Limowo
30 Apwé sa Moziz palé épi sé chèf-la an lafanmi Izwayèl, épi i di yo: “Mi sé sa Jéhova konmandé: 2 Si an nonm fè yon pwonmèt bay Jéhova ében i sèmanté pou fè èben pa fè an bagay, i dwé tjenn pawòl li. I dwé fè tout sa i té pwonmèt pou fè. 3 “Épi si an jenn fi ki ka viv an kay papa’y fè yon pwonmèt bay Jéhova, ében i sèwmanté pou fè èben pa fè an bagay, 4 si papa’y tann pwonmèt li ében sèman’y, épi papa-a pa di anyen, fi sala sipozé tjenn pwonmèt li épi sa i té sèmanté pou fè èben pa fè. 5 Mé si papa’y pa dakò épi’y lè’ y tann pwonmèt-la i té fè-a, ében sa i sèmanté pou fè èben pa fè-a, fi sala pa kay ni pou tjenn pwonmèt li. Jéhova kay pawdonnen’y paski papa’y pa té dakò épi’y. 6 “Mé si sé apwé i fè sèman-an ében pwonmèt-la san katjilé, i mayé, 7 èk mawi’y pa di anyen jou-a i té vini konnèt sa, fi sala dwé tjenn pwonmèt li ében sa i sèmanté pou fè èben pa fè-a. 8 Mé si mawi’y pa dakò épi’y lè’y tann sa, i sa éfasi sèman-an ében pwonmèt-la madanm-li té fè-a. Jéhova kay pawdonnen madanm-lan. 9 “Mé si an vèv ében yon madanm ki dévosé fè an sèman, i dwé fè tout sa i té sèmanté pou fè èben pa fè-a. 10 “Mé si an madanm fè an pwonmèt, ében i sèmanté pou fè èben pa fè an bagay padan i an kay mawi’y, 11 èk mawi’y tann li, mé i pa di anyen, madanm sala dwé tjenn pwonmèt li ében sa i sèmanté pou fè èben pa fè-a. 12 Mé si mawi’y éfasi népòt pwonmèt ében népòt sèman i té fè asou jou-a i té tann li-a, madanm-lan pa kay ni pou tjenn pwonmèt li. Jéhova kay pawdonnen madanm-lan paski mawi’y éfasi yo. 13 Lè’y vini pou népòt pwonmèt ében népòt sèman pou pa fè èben pa fè yon bagay, mawi’y dwé désidé si i kay établi’y ében si i kay éfasi’y. 14 Mé si jou apwé jou, mawi’y pa janmen di anyen, i menm ka établi tout sa madanm li pwonmèt pou fè èben pou pa fè. I ka établi tout pwonmèt madanm li, paski i pa té di anyen asou jou-a i tann madanm li fè yo-a. 15 Mé si mawi’y éfasi yo pli ta, tjèk tan apwé jou-a i tann yo-a, mawi-a kay péyé pou péché madanm li. 16 “Sa sé wèg-la Jéhova té bay Moziz lè’y vini pou yon mawi èk madanm li, èk lè’y vini pou yon papa èk jenn fi’y ki ka wèsté an kay li.