Ègzodòs
19 Twa mwa apwé Jan Izwayèl sòti an péyi Éjip, asou menm jou-a yo té sòti-a, yo wivé an savann sèk-la an Saynay. 2 Yo té kité Rèfidim èk yo antwé an savann sèk-la an Saynay. Yo fè tant yo an savann sèk-la, douvan montany-lan. 3 Alè sa-a Moziz alé oti Dyé Vwé-a. Èk vwa Jéhova sòti hòd montany-la èk di’y: “Mi sé sa ou ni pou di lafanmi Jakòb èk sé Izwayèlayt-la, 4 ‘Zò ja wè pou kò zòt menm, sa mwen té fè sé Éjipsyen-an pou mwen sa pòté zòt asou zèl yon lèg, pou mennen zòt oti mwen. 5 Konsa, si zòt obéyi tout sa mwen di èk tjenn agwéman mwen; sètenman, zòt kay vini on byen spésyal pou mwen, on byen mwen tiwé hòd tout sé pèp-la an latè-a, paski tout latè-a sé sa mwen. 6 Zòt kay vini on wéyòm di pwèt pou mwen, èvèk on nasyon ki sen pou mwen.’ Sé sa ou ni pou di sé Izwayèlayt-la.” 7 Alò, Moziz kiyé sé ansyen-an anpami sé pèp-la pou di yo tout sa Jéhova té koumandé’y. 8 Apwé Moziz di yo tout sa, sé pèp-la wéponn épi yon vwa èk di: “Nou dakò pou fè tout sa Jéhova di.” La menm Moziz di Jéhova wépons sé pèp-la. 9 Konsa, Jéhova di Moziz: “Tann sa! Mwen ka vini oti’w an yon nwaj ki nwè, pou sé pèp-la sa tann mwen lè mwen ka palé épi’w. Pou yo sa toujou ni konfyans an ou tou.” Apwé sa, Moziz di sé pèp-la tout sa Jéhova té di. 10 Apwé, Jéhova di Moziz: “Alé oti sé pèp-la èk piwifyé yo jòdi èk denmen. Yo dwé lavé had yo. 11 Yo dwé pawé pou twazyenm «3yenm» jou-a. Paski asou twazyenm «3yenm» jou sala, Jéhova kay désann Mòn Saynay douvan tout sé pèp-la. 12 Ou dwé mété yon bòn owon montany-lan pou sé pèp-la èk di yo, ‘Pwan pwokosyon èk pa mouté montany-lan èben pasé sé bòn-an. Népòt moun ki mété pyé yo asou montany-lan kay mò. 13 Pyèsonn pa sipozé manyen moun sala, mé pito zòt sipozé fouté’y koul wòch èben pèsé’y. Ki i sé yon bèt ki i sé yon moun, i dwé mò.’ Mé lè yo tann son kòn-la, yo sa apwoché montany-lan.” 14 Apwé sa, Moziz désann montany-lan èk i koumansé piwifyé sé pèp-la, épi yo lavé sé had yo-a. 15 Moziz di sé pèp-la: “Sé pou zòt pwépawé pou twazyenm «3yenm» jou-a. Sé pou zòt pa ni pyès wilasyon sèksyouwal.” 16 Asou bonmaten-an twazyenm «3yenm» jou-a, la té ni lowaj èk zéklè. Èk nwaj té kouvè montany-lan, èk moun té ka tann son kòn-la ki té byen fò. Èk tout sé pèp-la koumansé twanblé. 17 Atjwèlman, Moziz mennen sé pèp-la dèwò kanp-la, pou yo sa jwenn Dyé Vwé-a. Konsa, yo pwan plas yo an pyé montany-lan. 18 Mòn Saynay koumansé ni lafimen toupatou asou’y, paski Jéhova té désann asou mòn-an épi difé. Mòn-la koumansé fè lafimen kon lafimen ki ka sòti yon fou yo fè épi bwik. Èk tout montany-lan té ka soukwé anpil. 19 Kon son kòn-la ka vini pli èk pli fò, Moziz tè ka palé èk moun té ka tann vwa Dyé Vwé-a ka wéponn li.