Limowo
25 Lè jan Izwayèl té ka wèsté an Chitim, yo koumansé fè imowalité sèksyouwal épi sé fi Mowab-la. 2 Sé fanm Mowab-la té envité jan Izwayèl pou patisipé an sé sakwifis-la yo té ka tjenn pou sé fo dyé yo-a. Èk jan Izwayèl koumansé manjé an sé sakwifis yo-a, èk yo koumansé adowé sé fo dyé yo-a. 3 Alò, jan Izwayèl koumansé adowé Bal ki an Piyon, èk Jéhova té vini faché an pil épi pèp li. 4 Jéhova di Moziz: “Pwan tout sé chèf pèp-la èk pann yo douvan Jéhova gwan lajouné, pou kòlè Jéhova bésé kont jan Izwayèl.” 5 Apwé sa, Moziz di sé jij Izwayèl-la: “Zòt chak sipozé tjwé sé nonm-lan ki alé adowé Bal ki an Piyon.” 6 Menm lè sala, yonn an sé nonm Izwayèl-la té ka mennen an fanm Midiyonnayt douvan zyé Moziz èk douvan zyé tout sé pèp Izwayèl-la, padan yo té ka pléwé douvan tant mitin-lan. 7 Lè Finiyas, gason Éliyéza ki sé gason Éronn pwèt-la wè sa ki té ka fèt, san pèdi tan, i doubout an mitan pèp-la èk i pwan an pitjèt fè. 8 Èvèk i alé dèyè nonm Izwayèl-la an tant-la èk i pèsé yo toulé dé épi pitjèt fè-a, pitjèt fè-a antwé kò ni nonm Izwayèl-la ni fanm Midiyonnayt-lan an plas pwivé yo. La menm, malédiksyon-an ki té tonbé asou jan Izwayèl doubout. 9 Ven kat mil «24,000» moun mò akòz di malédiksyon-an ki té tonbé asou jan Izwayèl. 10 Apwé sa Jéhova di Moziz: 11 “Finiyas, gason Éliyéza ki sé gason Éronn pwèt-la fè kòlè mwen bésé kont jan Izwayèl, paski i pa té tolowé pyès fo adowasyon anpanmi zòt. Alò mwen pa té détwi jan Izwayèl, paski mwen vlé moun adowé mwen sèlman. 12 Alò, di yo: ‘Mwen ka fè yon agwéman lapé épi Finiyas. 13 Agwéman sala kay pèwmité li menm, èvèk désandan’y pou wann sèvis kon pwèt pou an pil tan. Paski i té zélé pou Bondyé’y, èvèk i fè jan Izwayèl twapé padonnasyon pou péché yo.’” 14 Nonm-lan Finiyas té tjwé-a ansanm épi fanm Midiyonnayt-lan sété Zimray. I sété gason Sélou. Sélou té yon chèf an lafanmi Siméyon. 15 Non fanm Midiyonnayt-lan yo té tjwé-a sété Kòzbay fi Zo. Zo sété yon chèf an sé gwoup-la an fanmi Midiyonn. 16 Apwé sa Jéhova palé épi Moziz, i di’y: 17 “Ataké sé jan Midiyonn-lan èk tjwé yo. 18 Paski yo té ka wann jan Izwayèl minab lè yo té ésésyé kwennen zòt an zafè Piyon-an èk Kòzbay. Kòzbay sété fi chèf Midiyonn-lan, sésé yo. Finiyas té tjwé’y jou-a Bondyé té mennen malédiksyon asou pèp li pou lapéti sa ki té fèt an Piyon.”