Limowo
34 Èk Jéhova kontiné palé épi Moziz èk i di’y: 2 “Ba jan Izwayèl sé enstwiksyon sala: ‘Lè zòt antwé péyi Kénann, sa sé péyi-a zòt kay éwityé-a, péyi Kénann silon bòn li. 3 Bòn zòt asou fasad soud-la kay asou bòdaj Idonm an savan sèk Zin. ‘Épi bòn zòt asou fasad soud-la, an diwèksyon sòlèy lévan-an, kay koumansé bò Lanmè Sèl-la. 4 Bòn zòt kay chanjé diwèksyon èvèk pasé soud Akrabim èk kontiné pou wivé Zin. Bout li kay wivé soud Kadèchbannya. Osi bòn-lan kay wivé Hazarada èk i kay kontiné pou wivé jis Azmonn. 5 Bòn zòt kay chanjé diwèksyon bò Azmonn pou wivé wavin Éjip, èk bout li kay wivé Gwo Lanmè-a. 6 “‘Bòn zòt asou fasad sòlèy kouché-a kay wivé bò Gwo Lanmè-a. Sé sa ki kay bòn zòt asou fasad sòlèy kouché-a. 7 “‘Mi bòn zòt asou fasad nò-a: Zòt kay matjé bòn zòt hòd Gwo Lanmè-a pou wivé Mòn Hò. 8 Èvèk hòd Mòn Hò zòt kay matjé bòn zòt pou wivé Libòhémaf, èk bout li kay wivé Zédad. 9 Èvèk bòn-lan kay kontiné pou wivé Zifròn èk bout li kay wivé Hazarénann. Sé sa ki kay bòn zòt asou fasad nò-a. 10 “‘Apwé sa, zòt sipozé matjé bòn zòt asou fasad sòlèy lévan-an hòd Hazarénann pou wivé Shéfam. 11 Bòn-lan kay sòti Shéfam pou wivé Ribla, asou koté solèy lévan Éyin. Èk bòn-lan kay désann èk pasé asou koté Lanmè Chinèrèf, asou fasad sòlèy lévan-an. 12 Bòn-lan kay kontiné pou wivé Jouden èk bout li kay wivé Lanmè Sèl-la. Sé sa ki kay péyi zòt épi sé bòn-lan oliwon’y.’” 13 Alò Moziz bay jan Izwayèl enstwiksyon sala, i di yo: “Sa sé tè-a zòt kay éwityé-a èk sépawé anpami zòt pa lo. Menm kon Jéhova té konmandé pou sépawé anpami nèf lafanmi èk apanmi yon dimi an lafanmi Mannasa. 14 Lafanmi sé Roubennayt-la silon fanmi yo, lafanmi sé Gadayt-la silon fanmi yo, èk yon dimi an lafanmi Mannasa ja pwan mòso tè yo. 15 Sé dé èk yon dimi lafanmi-a ja pwan pa yo an wéjyon sòlèy lévan Jouden, bò Jèriko, an diwèksyon sòlèy lévan-an.”