Limowo
18 Jéhova kontiné di Éronn: “Ou épi sé gason’w-lan èk moun an fanmi papa’w ki ansanm épi’w kay péyé pou népòt péché moun fè kont tabènak-la. Épi ou èk sé gason’w-lan kay péyé pou népòt péché moun fè kont sèvis zòt kon pwèt. 2 Osi, fè sé fwè’w-la ki an lafanmi Livay, ayèl ou, vini ansanm épi’w, pou wann sèvis épi’w èk sé gason’w-lan douvan tant-la ki ni Bwèt Agwéman-an andidan’y. 3 Yo dwé fè twavay-la yo ni pou fè, ni pou ou ni pou tout tant-lan. Kanmenm, yo pa dwé vini pwé sé vésèl-la ki an plas sen-an èk lotèl-la, pou ni yo ni ou menm pa mò. 4 Yo kay vini jwenn ou pou yo fè tout sa yo sipozé fè lè’y vini pou tant mitin-lan èk tout sèvis tant-lan. Èvèk népòt moun ki pa ni dwa-a pou fè sé twavay sala pa sipozé vini pwé zòt. 5 Zòt dwé fè tout sa zòt ni pou fè lè’y vini pou plas sen-an épi lotèl-la, pou Bondyé pa vini faché kont jan Izwayèl ankò. 6 Sé mwen menm ki chwazi sé fwè’w-la, sé Livayt-la, anpami jan Izwayèl kon an kado pou zòt. Mwen Jéhova mété yo apa pou mwen, pou yo sa wann sèvis an tant mitin-lan. 7 Ou èk sé gason’w-lan wèskonsab pou sé twavay pwèt-la lè’y vini pou sèvis lotèl-la épi sèvis ki ni pou fèt dèyè wido-a. Sé zòt ki ni pou wann sèvis sala. Sèvis-la zòt ka wann kon pwèt sé yon kado mwen bay zòt. Èvèk népòt moun ki pa ni dwa-a pou fè sé twavay sala ki vini pwé zòt, sipozé mò.” 8 Jéhova kontiné di Éronn: “Sé mwen menm ki mété’w wèskonsab sé kontwibisyon-an yo ka ba mwen. Mwen ja ba ou èk sé gason’w-lan an pòsyon an tout sé kontwibisyon sen-an jan Izwayèl ba mwen, kon pòsyon zòt pou tout tan. 9 Sa kay sa ou anpami tout sé bagay sen-an yo mennen ba mwen, sé bagay-la yo bwilé an difé. Ou kay ni an pòsyon an chak sakwifis yo fè, tèl kon lè yo ofè gwenn, sakwifis péché èk sakwifis yo fè si yo koupab. Sa sé kéchòy ki sen an pil pou ou èk sé gason’w-lan. 10 Ou sipozé manjé pòsyon’w adan an plas ki sen an pil. Chak gason sipozé manjé’y. Sa kay kéchòy ki sen pou ou. 11 Sé kado-a sé jan Izwayèl-la bay, ansanm épi tout sé sakwifis-la pwèt-la pasé douvan Bondyé sé sa ou osi. Mwen ja ba ou, sé gason’w-lan èk sé fi’w-la sé bagay sala kon pòsyon zòt pou tout tan. Sé sèlman sé moun-lan ki nèt an kay ou ki sipozé manjé’y. 12 “Pwèmyé wékòt-la yo bay Jéhova an tout pli bon kalité lwil, èk tout pli bon kalité diven, èk gwenn, mwen ka ba ou. 13 Sé pwèmyé fwi-a ki mi yo pòté bay Jéhova, an tout sa yo ni an péyi yo, kay vini sa ou. Sé sèlman sé moun-lan ki nèt an kay ou ki sipozé manjé’y. 19 Mwen kay toujou ba ni ou ni sé gason’w-lan ni sé fi’w-la, yon pòsyon an tout sé kontwibyousyon sen-an pèp Izwayèl kay bay Jéhova. I sé an agwéman di sèl ki kay diwé pou tout tan douvan Jéhova, pou ou èk jennéwasyon’w.” 26 “Ou dwé di sé Livayt-la: ‘Zòt kay wisouvwè hòd jan Izwayèl dis pousan «10%» an tout sa yo ni. Sé sa mwen ja bay zòt kon yon éwitaj hòd yo. Èk zòt sipozé bay dis pousan «10%» an sa zòt wisouvwè-a, kon yon kontwibyousyon pou Jéhova. 27 Mwen kay konsidiwé sa kon kontwibyousyon zòt. Sé konmsi zòt ka bay gwenn zòt vanné, tout diven zòt pwodwi, ében tout lwil zòt pwodwi. 28 An mannyè sala zòt kay bay Jéhova on kontwibyousyon hòd tout sé dis pousan-an «10%» zòt wisouvwè hòd jan Izwayèl. Èvèk zòt ni pou bay Éronn pwèt-la, kontwibyousyon-an zòt tiwé pou Jéhova. 29 Zòt kay pwan sa ki pli bon an tout sa yo bay zòt kon an bagay ki sen, pou zòt fè tout kalité lofwann bay Jéhova.’