Ḍighinhom Agey ‘Inmo Phọ Ẹnhaan Ẹngo Bọ’ Nyịnha

Yira rọkelhom ghan ni ọkparamhi phọ yira rọmoogh ghan bọ mem dị yira ooḅughonhaan r’abumor r’abumaranhi phọ ayira. Kụolo ọkparamhi oniin atum nyoniin epelhom ni ooḅughonhaan. Ịikpo phọ yira ọmhoogh bọ ọkparamhi oniin atum nyoniin, ạ Bạịbul phọ akol mọ inmo Ẹnhaan. (Rom 1:11, 12) Ika nụun kụ edi yira kotue bọ oḍighinhom agey inmo phọ ịphen phọ?

Ḅạ ghan ikpo ọnhu ọkparamhi. Esi ọmaam, mem dị yira rọpagharanhaan ḍipuru otu ịtuugha, ọphagharanhaan phọ ayira kúgbon loor ayira. Kụolo agbon a Jehova, Ekpo Ọnhu phọ ọdi, ḅịlhe r’abumor r’abumaranhi phọ. Mem dị yira rọkaaphan r’abumor r’abumaranhi phọ, ạraghaaph phọ ayira eḍighi ghan rạghaaph dị kẹlogh bịdi r’ayira epophe.

Kpạramhi bụnhon esi osopha phọ r’iḍighinhom ạraraar phọ ạna. Esi ọmaam, abuniin abumor r’abumaranhi mosopha ọghiom aghisigh rukumuan oomo amem mọ ạbidi etigheri ịpaanhaan dị bịdi osoman. Ạbunhon abumor r’abumaranhi rotu ghan ni ịtuugha ogbo a wiki phọ ghạlhamo r’ịduon aloor ạbidi redugh ghan bọ ni mem dị bịdi origheel oḍighi. Abuniin rọkparam ghan ni koru ịtuugha ogbo a wiki phọ ghạlhamo r’émoon phọ ạbidi.

Ikpo ọnhu phọ r’iḍighinhom ạraraar phọ ạna rẹkparamhi ghan ni bumor r’abumaranhi phọ ạna ḍughum? Nạ rạlogh ghan ni elhegh reten dị ikpo ọnhu r’iḍighinhom ạraraar phọ ạbidi ketue ẹkparamhi aani nyịnha ḍụghum?