Livitikòs
26 “‘Zòt pa dwé fè ni idòl, ni imaj ni poto ki sen pou kò zòt. Èk zòt pa dwé mété imaj ki fèt épi wòch an péyi zòt pou zòt adowé’y. Paski mwen sé Jéhova Dyé zòt. 3 “‘Si zòt kontiné maché silon lwa mwen èk zòt tjenn koumandman mwen èk obéyi yo, 4 mwen kay fè lapli tonbé a bon lè-a. Èk tè-a kay pwodwi wékòt li, èk sé pyé bwa-a kay pòté fwi. 5 Zòt kay ni bèl wékòt. Padan zòt ka bat gwenn, sézon-an pou wékòlté wézen kay wivé, èk padan zòt ka wékòlté wézen, sézon-an pou simen gwenn kay wivé. Zòt kay manjé pen jistan bouden zòt wèd, èk zòt kay viv an sikyòrité an péyi zòt. 6 Mwen kay mété lapé an péyi-a, épi zòt kay kouché èk pyèsonn pa kay fè zòt pè. Osi mwen kay tiwé tout bèt sovay ki an péyi-a, èk pyès lèlmi pa kay ataké péyi zòt. 16 Mwen menm, kay fè’w sé bagay sala: Mwen kay fè’w soufè épi TiBi (tuberculosis) èk gwo lafyèv, zyé’w kay vini toub èk lavi’w kay fini anyen. Ou kay planté jaden’w pou anyen, paski lèlmi’w kay manjé sa’w planté. 18 Si zòt pa kouté mwen magwé tout sa mwen di zòt, mwen kay ni pou pini zòt sèt fwa plis toujou pou péché zòt. 19 Mwen kay kwazé vyé lògèy sala zòt ni-an ki ka fè zòt antété, mwen kay fè syèl-la vini menm kon fè pou zòt èk mwen kay fè tè-a vini menm kon tjwiv pou zòt. 20 Zòt kay sèvi tout kouway zòt pou anyen, paski tè-a pa kay pòté èk sé pyé bwa-a ki an péyi-a pa kay bay fwi. 21 Mé si zòt kontiné twavay kont mwen èk zòt wifizé kouté mwen, mwen kay ni pou fwapé zòt sèt fwa plis toujou silon péché zòt. 22 Mwen kay voyé bèt féwòs ki an savann-nan anpami zòt. Èk yo kay tjwé ich zòt, yo kay manjé zannimo zòt, yo kay fè zòt ni mwens moun an nasyon-an, èk chimen zòt kay vid. 23 Si zòt pa kowijé magwé mwen fè zòt tout sa, èk zòt kontiné twavay kont mwen, 24 ében mwen menm kay twavay kont zòt osi, èk mwen kay fwapé zòt sèt fwa pou péché zòt. 25 Mwen kay fè lèlmi zòt ataké zòt épi sab paski zòt pa tjenn agwéman-an mwen té fè épi zòt-la. 26 Lè mwen détwi wézèv manjé zòt, dis fanm kay fè pen bay zòt adan yon sèl fou èk yo kay ni pou pézé kantité pen yo kay bay chak moun. Zòt kay manjé mé zòt pa kay satisfè. 27 Si zòt pa kouté mwen èk zòt kontiné twavay kont mwen, magwé mwen fè zòt tout sa, 28 mwen kay twavay kont zòt anho limit èk mwen kay ni pou pini zòt sèt fwa plis toujou pou péché zòt. 29 Lè sala zòt kay ni pou manjé lachè sé gason zòt-la, èk zòt kay manjé lachè sé fi zòt-la. 30 Mwen kay détwi koté zòt ka adowé sé fo dyé zòt-la, mwen kay kwazé koté zòt ka bwilé lansan zòt, èk mwen kay mété tout kadav zòt asou pil-la mwen té fè-a épi sé vyé idòl zòt-la ki pa ni lavi. Apwé sa, mwen kay tounen do mwen asou zòt paski zòt ban mwen dégou. 31 Mwen kay livwé sé vil zòt-la an lanmen lèlmi zòt pou yo détwi zòt, mwen kay fè koté zòt ka adowé sé fo dyé zòt-la vin vid, èk bon lòdè sé sakwifis zòt-la pa kay fè mwen plézi. 32 Mwen menm kay fè péyi zòt vini vid, èk lèlmi zòt ki an plas-la kay wèsté bouch gwan ouvè lè yo wè sa mwen fè-a. 33 Èk mwen kay simen zòt anpami sé nasyon-an èk mwen kay fè lèlmi zòt ataké zòt épi sab. Péyi zòt kay vini vid èk yo kay détwi tout vil zòt-la nèt.