Ègzodòs
12 Mi sé sa Jéhova té di Moziz èk Éronn pandan yo té an péyi Éjip: 2 “Mwa sala sé koumansman sé mwa-a pou zòt. i kay pwèmyé mwa nanné-a pou zò. 3 Palé épi tout pèp Izwayèl, èk di yo, ‘Asou dizyenm «10yenm» jou mwa sala, zò sipozé pwan on mouton hòd mouton papa zò. Yon mouton pou chak kay. 4 Mé si lafanmi-a twò piti pou manjé tout mouton-an, yo sipozé sépawé’y épi vwézinaj yo ki pli pwé yo, akòdans kantité moun ki la. Èk détèminé konmen chak moun sa manjé an mouton-an. 5 Mouton zò dwé yonn ki pa ni pyès défo. Ou pé chwazi yonn anpanmi sé jenn bélyé mouton-an èben sé kabwit-la. 6 Zò ni pou swen’y jislè katòzyenm jou-a an mwa sala wivé. Épi tout pèp Izwayèl dwé twé’y lè sòlèy ka kouché mé avan nwèsè wivé. 7 Zò ni pou pwan adan san’y èk pasé’y asou kay zò, anho lapòt-la an kay-la zò kay manjé zannimo-a. 8 “‘Zò dwé manjé vyan-la asou swè sala. Zò sipozé woti’y asou difé-a èk manjé’y épi pen ki pa ni lèlven, épi fèy anmè. 9 Pa manjé vyan-la si i kwi, si i bouyi èben si i twit a glo, mé pito woti’y asou difé-a, tèt li épi janm li épi boyo’y. 10 Pa tjenn anyen an vyan sala pou denmen bonmaten, mé si la ni lawèstan li denmen bonmaten, zòt dwé bwilé épi difé. 11 Mi mannyè zòt sipozé manjé’y; épi wen zòt byen mawé, épi sandal zòt asou pyé zòt, épi baton zòt an lanmen zòt; èk zòt sipozé manjé’y pwésé. Sa sé fèt Pasova Jéhova. 12 Mwen kay pasé an péyi Éjip swè sala èk mwen kay tjwé tout pwèmyé piti an péyi Éjip, ni moun ni bèt. Èk mwen kay pasé jijman asou tout dyé Éjip. Mwen sé Jéhova. 13 San-an kay sèvi kon on sin asou kay zòt koté zòt yé-a, èk lè mwen wè san-an, mwen kay pasé kay zòt dwèt. Èk plèg-la pa kay détwi zòt lè mwen fwapé péyi Éjip. 14 “‘Jou sala kay vini on jou pou zòt toujou chonjé. Èk zòt ni pou sélébwé’y kon on fèt pou Jéhova jennéwasyon apwé jennéwasyon. Sa sé on koumandman zòt sipozé tjenn pou tout tan. 15 Pou sèt jou, zò sipozé manjé pen ki pa ni lèlven. Asou pwèmyé jou-a, zòt ni pou tiwé pen ki ni lèlven an kay zò. Si népòt moun manjé pen ki ni lèlven népòt lè diwan pwèmyé pou sètèyem jou-a, zòt ni pou tiwé moun sala hòd Izwayèl. 16 Asou pwèmyé jou-a, zòt kay ni on konvansyon sen. Èk asou sètyenm jou-a, zòt kay ni on lòt konvansyon sen. Zòt pa sipozé fè twavay asou sé jou sala. Mé zòt sa pwépawé sa zòt bizwen pou manjé sèlman. 17 “‘Zòt dwé tjenn Fèt Pen San Lèlven-lan, paski sé asou jou sala mwen kay fè zòt sòti an péyi Éjip. Èk zòt dwé sélébwé jou sala pou jennéwasyon apwé jennéwasyon. Sa sé on koumandman pou tout tan. 18 An pwèmyé mwa-a, an swè-a asou katòzyenm «14yenm» jou mwa sala, pou alé swè-a venenyenm «21yenm» jou-a, zòt dwé manjé pen san lèlven. 19 Zò pa sipozé ni pen ki ni lèlven an kay zòt pou sèt jou. Si népòt moun manjé pen ki ni lèlven, menm si i sé on étwanjé èben on moun ki fèt an péyi-a, zòt ni pou tiwé moun sala hòd pèp Izwayèl. 20 Zòt pa dwé manjé anyen ki ni lèlven adan’y. Sé pen ki pa ni lèlven zòt dwé manjé an kay zòt.’”