ẸMHUOGHAAPH ỊTUUGHA PHỌ 37
ẠḌUOR PHỌ 114 “Exercise Patience”
Ịdi Nạ Kaḍighi Mem Dị Nạ Ọbobo Ạbunhon Osoman Ekeeny Ọoruen
“Ọdi ạwa ghan dị bịdi koḍighi ịpe eḍighi bọ elhiom, kụolo pogh! ekeeny ọoruen ghụn kụ imuza.”—ISA. 5:7.
EGBON
Ịyaar dị yira kọtuugha esi ịpe a Jizọs amhegheron ghan bọ mem dị ọdi ạmhiin dị ọzoom bụnhon eten dị ị́nighe ḅịlhe r’ịdi yira kọtuughaany eḍeenhaan phọ ọdi.
1-2. Ịbadi awe romegheron ghan ika mem dị ọzoom bịdi ọbobo we dị bịdi olhegheri eten dị ị́nighe? (b) Yira kọoḅeghion eeghe sịen ẹmhuoghaaph phọ ẹphen phọ?
ḌIO arodon, awe rọzoom ghan ni bụnhon eten dị ị́nighe. Eeni loor esi aḍizu ạbidi, ẹ́moogh ikpoki, eelhe ọbobo loor ekpisi phọ bịdi ọḍua bọ oru. Kụ awe rọmiinhom ghan loor esi dị abugbogh abumuul ḍighi ḅịlhe ạbuo ịtooghi phọ ụ́moogh ogbolhomaam awe phọ. Ịphen phọ r’ịnhon areten ekeeny ọoruen ketue ni eḍighi ịdi yira ọbobo awe dị yira olhegheri kọmiinhom.
2 Rodon, ịbadi awe ọkagh ni olhoghi loor ekeeny ọoruen phọ edi bọ sịen aḅirinhi phọ. Oomo phọ ayira rọwa ni ọrol aḅirinhi dị ẹepho r’elhiom ọoruen kụ edi. Loor ephigh phọ ẹphen, abuniin awe roḍighi ghan ni rạraar orue osiemhi eekunha ekeeny ọoruen. Bịdi rọsar ghan ni igiri émeera mem dị ạbuo ịtooghi phọ ọlhogh olhogh dị ụ́ḅeraan bịdi, koḍighan oye dị aguanhaan oolemhi ịiḅaghamhi phọ. Tọrobo ịpe ẹrol bọ, ịdipho ạ Krịstẹn yira mọtuugha ọmiin sịphe ạ Bạịbul phọ mọ yira “kạ́buo aḅirinhi phọ” ḅịlhe mọ Ọmhar phọ Ẹnhaan kụ katue asiemhi eekunha ekeeny ọoruen. (Jọn 17:16) Ghạlhamo r’ịduon phọ ni, olhoghi ayira rạ́ḅaal ghan mem dị yira ọmhiin dị ọzoom bụnhon eten dị ị́nighe. Eeni nạ atue ni apuruan loor mọ: ‘Mị kaḍighi ika mem dị ịphen phọ emite? Ịyaar edi ni dị mị katue aḍighi oolemhi ekeeny ọoruen nyịidipho ḍụghum?’ Orue ọphagharanhaan asipuru phọ ịphen, ọoḅeghion ịpe a Jehova rạ Jizọs rologhoma ghan bọ mem dị bịdi ọmhiin dị ọzoom bụnhon eten dị ị́nighe.
A JEHOVA RA JIZỌS ỌLOGH ḌIEN EKEENY ỌORUEN
3. Uḍighi ika kụ olhoghi ayira rạ́ḅaal ghan bọ mem dị ụzoom iyira ọbobo bụnhon eten dị ị́nighe? (Isaiah 5:7)
3 Ạ Bạịbul phọ aḍeenhaan ni ịyaar phọ eḍighi bọ kụ olhoghi ayira rạ́ḅaal ghan bọ mem dị ụzoom iyira ọbobo bụnhon eten dị ị́nighe. Ạkaaph mọ a Jehova ụlhem iyira ạkighimaam loor ḅịlhe mọ ọdi “ạpomoghian elhiom eḍighinhom ịyaar r’elhiom ọoruen.” (Ps. 33:5; Gen. 1:26) R’amem r’amem ọdi kạ́zoom we eten dị ị́nighe, kụ ọdi ọ́wa mọ ọnyo ayira ạzo eten phọ ẹpe phọ! (Deut. 32:3, 4; Mic. 6:8; Zech. 7:9) Esi ọmaam, sịphe ọrugh oyil phọ Ạịzạyạ, a Jehova ạnhaghan ni emoghi ịbadi awe Izrẹl loor ịduon abuniin ạbuo Izrẹl rọzoom bọ bịdi eten dị ị́nighe. (Bạl Isaiah 5:7.) Esi ịduon phọ, a Jehova ạlhiom ni we phọ Izrẹl ạbuphe ụ́daph bọ olhogh phọ kụ rọzoom bọ bụnhon eten dị ị́nighe.—Isa. 5:5, 13.
4. Ẹghen eḍeenhaan ạ Bạịbul kụ ịma emiteom ịpe a Jizọs alhoghoma ghan bọ mem dị ọzoom bụnhon eten dị ị́nighe? (Mịin kẹn afoto phọ.)
4 Ịdipho a Jehova, a Jizọs ạpomoghian elhiom ọoruen kụ ạlogh ḍien ekeeny ọoruen. Eniin amem, a Jizọs ạmhiin ni oye dị ạḍighaagh emhugh, ọdi ạmhoogh ni igbiririph ạghi esi oye phọ kụ aakonhom nyọdi. Kụolo mem dị abuḍiemhiom ạruuku ịiḅereghi phọ ọmhiin ịphen a Jizọs aḍighi bọ, ịghagh ni ilhoghi ạbidi iboom. Kpạripe dị olhoghi ạbidi kạḅaal ịduon oye phọ ụ́miinhom mụn bọ, bịdi ụḅem ghụn mọ a Jizọs mạka olhogh aḍio ophooghian phọ. A Jizọs alhoghoma ika esi ịphen bịdi ọzo bọ? Olhoghi ọdi eeph ni iboom “loor ịgbagara ilhoghi phọ ạbidi.”—Mạk 3:1-6.
Mem mọ a Jizọs, abuḍiemhiom ạruuku ịiḅereghi phọ ụ́zoom ghan we r’igbiririph, kụolo aJizọs ạzoom ghan ni r’igbiririph (Mịin ẹkpigh phọ 4)
5. Ẹwa mọ ọotughian ghan eeghe ịyaar mem dị yira ọghagh olhoghi loor ekeeny ọoruen?
5 Loor ịduon rẹ́ḅaal ghan bọ olhoghi a Jehova ra Jizọs ọmhiin ekeeny ọoruen, íbeeph dị yira kologhoma aani eten phọ ẹphen phọ. (Efẹ. 4:26) Kụolo, ọlhogh elhegh mọ ghạlhamo yira ọmoogh ni igey ariphigh ọtuan ọghagh olhoghi, yira kótue osiemhi eekunha ekeeny ọoruen, esi ịduon phọ ẹwa mọ ọphamhaghan ịghagh ilhoghi phọ ayira. Ọkar ọghaaph, eḍighi mạar dị yira ọghiom ghisigh ọghagh olhoghi pọ etue ni etir ịitughian r’ạdol omhoon aloor phọ ayira. (Ps. 37:1, 8; Jems 1:20) Esi ịduon phọ, yira koḍighi ika mem dị ụzoom iyira ọbobo bụnhon eten dị ị́nighe? Yira kotue ni ọtuugha ịyaar esi eḍeenhaan phọ a Jizọs.
ỊDI A JIZỌS AḌIGHI MEM DỊ ẠMHIIN DỊ ỌZOOM BỤNHON ETEN DỊ Ị́NIGHE
6. Ịghen kụ iniin areten dị awe ọzoom ghan bụnhon mem mọ a Jizọs ạrol bọ sịen ade phọ? (Mịin kẹn afoto phọ.)
6 Mem mọ a Jizọs ạrol bọ sịen ade phọ, ọdi ạmhiin ni ịdi awe ọzoom ghan bụnhon eten dị ị́nighe. Esi ọmaam, ọdi ạmhiin ni ịdi abuḍiemhiom ạruuku ịiḅereghi rọkpilhoghom oopho awe. (Mạt. 23:2-4) Ọdi ạmhiin kẹn ẹgbagara eten phọ ạbuo ịtooghi phọ a Rom rọzoom bọ bụphe bịdi rọtooghi bọ kọngo. Ịbadi ạbuo aJu phọ ụkar kụ ọwa ẹereegh ḍịghaagh ạbuo a Rom mọ. Abuniin ạbuo aJu umiteoghom ni rugu okori eenhan ạbuo a Rom mọ. Esi ọmaam bịdi umiteom ni egu dị oghol mọ Zealots. Kụolo, a Jizọs óḍighan r’eniin egu dị robe onme ịtooghi phọ. Mem dị ọdi aru alhegheri mọ awe rọwa oḍighi ọdi uwo ẹmha, ọdi ạḍua ni pạ bịdi odi bọ.—Jọn 6:15.
A Jizọs arelhe ni ạḍua mem mọ awe phọ ọwa bọ oḍighi ọdi ọdaam (Mịin ẹkpigh phọ 6)
7-8. Eeghe kụ iḍighi kụ a Jizọs ọ́kparagha bọ osiemhi eekunha ekeeny ọoruen mem mọ ọdi ạrol bọ sịen ade phọ? (Jọn 18:36)
7 Mem mọ a Jizọs ạrol bọ sịen ade phọ, ọdi ólhọgh ḍịghaagh ọdi rạghaaph imirighan ịtooghi orue osiemhi eekunha ekeeny ọoruen. Eeghe kụ iḍighi? Loor esi dị, ọdi alegheri mọ ọmhar awe ụ́moogh elhiom r’ịikpo ọtooghi ọngo aloor ạbidi. (Ps. 146:3; Jer. 10:23) Kụ bịdi ụ́moogh ịikpo osiemhi eekunha rạraar phọ rẹkom ghan bọ ekeeny ọoruen. A Setạn Eru phọ kụ rạtooghi aḅirinhi phọ ọphon phọ, ọdi ọkaraph oye. Ọdi ạsighe ịikpo phọ ọdi ạmhoogh bọ ranyuughiom ghan we ọzoom ạbunhon eten dị ị́nighe. (Jọn 8:44; Ẹfe. 2:2) Loor émunughan phọ, ghạlhamo awe dị ọmhoogh igey ilhoghi bịn rẹkparanhaan ghan ni eeni amem ọzoom awe eten dị ẹnhighe.—Eccl. 7:20.
8 A Jizọs alhegheri ni mọ ogina ịtooghi Ọmhar phọ Ẹnhaan kụ katue asiemhi eekunha rạraar phọ rẹkom ghan bọ ekeeny ọoruen. Loor ephigh phọ ẹphen phọ, ọdi ạlhogh ni mem r’ịnyaam “agbeelhom ghan iiḅi ịinhaghan ịlo Ọmhar phọ Ẹnhaan.” (Luk 8:1) Ọdi ạadereghi ni we phọ ạbuphe rọwa bọ ọmhiin amem dị iḅuabua r’ekeeny ọoruen kesi bọ eekuna. (Mạt. 5:6; Luk 18:7, 8) Tọrobo ịpe ẹrol bọ, ịtooghi ọmhar awe ílo dị ketue eḍighi ịphen phọ, ogina ịtooghi Ọmhar phọ Ẹnhaan íḍighi bọ ịlo aḅirinhi phọ ọphon.—Bạl Jọn 18:36.
TỤUGHAANY JIZỌS MEM DỊ NẠ ASOMAN ỌBOBO ẠMHIIN EKEENY ỌORUEN
9. Eeghe kụ ịngo bọ nyịnha okuphom owol mọ ogina Ọmhar phọ Ẹnhaan kụ katue asiemhi eekunha ekeeny ọoruen?
9 Ekeeny ọoruen phọ yira rọmiin bọ rodon epu ịpe a Jizọs ạmhiin bọ mem mọ ọdi. Kụolo yira olegheri ni mọ a Setạn r’ạbuphe ọdi rạaḅaki bọ ọkiom ni ghisigh rọkom ekeeny ọoruen sịen asiḍio aruukuna phọ. (2 Tim. 3:1-5, 13; Ogan. 12:12) Ịdipho a Jizọs, yira olegheri ni mọ ogina ịtooghi Ẹnhaan kụ katue asiemhi eekunha zin ekeeny ọoruen ḅịlhe r’ẹkaraph eḍighinhom ịyaar. Kụ loor ịduon yira ọbaki bọ Ọmhar phọ, yira róḍighan ghan we kọsar igiri émeera ọbobo oḍighi ịnhon ạraraar dị bịdi ọotughian mọ kesiemhi eekunha ekeeny ọoruen. Ọoḅeghion eḍeenhaan umaranhi dị oghol mọ Stacy.a Kụ ọdi agbi bọ ọtuugha igey phọ, ọdi aḍighan ghan we ọsar igiri émeera ọghi esi ịtooghi phọ loor ekeeny ọoruen. Kụolo ẹsighe rẹki bịn odị amhiigh ookia mụghumo ịphen bịdi roḍighi bọ kẹlogh ni ḍịghaagh. A Stacy ạḅem mọ: “Mem dị yoor rọsar igiri émeera phọ mị uukia ghan ni mụghumo mị ạkar ri odi gạ dị ạnhighe. Nyịidipho mị rạbaki bọ Ọmhar phọ Ẹnhaan, mị alegheri ni mọ mị odi gạ dị ạnhighe. Mị alegheri mọ a Jehova kụ katue ạbianhaan tọrobo oye dị asoman ekeeny ọoruen upu ịmhi.”—Ps. 72:1, 4.
10. Ọdaphan Mạtiu 5:43-48, eeghe kụ iḍighi kụ yira ródighan ghan bọ rookpomhoghan dị robe ghan osiemhi eekunha ịkaraph ịtooghi? (Mịin kẹn afoto phọ.)
10 Arookpomhoghan dị awe omiteom eenhan ạgomet ọbobo igiri émeera dị awe rọsar rẹḅaram ghan ịghagh ilhoghi r’oḍighi ạraraạr dị kẹngo ịiḅaghamhi bụnhon. Kụ ịpe phọ ị́ḅophan eḍeenhaan phọ r’ịtughemhi phọ a Jizọs. (Ẹfe. 4:31) Ọnyo umor dị oghol mọ Jeffrey ạḅem mọ: “Mị alegheri ni mọ mem dị awe rọsar igiri émeera dị ọḅem mọ kéḍighi ịlo ịiḅaghamhi, esi onyam ọḅatan, reten ghan ni elhebiri r’imhi.” Kụolo a Jizọs ạtughemhi mọ ọzoom ghan oomo awe r’ẹphomoghian, ghạlhamo r’awe dị rụmhiinhe iyira. (Bạl Mạtiu 5:43-48.) Ịdipho ạ Krịstẹn, yira roḍighi ghan ni oomo ịpe yira kotue bọ ọdaphan eḍeenhaan phọ a Jizọs.
Remoghi ghan ni ạkpo oḅio orue ọrol ạsam mem dị rọkaaph ịlo imirighan ịtooghi rodon (Mịin ẹkpigh phọ 10)
11. Uḍighi ika kụ eeni amem rịkparanhaan ghan bọ iyira ọtuughaany a Jizọs?
11 Ghạlhamo r’ịduon yira olhegheri bọ mọ ogina Ọmhar Phọ Ẹnhaan kụ katue asiemhi eekunha ekeeny ọoruen, etue ni ịkparanhaan iyira ọtuughaany eḍeenhaan phọ a Jizọs mem dị ụzoom iyira eten dị ị́nighe. Ọoḅeghion ịdi emitenhaan ọnyo umaranhi dị oghol mọ Janiya mem dị ọzoom nyọdi eten dị ị́nighe. Ọdi ạḅem mọ: “Ịpe awe phọ ọghaaph bọ ịkar kụ ephin esi ạmhị, kụ mị ạwa ghan mọ ọtuan ịduon phọ ọlhiom bịdi. Esi ịduon phọ, mị usopha oḍighan oniin ookpomhoghan eenhan awe dị rọzoom ghan bụnhon ẹkaraph eten loor ekpisi dị bịdi ọḅua oru. Mị uḍighi ịphen phọ oḍeenhaan ịdi repin esi ạmhi.” Kụolo rẹsighe rẹki bịn a Janiya ạmhiin mọ ẹkpe dị ọdi kanme ịitughian phọ ọdi. Ọdi ạḅem mọ, “Mị urue ni ạmhiin mọ kpạripe r’oḍuom olhoghi a Jehova, mị mamhiigh rameeraam ghụn rạraar dị awe rọkaaph. Mị usopha mọ mị káḍigh mụn ookpomhoghan phọ ọpo phọ.” Yira ọwa ni omhiigha aloor pịdi ịghagh ilhoghi dị yira ọmhoogh dị ị́beeph ni, kẹkom ịdi yira koḍigh gạ mem dị rọkaaph ịlo imirighan ịtooghi.—Jọn 15:19.
12. Eeghe kụ iḍighi kụ ẹnhighe bọ dị yira kogonha loor esi ạraraar dị yira rọbal, rọnaghan, kọḅilhe ophogh?
12 Eeghe kụ kịlhoghonhaan iyira ḍịghaagh mem dị ụzoom iyira ọbobo bụnhon eten dị ị́nighe? Eniin ịyaar pọ ogonha aloor esi ạraraar dị yira rọbal, rọnaghan, kọḅilhe ophogh. Iniin ạraraar dị rọlogh ghan sịphe ịntạnẹt phọ, reḍighi ghan ni unmam esi awe phọ kụ ẹkom dị awe phọ komiigh ọghaaph ịkaraph ịlo ạbuo ịtooghi phọ. Kụ ịbadi amem ạbuo ịinhaghan phọ rọ́kaaph ghan ọkar ịpe emite bọ. Kụ ghạlhamo ịinhaghan phọ ọngo bọ ẹkar ri etu ịne, ọotughian ghan ịlo ịpe phọ kẹkar ri ẹlogh ḍịghaagh? Eḍighi mạar dị yira ọlhogh mem ọotughian ghan ịlo ịinhaghan phọ, ịphen phọ etue ni eḍighi ịdi olhoghi ayira kabeeph, bịn yira oḅonyonhu ozuan. (Prov. 24:10) Kụ ẹdi eeph iboom, keḍighi ịdi yira kọ́logh mụn elhegh mọ oginha Ọmhar Phọ Ẹnhaan kụ katue asiemhi eekunha ekeeny ọoruen.
13. Ika kụ ịdi ạal ghan r’ogbirima ghan ạ Bạịbul phọ kịlhoghonhaan iyira ḍịghaagh ọmhoogh ephoghom dị eeleeny ịlo ekeeny ọoruen?
13 Ạal ghan kụ ogbirima ịlo ạ Bạịbul phọ kịlhoghonhaan iyira ḍịghaagh okaran mem dị yira ọbobo ạbunhon osoman ekeeny ọoruen. Ịkar kụ ẹeḅaghamhi ọnyo umaranhi dị oghol mọ Alia mem dị rọzoom we ẹmha ạbidi eten dị ị́nhighe. Iphin ni esi ọdi ịduon ụ́liom bọ we phọ. Alia ạḅem mọ: “Mị ụrol li ude kụ apuruan loor mọ, ‘Mị ạkar ri ameeraam mọ a Jehova kasiemhi ni eekunha ịiḅaghamhi phọ ịphen phọ?’ Pọ kụ amem dị mị ạal ịpe edi bọ Job 34:22-29. Ạsiikpigh phọ ịphen phọ ịitughianham ịmhi mọ a Jehova rạmiin ni ịphen remite bọ. Kụ mọ ọdi bịn kụ katue asoph ogey ọoruen ạḅilhe aalhemhi rạraar.” Yira koḍighi eeghe nyịidipho kụ okoriom dị Ọmhar Phọ Ẹnhaan kaalemhi rạraar?
ỊYAAR DỊ YIRA KOḌIGHI NYỊIDIPHO
14. Yira koḍighi eeghe pịdi yira kọ́logh opophe ekeeny ọoruen? (Kọlosi 3:10, 11)
14 Yira kótue onme ịpe awe rọzoom ghan bọ bụnhon, kụolo yira kotue ni onme ịpe yira rọzoom ghan bọ bụnhon. Ịduon yira mọoḅeghion bọ, yira rọtuughaany ghan Jizọs esi oḍeenhaan ghan ẹphomoghian. Kụ ẹphomhoghian phọ ẹphen phọ rinyu ghan iyira ọzoom ạbunhon r’ọlhogh eegu, ghạlhamo r’awe dị rụzoom ghan iyira eten dị ị́nighe. (Mạt. 7:12; Rom. 12:17) Olhoghi a Jehova rạḅaal ghan ni agey mem dị yira ọzoom oomo awe eten dị eeleeny r’eten ẹphomhoghian.—Bạl Kọlosi 3:10, 11.
15. Ọḅenhi aani ghan ạbunhon igey ạ Bạịbul phọ ketir ika bịdi?
15 Eten dị ẹnhighe epu dị yira kotue ọloghonhaan ḍịghaagh bụnhon okaran ekeeny ọoruen pọ ọḅenhi aani ghan ạbidi igey ạ Bạịbul phọ. Uḍighi ika kụ ọḅem bọ ịduon phọ? Loor esi dị “olhegheri ịyaar phọ” a Jehova katue ni anme oye dị aḍighi ghan oye ịigamhanhian, bịn oye phọ ạyoghoyogho ạḅilhe ạpomhoghian ẹepho. (Isa. 11:6, 7, 9) Ọoḅeghion eḍeenhaan oye dị oghol mọ Jemal, kụ agbi bọ ọtuugha igey phọ, ọdi aḍighan ni egu awe dị ee ghan onme ịtooghi eelhe phọ ạbidi, dị ọdi ạatughian mọ rọkpilhoghom we eelhe phọ ạbidi. Ọdi ạḅem mọ: “Nạ kátue ạkpaariom we mọ onmia, oye kụ ịmhi ụkpaariom onmia, igey ạ Bạịbul phọ kụ inme ịmhi.” Ịpe aJemal ạtuugha bọ sịphe ạ Bạịbul phọ inyu ni nyọdi ọwilhe egu phọ ee ghan bọ ọghi esi ịtooghi eelhe phọ. Ịduon yira rọtughemhi bọ we igey ạ Bạịbul phọ, kenyu ni bịdi ọwilhe oḍighi ghan ạraraar dị kẹkom ekeeny ọoruen.
16. Uḍighi ika kụ nạ rạwa bọ ọḅenhi aani ạbunhon rạraar phọ Ọmhar Phọ Ẹnhaan kaḍighi bọ?
16 Ịdipho a Jizọs, yira ọnyaaghian ọḅenhi aani ạbunhon mọ Ọmhar Phọ Ẹnhaan bịn kụ katue ạnighemhi rạraar ạḅilhe asiemhi eekunha ekeeny ọoruen. Oḍuom olhoghi phọ ọphon phọ katue ni ạkparamhi bụphe mọzoom bọ eten dị ị́nhighe. (Jer. 29:11) A Stacy, ọghaaph bọ oghol ẹpe ọmhan, ạḅem mọ: “Ọtuugha igey phọ iḍighi ịdi mị arue akaran ekeeny ọoruen dị mị ạmhiin dị ạbunhon osomhan r’ịdi mị r’aloor asomhan. A Jehova rạsighe ghan dom ạ Bạịbul phọ kụ ụudereghiom iyira.” Orue ọḅenhi aani ạbunhon ịpe ạ Bạịbul phọ ạghaaph bọ ịlo ịpe ekeeny ọoruen kesi bọ eekunha, ẹwa mọ ọmhaar ookolhobian. Nạ akuphom ni owol ịpe ạ Bạịbul phọ ạghaaph bọ ịlo ekeeny ọoruen ọdaphan ịphen yira mọoḅeghion bọ, pọ kẹlhoghonhaan nyịnha ḍịghaagh ọghaaph ọḅenhi aani ạbunhon r’amagheel, mụghomo otu askul ọbobo otu oḍighi.b
17. Ika kụ ịdi a Jehova rụlhoghonhaan ghan iyira ḍịghaagh okaran ekeeny ọoruen nyịidipho?
17 Loor ịduon kőphiemhi bọ Setạn “ọdaam aḅirini phọ,” yira r’ạbunhon kọkiom ni ghisigh osomhan ekeeny ọoruen. Kụolo yira ọmoogh ni oḍuom olhoghi r’ọlhoghonhaan ạḍighaagh ịduon yira rokori bọ dị kopiemhi nyọdi. (Jọn 12:31) Dị eego esi ạ Bạịbul phọ, a Jehova agananhamhi ni ịyaar phọ eḍighi bọ kụ ekeeny ọoruen edi bọ, ḅịlhe r’ịpe Ọdi alhoghoma bọ loor ịiḅaghamhi phọ mẹkom bọ ịngo iyira. (Ps. 34:17-19) Dị eego esi ọony phọ Ọdi, a Jehova mụtughemhi iyira ịlo oḍighi mem dị yira osomhan ekeeny ọoruen ọbobo ọmhiin dị ạbunhon osomhan, ḅịlhe r’ịpe Ọmhar phọ Ọdi kasiemhi bọ eekunha ekeeny ọoruen. (2 Pit. 3:13) Eḍighi ni ịdi yira kọkiom ghisigh ogbeelhom iiḅi ịinhaghan phọ r’oophugh, kụ ogbon mem dị “elhiom eḍighinhom ịyaar r’elhiom ọoruen” keepaany sịen ade phọ.—Isa. 9:7.
ẠḌUOR PHỌ 158 “It Will Not Be Late!”
a Monme iniin asiḍien.
b Mịin kẹn aḍipum A ẹkpigh phọ 24-27 sịphe abrosọ phọ Pomhoghiạn We—Aḍighi Bidị Bumatuạn.