Livitikòs
16 Jéhova té palé épi Moziz apwé lanmò sé dé «2» gason Éronn-la, ki té mò paski yo té apwoché Jéhova adan on mannyè ki pa té bon. 2 Mi sé sa Jéhova di Moziz: “Di fwè’w Éronn, pa anni antwé plas-la ki sen-an, ki apwé wido-a, douvan kouvèti Ak-la, népòt lè i vlé, pou i pa mò. Mwen kay pawèt anho kouvèti-a adan on nwaj. 3 “Mi sé sa Éronn sipozé mennen lè i vini an plas-la ki sen-an. Yon jenn towo bèf pou an ofwan pou péché. Èvèk yon mal kabwit pou an ofwan bwilé. 4 I sipozé mété asou’y, gòl linenn-lan ki sen-an épi kalson linenn-lan sipozé kouvè kò’y. Èk i sipozé mawé wen’y épi linenn èk osi, i ni pou mawé tèt-li épi on mouchwè. Sé bagay sala sé had ki sen. Éronn kay ni pou benyen an glo èk apwé mété had sen-an asou’y. 5 “I ni pou pwan dé «2» jenn mal kabwit an lanmen jan Izwayèl, pou an ofwan péché, èk yonn «1» bélyé an lanmen yo, pou an ofwan bwilé. 6 “Éronn dwé pwézanté towo bèf-la pou ofwan péché-a. Sa sé pou péché’y. Èk i ké mandé pawdonnasyon pou kò’y menm èk pou moun an kay li. 7 “Apwé sa, i ké pwan sé dé kabwit-la, èk mennen yo douvan Jéhova, an pa lapòt tant mitin-lan. 8 Éronn ké mandé Jéhova pou diwèksyon konsèné sé dé «2» kabwit-la pou’y sa konnèt kilès pou Jéhova èk kilès pou Azazèl. 9 Éronn ké sèvi kabwit-la pou Jéhova kon ofwan-an pou péché. 10 Mé, mi sé sa i ni pou fè épi kabwit-la pou Azazèl. i ni pou mennen kabwit-la, vivan, douvan Jéhova èk i ni pou mandé pawdonnasyon pou péché yo. Apwé sa, i ni pou voyé kabwit-sala alé, an savann syèk-la pou Azazèl. 11 “Éronn dwé pwézanté towo bèf-la pou ofwan-an pou péché-a. Sa sé pou péché’y. Èk i ké mandé pawdonnasyon pou kò’y menm èk pou moun an kay li. Apwé sa, i ké tjwé bèf-la pou ofwan péché-a. Sa sé pou péché’y. 12 “Èk bagay-la yo ka sèvi pou pòté chèbon difé-a, i ké pwan’y hòd lotèl-la ki douvan Jéhova, èk plen’y. Osi i ké pwan dé «2» ponyen lansan-an ki ka santi bon-an, èk i ké mennen yo a plas-la ki sen-an, dèyè wido-a. 13 Osi, i ké mété lansan asou difé-a douvan Jéhova. Épi lafimen lansan-an ké kouvè kouvèti Ak-la ki ni Témwéyaj-la. Konsa, i pa kay mò. 14 “I ké pwan adan san towo bèf-la èk sèvi dwèt li pou simen’y douvan kouvèti ak-la asou lanmen lès-la. Èvèk i ké sèvi dwèt li pou simen adan san-an douvan kouvèti ak-la. i ké fè sa sèt fwa. 15 “Apwé sa, i ké tjwé kabwit-la pou ofwan-an pou péché-a. Sa sé pou péché sé pèp-la. Èk i ké mennen san kabwit-la adidan plas-la ki sen-an èvèk i ké fè menm bagay-la i té fè-a épi san bèf-la. i ni pou simen’y an diwèksyon kouvèti ak-la èk osi douvan kouvèti ak-la. 16 “I dwé piwifyé plas-la ki sen-an pou lapéti tout sa jan Izwayèl té fè ki pa té pwòp, pou tout pasdwa yo èk pou tout péché yo. Sé sa i ni pou fè épi tant mitin-lan ki an mitan yo menm, ki an mitan sé bagay-la yo ka fè-a ki pa pwòp. 17 “Dépi i antwé pou’y sa piwifyé plas-la ki sen-an, jis lè i sòti; la pa sipozé ni pyèsonn an tant mitin-lan. i ké mandé pou pawdonnasyon pou kò’y menm, pou tout moun ki an kay li èk pou tout pèp Izwayèl.