Limowo
11 Lè sala Balak di Balanm: “Ki sa ou fè mwen-an? Mwen mennen’w la pou’w mété modisyon asou lèlmi mwen, mé ou benni yo pito.” 12 Balanm wéponn li: “Ès mwen pa sipozé di népòt pawòl Jéhova mété an bouch mwen?” 13 Épi Balak di’y: “Tanpwi souplé, vini épi mwen adan a lòt plas koté ou sa wè jan Izwayèl. Sé sèlman yon pa adan yo ou kay wè; ou pa kay wè yo tout. Mété yon modisyon asou yo padan ou an plas sala.” 14 Konsa, Balak pwan Balanm épi l mennen’y an savann Zofim, asou tèt mòn Pisga. Balak bati sèt lotèl, épi l ofè yon towo bèf èk yon bélyé mouton asou chak lotèl. 15 Konsa, Balanm di Balak: “Wèsté la bò sakwifis bwilé’w padan mwen palé épi Bondyé asou lòt fasad-la.” 16 Alò, Jéhova palé épi Balanm. Mi sé sa l di’y: “Viwé jwenn Balak, épi mi sé sa pou ou di’y.” 17 Konsa, Balanm viwé, èk Balak té ka èspéwé’y bò sakwifis bwilé’y èk sé pwens Mowab-la té la épi’y. Balak mandé’y: “Ki sa Jéhova di?” 18 Lè sala Balanm bay konmisyon-an, l di’y: “Lévé Balak èk kouté. Tann sa mwen ka di’w, ou gason Zipò. 19 Bondyé sé pa yon nonm ki ka manti, èk l pa yon gason lézòm ki ka chanjé lidé’y. Lè l di kéchòy, ès l pa ka fè’y? Lè l palé, ès l pa ka fè sa l di? 20 Mi! Sé benni mwen sa benni; Bondyé ja benni pèp li, mwen pa sa chanjé sa. 21 l pa ka kité pyèsyonn sèvi tjenbwa kont Jakòb, èk l pa ka pèwmité pyèsyonn pou bay pèp Izwayèl pwòblenm. Jéhova, Bondyé Jakòb, la épi yo. Épi pèp Izwayèl ka fè moun konnèt Bondyé sé Wa yo. 22 Sé Bondyé ki ka tiwé yo hòd péyi Éjip. l menm kon kòn yon towo bèf mawon pou pèp Izwayèl. 23 La pa ni pyès cham ki sa tonbé asou Jakòb, èk la pa ni pyès maji ki sa tonbé asou pèp Izwayèl. Lè sala moun kay di konsèné Jakòb èk Izwayèl: ‘Gadé sa Bondyé ja fè!’ 24 Mi yon pèp ki kay lévé doubout menm kon yon lyon, épi menm kon lyon-an, l kay lévé doubout pa kò’y. Tout tan l pa manjé sa l tjenbé, épi bwè san sa l tjwé, l pa kay kouché.” 25 Lè sala Balak di Balanm: “Si ou pa sa mété modisyon asou yo, ou pa sipozé benni yo nonplis.” 26 Konsa Balanm wéponn Balak: “Ès mwen pa té di’w, ‘Mwen kay fè tout sa Jéhova di mwen pou fè’?”