ọkimom ẹghen?

OKUMUAN EKPISI DỊ ẸGHAM EDI

Ụsighe ni iyoor ọghimom Kenya, kụolo abumor phọ rokumuan bọ sịphe ọla ạgada phọ ạ Kenya ụḅenhi ni iyoor mọ yoor ụki Uganda, eelhe dị etuman bịdi kụ okumuan. Esi a ḍioph ạsia ẹpe ọmhan, oniin ọnyo ẹgham dị oghol mọ General Idi Amin agboton ni ạgada ịtooghi phọ Uganda. Ịtooghi phọ ọdi ịkom ni ḍuugh r’ạḍikparamhinheen ẹngo ịbadi. Kụ lhạ phọ 1979, ạbunhon egu awe ogboton nyọdi ạgada. Oghiilhaan ạrol li okumuan ọdo eelhe dị ẹrol ịduon phọ. Kụolo askul a Gilead phọ muukolhobian iyoor oḍuom olhoghi a Jehova. Esi ịduon phọ, yoor umheeraam ni ọghi.

Ạraraar ịkar kụ eeph iboom ẹpe Uganda. Ạ Heinz olom mọ ạmhi ạghaaph ni ịpe ạraraar ẹrol bọ ẹpe phọ sịphe a Yearbook 2010. Ọdi ạḅem mọ: “Ịbadi ạraraar ị́tol ghan mụn . . . Ạmuum ọphughol r’ịlo ọmhagh oye fon ítol. . . . Ịtaph r’imhi kụ ịḅilhe eetura ẹkpaariom nụun ḍughul. . . . Mem dị aḍughul eghul, tọrobo oye ạrol ghan olhoghi otu bịnkụ ạaḅereghighan mọ ạruḅa kútu olhoghi otu ạbidi.” Etigheri ịiḅaghamhi phọ ịphen phọ, abumor r’abumaranhi phọ ọrol bọ Uganda ụghiom ni ghisigh ọpham omeeraam mọ ạbidi ọkparamhi!

Lhạ phọ 1982, mị r’olom ạmhi ụghi ni Kampala, ẹkpanha ẹmha phọ ạ Uganda. Sịphe ịḅel oogh ạrunwanyu phọ, yoor ụrol otu olom r’ạnhir dị oghol mọ Sam rạ Christina Waiswa, bịdi ụmhoogh oogh ạnmuny r’inya asiya ạbidi dị ọrol ghan r’ạbidi. Eghunotu phọ ẹphen phọ ulhe ghan eḍien mem ḍio phọ, ghạlhamo r’ịduon phọ, bịdi ụngo aani ghan ni iyoor ịpe bịdi ọmhoogh bọ. Mị r’olom ạmhi ụtuugha ni ịbadi ạraraar ḍịghaagh ạbidi dị ịlhoghonhaan iyoor ḍịghaagh sịphe oḍighi ạ mịsọnạrị phọ ayoor. Esi ọmaam, yoor ụtuugha ni ịlo owura ghan ọony ạmuum, kụ yoor ọsighe mụum mọ yoor owura bọ ootolhom epogh amunhum mọ. Lhạ phọ 1983, mị r’olom ạmhi ụmhoogh ni otu ọlo ayoor ekpisi dị ẹphoom ẹnum ẹpe Kampala.

Yoor ụkar kụ ọghelhom oḍighi iphelhegbeel phọ ẹpe Kampala. Mị ạatughian ni oniin ụnwanyu di yoor ọngo rịnya dị repel li 4,000! Kụolo ịpe awe phọ omegheron bọ oru esi adom mọ kụ ịkar ịḅeraan iyoor epu. Bịdi ọlogh eegu Ẹnhaan agey kụ rọwa ghan kẹn ọghaaph ịlo ạ Bạịbul phọ. Ạ Heinz r’ạmhị ụmhoogh ni we dị rọman ni 10 kụ esi 15 dị yoor ọtughemhi ghan Bạịbul. Yoor ụtuugha kẹn ịbadị ạraraar ḍịghaagh ạbidi. Esi ọmaam, ghạlhamo r’ịduon bịdi orelhe ghan bọ kụ oru ịtuugha tọrobo awiki, bịdi úgum ghan, tọrobo amem kụ ọyighogh ni.

Ụḅilhe ni ee ẹgham ẹpe Uganda lhạ phọ 1985 rạ 1986. Yoor ụmhiin ghan ịbam ạnmuny dị ọphamhagh igbogh ạsilaagba ọmheregha yogh eten. Mem mọ ạmuphe phọ, yoor ụuḅereghi ghan mọ a Jehova ụngo iyoor ọsu olhoghi r’ekpom dị ẹepho pịdi yoor orue ọmhiin we dị kọnaghan dom mọ. A Jehova ạnhaghan ni ịiḅereghi phọ ayoor. Tọrobo amem di yoor ọmhiin oye dị amhegheron agey aru esi adom mọ, yoor uwulha ghan ni oomo ịiḅaghamhi phọ yoor osoman bọ.

Yoor ụghelhom ghan ni kẹn ọghaaph iiḅi ịinhaghan phọ ọḅenhi aruuruen. Esi ọmaam, yoor uuzuanhaan ni kụ ọḅilhe ọtughemhi Bạịbul phọ olom r’ạnhir dị oghol mọ Murat ra Dilbar Ibatullin, dị ọḅua Tatarstan (Central Russia) kụ oru. A Murat aḍighi oyil arookonhom. Ịyal phọ ạbidi uḍiiny ni mụum kụ ọkiom ni ghisigh rokumu a Jehova. Onyebel roten, mị ụḅilhe ni azuan TatjanaVileyska, ạnhir ọlo a Ukraine dị ạatughian ghan osinha. Ạ Tatjana aḍiiny ni mụum, aḅulha ẹpe Ukraine bịn ẹsighe rẹki amhiigh okumuan ịdipho ọdi rạgba aani ghan rịnya ayira katenheghi.a

IMHOOM ỊPAANHAAN

Mem dị yoor ọghi ophooghian ẹpe Austria lhạ phọ 1991, ọla ạgada ẹpe phọ ụḅenhi ni iyoor mọ monme ekool arukumuan ayoor, mọ yoor kokumuan ghan epẹ Bulgaria nyịidipho. Usophoghom ni oḍighi iphelhegbeel phọ ẹpe Eastern Europe esi ịbadi ạsia. Kụolo nyịdipho ạraraar menmia, momheera mọ ọghaaph iiḅi ịinhaghan phọ ẹpe phọ. Ịdipho mị ạghaaph bọ ẹpe ọmhan, olom ạmhi r’ạmhi ụsighe ghan ni rịnya ọghimom ẹpe phọ eten ịbooghian mem mọ osophoghom bọ oḍighi phọ, kụolo nyịidipho mọkar urom iyoor ọghi ẹpe phọ ọghaaph iiḅi ịinhaghan phọ.

Ụḅenhi iyoor mọ yoor kúḅulha ẹpe Uganda. Esi ịduon phọ, ịlo oḅulha ẹpe yoor ọrol ghan bọ ookoroghian ạraraar ayoor ọbo ọḅenhi rịghiri ayoor mọ adulghul bọroph ị́tol, yoor ụghi ẹpe Bẹtel ạ Germany, ụngo iyoor moto kụ yoor ọḅua ọghi Bulgaria. Yoor osi bọ ẹpe phọ, ụsighe ni iyoor ọghimom egu dị 20 ạbukaaphom kụ odi, ekpisi dị oghol mọ Sofia.

Yoor usoman ni ịbadi ịpaanhaan ẹpe Bulgaria. Ẹḅel phọ, yoor ụ́maar ọnhu phọ. Kụ ogina ạrinya dị ẹrol ọnhu phọ pọ ạḍinya phọ The Truth That Leads to Eternal Life r’ạḍinya phọ My Book of Bible Stories. Ịkparanhaan ni iyoor omhiigh ọtughemhi awe Bạịbul. Etigheri ịpaanhaan phọ ịphen phọ, abumor r’abumaranhi phọ ụghiom ni ghisigh oḍighi iphelhegbeel phọ. Kụolo mem mọ ạbuo ạsiosi phọ ọmhiin bọ ịpe a Jehova rạseph bọ oḍighi phọ, kụ edi ịiḅaghamhi phọ ẹkar bọ emhiigh.

Lhạ phọ 1994, ịtooghi a Bulgaria ụ́lọgh mụn elhegh Bụgbanhaaan phọ ịdipho ẹku ịiḅereghi kụ omhiin ọzoom ayoor ẹkaraph eten. Usiphi ni bunhiin abumor. Omhiigh ọgbaghi ọkpe ịlo Ạbugbaanhaan phọ olhoghi a Tv, newsapaper ra redio. Bịdi ụḅem mọ Ạbugbaanhaan phọ rọze ghan ịbam ạnmuny ạbidi loor ịduon bịdi rómeera ghan bọ kọlhogh bịdi ịḅaal, ḅịlhe mọ bịdi rọḅenhi ghan bumor r’abumaranhi phọ oghiigha aloor. Esi ịduon phọ, ịkparanhaan ghan ni iyoor ọghaaph iiḅi ịinhaghan phọ. Mem dị yoor omite ẹpe erugh phọ, awe ụghagham ghan ni iyoor olhoghi, ụlooghiom iyoor, ụmhaghanhaan iyoor bụo iḍiil ọḅilhe uroḅol iyoor rạar. Ídugh ghan ọsighe ạrinya phọ oḍighom sịphe eelhe phọ, ghạlhamo r’ophir esi dị kọpam ghan ịtuugha bịn ịkpar ghan ni. Eniin amem dị ọpham ookpomhoghan eephugh, ạbuo iḍiil phọ uru ni osophoghom ẹdeom mọ. Iyoor kụ̋zoom ghan eten phọ ẹphen phọ. Bịdi ụ́tol ịdipho awe a Uganda phọ ookolhobian bọ ọnhaghan adom mọ ayoor! Eeghe kụ ịlhoghonhaan iyoor ḍịghaagh okaran ịpaanhaan phọ ịphen?

Ibo phọ yoor ọmhoogh ghan bọ ooḅughonhaan ghan abumor r’abumaranhi phọ kụ ịlhoghonhaan bọ iyoor ḍịghaagh. Olhoghi ạbidi ạkar kụ ạḅaal ịduon bịdi mọmhiin bọ igey phọ, kụ ọsereghian kẹn ọlhoghonhaan ạḍighaagh phọ yoor ọngo bọ bịdi. Tọrobo ọnyo ạbidị ạlhoghonhaan ghan ni ḍịghaagh nyọripho. Mị r’olom ạmhi ụmhiin ni mọ yoor kotue ni ọmoogh ọḅaal olhoghi tọrobo oḍighi dị ụngo iyoor eḍighi mạar dị yoor ọphomhoghian we phọ.

Ạsia reten, ạraraar ịḅilhe ni ẹnhighe. Ịtooghi a Bulgaria phọ ụḅilhe ni ọlhogh elhegh ookpomhoghan phọ ayira ịdipho ẹku ịiḅereghi lhạ phọ 1998, kụ umiteom ni kẹn ịbadi ạrinya ayira ọnhu ạ Bulgaria. Kụ lhạ phọ 2004 ụḅogh ni ọngo a Jehova omhoom ọla ạgada dị ọlhogh sịphe Bulgaria. Rodon, 57 arookpomhoghan kụ edi Bulgaria, kụ 2,953 ạbukaaphom kụ odi. Sịphe ạlha arukumuan phọ eten bọ, awe dị ọmhan 6,475 kụ ụghi ạ Memorial phọ. Mem dị eten oginha oogh abumaranhi kụ ụrol ghan eelhe phọ oghol bọ mọ Sofia, kụolo nyịidipho esugha arookpomhoghan kụ memite ẹpe phọ! Yoor mọkar kụ ọmiin dị ‘ẹbam egu phọ . . . Keḍighi ni ọonir.’—Isa. 60:22.

OKARAN ỊIḄAGHAMHI ALOOR

Mị ạmoogh ni ịiḅaghamhi aloor. Esi ịbadi ạsia ạruphugh remite ghan ni loor ạmhi, eniin edi ẹmhu ạmhi. Mị ụghi ni rookonhom ẹpe India, ịsighe ni 12 ạwa ạay ọsighe rụphugh phọ ịphen phọ. Yoor ụrol ẹpe ọla ạgada phọ india, kụ mị rọmhoogha loor ạmhi, kụ yoor obulha oḍighi phọ ayoor ẹpe Bulgaria.

Ẹsighe rẹki bịn olom ạmhi amheelhom aani ẹnhon ẹgbagara ẹzegh dị oghol mọ Huntington. Ẹzegh phọ iḍighi ịdi ẹkparanhaan ghan nyọdi orue orelhe, oḅa ọbobo ọphamhaghan erelhe phọ ọdi. Ịduon ẹzegh phọ rẹbugh bọ, bịn mị kuḍighinhaan ghan nyọdi tọrobo ịyaar. Aloor ạmhi ịpelhelhe ghan ni ịbadi amem kụ mị ạaḅaghamhian ghan loor ịpe ạraraar kẹki bọ. Tọrobo ịpe ẹrol bọ, ọḍoogh ọnyo umor dị oghol mọ Bobi agbor ghan ni ạpham Heinz amitenhom ghan ẹpe erugh phọ. Ạ Bobi óghiilhom ghan umugholoor ẹzegh olom mọ ạmhi. Ọdi ạrol ghan ni oomo amem ọlhoghonhaan ayoor ḍịghaagh. Ghạlhamọ r’ịduon yoor osopha bọ mọ yoor kọ́mar nmụny sịen aḅirinhi phọ ọphon phọ, a Jehova ạsighe ni Bobi bịn ụngo iyoor ịdipho ọony ayoor!—Mạk 10:29, 30.

A Heinz ooḅi olom mọ ạmhi ạḅilhe ni ạmhooghom Kạnsa bịn amhugh lhạ phọ 2015. A Heinz amhugh bọ ịghigh mụdi mị mapokoro; mị útue umeeraam mọ ọdi mamhugh. Kụolo mị rạatughian ghan ni ịlo ọdi dị ẹḅilhe ẹghigh mụdi kőmhugh! (Luk 20:38) Ḍio ḍio ḍio, mị rạatughian ghan ni ịma ikpo ọnhu phọ ḅịlhe r’ogey oromha phọ ọdi ịphoomhi ghan bọ ịmhi. Mị rạsereghian ni a Jehova igey ịduon yoor orue bọ ni ọḅophoghan okumu nyọdi ịbadi ạsia.

MỊ RẠSEPH NI A JEHOVA ESI ỌLHOGHONHAAN ẠḌIGHAAGH PHỌ ỌDI

A Jehova mạkar ụlhoghonhaan ịmhi ḍịghaagh orue ọkparam oomo ịiḅaghamhi phọ ạmhi. Ọdi mụlhoghonhaan ịmhi ḍịghaagh ọkpar opu umugholoor phọ ạmhi r’oḍighi ọnyo ạ mịsọnạrị dị ạphomhoghian we. (2 Tim. 1:7) Mị ạkar kụ rạseph a Jehova, nyịidipho ọbam umaranhi ạmhi r’ạmhi odi rukumuan oomo amem mọ. Rodon, olom ọdi r’ọdi odi rukumuan ophogh eghir phọ a Serbia ẹpe Europe. Ịiḅereghi phọ ọde ayoor ạaḅereghi bọ epẹ ọmhan mọphagharanhaan rodon!

Ịtuugha ạ Bạịbul phọ ạmhi mịngo ịmhi ẹepho olhoghi. Mem dị ạraraar ẹkpar, mị mạtuugha ịdi mị ‘kạkananaam’ ghan ịiḅereghi ịdiphọ a Jizọs. (Luk 22:44) Eniin eten dị a Jehova mạphagharanhaan ịiḅereghi phọ ạmhi pọ ẹphomhoghian r’ọnma ighirigiir phọ abumor r’abumaranhi phọ udeenhaan bọ ịmhi sịphe ookpomhoghan phọ aNadezhda, ẹpe Sofia. Ịbadi amem bịdi rụmhagh ghan ịmhi ooḅughonhaan abịdi, kụ rụḅenhi ghan kẹn ịmhi mọ bịdi ụphomhoghian ni ịmhi. Ịpe phọ rịngo ghan ịmhi iboom ibo.

Mị ragbor ghan ni kagbirima ịlo oḍuomolhoghi oḅetenhu esi aḍuugh phọ. Eeni amem mị agbirima kụ ạmiin ọde r’onhiin ạmhi dị ọmheera pạ esomanan otu phọ ayoor, kụ ọḅilhe ọnhighe ịdipho amem mọ bịdi ạalhan bọ. Kụ mị ạḅilhe ạmiin umaranhi phọ ạmhi dị raakolhobian ghan eḍien olhe. Mị rạmiin ghan kẹn olom mọ ạmhị Heinz dị ạmheera atuman ạsu phọ ọdi. Ịdo phọ ịitughian phọ ịphen phọ reḍighi ghan ịyaar dị olhoghi ạmhi rágbor ghan kạghi esi ịiḅaghamhi phọ mị masoman ghan bọ, kpạripe ghụn reḍighi ghan idị mị rạseph ghan a Jehova.

Mem dị mị ạatughian ịlo aghuḍum mọ ạmhi r’ịpe aghuḍum mọ ạmhi kạtol bọ ẹpe ghisigh, mị ameeraam ni r’oomo ekpom mọ ikpo ọnhu phọ a Devid edi bọ Psalm 27:13, 14, ẹḅem bọ mọ: “Mị alegheri ni mọ mị kạtol li ạmiin ẹnighe Ọmoogh-we phọ sịen aghuḍum mọ ạkuen. Ḍuomolhoghi a Jehova; kpọ oḅio kụ ạkparamhi ekpom ạna. Ii, ḍuom olhoghi a Jehova.”