2 Sanmyèl

24 Mèfibochèf, ti ich Sòl, té alé jwenn wa-a tou. Mèfibochèf pa té lavé pyé’y, i pa té koupé bab li, èk i pa té lavé had-la ki té asou’y-la dépi jou-a wa David té kité, pou jis jou-a i witounen an lapé. 25 Lè’y alé Jérouzalèm pou jwenn wa-a, wa-a di’y: “Mèfibochèf, pouki ou pa té alé épi mwen?” 26 Mèfibochèf wéponn li: “Senyè mwen, wa mwen-an, sèvant mwen té kwennen mwen. Paski mwen enfim, mwen té di’y ‘Pwépawé bouwik mwen ban mwen pou mwen alé épi wa-a.’ 27 Mé senyè mwen, sèvant mwen manti asou mwen ba’w. Kanmenm wa mwen, ou menm kon on nanj Dyé vwé-a. Konsa, fè sa’w wè ki bon. 28 Ou té ni dwa-a pou tjwé tout moun an lafanmi papa mwen, mé ou mété mwen manjé anpami moun ki ka manjé asou tab ou. Alò, ki dwa mwen ni pou mandé wa-a pyès lòt favè?” 29 Mé wa-a di’y: “Pouki ou ka kontiné palé kon sa? Mwen ja désidé ou èk Zayba kay sépawé tè-a.” 30 Lè sala Mèfibochèf di wa-a: “I sa pwan tout pou kò’y, paski senyè mwen, wa mwen-an, ja witounen lakay li an lapé.”