Limowo
1 Èk Jéhova palé bay Moziz an dézè Saynay, an tant mitin-lan, pwèmyé jou an dézyenm «2yenm» mwa-a, an dézyenm «2yenm» lanné-a apwé yo sòti an péyi Éjip. I di’y: 2 “Konté tout moun an nasyon Izwayèl. Konté yo chak silon fanmi yo, silon fanmi papa yo, silon non tout nonm ki an nasyon-an. 3 Ou èvèk Éronn sipozé anwéjistwé tout nonm ki ven «20» lanné èben pli, ki sa wann sèvis an gwoup yo an lawmé Izwayèl. 4 “Pwan yon nonm an chak lafanmi; fè asiwé nonm sala sé chèf-la an fanmi papa’y. 5 Mi non sé nonm-lan ki kay édé zòt: an lafanmi Roubenn, zòt kay pwan Èlizou, gason Chèdiyou; 6 an lafanmi Siméyon, zòt kay pwan Chèloumiyèl, gason Zourichaday; 7 an lafanmi Jouda, zòt kay pwan Nachòn, gason Aminadab; 8 an lafanmi Isaka, zòt kay pwan Nèfannèl, gason Zouwa; 9 an lafanmi Zèbyoulonn, zòt kay pwan Ilayab, gason Hilonn; 10 anpami sé gason Jozèf-la: an lafanmi Ifrém, zòt kay pwan Ilichama, gason Anmayhoud; an lafanmi Mannasa, zòt kay pwan Ganmalyèl, gason Pidazou; 11 an lafanmi Bennjamin, zòt kay pwan Abidann, gason Gidiyonay; 12 an lafanmi Dann, zòt kay pwan Anhayiza, gason Anmichaday; 13 an lafanmi Achè, zòt kay pwan Pégiyèl, gason Òkrann; 14 an lafanmi Gad, zòt kay pwan Ilayasaf, gason Douwèl; 15 an lafanmi Naftalay, zòt kay pwan Anhayra, gason Inann. 16 Sa sé sé nonm-lan yo chwazi anpami pèp-la. Yo sé chèf an lafanmi papa yo, yo sé tèt sé gwoup-la ki ni yon mil «1,000» moun adan yo an Izwayèl.” 17 Lè yo fin bay non sé nonm-lan yo chwazi-a Moziz èk Éronn pwan yo. 18 Yo asanblé tout sé moun-nan pwèmyé jou an dézyenm «2yenm» mwa-a, pou yo sa anwéjistwé chak moun pa non yo, pa fanmi yo, èk pa fanmi papa yo. Yo anwéjistwé tout sa ki té ven «20» lanné èben pli, 19 menm kon Jéhova té konmandé Moziz. Kon sa, Moziz anwéjistwé yo an dézè Saynay.