Limowo
20 An pwèmyé mwa-a tout pèp Izwayèl wivé an tè sèk Zin, épi sé moun-lan koumansé wèsté Kédèsh. Sé la Miriyanm mò èk sé la yo téwé’y. 2 Konsa, paski la pa té ni dlo pou pèp Izwayèl bwè, yo sanblé kont Moziz èk Éronn. 3 Sé moun-lan koumansé babyé épi Moziz, yo di: “Simyé nou té mò lè sé fwè nou-an mò douvan Jéhova! 4 Pouki zòt mennen pèp Jéhova an tè sèk sala pou nou èk zannimo nou mò isi-a? 5 Èk pouki zòt fè nou kité péyi Éjip pou mennen nou an vyé plas sala? La pa ni plas pou fè jaden, pou nou planté fig fwans, wézen, èk gwinad. Osi la pa ni dlo pou nou bwè.” 6 Lè sala Moziz èk Éronn sòti douvan pèp Izwayèl épi yo antwé an tant mitin-lan. Yo ladjé kò yo fas atè, èk laglwa Jéhova koumansé pawèt douvan yo. 7 Apwé sa Jéhova di Moziz: 8 “Pwan baton-an, èk ou épi fwè’w Éronn asanblé pèp Izwayèl. Sé pou zòt palé bay kayè-a douvan yo, pou dlo sòti adan’y. Zòt kay fè dlo sòti an kayè-a pou bay ni pèp Izwayèl ni zannimo yo dlo pou bwè.” 9 Konsa, Moziz pwan baton-an douvan Jéhova, menm kon Bondyé té koumande’y. 10 Apwé sa Moziz épi Éronn sanblé pèp Izwayèl douvan kayè-a èk Moziz di yo: “Kouté, débann wébèl! Ès sé an kayè sala nou ni pou fè dlo sòti bay zòt?” 11 Alò, Moziz lévé lanmen’y anlè épi i fwapé kayè-a dé fwa épi baton’y. An chay dlo koumansé sòti, épi pèp Izwayèl èk sé zannimo yo-a koumansé bwè dlo. 12 Pli ta Jéhova di Moziz èk Éronn: “Paski zòt pa té moutwé lafwa an mwen épi sanngtifyé mwen douvan pèp Izwayèl, zòt pa kay mennen yo an péyi-a mwen kay ba yo-a.” 13 Dlo sala sé dlo Mèriba, koté pèp Izwayèl té babyé épi Jéhova. Sé lè sala i té moutwé yo i sé an Dyé ki sen. 23 Padan yo té asou Mòn Hò tou pwé bòdaj péyi Idonm, Jéhova di Moziz èk Éronn: 24 “Éronn kay mò. I pa kay antwé an péyi-a mwen té pwonmèt jan Izwayèl, paski zòt toulédé-a té dézobéyi lòd mwen konsèné dlo Mèriba-a. 25 Pwan Éronn èk gason’y Éliyéza èk mouté Mòn Hò épi yo. 26 Tiwé had pwèt-la asou Éronn èk mété’y asou Éliyéza gason’y, épi sé la Éronn kay mò.” 27 Konsa Moziz fè ègzaktiman sa Jéhova té konmandé’y pou fè. Èk yo mouté Mòn Hò douvan tout jan Izwayèl.